Mbaʼéichapa ojejapo vaʼerã pe rreunión Mbaʼéichapa Jaiko ha Japredika vaʼerã

Oĩva pype

1. Koʼápe retopáta mbaʼe mbaʼépa oreko vaʼerã enkuénta entéro umi orekótava párte pe rreunión héravape Mbaʼéichapa Jaiko ha Japredika vaʼerã. Káda partisipánte oprepara mboyve la iparterã osegi vaʼerã la heʼíva koʼã instruksión ha pe Prográma rreuniónpe g̃uarã. Mbaʼéichapa Jaiko ha Japredika vaʼerã. Oñemokyreʼỹ vaʼerã entéro puvlikadórpe ojapo hag̃ua umi párte estudiantíl. Umi estudiánte ou meméva rreunionhápe ha ndahaʼéiva gueteri puvlikadór ikatu avei oñanota, ogueroviáma guive la Biblia omboʼéva, ha oiko Ñandejára Ñeʼẽ heʼiháicha. Oĩramo peteĩ estudiánte oñanotaséva oreko hag̃ua párte estudiantíl, pe Superintendénte de rreunión Mbaʼéichapa Jaiko ha Japredika vaʼerã, oanalisáta hendive umi rrekisíto tekotevẽva okumpli, ha upe rire heʼíta chupe ikatúmapa térãpa nahániri. Umícha jave oĩ vaʼerã avei pe estudiánte instruktór (térã isy o itúa haʼéva Testígo). Umi rrekisíto tekotevẽva oñekumpli haʼe avei umi rrekisíto okumpli vaʼerã peteĩ oikosévagui chugui puvlikadór no vautisádo (od kap. 8 párr. 8).

OJEʼÉTAVA OÑEPYRŨ HAG̃UA PE RREUNIÓN

2. Un minúto. Ojepurahéi rire pe kántiko ha oñeñemboʼe rire, pe omoakãva pe rreunión Mbaʼéichapa Jaiko ha Japredika vaʼerã (presidénte), kyreʼỹme oñeʼẽta pe prográmare ikatu hag̃uáicha umi ermáno ohenduse pe rreunión. Pe presidénte orresalta vaʼerã umi mbaʼe ideprovechovétava upe kongregasiónpe.

TESÓRO OĨVA ÑANDEJÁRA ÑEʼẼME

3. Diskúrso (10 minúto): Pe Prográma rreuniónpe g̃uarãme oñemoĩ pe diskúrso téma, ha avei mokõi térã mbohapy púnto prinsipál oñemyesakã vaʼerã. Ko párte ojapo vaʼerã peteĩ ansiáno térã peteĩ siérvo ministeriál ikatupyrýva. Oñemoñepyrũ jave peteĩ lívro de la Biblia ojehechaukáta pe vidéo oñeʼẽva upe lívrore. Pe ojapóva ko párte ikatu omombeʼu mbykymi mbaʼéichapa pe vidéo oapoja pe téma oanalisáva hína. Péro katuete oanalisapa vaʼerã umi púnto prinsipál oñemoĩva ko diskúrsope g̃uarã. Umi taʼanga oipytyvõ oñentende porãve hag̃ua pe informasión, ha omeʼẽma guive la tiémpo pe ermáno oipurukuaa umíva. Ikatu avei oipuru ótra informasión oipytyvõtama guive omyesakãve hag̃ua umi púnto oñeanalisáva.

4. Óro kuʼi oĩva la Bíbliape (10 minúto): Ojejapo vaʼerã umi pregúnta oĩva pe prográmape ikatu hag̃uáicha oñekomenta. Ko pártepe natekotevẽi ojejapo peteĩ introduksión ni konklusión. Ojapo vaʼerã peteĩ ansiáno térã peteĩ siérvo ministeriál ikatupyrýva. Haʼe ojapo vaʼerã umi mokõi pregúnta oĩva. Pe ermáno ohecha vaʼerã tekotevẽpa ojelee umi téxto oĩva ko pártepe. Umi okomentáva ndohasái vaʼerã 30 segúndo.

5. Lektúra bíblica (4 minúto): Ojapo vaʼerã peteĩ kuimbaʼe. Pe orekóva ko párte olee vaʼerã ojapoʼỹre peteĩ introduksión ha konklusión. Pe omoakãva pe rreunión oipytyvõta pe oleévape ikatu hag̃uáicha olee oĩhaichaite, oñentende chupe, olee syryrýpe, orresalta hendaitépe, okambiaʼimi oñeʼẽ lája, opausa tekotevẽhápe, ha olee hag̃ua oñeʼẽháicha jepi normálmente. Umi téxto ojeleéva jepi ko pártepe sapyʼánte mbykyve térã ipukuve, ha pe Superintendénte de rreunión Mbaʼéichapa Jaiko ha Japredika vaʼerã, oreko vaʼerã enkuénta umi opartisipáva kapasida oasignáta jave ko párte.

ÑAMBOʼE PORÃVE HAG̃UA

6. Quince minúto. Ko seksión ojeprepara enterove ñañensaja hag̃uáicha ha péicha ñamehora ñañemongetáta jave la héntendi, japredika lája ha avei ñaporomboʼe lája. Tekotevẽramo, umi ansiáno ikatu avei ojapo umi párte estudiantíl. Entéro umi partisipánte oreko vaʼerã enkuénta peteĩ leksión oĩva pe folléto Ñamboʼe porãve hag̃uáme térã pe folléto Pe oporohayhúvape. Oikuaa hag̃ua mbaʼe leksiónpepa ombaʼapo vaʼerã, oñemoĩta voi éntre paréntesis pe Prográma rreuniónpe g̃uarãme. Sapyʼánte oñeanalisáta ermanokuérandi peteĩ informasión, umíva ojapo vaʼerã peteĩ ansiáno térã peteĩ siérvo ministeriál ikatupyrýva (ehecha párrafo 15 eikuaa hag̃ua mbaʼéichapa ojejapo vaʼerã umi párte oñeanalisátava ermanokuérandi).

7. Ñañepyrũ hag̃ua ñañemongeta: Ko párte estudiantíl ikatu ojapo peteĩ kuimbaʼe térã peteĩ kuña. Ojapo vaʼerã kuña kuñándi ha kuimbaʼe kuimbaʼéndi, térã oiméramo oñohénte ikatu oñembojeheʼa. Ikatu ojapo hikuái ko párte oñemboʼyhápe térã oguapyhápe. (Eikuaave hag̃ua mbaʼe rehepa ñañeʼẽta ha mbaʼe situasiónpepa ojejapóta ko párte, ehecha párrafo 12 ha 13).

8. Jajapo rrevisíta: Ko párte estudiantíl ikatu ojapo peteĩ kuimbaʼe térã peteĩ kuña. Ojapo vaʼerã kuña kuñándi ha kuimbaʼe kuimbaʼéndi (km-S 5/97 páh. 2). Ikatu ojapo hikuái ko párte oñemboʼyhápe térã oguapyhápe. Pe ojapóva ko asignasión ohechauka vaʼerã mbaʼépa ikatu jaʼe peteĩ persónape ñakontinua hag̃ua pe konversasión jareko vaʼekue hendive anteve. (Eikuaave hag̃ua mbaʼe rehepa ñañeʼẽta ha mbaʼe situasiónpepa ojejapóta ko párte, ehecha párrafo 12 ha 13).

9. Jajapo disípulo: Ko párte estudiantíl ikatu ojapo peteĩ kuimbaʼe térã peteĩ kuña. Ojapo vaʼerã kuña kuñándi ha kuimbaʼe kuimbaʼéndi (km-S 5/97 páh. 2). Ikatu ojapo hikuái ko párte oñemboʼyhápe térã oguapyhápe. Ko pártepe ojehechaukáta mbaʼéichapa ojejapo peteĩ estúdio bíblico, péro ndahaʼéi oñepyrũha guive. Upévare natekotevẽi ojejapo peteĩ introduksión ni konklusión, noiméiramo otoka voi pe estudiántepe ombaʼapo upe leksiónpe. Natekotevẽi ojeleepaite en vos álta pe informasión kompletoite, péro oĩramo oleeséva, ikatúnte avei ojapo upéicha.

10. Eexplika umi mbaʼe egueroviáva: Haʼe jave peteĩ diskúrso, ojapo vaʼerã peteĩ kuimbaʼe. Haʼéramo peteĩ demostrasión katu ojapokuaa peteĩ kuimbaʼe térã peteĩ kuña. Ojapo vaʼerã kuña kuñándi ha kuimbaʼe kuimbaʼéndi, térã oiméramo oñohénte ikatu oñembojeheʼa. Ojapóva ko párte orresponde vaʼerã hendápe porã ha oñentende porã hag̃uáicha pe porandu oĩva pe prográmape, ha oipuru vaʼerã pe rreferénsia oñemeʼẽva. Pe estudiánte odesidíta omensionátapa térã nahániri moõguipa oñeguenohẽ pe informasión.

11. Diskúrso: Ko párte estudiantíl ojapo vaʼerã peteĩ kuimbaʼe ha ojapóta ojejapoháicha peteĩ diskúrso kongregasiónpe g̃uarã. Oñemoĩ jave kómo rreferénsia pe informasión A oĩva pe folléto Pe oporohayhúvape, pe estudiánte omyesakã vaʼerã mbaʼéichapa ikatu jaipuru umi téxto bíblico predikasiónpe térã ñaporomboʼe jave. Por ehémplo, ikatu oexplika mbaʼépa heʼise peteĩ versíkulo, mbaʼéicha javépa ikatu jaipuru térã mbaʼéichapa ikatu jaipuru ñamopensa hag̃ua la héntepe. Oñemoĩ jave kómo rreferénsia peteĩ leksión pe follétogui, pe estudiánte ohechauka vaʼerã mbaʼéichapa ikatu ñamoĩ en práktika oĩva pe leksiónpe japredika térã ñaporomboʼe jave. Ha pe estudiánte ohechakuaáramo ideprovechotaha, ikatu avei oipuru pe ehémplo oĩva púnto 1-pe upe leksiónpe, térã umi ótro téxto oĩva upépe.

12. Mbaʼe rehepa ñañeʼẽta: Umi instruksión oĩva ko párrafo ha pe oúvape, ojereko vaʼerã enkuénta ojejapóta jave “Ñañepyrũ hag̃ua ñañemongeta” ha “Jajapo rrevisíta”. Koʼã pártepe majórmente pe estudiánte oñeʼẽ vaʼerã peteĩ téma bíblico isensíllovare, ointeresátavare la héntepe ha ikatútava upe rire okontinua la konversasión. Ndahaʼéiramo upéicha oñemoĩta voi mbaʼéichapa ojejapo vaʼerã. Pe estudiánte oelehíta peteĩ téma ou porãtava iterritóriope g̃uarã. Natekotevẽi katuete ohechauka peteĩ vidéo ni peteĩ puvlikasión oĩva pe kit de enseñánzape. Omemorisa rangue peteĩ demostrasión, koʼápe la estudiánte oñembokatupyrýta oñemongetakuaa hag̃ua, por ehémplo oñeʼẽ hag̃ua ojepokuaaháicha voi ojapo ha ohechauka hag̃ua oñeinteresaha la héntere ipyʼaite guive.

13. Mbaʼe situasiónpepa: Koʼápe oñemoĩ mbaʼe situasiónpa ikatu oñepresenta, ha káda estudiánte ojapokuévo ohecháta mbaʼépa opyta porãvéta iterritóriope g̃uarã. Por ehémplo:

1) Japredika ogahárupi: Heʼise ñañemongetaha la héntendi hogaitépe voi, tahaʼe ñag̃uahẽ rupi hógape, ñahenói rupi por teléfono, térã ñamog̃uahẽgui chupe peteĩ kárta. Avei heʼise jakontinuaha la konversasión pe ohendu porã vaʼekuéndi japredikárõ guare chupe upéicha.
2) Japredika oimehápe: Heʼise jaaprovechaha oimehaichagua situasión oñepresentáva japredika hag̃ua jaikohárupinte. Ikatu ñañemongeta hína oimeraẽ mbaʼére ha upéi jaaprovecha ñañeʼẽ hag̃ua la Bíbliare, por ehémplo, ñane kompañéro de traváhondi, kompañéro de eskuéla térã koléhiondi, ñane vesínondi, ñahaʼarõ aja kolektívo ha umícha.
3) Predikasión púvlika: Heʼise japredikaha jaipurúvo umi karríto, umi negosioháre, kállere, umi párkepe, térã oimeraẽ ótro lugár oĩháme hénte.

14. Vidéo ha puvlikasionkuéra: Opyta porãma guive, pe estudiánte ikatu odesidi oipurútapa peteĩ vidéo térã puvlikasión. Ojejeruréramo voi pe asignasiónpe ojepuru hag̃ua peteĩ vidéo térã pe estudiánte odesidíramo oipuruseha, ndohechaukái vaʼerã la vidéo ojapokuévo idemostrasión, péro si opresenta ha oanalisa vaʼerã.

JAIKO KRISTIÁNO TEÉICHA

15. Ojepuraheipa rire, 15 minúto aja ojejapóta peteĩ térã mokõi párte oipytyvõtava ermanokuérape omoĩ hag̃ua en práktika umi mbaʼe oaprendéva la Bíbliagui. Ko párte ikatu ojapo peteĩ ansiáno térã peteĩ siérvo ministeriál ikatupyrýva, pe prográma ndeʼírima guive espesífikamente mávapa ojapo vaʼerã. Péro pe párte hérava “Umi mbaʼe ideprovéchotava kongregasiónpe” peteĩ ansiánomante ojapo vaʼerã. Oĩramo peteĩ párte ojerurehápe oñeanalisa hag̃ua ermanokuérandi, pe ermáno oipurúta umi pregúnta oĩva voi upépe ha ikatu avei oporanduve ótra kósa. Oñepyrũ hag̃ua pe ermáno mbykymínte oñeʼẽ vaʼerã, ikatu hag̃uáicha oñeanalisa porã umi púnto prinsipál ha avei ermanokuéra okomenta hag̃ua. Ojejapótaramo peteĩ entrevísta, ijáma guive, iporãveta pe oñeentrevistátava ojupi pe platafórmape voi ha ndahaʼéi iñasiénto guivénte.

16. Estúdio bíblico kongregasionpegua (30 minúto): Ojapo vaʼerã peteĩ ansiáno ikatupyrýva. (Ndaipóriramo heta ansiáno, ikatu avei oñeasigna umi siérvo ministeriál ikatupyrývape). Pe kuérpo de ansiáno ohecha vaʼerã máva mávapa ikatupyry ojapo hag̃ua ko párte. Umi ermáno oñenkarga vaʼerã oñeanalisapa hag̃ua pe informasión órape, orresalta vaʼerã umi téxto iñimportantevéva ha oipytyvõ vaʼerã ermanokuérape ohecha hag̃ua mbaʼéichapa ideprovécho la ojestudiáva. Upearã ikatu oipytyvõ chupe umi instruksión ohechaukáva mbaʼéichapa ojejapo vaʼerã umi párte orekóva pregúnta ha rrespuésta (w23.04 páh. 24, rrekuádro). Oimérõ oñeanalisapa porãma la informasión, natekotevẽi oñembopukuve la estúdio ojehupyty hag̃ua si o si 30 minúto. Ikatúma guive, káda semána odirihi ha olee vaʼerã diferénte ermáno. Pe presidénte ojeruréramo pe odirihívape omombykymie hag̃ua la estúdio, haʼe odesidíta mbaʼéichapa ojapóta upéva. Por ehémplo, ikatu ohecha mbaʼe párrafopa ndojeleemoʼãi.

OJEʼÉTAVA OPA HAG̃UA PE RREUNIÓN

17. Tres minúto. Pe presidénte omombeʼúta umi mbaʼe iñimportantevéva oñeaprende vaʼekue upe rreuniónpe. Avei omensionáta mbaʼépa ojehecháta pe semána oúvape. Oĩramo tiémpo, ikatu heʼi máva mávapa orekóta umi párte estudiantíl ótra semánape. Oĩ jave anúnsio térã kárta ojelee vaʼerã, pe presidénte ojapo vaʼerã upéva ko pártepe, noiméiramo oĩ algúna instruksión espesífika heʼíva ojejapo vaʼerãha upéva ótro moméntope. Noñeanunsiái vaʼerã platafórma guive umi mbaʼe pe kongregasión siémpre ojapóva jepi voi, por ehémplo mávapepa otoka limpiésa, moõ ha mbaʼe órapa ojepredikáta ha umícha. Koʼã mbaʼe oñemoĩ vaʼerã pe tavléro de anúnsiope. Pe presidénte ohechakuaáramo nomeʼẽmoʼãiha chupe la tiémpo ojapopa hag̃ua umi anúnsio térã olee hag̃ua umi kárta, ikatu ojerure oñemombykyve hag̃ua umi párte ojerekóva Jaiko Kristiáno Teéichape (ehecha párrafo 16 ha 19). Oñemohuʼã hag̃ua pe rreunión, ojepurahéita ha upéi oñeñemboʼéta.

OJEFELISITA HA OÑEMEʼẼ JAVE KONSÉHO

18. Ojejapopa rire káda asignasión estudiantíl, pe presidénte ikatu oipuru un minúto térã saʼive ofelisita hag̃ua pe oreko vaʼekuépe párte, ha omeʼẽ hag̃ua chupe konsého orekóvo enkuénta pe leksión ombaʼapo haguépe. Péro opresenta jave umi orekótavape asignasión, ndeʼimoʼãi mbaʼe leksiónpa otoka chupe. Ojejapopa rire káda asignasión, pe presidénte oguerohorýta pe estudiántepe, upéi omombeʼukuaa mbaʼe leksiónpepa ombaʼapo raʼe ha heʼíta chupe mbaʼérepa ojapo porã, ha tekotevẽramo heʼi porãtante chupe mbaʼépepa ikatu omehora. Pe presidénte ikatu avei omensiona ótra kósa ojejapo porã vaʼekue pe pártepe, ohechakuaáramo upéva ideprovechotaha pe estudiántepe térã ermanokuérape. Oiméramo pe ermáno térã ermána oikotevẽ ótro konsého ojapo porãve hag̃ua pe leksión, térã omehorave hag̃ua ótra kósape, pe presidénte ikatu heʼi chupe opa rire pe rreunión térã opyta porã vove. Upearã ikatu oipuru umi folléto Pe oporohayhúva ha Ñamboʼe porãve hag̃ua, térã pe lívro Eñembokatupyrýke (eikuaave hag̃ua mbaʼe mbaʼépa ojapo vaʼerã pe presidénte ha pe konsehéro auxiliár, ehecha párrafo 19, 24 ha 25).

TIÉMPO

19. Entéro umi orekóva párte ndohasái vaʼerã hiʼóra, tahaʼe jepe raʼe pe presidénte. Pe Prográma rreuniónpe g̃uarãme heʼíma voi mboýpa odura vaʼerã káda párte, péro oimérõ ojeexplikapáma la informasión natekotevẽi oñembopuku rei oñekompletaségui pe tiémpo oñemoĩva. Oiméramo algúno ohasa itiémpo ojapokuévo iñasignasión, pe presidénte térã pe konsehéro auxiliár oñeʼẽ vaʼerã haʼeñoháme upe ohasa vaʼekuéndi hiʼóra oakonseha hag̃ua chupe (ehecha párrafo 24 ha 25). Pe rreunión kompletoite oduráta 1 óra 45 minúto, upévape oikéma umi kántiko ha ñemboʼe.

SUPERINTENDÉNTE DE SIRKUÍTO OVISITA JAVE KONGREGASIÓN

20. Pe visíta del superintendénte aja, oñekambiaʼimíta pe Prográma rreuniónpe g̃uarã. Ndojejapomoʼãi pe “Estúdio bíblico kongregasionpegua”, upéva rangue pe superintendénte de sirkuíto ojapóta peteĩ diskúrso de servísio de 30 minúto. Péro pe diskúrso mboyve pe presidénte ojapóta peteĩ rrepáso ha omombeʼúta avei umi mbaʼe ojehechátava pe semána oúvape. Tekotevẽramo, ojapóta umi anúnsio ha oleéta umi kárta, ha upéi opresentáta pe diskúrso de servísio ojapótava pe superintendénte de sirkuíto. Ojapopa rire idiskúrso, pe superintendénte de sirkuíto omohuʼãta pe rreunión, ha ojepurahéita pe kántiko haʼe voi oiporavo vaʼekue. Upéi ikatu ojerure ótro ermánope oñemboʼe hag̃ua. Pe visíta del superintendénte aja, pe segunda sála ndojepurumoʼãi ojejapo hag̃ua umi párte estudiantíl. Oĩramo ótro grúpo oñerreuníva jepi pe segunda sálape, lomímonte ikatu ojapo apárte la irreunión pe visíta aja. Péro pe superintendénte de sirkuíto ojapóta vove pe diskúrso de servísio, omoirũ vaʼerã pe kongregasiónpe ohendu hag̃ua pe diskúrso.

ASAMBLÉA SEMÁNAPE

21. Otoka jave pe aty guasu un diagua ha tres diagua ñane kongregasiónpe, upe semánape ndojejapomoʼãi ni peteĩ rreunión. Péro oñemomanduʼa vaʼerã ermanokuéra tostudia hógapente umi informasión oñehesaʼỹijótava kuri rreunionhápe upe semánape, tahaʼe haʼeñoháme térã ifamíliandi.

KONMEMORASIÓN SEMÁNAPE

22. Pe Konmemorasión hoʼáramo éntre semána, ndojejapomoʼãi pe rreunión Mbaʼéichapa Jaiko ha Japredika vaʼerã.

SUPERINTENDÉNTE DE RREUNIÓN MBAʼÉICHAPA JAIKO HA JAPREDIKA VAʼERÃ

23. Pe kuérpo de ansiáno odesidíta mávapa umi ansiáno apytégui oservíta kómo superintendénte de rreunión. Ko superintendénte ojapo vaʼerã la tekotevẽva guive pe rreunión oñeorganisa porã hag̃ua ha ojesegi hag̃ua umi instruksión oĩva koʼápe. Oñemongeta pyʼỹi vaʼerã pe konsehéro auxiliár ndive. Og̃uahẽre pe Prográma rreuniónpe g̃uarã, pe superintendénte de rreunión oasignáma vaʼerã máva mávapa orekóta entéro umi párte pe rreunión éntre semanaguápe umi 2 mésepe g̃uarã. Por ehémplo, oasigna vaʼerã umi párte estudiantíl, umi ndahaʼéiva estudiantíl ha mávatapa presidénte umi rreunión éntre semanaguápe. Umi párte ndahaʼéiva estudiantíl ha pe presidénsia oñeasigna vaʼerã sólamente umi ermáno pe kuérpo de ansiáno oaprova vaʼekuépe (ehecha párrafo 3-16 ha 24). Pe superintendénte de rreunión oasigna mboyve umi párte estudiantíl térã umi ótra párte, oreko vaʼerã enkuénta mbaʼe témarepa oñeñeʼẽta hína, mboy áñopa oreko upe ojapótava ha avei ikapasida. Entéro umi asignasión oñemeʼẽma vaʼerã por lo méno 3 semána ánte. Oñeasigna hag̃ua umi párte estudiantíl ojepuru vaʼerã pe formulário de Asignasión rreuniónpe g̃uarã. Mbaʼéichapa Jaiko ha Japredika vaʼerã (S-89). Pe superintendénte ojaseguráta oñemoĩ hag̃ua pe prográma kompletoite pe tavlérope. Pe kuérpo de ansiáno ikatu oasigna peteĩ ansiáno térã peteĩ siérvo ministeriálpe oipytyvõ hag̃ua chupe. Péro umi ansiáno añoite ikatu oasigna mávapa ojapóta umi párte ndahaʼéiva estudiantíl.

OMOAKÃVA RREUNIÓN MBAʼÉICHAPA JAIKO HA JAPREDIKA VAʼERÃ (PRESIDÉNTE)

24. Káda semána peteĩ ansiáno omoakãta ko rreunión oñepyrũ guive opa peve. (Umi kongregasión ndaiporihápe heta ansiáno, ikatu avei oñeasigna umi siérvo ministeriál ikatupyrývape). Pe presidénte ojapóta peteĩ introduksión ha peteĩ konklusión opa hag̃ua la rreunión. Avei opresentáta káda ermáno orekótavape párte, ha oimérõ ndahetái umi ansiáno, pe presidénte ikatu avei ojapo ótra párte pe rreuniónpe, espesiálmente umi párte tekotevẽhápe ojehechaukánte algún vidéo. Pe presidénte mbykymínte oñeʼẽ vaʼerã káda ermáno ojapopa rire ipárte. Pe kuérpo de ansiáno oiporavo vaʼerã mávapa ijapyteguikuéra ikatupyry omoakã porã hag̃ua pe rreunión. Umi ansiáno ojeporavóva, oñoturnáta ohóvo omoakã hag̃ua la rreunión. Oĩ kongregasión tekotevẽtahápe pe superintendénte de rreunión omoakã pyʼỹive pe rreunión umi ótro ansiáno ikatupyrývagui. Peteĩ ansiáno ikatupyrýramo omoakã hag̃ua pe “Estúdio bíblico kongregasionpegua”, majórmente heʼise hína ikatupyryha avei ojapo hag̃ua de presidénte. Iñimportanteterei hína pe presidénte omokyreʼỹkuaa umi estudiántepe ha oiméramo tekotevẽ omeʼẽ chupekuéra algún konsého oñeʼẽ vaʼerã mborayhúpe. Avei ojasegura vaʼerã pe rreunión opa hag̃ua oraitépe (ehecha párrafo 17 ha 19). Pe presidénte oipotáramo ha oĩramo lugár pe platafórmape, ikatu oñemoĩ ótro mikrófono upépe, péicha omombeʼu aja mávapa orekóta párte, pe ermáno ojapótava iñasignasión ikatúma oñemoĩ pe atrílpe. Térã ikatu avei pe presidénte oreko pe platafórmape voi peteĩ mesa ha sílla, ha upe guivénte opresenta umi orekótavape iñasignasión pe párte estudiantílpe. Péicha ikatúta ojepuru porãve la tiémpo.

KONSEHÉRO AUXILIÁR

25. Ikatúma guive iporãta ojeporavo kómo konsehéro auxiliár peteĩ ansiáno heta tiémporema ojapóva diskúrso. Tekotevẽramo oñeakonseha umi ansiáno ha siérvo ministeriál orekóvape párte rreunionhápe, haʼe oñenkarga vaʼerã omeʼẽ la konsého chupekuéra haʼeñoháme. Por ehémplo umi orekóvape párte rreunión éntre semanaguápe, umi ojapóvape diskúrso púvliko ha umi omoakãva ha oleévape Ñemañaha ha Estúdio bíblico kongregasionpegua (ehecha párrafo 19). Peteĩ kongregasiónpe oĩramo heta ansiáno ikatupyrýva oporomboʼe hag̃ua ha ojapo porãva diskúrso, káda áño ikatu ojeporavo ijapyteguikuéra peteĩ konsehéro auxiliár diferénte, ha péicha oñoturna hikuái. Natekotevẽi káda ke umi ermáno ojapo ipárte omeʼẽ chupekuéra konsého.

SEGUNDA SÁLA

26. Oimérõ pe kongregasiónpe oĩ heta oñanotáva ojapo hag̃ua umi párte estudiantíl, ikatu avei ojejapo umíva segunda sálape. Upépe omoakãta peteĩ ermáno ikatupyrýva, ha haʼe oakonseháta umi orekóvape párte. Iporãvéta haʼéramo peteĩ ansiáno, péro tekotevẽramo ikatu ojeporavo peteĩ siérvo ministeriál ikatupyrývape. Pe kuérpo de ansiáno odesidíta máva mávapa ojapóta ko tembiapo, ha ojopyrútapa hikuái térãpa nahániri. Pe ermáno omoakãva osegi vaʼerã umi instruksión oĩva párrafo 18-pe. Opa rire “Óro kuʼi oĩva la Bíbliape”, ojejeruréta umi orekótavape párte segunda sálape oho hag̃ua upépe. Ojejapopa rire umi párte estudiantíl ikatu ohasa jey hikuái pe sála prinsipálpe.

VIDÉO

27. Umi vidéo ojehechaukátava rreunionhápe oñemoĩta ñane aplikasión JW Líbrarype. Koʼãva oĩta disponívle selulár, távlet ha komputadórape.

S-38-GI 11/23