‘Emaʼẽke rejapopa porã hag̃ua ne rembiaporã Ñandejára omeʼẽvaʼekue ndéve’

‘Emaʼẽke rejapopa porã hag̃ua ne rembiaporã Ñandejára omeʼẽvaʼekue ndéve.’ (COLOSENSES 4:​17, BNP.)

1, 2. Mbaʼépa ñane rresponsavilida ñande rapichakuéra ndive g̃uarã?

ÑANDE kristianokuéra ningo tuicha ñane rresponsavilida ñande rapichakuéra ndive g̃uarã. Haʼekuéra odesidívare koʼág̃a ikatu oikove térã omanohína og̃uahẽ vove ‘pe jehasa asy guasu’ (Apocalipsis [Revelación] 7:14). Ñandejára Ñeʼẽme heʼi ñandéve kóicha: “Enohẽ jejopýgui umi oñembotyryrývape ojejuka hag̃ua, eipeʼa ivaívagui ani ojejuka”. Aje piko tuichaite mbaʼe koʼápe heʼíva! Ha añetehápe nañamombeʼúiramo ñande rapichápe mbaʼépa ojapovaʼerã, ikatuhína omano ñandekáusa. Upévare Ñandejára Ñeʼẽ heʼi avei: ‘Erérõ: “Che ningo ndaikuaáikuri.” Reimoʼãpa ndoikuaamoʼãiha pe ñandepyʼapy ohechapáva? Pe omaʼẽva ñanderehe oikuaapáta, ha omyengoviáne peteĩteĩme hembiapokue ojerureháicha’. Upéicharõ, ñande jaservíva Jehovápe ndaikatúi jaʼénterõ ‘ndajaikuaaihákuri’ umi mbaʼe vai ohaʼarõva yvyporakuérape (Proverbios 24:​11, 12).

² Jehová ningo omombaʼeterei ñande rekove. Upévare, oipota ñañehaʼãmbaite jasalva opa ikatúvape. Enterove jaservíva Ñandejárape ñamombeʼuvaʼerã pe marandu porã oĩva Iñeʼẽme. Ñande ningo jajogua umi guárdia oporomomarandúvape oikótarõ peteĩ mbaʼe vai. Ndajaipotáingo ojeʼe ñanderehe ñande rapicha omanohague ñandekáusa (Ezequiel 33:​1-7). Upévare, tekotevẽterei ñañehaʼãmbaite ‘ñamosarambi pe marandu porã’ (jaleemína 2 Timoteo 4:​1, 2, 5).

3. Mbaʼépa jahecháta koʼág̃a ha upe rire avei?

³ Koʼág̃a jahecháta mbaʼéichapa ikatu ñandepuʼaka heta mbaʼe ñandejokosévare ani hag̃ua japredika, ha mbaʼéichapa ikatu ñaipytyvõ hetave ñande rapichápe. Upe rire jahecháta mbaʼéichapa ikatu ñañembokatupyry ñamboʼe porãve hag̃ua Ñandejára Ñeʼẽ. Ipahápe katu jahecháta mbaʼeichaitépa heta mbaʼe porã jahupytyñaína japredikahaguére oparupiete. Péro ñahesaʼỹijo mboyve koʼã mbaʼéna jahechami mbaʼérepa ijetuʼueterei koʼág̃a rupi opa mbaʼe.

Mbaʼérepa ñande rapichakuéra nohaʼarõvéima mbaʼeve iporãva?

4, 5. Mbaʼépa jahasa koʼág̃a rupi, ha mbaʼéichapa heta ñande rapicha oñeñandu upévare?

⁴ Opa mbaʼe oikóva ko múndope ohechauka jaikomaha ‘pe ára pahápe’, ha og̃uahẽmbotaitemaha huʼãme. Hetaiterei mbaʼe vai ningo jahasa koʼág̃a rupi. Koʼã mbaʼére Jesús ha hemimboʼekuéra heʼivaʼekue jahechakuaataha jaikomaha ‘pe ára pahápe’. Umi mbaʼe ñanembohasa asýva apytépe oĩ umi ñorairõ, ñembyahýi ha yvyryrýi. Opárupi avei oĩ umi haʼenteséva, oikóva iñakãre ha nomombaʼéiva Ñandejárape. Añetehápe ningo ijetuʼu koʼág̃a rupi, ñañehaʼãramo jepe jajapo Ñandejára Ñeʼẽme heʼíva (Mateo 24:​3, 6-8, 12; 2 Timoteo 3:​1-5).

⁵ Jahechakuaa avei hetaiterei oĩha ndoikuaáiva mbaʼérepa oiko koʼã mbaʼe. Upéicha rupi ojepyʼapyeterei hikuái ijehe ha ifamiliakuérare, térã opyta vaieterei ohasa rire oimeraẽ mbaʼe vai térã omano rire peteĩ hogaygua. Ha ndoikuaaporãigui mbaʼérepa oiko koʼã mbaʼe ha mbaʼéichapa oñesolusionáta, nohaʼarõvéima mbaʼeve iporãva (Efesios 2:12).

6. Mbaʼérepa ‘Babilonia Guasu’ noipytyvõi avavépe?

⁶ ‘Babilonia Guasu’, térã umi rrelihión japu noipytyvõi ñande rapichakuérape. Ombotavy ha oheja vai chupekuéra. Upévare ndoikuaavéima hikuái mbaʼépa Ñandejára rembipota. Ha peteĩ kuña reko vai ojapoháicha, ombojuruheʼẽ ha oreko ipoguýpe umi ‘mburuvicha guasukuérape’. Haʼekuéra oporombotavy ha ojapouka heta mbaʼe noĩporãiva, umíva apytépe máhia, paje ha hetave mbaʼe vai. Omoĩ avei tapichakuérape umi polítiko poguýpe. Péicha pe rrelihión japu omboykete Ñandejára rape ikatu hag̃uáicha hetápe oreko ipoguýpe (Apocalipsis [Revelación] 17:​1, 2, 5; 18:23).

7. Mbaʼépa ohaʼarõ hetaiterei tapichápe, péro mbaʼéichapa ikatu ñaipytyvõ chupekuéra?

⁷ Jesús heʼivaʼekue hetaitereive tapicha oĩha oguatáva pe tape guasu oporoguerahávare ñehundípe (Mateo 7:​13, 14). Oĩ ohóva upe tapére oikuaáramo jepe mbaʼépa heʼi la Biblia. Péro heta avei oĩ ohóva upérupi oñembotavýgui chupekuéra. Ojeʼe umi tapichápe oikohahína hikuái Ñandejára oipotaháicha. Upéicharõ jepe, ikatu oĩ okambiáva ojehechaukáramo chupe la Bíbliape mbaʼérepa okambiavaʼerã. Péro umi opytáva Babilonia Guasúpe ha ndoikuaaseivahína mbaʼeve Ñandejára Ñeʼẽgui, omanóta ‘pe jehasa asy guasúpe’ (Apocalipsis [Revelación] 7:14).

Japredika ‘memékena’

8, 9. Mbaʼépa ojaporakaʼe umi kristiáno ypykue oñepuʼãmbárõ guare hesekuéra, ha mbaʼérepa?

⁸ Jesús heʼivaʼekue hemimboʼekuéra omosarambivaʼerãha pe marandu porã ha oipytyvõvaʼerãha hapichakuérape oguata hag̃ua Ñandejára rapére (Mateo 28:​19, 20). Ñasẽvaʼerã japredika jahechauka hag̃ua jajepytasoha Ñandejára ykére ha jajeroviaha hese. Upévare jahechakuaa mbaʼérepa Jesús remimboʼekuéra osegi opredika oĩramo jepe opuʼãva hesekuéra. Ojerure hikuái Jehovápe tomombarete chupekuéra osegi hag̃ua opredika “kyhyjeʼỹre”. Ha Jehová omeʼẽ chupekuéra ijespíritu sánto. Upévare ipyʼaguasu hikuái oñeʼẽ hag̃ua Ñandejárare (Hechos 4:​18, 29, 31).

⁹ Ikangýpa Jesús remimboʼekuéra oñepuʼãmbárõ guare hesekuéra? Nahániri. Jahechami mbaʼépa oikorakaʼe. Umi hudíope omoakãva ipochy Jesús apostolkuéra opredikahaguére. Upévare ojagarra, oamenasa ha ombyepoti chupekuéra. Upéicharõ jepe, haʼekuéra “oporomboʼe ha omoherakuã meme Jesucristo réra”. Oikuaa porã hikuái ‘iñeʼẽrenduvaʼerãha Ñandejárape yvypórape rangue’ (Hechos 5:​28, 29, 40-42, BNP).

10. Mbaʼépa ñambohovái jepi koʼág̃a rupi, péro mbaʼépa jahupyty jajapohaguére iporãva?

¹⁰ Koʼág̃a rupi Ñandejára siervokuéra apytépe saʼi oĩ oñembyepotíva térã ojegueraháva préso opredikahaguére. Péro, enterove ñambohovái jepi opaichagua jejopy vai. Ikatu jaikógui Ñandejára Ñeʼẽ heʼiháicha, noĩporãihína ñande rapichakuérape g̃uarã térã ohechakuaa hikuái ndajajoguaiha chupekuéra. Ñane irũnguéra ñande travahohapegua térã eskuelapegua ha ñane vesinokuéra avei ikatu oimoʼã ñaĩvaiha ñane akãme jajapohaguére opa mbaʼe Ñandejára oipotaháicha. Ha opensáramo jepe hikuái upéicha, nañanemokangyivaʼerã. Yvyporakuéra ningo oĩ pytũmbýpe omboykégui Ñandejárape. Upévare ñande ‘ñamimbivaʼerã ijapytepekuéra umi estrélla omimbiháicha pyhare’ (Filipenses 2:15). Ikatu ningo oĩ umíva apytépe ohechakuaáva jajapoha iporãva, ha ohecharamógui upéva omombaʼeguasu avei Jehovápe (jaleemína Mateo 5:16).

11. a) Mbaʼépa ojapo jepi ñande rapichakuéra japredikahaguére? b) Mbaʼépa ojejapovaʼekue Pablo rehe, ha mbaʼépa haʼe heʼi?

¹¹ Jaikuaáningo ñandepyʼaguasuvaʼerãha japredika meme hag̃ua. Ikatu ningo ñande rapichakuéra, térã ñande rogaygua oñembohory ñanderehe térã ojapo oimeraẽ mbaʼe ñanemokangy hag̃ua (Mateo 10:36). Upéicha oikovaʼekue apóstol Pablo rehe. Chupe ningo heta vése oñembyepotivaʼekue opredikahaguére. Péro haʼe heʼi: ‘Rojejaʼo ha rojerereko asy rire jepe, Ñandejára orepytyvõ romombeʼu hag̃ua hembipota, pyʼaguasu ha ñorairõ paʼũme’ (1 Tesalonicenses 2:2). Ijetuʼunerakaʼe Páblope opredika hag̃ua. Chupe ningo ojejagarra, ojehejamoʼã opívo, oñembyepoti ha ojegueraha kárselpe (Hechos 16:​19-24). Mbaʼérepa haʼe ipyʼaguasu osegi hag̃ua opredika? Ojaposégui Ñandejára ohaʼarõva chugui (1 Corintios 9:16).

12, 13. Mbaʼeichagua provlémapa ikatu ñambohovaiñaína ha mbaʼépa ikatu jajapo jagueropuʼaka hag̃ua?

¹² Heta tapicha nohenduséi reínte pe marandu porã térã ndajatopái voi hesekuéra hógape, ha upéva ikatu ñanemokangy avei. Mbaʼépa ikatu jajapo oikóramo péicha ñande territóriope? Ikatu ñañembopyʼaguasu ha japredikave oimehárupi. Ñasẽkuaa avei ótra óra japredika hag̃ua térã jaha jatopatahápe hetave rehe (ñambojojami Juan 4:​7-15; Hechos 16:13; 17:17 rehe).

¹³ Ikatu avei ñaneg̃uaig̃ui térã ñandetuja ha ñande rasykatúgui nañasẽguasuvéi japredika. Oikóramo ñanderehe upéicha, aníkena ñanekangy. Jehová oikuaa porãiterei mbaʼépa ikatu jajapo ha omombaʼeterei opa mbaʼe jajapóva (jaleemína 2 Corintios 8:12). Ñambohováiramo jepe oimehaichagua provléma, jajapovaʼerã opa ikatúva ñañeʼẽ hag̃ua pe marandu porãre (Proverbios 3:27; ñambojoja Marcos 12:​41-44 heʼívare).

‘Ñamaʼẽkena jajapopa porã hag̃ua ñane rembiapo’

14. Mbaʼe ehémplopa omoĩvaʼekue Pablo iñermanokuérape, ha mbaʼépa heʼivaʼekue chupekuéra?

¹⁴ Apóstol Pablo omombaʼetereivaʼekue ipredikasión ha omokyreʼỹ iñermanokuérape omombaʼe hag̃ua avei (Hechos 20:​20, 21; 1 Corintios 11:1). Péro peteĩ árape omokyreʼỹ peteĩ kristiánope voi ojapo hag̃ua upéicha. Upéva hína Arquipo. Pablo ohaírõ guare umi Colosasguápe, heʼi: “Peje kóicha Arquípope: ‘Emaʼẽke rejapopa porã hag̃ua ne rembiaporã Ñandejára omeʼẽvaʼekue ndéve’” (Colosenses 4:17). Ndajaikuaáiningo mávapa rakaʼe Arquipo ni mbaʼépa ohasavaʼekue. Péro jahechakuaa oñemeʼẽhague chupe hembiaporã. Ha ñande oimérõ ñañemeʼẽmaraʼe Jehovápe, jarekóma avei ñane rembiaporã. Upéicharõ, ‘ñamaʼẽpa’ térã jajepyʼamongeta memépa hese jahecha hag̃ua jajapo porãpa ñaína?

15. Mbaʼépa jahechauka ñañemeʼẽvo Jehovápe, ha mbaʼépa ñañeporandukuaa upévare?

¹⁵ Ñande ningo ñañemeʼẽvaʼekue Jehovápe jajevautisa mboyve. Upéva jajapo ñañemboʼévo chupe ñande pyʼaite guive. Upéicha jahechauka jajaposeha Ñandejára rembipota. Upévare iporãta ñañeporandumi: “Añetehápepa amotenondeʼaína che rekovépe Ñandejára rembipota?”. Ikatu hína la Bíbliape voi heʼi ñandéve mbaʼépa jajapovaʼerã. Umíva apytépe ñamoĩ hag̃ua ñane famíliape oikotevẽva, ha Jehová ohaʼarõ jajapo upéicha (1 Timoteo 5:8). Péro, mbaʼéichapa jaiporu ñane tiémpo hembýva ñandéve? Mbaʼépa ñamotenondeveñaína ñande rekovépe? (Jaleemína 2 Corintios 5:​14, 15.)

16, 17. Mbaʼépa ikatu ojapo umi mitãrusu térã mitãkuña ha umi saʼi gueteri irresponsavilidáva?

¹⁶ Ndépa peteĩ mitãrusu térã mitãkuña reñemeʼẽmavaʼekue Jehovápe, ha remohuʼãmava ndekoléhio térã remohuʼãmbotaitémava? Ikatu ningo ndereguerekói gueteri rresponsavilida pohýi nde rogapýpe. Upéicharõ, mbaʼépa rejapose nde rekovépe? Nde ningo erémakuri Jehovápe rejapotaha hembipota, mbaʼépa upéicharõ nepytyvõta rejapo hag̃ua? Heta mitãrusu térã mitãkuña ohecha mbaʼéichapa oiporúta itiémpo ha mbaʼéichapa ojapóta hembiapo ikatu hag̃uáicha ojapo iprekursorádo. Upéicha rupi hetáma ovyʼa hikuái (Salmo 110:3; Eclesiastés 12:1).

¹⁷ Ikatu hína nde peteĩ kariaʼy térã kuñataĩ rembaʼapóva un diaite reñemantene hag̃ua, péro saʼi gueteri ne rresponsavilida. Katuete oimevaʼerã revyʼa reipytyvõhaguére kongregasiónpe ne tiémpo omeʼẽmiháicha ndéve. Péro, ikatúnepa revyʼave? Repensámapa mbaʼépa ikatu rejapo resẽve hag̃ua repredika? (Salmo 34:8; Proverbios 10:22.) Oĩ umi lugár tekotevẽha gueteri heta oñembaʼapo ojekuaauka hag̃ua opavavépe pe marandu porã. Ndépa ikatúne reipytyvõ chupekuéra? Ijáramo ndéve ningo ikatu reva umi lugár oñekotevẽhápe (jaleemína 1 Timoteo 6:​6-8).

18. Mbaʼépa ojapo peteĩ ermáno ha hembireko, ha mbaʼépa ohupyty hikuái upévare?

¹⁸ Jahechami mbaʼépa ojapovaʼekue Kevin ha hembireko Elenaa. Haʼekuéra oiko Estados Unídospe. Upe rupi umi omendaramóva ojoguavaʼerã hogarã. Haʼekuéra ojapo avei upéicha. Mokõivéva ombaʼapo un diaite ha oiko porã hikuái. Péro haʼekuéra hembiapo heta avei hogapýpe, upévare saʼíma osẽ predikasiónpe. Upeichaháguinte ohechakuaa hikuái ombaʼapoitereimaha umi mbaʼe orekóva rehehápe. Haʼekuéra ohecha mbaʼeichaitépa ovyʼa peteĩ ermáno ha hembireko ojapóva prekursorádo, péro ndorekóiva heta mbaʼe. Upévare ohechakuaa hikuái mbaʼépa omotenondevaʼerã hekovépe. Oñemboʼe rire Jehovápe oipytyvõ hag̃ua chupekuéra, ovende hikuái hóga ha ova peteĩ michĩvévape. Upe guive Elena saʼivéma ombaʼapo ha ojapo iprekursorádo. Haʼe omombeʼu iménape umi mbaʼe porã ohasáva predikasiónpe. Upéva omokyreʼỹeterei Kévinpe, ha ombaʼapo saʼive avei ojapo hag̃ua iprekursorádo. Upe riréma oho hikuái sudaméricape, peteĩ tetã oñekotevẽvehápe opredikavaʼerãre. Kevin heʼi: “Ore ningo rovyʼáva voínte oñondive, péro roñehaʼã guive rombaʼapove Jehovápe g̃uarã, rovyʼavéntema” (jaleemína Mateo 6:​19-22).

19, 20. Mbaʼérepa iñimportanteve ñamombeʼu pe marandu porã?

¹⁹ Ñamombeʼuvaʼerã pe marandu porã. Upéva ningo pe tembiapo iñimportantevéva ko Yvy ape ári (Revelación 14:​6, 7). Mbaʼérepa? Oñemopotĩ rupi upéicha Jehová réra (Mateo 6:9). Jajapóramo avei Ñandejára Ñeʼẽ heʼíva jaiko porãve ha ikatu hína ñandesalva. Káda áño hetave oĩ oservíva Jehovápe oñemombeʼu rupi ko marandu porã. Upévare oporanduhaguéicha pe apóstol Pablo: “Mbaʼéicha piko ohendúta, ndaipóriramo peteĩ oñeʼẽva chupekuéra upe marandu pyahúre?” (Romanos 10:​14, 15). Ajépa upeichaite. Upéicharõ, mbaʼérepa nañañehaʼãi jajapo opa ikatúva ñamombeʼu hag̃ua pe marandu porã?

²⁰ Jahechami mbaʼéichapa ikatu ñaipytyvõ ñande rapichápe ontende hag̃ua mbaʼérepa ijetuʼuete koʼág̃a rupi opa mbaʼe ha mbaʼépa oikóta hesekuéra oiporavo porã térã oiporavo vaíramo. Upévare, ñañembokatupyryvevaʼerã ñaporomboʼe hag̃ua. Pe artíkulo oúvape jahecháta mbaʼéichapa ikatu jajapo upéva.

[Nóta]

Mbaʼépa ñambohováita?

• Mbaʼe rresponsavilidápa jareko ñande rapichakuéra ndive g̃uarã?

• Mbaʼéichapa ikatu ñandepuʼaka heta mbaʼe ñandejokosévare ani hag̃ua japredika?

• Mbaʼéichapa ikatu jajapopa porã ñane rembiaporã oñemeʼẽvaʼekue ñandéve?

[Nóta oĩva taʼanga ndive páhina 10]

Ñandepyʼaguasuvaʼerã japredika hag̃ua oĩ jave opuʼãva ñanderehe