Aníkena jaiko ko múndope ojeikoháicha

1. ¿Mbaʼépa oipyʼapy raʼe Jesúspe pe pyhare omano mboyve?

PE PYHARE omano mboyve, Jesús ojepyʼapy kuri idisipulokuérare. ¿Mbaʼérepa? Pórke haʼe oikuaa porã omano potaitemaha. Upévare upe pyharépe heʼi chupekuéra: “Peẽ ndapeikói umi hénte ko mundopegua oikoháicha” (Juan 15:19). Upéi haʼe oñemboʼérõ guare idisipulokuérare heʼi Itúape: “Che ndaikói umi hénte ko mundopegua oikoháicha, upéicha avei haʼekuéra ndoikói umi hénte ko mundopegua oikoháicha” (Juan 17:15, 16). ¿Mbaʼépa heʼise vaʼekue Jesús?

2. ¿Mbaʼépa hína pe “múndo” Jesús oñeʼẽ hague?

² Jesús heʼírõ guare “múndo” oñeʼẽ umi ndoservírivare Ñandejárape ha oĩva Satanás poguýpe (Juan 14:30; Efesios 2:2; Santiago 4:4; 1 Juan 5:19). ¿Mbaʼépa ikatu jajapo ani hag̃ua jaiko ko múndope ojeikoháicha? Ko kapítulope jahecháta mbaʼéichapa ikatu jajapo upéva koʼã mbaʼépe. Primero: ñandefiél Ñandejára Rréinope ha ani japartisipa polítikape. Segundo: ani ñapensa ko múndope oñepensaháicha. Tercero: ñañemonde porã vaʼerã. Cuarto: jahecha hendápe porã pe pláta. Ha quinto: ñamonde pe armadúra kompletoite oúva Ñandejáragui (ehecha nóta 16 entende porãve hag̃ua).

ÑANDEFIÉLKENA ÑANDEJÁRA RRÉINOPE

3. ¿Mbaʼépa Jesús opensa vaʼekue pe polítikare?

³ Jesús oĩrõ guare ko yvy ape ári, ohecha vaʼekue mbaʼéichapa umi hénte heta iprovléma ha ijetuʼuha hendivekuéra. Upévare haʼe ojepyʼapy ha oipytyvõseterei chupekuéra. Péro ndoikéi polítikape ojapo hag̃ua upéva. Jesús oikuaa porã vaʼekue umi hénte oikotevẽha Ñandejára Rréinore. Haʼe voi ogovernáta upe Rréino, upévare opredikárõ guare oñeʼẽ meme vaʼekue ko témare (Daniel 7:13, 14; Lucas 4:43; 17:20, 21). Jesús núnka ndopartisipái vaʼekue polítikape ni ndoapojái peteĩ grúpope. Upévare oĩrõ guare governadór Poncio Pilato renondépe, haʼe heʼi: “Che Rréino ndahaʼéi ko mundopegua” (Juan 18:36). Ha idisipulokuéra osegi vaʼekue iñehémplo. Peteĩ lívro omombeʼúva istória heʼi umi kristiáno ypykue “oñenega hague oñekuaveʼẽrõ guare chupekuéra ombaʼapo hag̃ua pe goviérnope” (On the Road to Civilization). Koʼág̃arupi umi kristiáno añetegua ojapo avei upéicha. Ifiél Ñandejára Rréinope ha ndopartisipái polítikape (Mateo 24:14).

4. ¿Mbaʼéichapa umi kristiáno añetegua ohechauka oapojaha Ñandejára Rréino?

⁴ Pablo heʼi vaʼekue umi kristiáno unhídope: “Ñande hína Ñandejára rrepresentánte [térã embahadór], koʼág̃a jajapo pe traváho Cristo ojapo vaʼekue” (2 Corintios 5:20, nóta). ¿Mbaʼérepa Pablo heʼi chupekuéra upéva? Umi embahadór ombaʼapo ótro paíspe orrepresenta hag̃ua hetãme, upévare haʼekuéra noñentremetéi polítikape pe país ombaʼapohápe. Ha umi unhído upeichaite ojapo avei, haʼekuéra oreko pe esperánsa ogovernávo Jesús ndive yvágape, ha orrepresenta Ñandejára Rréinope oĩ aja ko yvy ape ári. Upévare noñentremetéi polítikape ha nombaʼapói umi goviérno oĩvape ko múndope (Filipenses 3:20). Upéva rangue, oipytyvõ umi héntepe oikuaa hag̃ua Ñandejára Rréinogui. Umi “ótro ovechakuéra” orekóva esperánsa opytávo ko yvy ape ári pára siémpre, oipytyvõ hína umi unhídope ha ndopartisipái avei polítikape (Juan 10:16; Mateo 25:31-40). Jahecha porã upéicharõ umi kristiáno añetegua ni mbaʼevéicharõ noñentremeteiha polítikape (elee Isaías 2:2-4).

5. ¿Mbaʼérepa umi kristiáno añetegua ndohói gerrahápe?

⁵ Umi kristiáno añetegua ohechakuaa haʼekuéra oñoermanoha ha haʼeha peteĩ famíliante, ha haʼéramo jepe diferénte paisgua oĩ hikuái peteĩ ñeʼẽme (1 Corintios 1:10). Jaháramo gerrahápe, ñañorairõta hína ñane ermanokuéra kóntrape, péro Jesús ñanemboʼe jahayhu hag̃ua chupekuéra (Juan 13:34, 35; 1 Juan 3:10-12). Hiʼarive haʼe heʼi idisipulokuérape ohayhu vaʼerãha iñenemigokuérape jepe (Mateo 5:44; 26:52).

6. ¿Mbaʼépa umi kristiáno opensa umi goviérnore?

⁶ Ñande kristianokuéra nañañentremetéiramo jepe polítikape, jahechauka jarrespetaha umi goviérnope ñakumplívo umi léi ha japagávo ñane impuésto. Péro ñameʼẽ Ñandejárape umi mbaʼe okorrespondéva chupe (Marcos 12:17; Romanos 13:1-7; 1 Corintios 6:19, 20). Umíva apytépe oĩ jahayhu, ñaneñeʼẽrendu ha ñamombaʼeguasu chupe. Ha ñaime voi ñamano hag̃uáicha ñaneñeʼẽrendu rupi Jehovápe (Lucas 4:8; 10:27; elee Hechos 5:29; Romanos 14:8).

ANI JAIKO NI ÑAPENSA KO MÚNDOPE OJEJAPOHÁICHA

7, 8. a) ¿Mbaʼépa heʼise jaiko ha ñapensa ko múndope ojejapoháicha? b) ¿Mbaʼéichapa opensa umi hénte oĩva ko múndope?

⁷ Ani hag̃ua jaiko Satanás múndope ojeikoháicha nañapermitíri vaʼerã ova ñanderehe haʼekuéra opensa lája. Koʼã mbaʼe ou Satanásgui ha haʼe oipuru upéva oreko hag̃ua ipoguýpe umi ndoservírivape Jehovápe. Upévare ñande ñañehaʼãmbaite ani hag̃ua ñapensa haʼekuéraicha. Heʼi haguéicha Pablo, “ñandéve ñandegia pe espíritu oúva Ñandejáragui, ha ndajahejái ñandegia umi hénte ko mundopegua opensa ha oiko lája” (1 Corintios 2:12; Efesios 2:2, 3; ehecha nóta 17 entende porãve hag̃ua).

⁸ ¿Mbaʼéichapa opensa umi hénte oikóva ko múndope? Haʼekuéra opensa ijehénte, oñemombaʼeguasu, irrevélde ha opensa voi jaiko porãveha nañaneñeʼẽrendúiramo Ñandejárape. Satanás oipota umi hénte ojapo la ojaposéva opensaʼỹre mbaʼépa ikatu oiko hese upéva káusare. Haʼe ogueroviaka iñimportanteveha jajapo umi mbaʼe ñandéve ñandegustávante (1 Juan 2:16; 1 Timoteo 6:9, 10). Satanás koʼýte oñehaʼãmbaite hína ombotavy umi kristiánope oipotágui opensa haʼéicha (Juan 8:44; Hechos 13:10; 1 Juan 3:8).

9. ¿Mbaʼéichapa ikatu jaju jaiko ha ñapensa ko múndope ojejapoháicha?

⁹ Umi hénte opensa lája yvytúicha iñasãi opárupi, upévare ñañehaʼã meme vaʼerã pono ova ñanderehe (elee Proverbios 4:23). Upéva ikatu voi oñepyrũ peteĩ mbaʼe ñapensávagui ndaivairiha. Por ehémplo, ñañepyrũ jajapo umi hénte ndoservíriva Jehovápe ojapóva (Proverbios 13:20; 1 Corintios 15:33). Ikatu avei ova ñanderehe umi hénte opensa lája jahecháramo pornografía, ñahendúramo umi apóstatape, térã ñanefanatikoitereíramo umi depórtere (ehecha nóta 18 entende porãve hag̃ua).

10. ¿Mbaʼépa jajapo vaʼerã ani hag̃ua jaiko ha ñapensa ko múndope ojejapoháicha?

¹⁰ Upévare, ¿mbaʼépa jajapo vaʼerã ani hag̃ua jaiko ha ñapensa ko múndope ojejapoháicha? Ñañemoag̃ui vaʼerã Jehováre ha jaheja haʼe tañandegia ikonsého rupive. Avei jajerure vaʼerã chupe ijespíritu ha ñandeguápo vaʼerã jaservívo chupe. Jehová ningo pe ipoderosovéva oĩva ko univérsope, upévare ikatu ñaime segúro haʼe ñanepytyvõtaha ani hag̃ua jaiko ha ñapensa ko múndope ojejapoháicha (1 Juan 4:4).

ÑAÑEMONDÉKENA JEHOVÁ OIPOTAHÁICHA

11. ¿Mbaʼéichapa oñemonde jepi umi hénte oĩva ko múndope?

¹¹ Ñañemonde lájare ikatu jahechauka ndajaikoiha ko múndope ojeikoháicha. Heta persóna oñemonde ohechauka hag̃uáicha orekoha heta pláta, oĩ katu oipotáva oñemaña hese, ótro katu oñemonde lájare ohechauka irreveldeha ha oĩ avei oñemondéva omoakãraku hag̃ua ótrope. Hetápe katu nointeresái la oñemonde lája, upévare oipuru ao ikyʼáva térã ipínta vaíva. Péro ñande kristiáno ndajajesegíri vaʼerã koʼã kostúmbre vaíre jaelehíta jave mbaʼépa ñamondéta.

12, 13. ¿Mbaʼéichapa umi konsého oĩva la Bíbliape ñanepytyvõ ñañemonde porã hag̃ua?

¹² Jehová siervokuéra siémpre oñehaʼã oipuru ao idesénteva, ipotĩva, ipínta porãva ha opyta porãva asegún mbaʼépa ojapóta. Ñañemonde jave jahechauka vaʼerã ‘japororrespeta ha ñaneakãguapyha’, upéicha jajapóramo ñamombaʼeguasu hína Ñandejárape (1 Timoteo 2:9, 10; Judas 21).

¹³ Ñañemonde lájare ikatu oñeñeʼẽ porã térã oñeñeʼẽ vai Jehová ha isiervokuérare. Ñande ningo jajapose opa mbaʼe ñambotuicha hag̃ua Ñandejárape (1 Corintios 10:31). Ñañemondéramo hekópe jahechauka jarrespetaha umi ótro oñandúva ha opensáva. Upévare jaelehíta jave ñande aorã jareko vaʼerã enkuénta ikatuha oipytyvõ térã operhudika ótrope (1 Corintios 4:9; 2 Corintios 6:3, 4; 7:1).

14. ¿Mbaʼépa jareko vaʼerã enkuénta ñañemondéta jave jaha hag̃ua rreunionhápe ha predikasiónpe?

¹⁴ ¿Mbaʼéichapa ñañemonde jaha hag̃ua rreunionhápe térã ñasẽta jave predikasiónpe? ¿Ñañemondépa oñemaña hag̃uáicha ñanderehe? ¿Ñamotĩpa ótrope ñañemonde lájare? ¿Ñapensápa avave ndaikatuiha heʼi ñandéve mbaʼéichapa ñañemonde vaʼerã? (Filipenses 4:5; 1 Pedro 5:6). Entéronte ningo jaipuruse umi ao ipínta porãva, péro iporãve hína jareko umi kualida Jehová omombaʼéva. Haʼe oguerohoryve umi mbaʼe ‘jarekóva ñane korasõme’, pórke umíva ‘ovaleterei chupe g̃uarã’ (1 Pedro 3:3, 4).

15. ¿Mbaʼérepa Jehová nomoĩri ñandéve peteĩ lístape mbaʼépa ñamonde vaʼerã?

¹⁵ Jehová nomoĩri ñandéve peteĩ lístape mbaʼéichapa ñañemonde vaʼerã. Péro omeʼẽ ñandéve heta konsého bíblico ñanepytyvõtava jadesidi porã hag̃ua (Hebreos 5:14). Tahaʼe jadesidíta jave peteĩ mbaʼe iñimportánteva térã naiñimportanteguasúiva, haʼe oipota jadesidi porã jahayhúgui chupe ha ñande rapichakuérape (elee Marcos 12:30, 31). Ko yvy tuichakuére Jehová siervokuéra oñemonde asegún ikultúra ha umi mbaʼe ogustáva chupekuéra. Koʼã mbaʼe iporãiterei ha ojapo porãiterei enterovére.

JAHECHÁKENA HENDAITÉPE PE PLÁTA

16. a) ¿Mbaʼérepa ikatu jaʼe umi hénte opensa lája pe plátare ndojoguerahaiha Jesús omboʼévare? b) ¿Mbaʼépa ñañeporandu vaʼerã?

¹⁶ Satanás oipota ñapensa pe pláta ha umi mbaʼe porã jarekóva ñanembovyʼataha. Péro Jehová siervokuéra oikuaa porã upéva japuha. Ñande jajeroviaiterei Jesús heʼi vaʼekuére: “Peguerekóramo jepe heta mbaʼe, pende rekove nodependéi umi mbaʼe peguerekóva rehe” (Lucas 12:15). Pe pláta añetehápe nañanembovyʼamoʼãi, nomeʼẽi ñandéve ñane amigorã, pyʼaguapy ni vída etérna. Añetehápe ningo ñaikotevẽʼimi la pláta ikatu hag̃uáicha jaiko porã, péro Jesús ñanemboʼe vaʼekue javyʼa añete hag̃ua jareko vaʼerãha Jehovápe ñane amígoramo ha ñamotenonde chupe (Mateo 5:3; 6:22). Upévare eñeporandumína: “¿Apensápa pe plátare ko múndope oñepensaháicha? ¿Añeʼẽ térã apensa memépa pe plátare añónte?” (Lucas 6:45; 21:34-36; 2 Juan 6).

17. ¿Mbaʼe mbaʼépa jahupytýta ñamboykéramo umi hénte opensa lája pe plátare?

¹⁷ Jaservíramo Jehovápe ñande pyʼaite guive ñamboykéta umi hénte opensa lája pe plátare, ha upéicha ñande rekove isentidovéta (Mateo 11:29, 30). Avei javyʼáta ha ñandepyʼaguapýta (Mateo 6:31, 32; Romanos 15:13). Ndajaikomoʼãi jajepyʼapyeterei umi ñane remikotevẽre (elee 1 Timoteo 6:9, 10). Javyʼaitereíta ikatu haguére ñameʼẽ (Hechos 20:35). Avei jarekovéta tiémpo ñaime hag̃ua umi persóna jahayhúvandi, ha ikatu voi jake porãve hína (Eclesiastés 5:12).

ÑAMOĨKENA “PE ARMADÚRA KOMPLETOITE OÚVA ÑANDEJÁRAGUI”

18. ¿Mbaʼépa ojapose ñanderehe Satanás?

¹⁸ Satanás oñehaʼã ombyai pe amista jaguerekóva Jehovándi, upévare jajapo vaʼerã ikatúva guive japrotehe hag̃ua upéva. La Biblia heʼi voi ñande ñañorairõha “umi demónio ehérsito yvagapeguándi” (Efesios 6:12). Satanás ha idemoniokuéra ndoipotái javyʼa ni jaiko pára siémpre (1 Pedro 5:8). Haʼekuéra ningo ipoderóso, upéicharõ jepe ikatu ñandepuʼaka hesekuéra Jehová ñanepytyvõ rupi.

19. ¿Mbaʼépa heʼi Efesios 6:14-18 pe armadúra omeʼẽvare ñandéve Ñandejára?

¹⁹ Yma umi soldádo oipurúmi vaʼerã peteĩ armadúra oho jave gerrahápe. Upéicha avei, ñande ñamoĩ vaʼerã ñandejehe pe armadúra omeʼẽva ñandéve Jehová (Efesios 6:13). Upe armadúra ningo ñandeprotehe. La Biblia heʼi ñandéve: “Upéicharõ, pejepytaso mbaretékena, ha peteĩ síntoicha pemoĩ pende kuʼáre pe añetegua, ha peteĩ armadúraicha pemoʼã pende pytiʼa hustísiape. Pemoĩ pende pýre pe sandália peime hag̃ua preparádo pepredika hag̃ua umi notísia porã oñeʼẽva pyʼaguapýre. Siémprekena peñakarama pende jeroviáre peteĩ eskúdo guasúicha, upévape peẽ ikatúta pembogue kompletoite umi flécha hendýva opoíva Satanás. Avei pemoĩ pene akãre peteĩ káskoicha pe salvasión, ha pejagarra pe espáda omeʼẽva pe espíritu sánto, upéva hína Ñandejára ñeʼẽ. Upe aja pesegi pejapo opaichagua ñemboʼe ha pejerure asy Ñandejárape pe espíritu podér rupive” (Efesios 6:14-18).

20. ¿Mbaʼépa jajapo vaʼerã ñandeprotehe hag̃ua pe armadúra oúva Ñandejáragui?

²⁰ Peteĩ soldádo hesaráiramo ha ndoguerahái peteĩ párte jepe pe armadúragui, ikontrariokuéra oñehaʼãta oataka chupe pe párte inandihápe. Upéicha avei, jaipotáramo pe armadúra oúva Ñandejáragui ñandeprotehe, aníkena ñanderesarái tekotevẽha ñamantene porã ha siémpre jareko kompletoite ñandejehe. Ñande ningo jasegíta ñañorairõ oñehundi peve Satanás múndo ha ojepeʼa peve chupe ha idemoniokuérape ko yvy ape árigui (Apocalipsis 12:17; 20:1-3). Upéicharõ, oiméramo nde reñehaʼã hína ndepuʼaka hag̃ua umi deséo vaíre térã peteĩ mbaʼe vai ndestirávare, ¡aníkena eñentrega! (1 Corintios 9:27).

21. ¿Mbaʼéichapa ikatu ñandepuʼaka Satanásre?

²¹ Satanás ningo ipoderosove ñandehegui, péro ikatu ñandepuʼaka hese Jehová ñanepytyvõ rupi. Ikatu hag̃uáicha jasegi ñandefiél Jehovápe tekotevẽ ñañemboʼe chupe, jastudia Iñeʼẽ ha jaha meme rreunionhápe (Hebreos 10:24, 25). Koʼã mbaʼe ñanepytyvõta ani hag̃ua jaheja Jehovápe, ha ñaime hag̃ua preparádo ñadefende hag̃ua umi mbaʼe jagueroviáva.

ÑAIMÉKENA PREPARÁDO ÑADEFENDE HAG̃UA UMI MBAʼE JAGUEROVIÁVA

22, 23. a) ¿Mbaʼépa ñanepytyvõta siémpre ñaime hag̃ua preparádo ñadefende hag̃ua umi mbaʼe jagueroviáva? b) ¿Mbaʼépa jahecháta pe ótro kapítulope?

²² Siémpre ñaime vaʼerã preparádo ñadefende hag̃ua umi mbaʼe jagueroviáva (Juan 15:19). Ñande testígo de Jehová ningo ñapensa diferentete umi héntegui heta mbaʼépe. Eñeporandumína: “¿Antende porãpa mbaʼérepa umi Testígo oguerovia térã ojapo peteĩ mbaʼe? ¿Aimépa segúro umi mbaʼe oĩva la Bíbliape, ha umi mbaʼe omboʼéva pe esklávo de konfiánsa ha iñarandúva haʼeha pe añetegua?” (Mateo 24:45; Juan 17:17). “¿Amombaʼépa che haʼe haguére peteĩ testígo de Jehová?” (Salmo 34:2; Mateo 10:32, 33). “¿Aimépa preparádo aexplika hag̃ua ótrope umi mbaʼe agueroviáva?” (elee 1 Pedro 3:15).

²³ Heta vése ndahasýi ñanediferénte hag̃ua ko múndogui, péro heta vése ndahaʼéi avei la ifasilpáva. Satanás oipuru heta ñuhã ñandereity hag̃ua. Peteĩva umíva apytépe haʼe umi vyʼarã. ¿Mbaʼépa ikatu jajapo jaiporavo porã hag̃ua umi vyʼarã? Ko porandu ñambohováita pe ótro kapítulope.