Josías omombaʼeterei vaʼekue Jehová Léi

Josías oreko vaʼekue 8 áño oikórõ guare chugui rréi de Judá. Upe tiémpope umi hénte ojapo vaʼekue máhia ha oadora umi taʼanga. Josías orekórõ guare 16 áño, oikuaase vaʼekue mbaʼéichapa oadora vaʼerã Jehovápe. Upéi orekórõ guare 20 áño, oñepyrũ ohundi umi dios fálso raʼanga ha umi altár oĩva upe paíspe. Ha orekórõ guare 26 áño, opreparapaite umi mbaʼe oñekotevẽva ojearregla hag̃ua Jehová témplo.

Pe súmo saserdóte hérava Hilquías otopa pe témplope peteĩ rróllo oĩháme Jehová Léi. Ikatu oime Moisés raʼe la oskrivi vaʼekue upe rróllo. Pe rréi sekretário hérava Safán oraha Josíaspe pe Jehová Léi ojetopa vaʼekue ha olee chupe en vos álta. Josías ohendúvo umi mbaʼe heʼíva pe lívro de la léi, ohechakuaa pe puévlo hetaiterei tiémporema ndojapoiha oikóvo raʼe Jehová oipotáva. Upévare rréi Josías heʼi Hilquíaspe: “Jehová ipochyeterei hína ñanendive. Eñeʼẽmína hendive ha eporandu chupe mbaʼépa ikatu jajapo”. Ha Jehová heʼi pe profetísa Huldápe: “Judá ningo oñemomombyry chehegui. Che akastigáta chupekuéra, péro ndajapomoʼãi upéva Josías ogoverna aja pórke haʼe iñumílde”.

Rréi Josías ohendu rire la Huldá heʼíva oho pe témplope ha ombyatypaite upépe entéro umi oikóvape Judápe ha olee chupekuéra Jehová Léi. Upéi Josías ha pe puévlo kompletoite opromete iñeʼẽrendutaha Jehovápe ipyʼaite guive.

Upérõ ojapóma heta áño umi oĩva Judápe ndofestehavéi hague pe Páskua. Péro Josías otopa Jehová Léipe heʼiha káda áño ojejapo vaʼerãha pe Páskua, ha upévare heʼi pe puévlope: “Jajapo vaʼerã pe Páskua Jehovápe g̃uarã”. Upéi Josías omanda ojeprepara hag̃ua heta sakrifísio ha oĩ hag̃ua peteĩ grúpo opurahéiva pe témplope. Ofesteha hikuái pe Páskua ha upéi 7 día aja ojapo avei hikuái pe Fiésta del Pan Ilevaduraʼỹva. Peichagua Páskua ndojejapovéiva Samuel omano guive. Jahechaháicha, Josías omombaʼeterei vaʼekue Ñandejára Léi, ¿ndévepa igústo avei reaprende Jehovágui?