Rréi David opeka

Rréi Saúl omano rire, David ojupi ogoverna hag̃ua hekovia, ha upérõ haʼe oreko kuri 30 áño. Heta áño rire, peteĩ pyhare David oĩ jave hína pe palásio terrásape, ohecha peteĩ kuña iporãitereíva. David oporandu mbaʼéichapa héra upe kuña ha ojeʼe chupe heraha Bat-Seba ha iména haʼeha peteĩ soldádo hérava Urías. Upémarõ David ogueruka Bat-Sébape ipalásiope ha oreko hendive rrelasión sexuál ha Bat-Seba opyta hyeguasu. David omokañysemoʼã pe ojapo vaʼekue, upévare heʼi pe omoakãvape ijehérsito omoĩ hag̃ua puntaitépe Uríaspe oñorairõ hag̃ua, ha oheja hag̃ua chupe hikuái haʼeño umi iñenemigokuéra oataka vove chupekuéra. Péicha Urías omano upe gerrahápe, ha David omenda Bat-Seba rehe.

Péro Jehová ohechapaite umi mbaʼe vai ojapóva David. ¿Mbaʼépa ojapóta Jehová? Haʼe omondo proféta Natánpe oñeʼẽ hag̃ua David ndive. Natán heʼi Davídpe: “Peteĩ siudápe oĩ vaʼekue peteĩ karai ipláta hetáva ha ótro imboriahúva. Pe ipláta hetáva oreko vaʼekue hetaiterei ovecha, péro pe imboriahúva katu peteĩmínte oreko ha ohayhueterei la ijovecha. Péro pe kuimbaʼe irríkova oipeʼa chugui la ijovecha peteĩmi”. David ipochyeterei pe kuimbaʼe ipláta hetávare ha heʼi: “Pe kuimbaʼe ojapo vaʼekue upéva omano vaʼerã”. Ha Natán heʼi chupe: “¡Nde hína upe kuimbaʼe!”. David ombyasyeterei la ojapo vaʼekue ha heʼi Natánpe: “Apeka Jehová kóntrape”. David ha ifamiliakuéra heta osufri vaʼekue umi mbaʼe vaiete haʼe ojapo vaʼekuére. Jehová okastiga Davídpe, péro nohundíri chupe pórke David iñumílde ha orrekonose ojavy hague.

David ojapose kuri peteĩ témplo Jehovápe g̃uarã. Péro Jehová oiporavo David raʼy héravape Salomón omopuʼã hag̃ua pe témplo. Upémarõ David oñepyrũ oprepara Salomónpe heta mbaʼe oipuru hag̃ua omopuʼã vove pe témplo. David heʼi: “Pe óga oñemopuʼãva Jehovápe g̃uarã ojajaipa vaʼerã porãgui. Ha che raʼy Salomón ningo imitã gueteri, upévare apreparapáta chupe umi mbaʼe oikotevẽtava upearã”. David orregala vaʼekue hetaiterei pláta oñemopuʼã hag̃ua pe témplo. Avei oheka umi hénte ikatupyrýva ombaʼapo hag̃ua ha ombyaty heta óro, pláta ha ogueruka madéra de sédro Tiro ha Sidóngui. Upéi David omano mbotaitépema, omeʼẽ Salomónpe pe pláno ojapo hag̃ua pe témplo ha heʼi chupe: “Jehová heʼi chéve ajapo hag̃ua ko pláno ha antrega hag̃ua ndéve. Haʼe nepytyvõta. Ani rekyhyje. Nembarete ha embaʼapo jejopy vaʼerã”.