Ikatúpa jajerovia gueteri “Antiguo Testamento” rehe?
ÁÑO 1786-pe peteĩ doktór Franciaygua ojapo peteĩ lívro hérava Traité dʼanatomie et de physiologie oñeʼẽva Anatomía ha Fisiologíare. Ojeʼe ndaiporihague yma peichagua lívro omombeʼu porãitéva mbaʼéichapa ombaʼapo umi nérvio ñande retépe. Saʼietereíma oĩ ha ndaʼaréi oñevende peteĩ lívro 27 mil dólares rehe. Péro koʼág̃a rupi ndaiporimoʼãi ojeroviáva peteĩ doktór rehe oiporúramo upe lívro itujaitéva. Jepe oñemombaʼe koichagua lívro, ndojeporuvéima ojekuaa hag̃ua mbaʼéichapa oñepohãnóta umi hasývape.
Heta oĩ opensáva avei upéva “Antiguo Testaméntore”. Haʼekuéra omombaʼe umi mbaʼe heʼíva tetã Israel yma guarére ha umi poesía porãite orekóva. Péro ndogueroviái ikatuneha ñanepytyvõ koʼág̃a, ojapógui 2400 áño rasa ojehaihague. Koʼág̃a umi sientífiko hetave mbaʼéma oikuaa, negósio ha familiakuéra koʼag̃agua ndahaʼeiete yma guaréicha. Philip Yancey karai omoakãvaʼekue rrevísta hérava Christianity Today, ohai peteĩ lívro hérava La Biblia que leyó Jesús. Upépe heʼi: “Antiguo Testamento heta vése noñentendéi, ha oñentende jave omongavaju hentekuéra koʼag̃aguápe. Upévare ha hetave mbaʼére ndojeleevéi”. Ko mbaʼe ndojeʼéi koʼág̃ante.
Amo áño 100 rupi, omano rire apóstol Juan, peteĩ kariaʼy ipláta hetáva hérava Marción heʼi kristianokuéra nomombaʼeivaʼerãha “Antiguo Testamento”. Robin Lane Fox héra peteĩ karai Inglaterraygua iñarandúva istóriape. Haʼe heʼi Marciónpe g̃uarã “‘Ñandejára’ Antiguo Testamentopegua ‘ipyʼahatãitereiha’ ha oñangarekoha umi vandído ha terrorístare, umíva apytépe Israel mburuvicha rréi David. Crístore katu jahecha peteĩ Ñandejára ipyʼaporãva ndahaʼéiva upeichagua”. Heʼi avei koʼã mbaʼépe “oñehenoiha ‘marcionismo’ ha ogustaha heta tapichápe oikóva síglo cuatro peve. Umi oguerohoryvéva Orienteygua oñeʼẽva siríakope”. Ohasáma 1600 áño upe hague ha oĩ gueteri heta opensáva péicha. Upévare Philip Yancey heʼi “kristianokuéra apytépe oĩha hetaiterei ndoikuaáiva mbaʼépa heʼi Antiguo Testamento. Ha umi tapicha koʼag̃agua hesaráima chugui”.
Oñemyengovia piko pe “Antiguo Testamento”? Mbaʼéichapa ikatu ñantende peteĩnteha ‘Jehová oñorairõkuaáva’ “Antiguo Testamento” oñeʼẽha ha ‘mborayhu ha pyʼaguapy Jára’ “Nuevo Testamento” oñeʼẽha? (Éxodo 15:3, ÑÑM; 2 Corintios 13:11.) Ikatúnepa ñanepytyvõ “Antiguo Testamento” heʼíva?