Jehová omombarete Elíaspe

Jezabel oikuaa la oiko vaʼekue Baal profetakuérare ha ipochyeterei. Upévare heʼika Elíaspe: “Koʼẽrõ nde remanóta avei Baal profetakuéraicha”. Elías okyhyjeterei ha oho okañy pe desiértore. Upéi oñemboʼe ha heʼi Jehovápe: “¡Jehová, naaguantavéima! Hiʼãntema chéve amano”. Elías ikaneʼõiterei kuri upérõ ha opyta oke peteĩ yvyramataʼi guýpe.

Upéi peteĩ ánhel ou oñeʼẽ vevyimi Elíaspe ha heʼi chupe: “Epuʼãna ekaru”. Elías ohecha peteĩ pan apuʼa oĩva ita aku ári ha ijykére una hárra y. Elías opuʼã hoʼu pe pan ha pe y ha oñeno jey oke. Upéi pe ánhel omombáy jey chupe ha heʼi: “Epuʼãna ekaru, pórke ipuku gueteri la nde viáhe ha ndeforsaitereíta”. Upémarõ haʼe opuʼã ha okaru jey. Upéi Elías oguata 40 díare, ára ha pyhare, og̃uahẽ meve Sérro Horébpe. Og̃uahẽvo upépe, haʼe oike peteĩ kuévape oke hag̃ua. Upépe Jehová oñeʼẽ chupe ha heʼi: “Elías, ¿mbaʼéiko rejapo hína koʼápe?”. Ha Elías heʼi chupe: “Umi israelita ningo nokumplíri la opromete vaʼekue ndéve, ohundipa hikuái umi nde altarkuéra ha ojukapa nde profetakuérape, ha koʼág̃a chevehaitéma chejukase hikuái”.

Upéi Jehová heʼi Elíaspe: “Esẽ okápe ha eñemboʼy ko sérrope che renondépe”. Upévo oipeju hatãiterei pe yvytu, oiko peteĩ terremóto ha ou peteĩ tatarendy. Upéi Elías ohendu peteĩ oñeʼẽva pyʼaguapýpe ha mbeguekatu asy, upémarõ omoʼã hova pe ijaópe ha oñemboʼy pe kuéva entrádape. Upépe Jehová oporandu chupe mbaʼérepa la okañy oikóvo, ha Elías heʼi chupe: “Ndaiporivéima ningo ótro proféta ndeservíva, che añomíntema apyta”. Péro Jehová heʼi chupe: “Nereiméi ningo neaño, Israélpe oĩ gueteri 7.000 persóna cheadoráva chéve. Koʼág̃a eho ha ere Eliséope aiporavo hague chupe che profetarã nde rekovia”. Ensegída Elías oho ha ojapo la Jehová heʼíva chupe. ¿Ndépa ere Jehová nepytyvõtaha avei neñeʼẽrendúramo chupe? Si, haʼe seguroite voi nepytyvõta. Jahechavemína mbaʼépa oiko vaʼekue oúrõ guare pe séka pukuete.