Umi ánhel omombeʼu Jesús onase hague

César Augusto ogovernárõ guare pe império rrománo, ojapoka peteĩ sénso ha heʼi entéro judío oho vaʼerãha oñeanota pe lugár onase haguépe. Upévare José ha María oviaha Belénpe pórke José upépe guare. Upérõ María hyeguasuetéma ha og̃uahẽmbaitéma pe fécha imemby hag̃ua.

Og̃uahẽrõ guare hikuái Belénpe ndaiporivéima lugár opyta hag̃ua, upémarõ opyta hikuái peteĩ estávlope. Upépe onase Jesús. María olia chupe umi téla isuáve asývape ha omoñeno chupe peteĩ mbaʼyru oñemoĩhápe umi animálpe hembiʼurã.

Namombyrýi Beléngui, upe pyharépe unos kuánto pastór okuida hína kuri ijovechakuérare pe ñúre. Upeichaháguinte ojaparese chupekuéra peteĩ ánhel ha omimbipa ijererekuéra. Umi pastór tuichaiterei oñemondýi, upévare pe ánhel heʼi chupekuéra: “Ani pekyhyje, che aju amombeʼu hag̃ua peẽme peteĩ notísia iporãitereíva. Koestedía pe Mesías oime onaséma Belénpe”. Upépe ojapareséma hetave ánhel ha heʼi: “Toñembotuicha Ñandejárape yvágape, ha ko yvy ape ári taipyʼaguapy umi hénte”. Upéi umi ánhel oho jey yvágape. ¿Mbaʼépa ojapo upe rire umi pastór?

Upévo umi pastór heʼi ojupe: “Koʼag̃aite voi jaha Belénpe”. Ensegída umi pastór osẽ oho Belénpe, upépe otopa hikuái José ha Maríape peteĩ estávlope ha ohecha hikuái pe mitã onase ramóvape.

Entéronte opondera joa oikuaávo pe ánhel heʼi vaʼekue umi pastórpe. María siémpre ojepyʼamongeta la pe ánhel heʼi vaʼekuére ha ndahesaráiri umívagui. Upéi umi pastór oho jey pe ñúme okuida hag̃ua ijovechakuérare, haʼekuéra oagradeseterei Jehovápe entéro umi mbaʼe ohecha ha ohendu vaʼekuére.