Pablo ha Timoteo

Timoteo haʼe vaʼekue peteĩ mitãrusu oĩva pe kongregasión de Lístrape. Timoteo túa haʼe vaʼekue griego ha isy katu judía. Isy héra vaʼekue Eunice ha ijavuéla Loida, haʼekuéra omboʼe vaʼekue Timotéope Jehovágui imitã guive.

Pablo ovisitárõ guare Listra, pe segundo viáhe ojapo vaʼekuépe opredika hag̃ua, ohechakuaa Timoteo ipyʼaite guive ohayhuha ermanokuérape ha oipytyvõseha chupekuéra. Upévare, Pablo oinvita Timotéope omoirũ hag̃ua chupe umi iviáhepe. Pablo ombokatupyry vaʼekue Timotéope ikatu hag̃uáicha oporomboʼe ha opredika umi notísia porã oñeʼẽva Ñandejárare.

Pe espíritu sánto ogia vaʼekue Pablo ha Timotéope oho ohohápe. Peteĩ pyhare, Pablo ohecha peteĩ visión, upe visiónpe peteĩ kuimbaʼe ojerure chupe oho hag̃ua Macedóniape oipytyvõ hag̃ua chupekuéra. Upémarõ Pablo, Timoteo, Silas ha Lucas oho upépe opredika ha oforma hag̃ua kongregasión.

Macedóniape oĩ vaʼekue peteĩ siuda hérava Tesalónica, ha upépe heta kuimbaʼe ha kuña oñepyrũ vaʼekue oservi Ñandejárape. Péro oĩ vaʼekue umi judío oenvidiáva Pablo ha iñirũnguérape, upévare oñomoirũ heta hénte añándi ha tyryryhápe oraha hikuái umi ermánope umi governadór renondépe. Upépe umi judío osapukái ha heʼi: “Koʼã kuimbaʼe oñemoĩ pe goviérno rrománore”. Pablo ha Timoteo oikuaa ikatuha ojejuka chupekuéra, upévare upe pyharépe oho hikuái Beréape.

Umi hénte oikóva Beréape ohendu porãiterei vaʼekue umi notísia porã oñeʼẽva Ñandejárare, upéicha rupi heta judío ha griego oñepyrũ oservi Ñandejárape. Péro unos kuánto judío ou Tesalónicagui omboliga hag̃ua umi héntepe opuʼã hag̃ua hesekuéra. Upémarõ Pablo osẽ oho Aténaspe. Péro Timoteo ha Silas opytánte Beréape oipytyvõ hag̃ua umi ermáno upepeguápe ojerovia mbarete hag̃ua. Tiémpo rire, Pablo omondo jey Timotéope Tesalónicape oipytyvõ hag̃ua umi ermánope oaguanta hag̃ua, pórke upépe ojepersegi mbarete hína kuri ermanokuérape. Upéi Pablo omondo Timotéope hetave kongregasiónpe ovisita ha omokyreʼỹ hag̃ua ermanokuérape.

Pablo heʼi vaʼekue Timotéope: “Enterove oserviséva Ñandejárape, ojepersegíta”. Timotéope heta ojepersegi vaʼekue ha ojegueraha avei chupe kárselpe ojerovia haguére Ñandejárare. Péro haʼe ovyʼa vaʼekue pórke péicha oreko oportunida ohechauka hag̃ua iñeʼẽrenduha Jehovápe.

Pablo heʼi vaʼekue umi ermáno Filiposguápe: “Amondóta pene rendápe Timotéope, haʼe penemboʼéta mbaʼéichapa Ñandejára oipota peiko ha mbaʼéichapa pepredika vaʼerã”. Pablo ojeroviaiterei vaʼekue Timotéore. Haʼekuéra heta áñore oservi vaʼekue oñondive Ñandejárape ha oñoamigoite vaʼekue hikuái.