David ha Saúl

David ojuka rire Goliátpe, rréi Saúl omoĩ chupe omoakã hag̃ua isoldadokuérape. David ogana heta gérra ha upévare ifamosoiterei. Haʼe ou jave gerrahágui, umi kuñanguéra ojeroky joa osẽ ohug̃uaitĩ chupe ha opurahéi: “Saúl ojuka mas de 1.000-pe, péro David ojuka mas de 10.000-pe voi”. Upévare Saúl oenvidia Davídpe ha ojukase voi chupe.

David ombopu porãiterei vaʼekue pe árpa. Peteĩ día ombopu jave Saúlpe g̃uarã, pe rréi ohaʼã chupe peteĩ lánsape ojuka hag̃ua chupe, péro haʼetépe David ojehekýi chugui ha pe lánsa ojekutu pe parére. Upe rire heta vése Saúl otantea jey ojuka hag̃ua Davídpe, upévare David oho okañy chugui pe desiértore.

Upémarõ Saúl oho oheka hag̃ua Davídpe ha oraha hendive 3.000 soldádo. Upéi Saúl oike peteĩ kuévape, haʼe ndoikuaái kuri David ha isoldadokuéra okañyha hína upe kuéva ruguaitépe. Upépe umi soldádo heʼi Davídpe: “Eaprovecha katu ko oportunida rejuka hag̃ua Saúlpe”. Upémarõ David opuʼã ha kirirĩhaitépe oñemboja ha oikytĩ Saúlgui ijao ruguái ha haʼe ni noñandúi la ojapóva hese. Péro upéi David oñeñandu vaieterei ndorrespetái haguére pe rréi Jehová oiporavo vaʼekuépe, ha ojoko isoldadokuérape ani hag̃ua oataka Saúlpe. Saúl osẽ rire pe kuévagui, David osapukái ha heʼi Saúlpe oreko hague oportunida ojukávo chupe péro ndojapói hague hese mbaʼeve. ¿Ndépa ere Saúl otrata porãtaha koʼág̃a Davídpe?

Saúl osegi opersegi Davídpe. Upéi peteĩ pyhare, David ha isovríno Abisái oike Saúl kampaméntope ha avavete ndopillái chupekuéra. Abner, haʼéva Saúl guardaespálda jepe oke hína kuri. Upépe Abisái heʼi Davídpe: “Jaaprovecha vaʼerã ko oportunida, ehejána che tajuka chupe”. Péro David heʼi chupe: “Jahejánte Jehová pópe, haʼe oikuaáta ojapóva chugui, jaguerahánte chugui ilánsa ha pe hiʼy ryru ha jaha koʼágui”.

Upéi David ojupi peteĩ sérro ruʼãme namombyrýi Saúl oĩhágui. Upe guive haʼe ohecha porãiterei Saúl kampaménto. Upéi osapukái Abnérpe ha heʼi: “Abner, ¿mbaʼéreiko ndereprotehéi raʼe pe rréipe? ¿Moõ piko oĩ hína pe rréi lánsa ha pe hiʼy ryru?”. Upépe Saúl orrekonose David ñeʼẽ ha heʼi chupe: “Nde ereko kuri oportunida chejuka hag̃ua, péro nderejapói upéva. Koʼág̃a ahechakuaa nde regovernataha upéi Israélpe”. Upe rire Saúl oho jey hógape. Péro Saúl hentekuéra apytépe ndahaʼéi vaʼekue enterovéva la ndochaʼéiva David rehe, oĩ vaʼekue ijapytepekuéra la ohayhúva chupe.