Jerusalén murálla

Jahamína unos kuánto áño atrás ha ñañeʼẽ Nehemías rehe. Nehemías haʼe vaʼekue peteĩ israelita oikóva Pérsiape pe siuda de Súsape, ha ombaʼapo vaʼekue rréi Artajérjespe g̃uarã. Peteĩ día, Nehemías ermáno og̃uahẽ Judágui ha heʼi chupe: “Umi israelita oho jey vaʼekue Jerusalénpe ningo ojapeligra hína amoite. Umi murálla ha pe siuda rokẽ ohundi vaʼekue umi babilonio ndojearreglái gueteri”. Nehemías ombyasyeterei upéva ha oipytyvõse chupekuéra, upémarõ oñemboʼe Ñandejárape ikatu hag̃uáicha pe rréi omeʼẽ chupe permíso oho hag̃ua Jerusalénpe.

Upéi pe rréi Artajerjes ohechakuaa Nehemías rehe ndovyʼaiha, upévare heʼi chupe: “¿Mbaʼe mbaʼéiko ojehu ndéve ajeve la nderovasy? Che ningo núnka ndorohecháiva péicha”. Ha Nehemías heʼi pe rréipe: “¿Mbaʼéicha piko ndacherovasymoʼãi ko che válle Jerusalén hoʼapa ha oñehundipámava?”. Pe rréi heʼi Nehemíaspe: “¿Mbaʼéiko ikatu ajapo roipytyvõ hag̃ua?”. Upepete Nehemías oñemboʼe Jehovápe ipyʼapýpe ha upéi heʼi pe rréipe: “Por favór, emeʼẽna chéve permíso aha hag̃ua Jerusalénpe aarregla hag̃ua umi murálla”. Ha pe rréi omeʼẽ chupe la permíso ha avei omeʼẽmbaite chupe umi mbaʼe oikotevẽtava pe viáhe pukúpe g̃uarã. Avei onombra chupe governadór de Judá ha omeʼẽ chupe heta madéra ojapo hag̃ua umi okẽ pe siudápe g̃uarã.

Nehemías og̃uahẽre Jerusalénpe ohóma ohecha mbaʼe situasiónpepa oĩ umi murálla. Upéi ombyaty umi saserdóte ha governadorkuérape ha heʼi chupekuéra: “Ivaipaite la situasión koʼápe, tekotevẽ ñambaʼapo ikatu hag̃uáicha jaarreglapaite jey”. Enterovénte heʼi oĩha de akuérdo ha oñepyrũ omyatyrõ hikuái umi murálla.

Umi hénte ndochaʼéiva umi israelítare oikuaárõ guare upéva, oñepyrũ oñembohory hesekuéra ha heʼi: “Peteĩ aguara jepe oitýta umi murálla pejapóva”. Péro umi israelita nopenái hesekuéra ha osegi ombaʼapo. Káda día omopuʼã yvateve ha orreforsave ohóvo hikuái umi murálla.

Upéi, umi iñenemigokuéra oikóva diferénte lugárpe oñemoĩmba de akuérdo oho hag̃ua oataka Jerusalén ohaʼarõʼỹve jave hikuái. Umi judío okyhyjeterei oikuaárõ guare upéva, péro Nehemías heʼi chupekuéra: “Ani pekyhyje. Jehová oĩ ñanendive”. Ha upéi Nehemías omoĩ umi guárdia oprotehe hag̃ua umi ombaʼapóvape. Upéicha rupi umi iñenemigokuéra ndaikatúi kuri oataka chupekuéra.

Otermina hikuái pe murálla 52 díape. Nehemías ombyatypaite entéro umi levítape Jerusalénpe ojapo hag̃ua hikuái peteĩ fiésta oñetermina haguére umi traváho. Upéi odividi chupekuéra mokõi grúpope. Peteĩ grúpondi oho Esdras ha pe ótro grúpondi katu oho Nehemías. Oho hikuái pe Ykua Rokẽ oĩháme ha ojupi hikuái pe eskalérarupi, peteĩ grúpo oho a la derécha gotyo pe murálla ári, ha ótro grúpo katu oho pe ótro ládorupi, ha orrodea hikuái pe siuda. Umi mokõi grúpo ombopu trompéta, platíllo ha árpa, ha opurahéi hikuái Jehovápe og̃uahẽ meve pe témplope. Enterovete, tahaʼe mitã, kakuaa, kuimbaʼe ha kuña, omeʼẽ ofrénda Jehovápe ha ofesteha hikuái oñondivepa pe fiésta. Ovyʼaiterei hikuái ha mombyry guive voi oñehendu chupekuéra.