Ojekastiga peteĩ rréina iñañaitereívape

Jezreélpe, ipalásio ventána guive rréi Acab ohecha Nabot parralty ha oipotaiterei. Upévare heʼika Nabótpe ovende hag̃ua chupe. Péro Nabot novendeséi pórke Jehová Léi heʼi porã novendéi vaʼerãha hikuái umi yvy orresivi vaʼekue kómo erénsia itúagui. Nabot iñeʼẽrendu vaʼekue Ñandejárape. ¿Péro ndépa ere Acab ontendetaha upéva? No. Acab ipochyeterei ha oñemboty ikotýpe ha nosẽvéi voi upégui ni okaru hag̃ua.

Acab rembireko héra vaʼekue Jezabel ha ko rréina iñañaiterei. Haʼe heʼi iménape: “¿Ndahaʼéi piko nde la rréi Israélpe? Nde reguereko vaʼerã la reipotáva. Che akonsegíta ndéve pe parralty nembaʼerã”. Upéi Jezabel oskrivi heta kárta umi kuimbaʼe omoakãvape pe puévlo ha heʼika chupekuéra oakusa hag̃ua Nabótpe omaldesi hague Ñandejárape, ha upéi ojapi hag̃ua chupe hikuái itápe omano meve. Umi kuimbaʼe omoakãva pe puévlo ojapo Jezabel heʼi hagueichaite chupekuéra. Upéi Jezabel heʼi Acábpe: “Nabot omanóma, tereho katu ejagarra iparralty nembaʼerã”.

Jezabel ojuka vaʼekue heta hénte ohayhúvape Jehovápe, ndahaʼéi Nabótpe añónte. Jezabel oadora vaʼekue avei umi dios fálso raʼanga ha ojapo hetave mbaʼe ivaietereíva. Jehová ohechapaite la Jezabel ojapóva. ¿Oheja reítapa chupe umíva?

Acab omano rire, itaʼýra Jehoram ogoverna hendaguépe. Upéi Jehová omondo peteĩ kuimbaʼe héravape Jehú okastiga hag̃ua Jezabel ha ifamiliakuérape.

Jehú ojupi ikárrope ha oho Jezreélpe, Jezabel oikohápe. Upémarõ Jehoram ojupi ikárrope ha oho ohug̃uaitĩ Jehúpe. Ha ojotopávo hikuái, Jehoram heʼi Jehúpe: “¿Reju piko hína pyʼaguapýpe?”. Ha Jehú heʼi chupe: “¡Mbaʼe pyʼaguapy piko oĩta nde sy Jezabel ojapo aja entéro hetaite mbaʼe vai!”. Upémarõ Jehoram ojeremoʼã oho jey hag̃ua Jezreélpe ha upepete Jehú ojapi chupe peteĩ fléchape ha ojukaite voi chupe.

Upéi Jehú oho Jezabel palásiope, ha Jezabel oikuaávo Jehú ouha hína, oho oñemakilla, oñepeina ha oguapy ohaʼarõ chupe pe ventánape, opytáva pe koty yvateguápe. Jehú og̃uahẽvo, Jezabel osaluda vaíma voi chupe. Jehú katu osapukái ha heʼi umi sirviénte oĩvape Jezabel ykére: “¡Peity chupe yvy gotyo!”. Upémarõ haʼekuéra oity chupe ventánarupi pe yvatégui ha omanoite voi.

Acab 70 itaʼýra vaʼekue, ha Jehú ojukapaite avei umívape ha entéro umi oadorávape Baálpe. Péicha opa umi oadoráva Baálpe. ¿Rehechakuaápa Jehová ohechapaiteha la jajapóva ha itiempoitépe okastigaha umi ojapóvape ivaíva?