44 JUAN EL BAUTISTA
Ndaipóri ótro iñimportantevéva chugui
HETAITEREI tiémpore Jehová nomondovéi kuri ni peteĩ profétape okorrehi hag̃ua ipuévlope. Péro upéi haʼe oasigna peteĩ kuimbaʼépe ojapo hag̃ua upéva. Upe kuimbaʼe héra kuri Juan. Haʼe oiko kuri haʼeño pe desiérto de Judéape. Upépe hakueterei ha itaty memete. Hiʼarive ipeligróso pórke oĩ mbói, alakrán, animál salváhe tuicháva ha heta vandído. Juan ipyʼaguasu vaʼekue oiko hag̃ua upépe, péro ipyʼaguasuvéntema kuri heʼi hag̃ua la héntepe la Jehová omandáva chupe.
Juan tuakuéra ningo haʼe vaʼekue Zacarías ha Elisabet. Ha oiméne haʼekuéra omombeʼu raʼe chupe la Jehová ánhel heʼi vaʼekue hese. Upévare oiméne Juan oikuaa raʼe tekotevẽtaha ikyreʼỹ proféta Elías ikyreʼỹ haguéicha. Oikuaáne avei raʼe haʼetaha nazareo, haʼe haguéicha Samuel, ha tekotevẽtaha oipytyvõ la héntepe oĩ hag̃ua preparádo oasepta hag̃ua álgien iñimportantevévape chugui. Juan orekórõ guare 30 áño ikatútama kuri oñepyrũ oservi de saserdóte itúaicha, péro upéva rangue haʼe oñepyrũ heʼi la héntepe oñarrepenti vaʼerãha. Péicha oñekumpli peteĩ profesía ymaiterei guare, heʼíva oĩtaha “peteĩ osapukáiva pe desiértore”. Haʼe oñeʼẽ vaʼekue pe ‘Rréino yvagapeguáre’, ha ikyreʼỹeterei rupi, la hénte ou voi opáguio ládo ohendu hag̃ua chupe. Ha Ñandejára omanda haguéicha chupe, haʼe ovautisa umi hénte oñarrepentívape. Péro ndahaʼéi voi upévante, umi saduséo ha fariséo oúrõ guare hendápe, Juan ipyʼaguasu vaʼekue ha ndokyhyjéi heʼi hag̃ua chupekuéra iñañaitereiha ha nokumpliriha Ñandejára léi.
Juan orekóramo jepe peteĩ asignasión iñimportánteva, haʼe ndoúi vaʼekue oñemombaʼeguasu. Upéva rangue haʼe iñumílde vaʼekue, ha heʼi porã upe rire outaha peteĩ iñimportantevéva chugui. Haʼe heʼi voi nomeresemoʼãiha ojora chupe ni isandália sã. Upéi, Juan ovautisárõ guare Jesúspe, ohendumi Jehovápe oñeʼẽrõ guare pe yvágagui ha heʼi: “Kóva hína che Raʼy ahayhuetéva ha aguerohorýva”. Ha tiémpo rire, Satanás oñepresenta riréma Jesúspe omoñuhã hag̃ua chupe, Juan hatã heʼi umi hénte renondépe: “¡Pemañami, Ñandejára Ovecha Raʼy, oipeʼáva pe pekádo ko múndogui!”.
Juan iñumílde rupi heʼi isegidorkuérape omoirũ hag̃ua Jesúspe. Heta oĩva ijapytepekuéra ojapo vaʼekue upéva, por ehémplo Andrés, haʼéva Pedro ermáno ha posívlemente Juan avei, haʼéva Zebedeo raʼy. Tiémpo rire mokõivévagui oiko vaʼekue Jesús apóstol. Peteĩ tiémpore, Juan ha Jesús ojapo vaʼekue el mísmo traváho, pórke mokõivéva omokyreʼỹ vaʼekue la héntepe ojevautisa ha oñarrepenti hag̃ua. Upéi, Juánpe oñemombeʼu Jesús disipulokuéra apytépe oĩha hetave ojevautisáva, péro Juan ndaipochýi ni noenvidiái chupe. Upéva rangue haʼe iñumílde ha heʼi: “Káda día hetavéta umi omoirũva Crístope, péro chéve chemoirũva saʼivéta ohóvo”.
Umi mbaʼe Juan heʼíva ombopochy umi líder rrelihióso ha umi governánte iñañávape, péro omokyreʼỹ umi ohaʼarõvape pe Mesíaspe
Juan ipyʼaguasu vaʼekue avei okorrehi hag̃ua umi orekóvape autorida entéro. Por ehémplo, rréi Herodes Antipas oike vaʼekue judiokuéra rrelihiónpe ha heʼi ijehe okumpliha pe léi. Péro upéva ndasiértoi kuri pórke haʼe omenda Herodías rehe, haʼéva imédio ermáno rembireko. Juan ipyʼaguasu vaʼekue heʼi hag̃ua chupe upéva ivaietereiha, upévare Herodes omoinge chupe kárselpe. Péro Herodías ndochaʼeieterei vaʼekue Juan rehe, upévare oipota voi ojejuka chupe.
Juan oĩ aja kárselpe oikotevẽ kuri álgien omokyreʼỹ chupe, upévare omondo mokõi idisípulope Jesús rendápe ha oporanduka chupe: “¿Nde piko hína pe Ñandejára opromete vaʼekue omboutaha, térãpa oúta ótro kuimbaʼe?”. Jesús heʼi chupekuéra tomog̃uahẽ Juánpe peteĩ notísia iporãitereíva: ‘Umi siégo koʼág̃a ohecha, umi nohendúiva ohendu, umi omanóvape oñemopuʼã jey’. Juan ikyreʼỹramo jepe pe proféta Elías ikyreʼỹ haguéicha, haʼe ndorekói vaʼekue podér ojapo hag̃ua milágro. Upévare, oĩramo jepe pe kársel ruguaitépe, oiméne okonsolaite raʼe chupe oikuaávo Jesús ojapoha la milágro. Ovyʼáne raʼe pórke haʼe oipytyvõ kuri la héntepe oasepta hag̃ua Jesúspe.
Tiémpo riremi, Herodías otopami la oportunida ojukauka hag̃ua Juánpe. Imembykuña ojeroky Heródespe g̃uarã ha chupe ogustaiterei upéva. Upévare Herodes opromete voi pe mitãkuñáme omeʼẽtaha chupe oimeraẽ mbaʼe oipotáva. Herodías heʼi imembykuñáme ojerure hag̃ua Juan el Bautista akãngue. Herodes legálmente ndojukaséi kuri Juánpe, péro ipyʼaju ha ojapo la ojejeruréva chupe. Juan osegi vaʼekue ipyʼaguasu ipahaite peve.
Jesús heʼi vaʼekue voi hese: “Ndaipóri ko yvy ape ári ni peteĩ persóna tuichavéva Juángui”. ¿Mbaʼérepa heʼi vaʼekue upéva? Pórke hese oñekumpli vaʼekue pe profesía heʼíva oĩtaha “peteĩ osapukáiva pe desiértore”. Haʼe oipytyvõ kuri umi héntepe oĩ hag̃ua preparádo oasepta hag̃ua pe Mesíaspe. Ha upéva haʼe vaʼekue peteĩ priviléhio tuichaitereíva ni peteĩ ótro proféta ndorekói vaʼekue, ni Moisés, ni Elías ni mavavéa. Juan el Bautista ipyʼaguasueterei vaʼekue ha iñehémplo osegi ñanemokyreʼỹ koʼag̃aite peve.
¿Moõpa oñeñeʼẽ hese la Bíbliape?
¿Mbaʼépa ere chupe?
¿Mbaʼérepa jaʼekuaa Juan el Bautista ipyʼaguasu hague?
Einvestigamína
1. ¿Mbaʼérepa jaʼekuaa Juan el Bautista ha Jesús haʼe hague oñohénte? (w10 1/10 32 párr. 4-6).
2. Flavio Josefo haʼe peteĩ istoriadór oiko vaʼekue umi apostolkuéra tiémpope. ¿Mbaʼépa haʼe heʼi raʼe ohechaukáva Juan el Bautista oexisti hague? (mrt artíkulo 14-wcgr). A
Taʼanga A: Peteĩ monéda ojapoka vaʼekue Herodes Antipas áño 30-pe d.C. Pe monédare heʼi: Herodes pe Tetrarca (heʼiséva “ogovernáva peteĩ distríto”)
3. ¿Mbaʼépa heʼise Juan el Bautista ojoguáta hague Elíaspe? (Luc. 1:17; it “Espíritu” párr. 60-wcgr). B
Taʼanga B
4. ¿Mbaʼépa ohechauka Juan ndorresusitái hague yvágape? (Mat. 11:11; ijwbq artíkulo 178 párr. 4-wcgr).
Ejepyʼamongetamína ndejehe
Juan rehe oñekumpli vaʼekue peteĩ profesía ha oipytyvõ kuri la héntepe oasepta hag̃ua pe Mesíaspe. Upéicharõ jepe osegi vaʼekue iñumílde (Juan 1:26, 27). ¿Mbaʼépa ñaaprende chugui?
Juan oiko vaʼekue sensillomínte ha omotenonde meme Ñandejára volunta (Mat. 3:4). ¿Mbaʼéichapa iñehémplo ikatu ñanepytyvõ koʼág̃arupi? C
Taʼanga C
¿Mbaʼéichapa ikatu ndepyʼaguasu Juan el Bautista ipyʼaguasu haguéicha?
Ejepyʼamongetamína Jehováre
Alee rire ko rreláto, ¿mbaʼépa aaprendeve Jehovágui?
Alee rire ko rreláto, ¿mbaʼépa aaprendeve Jehová rembipotágui ha pe téma prinsipál orekóvagui la Biblia?
¿Mbaʼépa aporandúne Juan el Bautístape Jehová omoingove jey vove chupe?
Reikuaave hag̃ua
Ehechamína mbaʼépa oipytyvõ vaʼekue Juánpe ovyʼa ha ipasiénsia hag̃ua ijetuʼúramo jepe hendive.
Juan el Bautista: Ñanemboʼe jasegi hag̃ua javyʼa (w19.08 29-31).
Oĩ jave ñandepersegíva, ñandesogue térã noñemeʼẽi ñandéve peteĩ asignasión jaipotáva, ¿mbaʼéichapa Juan ehémplo ikatu ñanepytyvõ ñaaguanta hag̃ua?