¿Mbaʼéichapa jaadora vaʼerã Ñandejárape?

Jahecha haguéicha leksión 13-pe, Ñandejára ndoguerohorýi entéro rrelihión. Péro ñande ikatu jaadora Ñandejárape chupe ogustaháicha ha ñambovyʼa chupe. ¿Mbaʼeichaguápa “pe adorasión”, térã “rrelihión”, Ñandejára oguerohorýva? (Santiago 1:27, nóta). Jahechamína mbaʼépa heʼi la Biblia.

1. ¿Moõpa heʼi mbaʼéichapa jaadora vaʼerã Ñandejárape?

La Biblia heʼi mbaʼéichapa jaadora vaʼerã Ñandejárape. Jesús heʼi vaʼekue Itúape: “Ne ñeʼẽ hína la verda” (Juan 17:17). Oĩ rrelihión omboykéva pe añetegua jatopáva la Bíbliape, ha omboʼe umi kostúmbre ha tradisión reínte. Jehová katu ndoguerohoryiete umi omboykévape imandamientokuéra (elee Marcos 7:9). Péro ñande ikatu ñambovyʼa chupe jarrespetáramo la Biblia ha jajapóramo la heʼíva pype.

2. ¿Mbaʼéichapa jaadora vaʼerã Jehovápe?

Jehová ningo haʼe ñande Apohare, upévare omerese ñamombaʼe chupe añoite (Apocalipsis 4:11). Upéva heʼise jahayhu ha jaadora vaʼerãha Jehovápente, ha ndovaleiha jaipuru umi sánto, taʼanga, ni ótra kósa upearã (elee Isaías 42:8).

Jehová oasepta hag̃ua ñane adorasión, upéva ojogua vaʼerã ‘peteĩ ofrénda sagrádape’ (Romanos 12:1). Upéva heʼise jajapo vaʼerãha entéro mbaʼe haʼe oipotaháicha. Por ehémplo umi ohayhúva Jehovápe orrespeta ha okumpli la haʼe heʼíva pe matrimóniore. Avei omboykete hikuái umi vísio: ndopitái, ndoisuʼúi petỹ, ndojedrogái, ndoʼurasái vevída ha ndoipurúi hendapeʼỹ umi pohã.a

3. ¿Mbaʼérepa ñañembyaty vaʼerã jaadora hag̃ua Jehovápe?

Umi rreunión jarekóvape káda semána ikatu ñamombaʼeguasu Jehovápe “heta hénte apytépe” (Salmo 111:1, 2). Peteĩ fórma jajapo hag̃ua upéva haʼe japurahéivo Ñandejárape (elee Salmo 104:33). Jehová oipota jaha meme rreunionhápe pórke ñanderayhu, ha oikuaa upéva ñanepytyvõtaha jaiko hag̃ua vyʼápe pára siémpre. Umi rreunionhápe ningo siémpre ñañomokyreʼỹ.

EJEPYʼAMONGETAMÍNA

4. Ndajaipurúi vaʼerã umi sánto térã taʼanga jaadora hag̃ua Ñandejárape

VIDÉO: ¿Oipotápa Ñandejára jaipuru sánto térã taʼanga jaadora hag̃ua chupe? (3:26)

• ¿Mbaʼépa oiko vaʼekue umi israelita oadorasérõ guare Ñandejárape oipurúvo peteĩ taʼanga?

Oĩ oipurúva umi sánto térã taʼanga oadora hag̃ua Ñandejárape pórke opensa upéicha oñemoag̃uiveha hese. Péro upéva añetehápe omomombyry hína chupekuéra Ñandejáragui. Elee Éxodo 20:4-6 ha Salmo 106:35, 36, ha upéi erresponde koʼã porandu:

• ¿Mbaʼe mbaʼépa nde rehecha ojepuruha jepi ojeadora hag̃ua Ñandejárape?

• ¿Mbaʼéichapa oñeñandu Jehová ohechávo ojepuruha jepi umi mbaʼe?

• ¿Mbaʼépa nde repensa umi sánto térã taʼangáre?

5. Jaadoráramo Jehovápe añoiténte jajeprotehe umi enseñánsa japúgui

VIDÉO: Koʼág̃a ae areko liverta (5:16)

Elee Salmo 91:14, ha upéi erresponde ko porandu:

• ¿Mbaʼépa Jehová opromete ojapotaha ñanderehehápe jahayhu ha jaadoráramo chupe añoite?

6. Umi rreunionhápe jaadora Ñandejárape

Ñakomenta ha japurahéivo rreunionhápe, ñamombaʼeguasu hína Jehovápe ha ñamokyreʼỹ avei umi ótrope. Elee Salmo 22:22, ha upéi erresponde koʼã porandu:

• ¿Ndévepa ndegusta umi komentário ojejapóva rreunionhápe?

• ¿Ndépa ejepreparase avei rekomenta hag̃ua?

7. Jehová ovyʼa ñakompartíramo ótrondi umi mbaʼe ñaaprendéva

Ikatu ñakomparti ñande rapichakuérandi la ñaaprendéva la Bíbliagui hetaiterei hendáicha. Elee Salmo 9:1 ha 34:1, ha upéi erresponde ko porandu:

• ¿Mbaʼe iporãvapa reaprendéma la Bíbliagui ha rekompartise ótrondi?

RRESÚMEN

Ñande Apohare ovyʼáta ñandereheve: jaadoráramo chupe añoite, ñamombaʼeguasúramo chupe umi rreunionhápe, ha ñamombeʼúramo ótrope umi mbaʼe ñaaprendéva.

Rrepáso

• ¿Moõpa ikatu ñaaprende mbaʼéichapa jaadora vaʼerã Ñandejárape?

• ¿Mbaʼérepa jaadora vaʼerã Jehovápe añoite?

• ¿Mbaʼérepa ñañembyaty vaʼerã umi ojaposévandi Ñandejára rembipota jaadora hag̃ua chupe?

EINVESTIGA HAG̃UA

Pe experiénsia héravape “Ndaikovéima aadora sánto ha taʼanga”, ehecha mbaʼéichapa peteĩ kuñakarai ohejaite vaʼekue umi mbaʼe.

“La Biblia okambia chupekuéra” (La Atalaya 1 de julio de 2011)

Ehecha mbaʼépa nepytyvõta ekomenta hag̃ua umi rreunionhápe.

“Ñamombaʼeguasu Jehovápe ñane komentário rupive” (Ñemañaha enero de 2019)

Ehecha mbaʼéichapa umi rreunión oipytyvõ peteĩ kariaʼýpe ijetuʼúramo jepe chupe oho hag̃ua.

Jehová oñeinteresa cherehe (3:07)

Heta persóna opensa oipuru vaʼerãha pe kurusu oadora hag̃ua Ñandejárape. ¿Péro siértopa upéva?

“¿Mbaʼére piko umi testígo de Jehová ndoipurúi kurusu oadora hag̃ua Ñandejárape?” (Artíkulo oĩva jw-pe)