Peñemoĩ mbaretékena Satanásre

1, 2. ¿Mbaʼépa tekotevẽ jaikuaa Satanás ha idemoniokuéragui?

JEHOVÁ ningo opromete ñandéve jaiko porãitereitaha pe múndo pyahúpe. Hasypeve jaikóta Jehová ymaite guive oipota haguéicha. Péro koʼág̃a jaiko peteĩ múndo oĩvape Satanás ha idemoniokuéra poguýpe (2 Corintios 4:4). Ndaikatúiramo jepe jahecha chupekuéra, jaikuaa oexisti ha ipoderosoitereiha hikuái.

² Ko kapítulope jahecháta mbaʼéichapa ikatu jasegi Jehová ykére ikatu hag̃uáicha haʼe ñandeprotehe Satanásgui. Jehová opromete ñanepytyvõtaha, péro upearã tekotevẽ jaikuaa umi ñuhã Satanás ha idemoniokuéra oipurúva ñandeataka ha ñanembotavy hag̃ua.

“HAʼETE PETEĨ LEÓN OKORORÕVA”

3. ¿Mbaʼépa ojapose ñanderehe Satanás?

³ Satanás oasegura ñande jaadoraha Jehovápe okonveníguinte ñandéve, ha jahejataha chupe jahasáramo umi situasión ijetuʼúva (elee Job 2:4, 5). Peteĩ persóna oikuaaséramo Jehovápe, Satanás ha idemoniokuéra ohecha upéva ha oñehaʼãmbaite hikuái ani hag̃ua upe persóna oikuaa Jehovápe. Ha ipochyeterei voi hikuái peteĩ persóna oñemeʼẽramo Jehovápe ha ojevautisa. La Biblia heʼi: “Pe Diablo okorre hína oikóvo pende jerére, haʼete peteĩ león okororõva hína ha oñehaʼã omokõ oimeraẽvape” (1 Pedro 5:8). Satanás ndoipotái oiko ñandehegui Jehová amígo (Salmo 7:1, 2; 2 Timoteo 3:12).

4, 5. a) ¿Mbaʼépa ndaikatúi ojapo Satanás? b) ¿Mbaʼéichapa ikatu ñañemoĩ mbarete Satanásre?

⁴ Péro natekotevẽi jakyhyje Satanás ha idemoniokuéragui, pórke Jehová odesidíma mbaʼe mbaʼépa haʼekuéra ndaikatúi ojapo ñanderehe. Jehová opromete “peteĩ aty guasu” oservíva chupe ohasataha pe ‘jehasa asy guasu’ (Apocalipsis 7:9, 14). Satanás ndaikatúi ojapo mbaʼeve ani hag̃ua oñekumpli Jehová opromete vaʼekue, pórke haʼe voi oprotehe ipuévlope.

⁵ Ñaiméramo Jehová ykére, Satanás ni mbaʼevéicharõ ndaikatumoʼãi ombyai pe amista jaguerekóva Ñandejárandi. La Biblia opromete ñandéve: “Jehová oĩ penendive peẽ ndapehejái aja entéro chupe” (2 Crónicas 15:2; elee 1 Corintios 10:13). Heta Ñandejára siérvo yma guare ifiél vaʼekue ha oñemoĩ mbarete Satanásre, pórke haʼekuéra osegi vaʼekue Jehová ykére, umíva apytépe oĩ Abel, Enoc, Noé, Sara ha Moisés (Hebreos 11:4-40). Ha ñande avei ikatu jajapo upéva. Ñandejára Ñeʼẽ heʼi voi ñandéve: “Peñemoĩ mbaretékena pe Diáblore ha haʼe odiparáta pendehegui” (Santiago 4:7).

ÑAÑORAIRÕ HÍNA UMI DEMÓNIO KÓNTRAPE

6. ¿Mbaʼéichapa ñandeataka Satanás?

⁶ Satanás oikuaa oĩha heta mbaʼe Jehová nopermitimoʼãiva chupe ojapo ñanderehe, upéicharõ jepe oñehaʼãmbaite ñanemomombyry hag̃ua Jehovágui. Koʼág̃arupi Satanás ñandeataka heta hendáicha, ha oĩ umi ñuhã yma guivéma oipurúva. Jahechamína umíva.

7. ¿Mbaʼérepa oataka Satanás Ñandejára siervokuérape?

⁷ Apóstol Juan oskrivi vaʼekue: “Ko múndo kompletoite oĩ pe aña poguýpe” (1 Juan 5:19). Satanás oguereko ipoguýpe ko múndo aña, ha hiʼãiterei avei chupe oguereko ipoguýpe Jehová siervokuérape (Miqueas 4:1; Juan 15:19; Apocalipsis 12:12, 17). Haʼe oikuaa mbykypaitemaha ohóvo itiémpo, upévare ñandejopy opáguio ládo jaheja hag̃ua Jehovápe. Sapyʼánte ñandeataka direktoite voi, ha sapyʼánte katu oipuru avei umi ñuhã hasýva japilla hag̃ua.

8. ¿Mbaʼépa ñantende porã vaʼerã entéro kristiáno?

⁸ La Biblia heʼi porã ñandéve: “Ñande ningo [...] ñañorairõ hína umi demónio ehérsito yvagapeguándi” (Efesios 6:12). Upéicharõ oĩ peteĩ mbaʼe ñantende porã vaʼerã, ñañemeʼẽ guive Jehovápe, káda uno ñañorairõ vaʼerã Satanás ha idemoniokuéra kóntrape. Upévare apóstol Pablo heʼi vaʼekue 3 vése voi umi Efesoguápe ‘ojepytaso mbarete’ hag̃ua (Efesios 6:11, 13, 14).

9. ¿Mbaʼépa oñehaʼã ojapo Satanás ha idemoniokuéra?

⁹ Satanás ha idemoniokuéra oñehaʼã ñanembotavy heta hendáicha. Ha oiméramo ñandepuʼakáma raʼe peteĩ ñuhã haʼe oipurúvare, ndeʼiséi katuete ñandepuʼakatamaha avei umi ótrore. Satanás ningo ojesareko ñanderehe oikuaa hag̃ua mbaʼépepa ñanekangy, ha upéi oiporavo mbaʼe ñuhãpa oipurúta. Péro ani hag̃ua jaʼa umívape, la Biblia ñandeavisa porã mbaʼe mbaʼépa umi ñuhã haʼe oipurúva (2 Corintios 2:11; ehecha nóta 31 entende porãve hag̃ua). Peteĩva koʼã ñuhã haʼe hína umi mbaʼe oúva umi demóniogui.

EÑEMOMOMBYRY VAʼERÃ UMI DEMÓNIOGUI

10. a) ¿Mbaʼe mbaʼépa ou umi demóniogui? b) ¿Mbaʼépa Jehová opensa umívare?

¹⁰ Oĩ heta mbaʼe añetehápe oúva umi demóniogui, por ehémplo pe adivinasión, pe vruhería, ojapóva paje, ha avei umi heʼíva oñeʼẽha umi omano vaʼekuéndi. Ha umi ojapóva koʼã mbaʼe añetehápe ombaʼapo umi demóniondi. La Biblia heʼi koʼã mbaʼe ‘ombojeguaruha Jehovápe’, ha heʼi avei peteĩ ojapóva koʼã mbaʼe ndaikatuiha oservi Ñandejárape (Deuteronomio 18:10-12; Apocalipsis 21:8). Upévare ñande kristianokuéra ñamboykete oimeraẽ mbaʼe oúva umi demóniogui (Romanos 12:9).

11. ¿Mbaʼépa oikóta ñandegustáramo umi mbaʼe oúva umi demóniogui?

¹¹ Satanás oikuaa ifasiltaha chupe ñandereity hag̃ua ko ñuhãme oiméramo ñandegusta umi mbaʼe oúva umi demóniogui. Ha jajapóramo peteĩ mbaʼe jepe oúva chuguikuéra ñambyaíta ñane amista Jehovándi.

SATANÁS OÑEHAʼÃMBAITE ÑANEMBOTAVY HAG̃UA

12. ¿Mbaʼépa Satanás oipota opensa umi hénte?

¹² Satanás oñehaʼã okonfundipa umi héntepe, péicha haʼekuéra mbeguekatúpe ou oduda ha oñepyrũ opensa “oĩ porãha pe oĩ vaíva, ha oĩ vaiha umi mbaʼe iporãva” (Isaías 5:20). Satanás oipota ñapensa umi konsého bíblico ndaideprovechoveimaha, ha avei javyʼavetaha ñamboykéramo Jehová mandamientokuéra.

13. ¿Mbaʼépa ojapo Satanás omboduda hag̃ua umi héntepe?

¹³ Satanás oipota umi hénte oduda, ha péva haʼe voi peteĩ ñuhã haʼe oipurúva ymaiterei guivéma. Por ehémplo Eva oĩrõ guare pe hardín de Edénpe, Satanás oipota kuri haʼe oduda Ñandejáragui, ha upévare oporandu chupe: “¿Añetéiko Ñandejára heʼi peẽme ndovaleiha peʼu umi yvyramáta hiʼávagui oĩva guive ko hardínpe?” (Génesis 3:1). Tiémpo rire, Satanás ontendeka Job oserviha Ñandejárape okonveníguinte chupe, ha heʼi voi Jehovápe entéro umi ánhel rovake: “Ndareíri ningo Job okyhyje ndehegui” (Job 1:9). Jesús ojevautisa rire katu, Satanás odesafia chupe ha heʼi: “Ndéramo añete Ñandejára raʼy, ejapo koʼã itágui pan” (Mateo 4:3).

14. ¿Mbaʼépa ojapo Satanás umi hénte opensa hag̃ua ndaipeligrosoiha umi mbaʼe oúva umi demóniogui?

¹⁴ Koʼág̃arupi Satanás oñehaʼã gueteri omboduda umi héntepe. Por ehémplo, oipota ñapensa umi mbaʼe oúva umi demóniogui ndahaʼeiha la ivaietereíva, upévare ohechauka koʼã mbaʼe iporã ha igustoramoguáicha. Oĩ heta kristiáno jepe ndohechakuaáiva mbaʼeichaite pevépa ipeligróso (2 Corintios 11:3). Ñapensamína, ¿mbaʼépa ikatu jajapo ani hag̃ua Satanás ñanembotavy ha ani hag̃ua jaʼa ko ñuhãme? Jahechamína mokõi mbaʼe Satanás ikatúva oipuru ñanembotavy hag̃ua: umi diversión, ha umi tratamiénto jasegíva jakuida hag̃ua ñande salúre.

SATANÁS IKATU OIPURU UMI MBAʼE ÑAIKOTEVẼVA ÑANEMOÑUHÃ HAG̃UA

15. ¿Mbaʼe mbaʼépa ikatu oipuru umi demónio oreko hag̃ua la héntepe ipoguýpe?

¹⁵ Heta vidéo, pelíkula, prográma osẽva télepe, videohuégo ha sítio oĩva Internétpe ohechauka umi mbaʼe oúva umi demóniogui, avei oreko máhia ha espiritísmo. Oĩ heta opensáva ndaipeligrosoiha koʼã mbaʼe, péro ndohechakuaái hikuái umi demónio oipuruha umíva oreko hag̃ua la héntepe ipoguýpe. Umi hénte ikatu avei ojapo umi demóniope ogustáva oleévo pe oróskopo, oipurúvo umi kárta del tarót ha vóla de kristál, térã oleekávo ipo. Satanás oipota umi hénte ikurióso ha opensa koʼã mbaʼe iñinteresánte ha igustoha, upéicha umi hénte opensáta ndaipeligrosoiha jajapo koʼã mbaʼe. Ikatu voi oĩ heʼíva ndoperhudikamoʼãiha chupe ohechánteramo koʼã mbaʼe, haʼe voi ndojapóima guive. ¿Mbaʼérepa ipeligrosoite ñapensáramo upéicha? (1 Corintios 10:12).

16. ¿Mbaʼérepa ñamboyke vaʼerã umi vyʼarã oúva umi demóniogui?

¹⁶ Satanás ha idemoniokuéra ndaikatúi oikuaa la ñapensáva. Péro ikatu opilla mbaʼépa ñapensa ha mbaʼépa ñandegusta umi mbaʼe jaiporavóvare ñandéve ha ñane famíliape g̃uarã, umíva apytépe umi vyʼarã. Jaiporavóramo pelíkula, músika ha lívro oñeʼẽva espiritísmore, pajére, endemoniádore, vrúhare, vampírore ha umícha, Satanás ha idemoniokuéra ohechakuaáta koʼã mbaʼe ñandegustaha. Ha upéva káusare ikatu haʼekuéra ou ojapoka ñandéve chupekuéra ogustáva (elee Gálatas 6:7).

17. Ñande ningo jakuida porãseterei ñande salúre, ¿mbaʼéichapa Satanás ikatu ojaprovecha upévare ñanemoñuhã hag̃ua?

¹⁷ Ñande ningo jakuida porãseterei ñande salúre ha Satanás ikatu ojaprovecha hína upévare ñanemoñuhã hag̃ua. Koʼág̃arupi oĩ hetaiterei hasýva, ha oĩ voi osegíva diferénte tratamiénto okuera hag̃ua (Marcos 5:25, 26). Umi hasyetéva okuerasetereígui ikatu voi ojedesespera ha osegise oimeraẽ tratamiénto. Péro ñande kristiáno ñañatende vaʼerã ani hag̃ua jasegi umi tratamiénto ojepuruhápe máhia (Isaías 1:13).

18. ¿Mbaʼeichagua tratamiéntopa ñamboykete vaʼerã?

¹⁸ Yma Israélpe oĩ vaʼekue ojapóva máhia, upévare Jehová heʼi chupekuéra: “Peẽ pehupi jave pende po peñemboʼe hag̃ua chéve, che akañy pendehegui. Pesegíramo jepe heta peñemboʼe, che nahendúi la pejéva” (Isaías 1:15). Jahechaháicha Jehovápe g̃uarã ivaieterei la ojapóva hikuái, upévare heʼi chupekuéra ni iñemboʼekuéra nohendumoʼãiha. Ñande ningo ndajajaposéi mbaʼeve ombyaítava ñane amista Jehovándi, ha jajapo haguére ivaíva oñemomombyry mbaʼe ñandehegui, pórke koʼýte ñaikotevẽta hese ñanderasy jave (Salmo 41:3). Upévare jaikuaa porã vaʼerã noiméipa pe tratamiénto ñapensáva jasegi ou hína umi demóniogui (Mateo 6:13). Ha ñapensáramo ouha chuguikuéra, ñamboykete vaʼerã (ehecha nóta 32 entende porãve hag̃ua).

ÑAMBOYKE VAʼERÃ UMI ISTÓRIA OÑEʼẼVA DEMONIOKUÉRARE

19. ¿Mbaʼérepa oĩ hetaite hénte okyhyjéva Satanásgui?

¹⁹ Heta hénte opensa Satanás ha umi demónio ndoexistiriha, péro oĩ avei heʼíva oexistiha, pórke ohechakuaa haʼekuéra ojapo hague hese álgo. Heta hénte katu okyhyjeterei umi espíritu añágui ha osegi umi superstisión. Oĩ voi omombeʼúva umi istória ivaietereíva ojapóva demoniokuéra umi héntere, ikatu hag̃uáicha omongyhyje chupekuéra. Hetápe ogustaiterei koʼãichagua istória ha omombeʼuseterei voi. Upéicha rupi umi hénte okyhyjeterei Satanásgui.

20. ¿Mbaʼépa ndajajapói vaʼerã ani hag̃ua ñaipytyvõ Satanáspe?

²⁰ Ñanemanduʼa vaʼerã Satanás oipotaha umi hénte okyhyje chugui (2 Tesalonicenses 2:9, 10). Haʼe ningo ijapueterei, ha ivale voi omoinge hag̃ua umi hénte akãme ogusta hag̃ua chupekuéra umi mbaʼe oúva umi demóniogui, ha ogueroviaka hag̃ua umi héntepe heta mbaʼe ndahaʼéiva siérto. Ikatu voi koʼãichagua persóna omombeʼu ohecha térã ohendu hague umi mbaʼe ojapóva umi espíritu aña. Ha oñemombeʼu jave peichagua istória oĩma voi oexaheráva la oiko vaʼekue. Ha ñande ñamombeʼúramo ótrope peichagua istória ñaipytyvõ hína Satanáspe ojekyhyje hag̃ua chugui, upévare ñande ñamboyke vaʼerã koʼã mbaʼe (Juan 8:44; 2 Timoteo 2:16).

21. ¿Mbaʼérepa iporãve ñañeʼẽ ñamombeʼu rangue umi istória oñeʼẽva umi demóniore?

²¹ Oiméramo peteĩ Jehová siérvope oafekta raʼe umi demónio ojapóva, ndovaléi oiko omombeʼu upérupi umi mbaʼe ohasa vaʼekue. Ñande kristiáno natekotevẽi jakyhyje ha ñapensaiterei umi mbaʼe ikatúvare ojapo ñanderehe Satanás ha idemoniokuéra. Upéva rangue jajepyʼamongeta ha ñañeʼẽ meme vaʼerã Jesúsre ha pe podér Jehová omeʼẽvare chupe (Hebreos 12:2). Jesús ndoikói vaʼekue omombeʼu idisipulokuérape umi istória oñeʼẽva umi demóniore. Upéva rangue oñekonsentra meme omombeʼu hag̃ua pe mensáhe oñeʼẽva pe Rréinore ha “umi mbaʼe ijojahaʼỹva Ñandejára ojapo vaʼekue” (Hechos 2:11; Lucas 8:1; Romanos 1:11, 12).

22. ¿Mbaʼépa nde reime vaʼerã desidído rejapotaha?

²² Aníkena ñanderesarái Satanás ohundiseha pe amista jarekóva Jehovándi ha ojapotaha oimeraẽ mbaʼe ohupyty hag̃ua upéva. Péro ñande jaikuaa porãiterei umi ñuhã oipurúva, upévare ñaime desidído ñamboyketetaha oimeraẽ mbaʼe oúva umi demóniogui. Ha nañapermitimoʼãi haʼe ñanemokangy jajapo hag̃ua upéva (elee Efesios 4:27). Ñañemoĩ mbaretéramo Satanásre, ndajaʼamoʼãi umi ñuhã oipurúvape, ha ikatu ñaime trankílo pórke Jehová ñandeprotehéta (Efesios 6:11).