Mitãrusu ha mitãkuñanguéra, penemanduʼákena koʼág̃a pende Apoharére
“Nemanduʼákena nde apohare rehe ne mitãrusu [ha ne mitãkuña aja].” (ECLESIASTÉS 12:1, ÑÑB.)
1. Mbaʼéichapa jaikuaa Jehová ojeroviaha umi mitãrusu ha mitãkuñanguéra chupe oservívare?
JEHOVÁ omombaʼeterei umi mitãrusu ha mitãkuñanguérape, ojajáiva hikuái ysapýicha. Haʼe voi heʼivaʼekue Itaʼýra ‘oñepyrũ vove ogoverna’, oĩvaʼerãha mitãrusu ha mitãkuñanguéra oñekuaveʼẽva kyreʼỹme oservi hag̃ua Cristo poguýpe (Salmo 110:3). Upe profesía oñekumplivaʼerã peteĩ tiémpo oĩtahápe heta tapicha ndojeroviáiva Ñandejárare, naiñeʼẽrendúiva, opensáva ijehénte ha pirapirére. Péro Jehová oikuaa umi mitãrusu ha mitãkuñanguéra omombaʼeguasúva chupe ndaʼupeichamoʼãiha. Péicha jahecha mbaʼeichaitépa Jehová ojerovia hesekuéra!
2. Mbaʼépa heʼise ñanemanduʼa Jehováre?
2 Oiménepa Jehová ovyʼaite ohechávo mbaʼeichaitépa heta mitãrusu ha mitãkuñanguéra imanduʼa hese (Eclesiastés 12:1). Upeichaite, ñanemanduʼa Jehováre ndeʼiséi ñapensánte hese. Heʼise avei jajapo umi mbaʼe haʼe oguerohorýva ha ñañehekomboʼe Iñeʼẽ rupive koʼẽ koʼẽre. Heʼise avei jajeroviaha hese, oipotaha jahupyty umi mbaʼe iporãvéva (Salmo 37:3; Isaías 48:17, 18). Mitãrusu ha mitãkuñanguéra, pehechápa upéicha pende Apoharépe?
“Ejerovia Ñandejárare ndepyʼaite guive”
3, 4. Mbaʼéichapa Jesús ohechaukavaʼekue ojeroviaha Jehováre, ha mbaʼérepa ñande jajapovaʼerã avei upéicha?
3 Jesucristo ojeroviaitereivaʼekue Jehováre, upéicha omoĩ ehémplo neporãva ñandéve g̃uarã. Haʼe oikovaʼekue Proverbios 3:5, 6-pe heʼiháicha: “Ejerovia Ñandejárare ndepyʼaite guive, ha ani ndejehe añónte. Eikuaáke haʼe oĩha opa rupi, ha haʼe omyesakãtaha ndéve nde rape”. Jesús ojevautisa riremi, Satanás oikuaveʼẽ chupe ko múndo ha opa mbaʼe oĩva ipype (Lucas 4:3-13). Péro Jesús ndohejái Satanás ombotavy chupe. Haʼe oikuaa umi “mbaʼerepy, terakuã porã ha tekove añeteguáva” jahupytyha ‘ñañemomirĩ ha jakyhyjéramo Ñandejáragui’ (Proverbios 22:4, ÑÑB).
4 Koʼág̃a rupi, ko múndope oĩ hetaiterei tapicha itaryrýi ha ijehénte opensáva. Jahechakuaa rupi umi mbaʼe, tekotevẽ jasegi Jesús ehémplo. Mitãrusu ha mitãkuñanguéra, aníkena penderesarái Satanás oñehaʼãmbaiteha hína penemboyke Jehová rapégui, ani hag̃ua pehupyty jeikove opaveʼỹva. Chupe hiʼãiterei opavavénte oñehundi. Aníkena peheja penembotavy! Peñembopyʼapeteĩ uvei ha penemanduʼa pende Apoharére. Pejerovia hese pendepyʼaite guive ha peñehaʼã pehupyty pe “jeikove añeteguáva”, térã tekove opaveʼỹva. Penemanduʼákena koʼẽrõitéma pehupytytaha upéva (1 Timoteo 6:19).
Mitãrusu ha mitãkuñanguéra, penearandúkena
5. Mbaʼépa nde repensa ohaʼarõha ko múndo añáme?
5 Umi mitãrusu ha mitãkuña imanduʼáva Ijapoharére iñaranduve umi hapichakuéragui (jaleemína Salmo 119:99, 100). Oikuaa rupi mbaʼépa ojapóta Jehová koʼẽrõite, nohaʼarõi mbaʼeve iporãva ko múndo añágui. Oiméramo jepe ne mitã gueteri, katuete rehechakuaáta mbaʼéichapa la hénte koʼẽ koʼẽre okyhyje ha ojepyʼapyve. Ha oiméne rehendu avei ojeʼéramo oñemongyʼa ha oñembyaipaha ñande yvy, ojeitypaha yvyramatakuéra ha hetave mbaʼe vai oikóva. Koʼã mbaʼe oipyʼapy hetaitereípe, péro ñande testigos de Jehová añoite jahechakuaa oñekumpliha ohóvo pe profesía ohechaukáva oñehundipotaitemaha ko múndo aña oĩva Satanás poguýpe (Apocalipsis [Revelación] 11:18).
6. Mbaʼéichapa oĩ heta mitãrusu ha mitãkuña hoʼáva mbaʼe vaípe?
6 Ñambyasyete ningo oĩhaguére mitãrusu ha mitãkuñanguéra ikangýva ijeroviápe noñehaʼãi rupi, ha hesarái ko múndo oñehundipotaitemaha. (2 Pedro 3:3, 4). Oĩ katu hoʼáva mbaʼe vaípe ohechahaguére taʼanga tieʼỹ térã ijúnta vai rupi (Proverbios 13:20). Ivaieténepa Jehová ñane mboykéramo ko ára pahápe! Ani hag̃ua oiko ñanderehe upéva, jahechami mbaʼépa oikovaʼekue umi Isrraelguáre oĩrõ guare hikuái pe ñu hérava Moábpe. Pe áño 1473, Jesús ou mboyve, haʼekuéra oĩmavaʼekue oike hag̃uáicha pe yvy oñeprometevaʼekuépe chupekuéra. Mbaʼépa oiko hesekuéra?
Hoʼa ohupyty mboyve Jehová oprometevaʼekue chupekuéra
7, 8. a) Mbaʼe ñuhãpa oiporuvaʼekue Satanás Moábpe? b) Mbaʼe ñuhãpa Satanás oiporu koʼág̃a rupi?
7 Satanás oñehaʼãmbaitevaʼekue ani hag̃ua umi Israelgua ohupyty Ñandejára oprometevaʼekue chupekuéra. Ñepyrũrã, oñehaʼãmbaite proféta Balaam rupive oñemaldesi hag̃ua upe tetãme, péro osẽ vai chupe. Upe rire, oiporu peteĩ ñuhã oity hag̃uáicha chupekuéra: oiporu umi kuña Moabgua omoakãraku hag̃ua umi Israelguápe ha upéicha opyta vai hikuái Jehová renondépe. Upérõ heta oĩ hoʼáva Satanás ñuhãme. Hetaiterei ijapyteguikuéra heko vai umi kuña Moabgua ndive ha omombaʼeguasu avei Baálpe. Oĩramo jepe ohupyty hag̃uáicha upe oñeprometevaʼekue chupekuéra, veinticuatro mil Israelgua omano. Ajépa ivaiete upe oikovaʼekue! (Números 25:1-3, 9.)
8 Ñande ñaime jahupyty hag̃uáicha peteĩ mbaʼe iporãvéva upe yvy oñeprometevaʼekuégui: Ñandejára múndo pyahu. Koʼág̃a, Satanás oiporu jey hína teko vai oity hag̃ua Jehová siervokuérape. Ko múndope ojehecha teko vai mbaʼeveʼỹrõguáicha, ha umi kuimbaʼe oikóva hapicha kuimbaʼéndi térã kuña oikóva hapicha kuñándi katu, heʼi hikuái káda uno odesidivaʼerãha upéva. Peteĩ sy heʼi: “Mokõi hendápente che membykuéra ohendu ivaiha oiko oñondive umi nomendáiva ha umi kuimbaʼe oikóva kuimbaʼéndi: che rógape ha Salón del Réinope”.
9. Mbaʼe provlémapa ohasa umi mitãrusu ha mitãkuñanguéra, ha mbaʼéichapa ikatu ombohovái upéva?
9 Umi mitãrusu ha mitãkuñanguéra imanduʼáva Ijapoharére, oikuaa ndaivairiha kuimbaʼe ha kuña oiko oñondive. Upéicha rupi jaikove ko Yvy ape ári. Péro haʼekuéra oikuaa umi omendávante ikatuha oiko oñondive (Hebreos 13:4). Upéicharamo jepe, jahechakuaavaʼerã ijetuʼuha chupekuéra ojejoko hag̃ua imitã aja (1 Corintios 7:36). Mbaʼépa ikatu rejapo oúramo ne akãme umi mbaʼe tieʼỹ? Ejerure Jehovápe tanepytyvõ repensa hag̃ua umi mbaʼe iporãva rehe. Jehová katuete ohendu umi ipyʼaite guive oñemboʼévape chupe (jaleemína Lucas 11:9-13). Iporãta avei reñemongetáramo nde rapichándi umi mbaʼe nepytyvõtavare.
Peiporavo porãkena umi mbaʼe pehupytyséva
10. Mbaʼéichapa naiporãi repensa, ha mbaʼépa ikatu reñeporandu?
10 Ko múndope oĩ hetaiterei mitãrusu ha mitãkuña oikóva iñakãre ha vyʼarã rapykuérinte. Upéva oiko nopensái rupi henonderãre, ndoikuaáigui Ñandejárape ha nohaʼarõigui mbaʼeve iporãva (Proverbios 29:18). Haʼete avei umi Israelgua oikovaʼekue Isaías tiémpope, oñemeʼẽrõ guare vyʼápe ha oiko víno ha soʼo hoʼu hag̃uánte (Isaías 22:13). Reikose rangue haʼekuéraicha, mbaʼérepa nderejepyʼamongetái umi mbaʼe porãre Ñandejára omoĩva umi iñeʼẽrendúvape g̃uarã? Ikatu reñeporandu: “Aipotámapa og̃uahẽ Ñandejára múndo pyahu? Añehaʼãmbaitépa ‘aiko akãguapýpe ahaʼarõ aja umi mbaʼe porã’ Jehová oprometevaʼekue?” (Tito 2:12, 13). Rembohovái rire koʼã porandu rehechakuaáta repensápa koʼã mbaʼére reiporavo jave umi mbaʼe rehupytyséva.
11. Mbaʼérepa umi mitã, mitãrusu ha mitãkuñanguéra oñehaʼãvaʼerã oaprende porã umi mbaʼe oñemboʼéva koléhiope?
11 Ko múndope oñemokyreʼỹ mitãrusu ha mitãkuñanguérape oñehaʼã hag̃ua ohupyty umi estúdio ijyvatevéva. Ha oiméramo reike gueteri koléhiope, reñehaʼãvaʼerã reaprende porã umi mbaʼe oñemboʼéva upépe. Upéicha rejapórõ rejuhúta nde travahorã, péro iñimportanteveha, ikatúta reipytyvõ avei kongregasiónpe ha predikasionhápe. Upéva rejapo hag̃ua tekotevẽ repensakuaa, reñemongetakuaa ha remombaʼe nde rapichakuérape reñemongeta jave hendivekuéra. Upéicharamo jepe, la Biblia nemboʼéva iporãiteve opaichagua estúdiogui. Restudia ha reñehaʼãramo rejapo umi mbaʼe reaprendéva chugui, osẽ porãvéta ndéve umi mbaʼe rejapóva ha ikatúta reikove opa ára g̃uarã (jaleemína Salmo 1:1-3).a
12. Máva ehémplopa oñehaʼãvaʼerã osegi umi família oservíva Jehovápe?
12 Israélpe iñimportanteterei vaʼekue mitãnguéra oñehekomboʼe porã. Upéva ojapovaʼekue sy ha túva, ha omboʼe chupekuéra opa mbaʼe oñekotevẽva. Péro pe iñimportantevéva, oipytyvõ chupekuéra omombaʼeguasu hag̃ua Ñandejárape (Deuteronomio 6:6, 7). Ha umi mitã ohendúva isy ha itúvape ha opavave kakuaápe, oaprende heta mbaʼe porã oipytyvõtava chupekuéra. Péro oñehekomboʼe rupi Jehová Ñeʼẽre, haʼekuéra opensakuaa, ohechakuaa iporãva ha ivaíva ha iñaranduve (Proverbios 1:2-4; 2:1-5, 11-15). Koʼág̃a rupi, umi oservíva Jehovápe ohekomboʼevaʼerã avei péicha ifamíliape.
Ehendúkena umi nderayhúvape
13. Mbaʼe konséhopa oñemeʼẽ umi mitãrusu ha mitãkuñanguérape, ha mbaʼérepa oñatendevaʼerã hikuái?
13 Heta oĩ oñemoñeʼẽva mitãrusu ha mitãkuñanguérape. Umíva apytépe oĩ umi profesór omokyreʼỹva chupekuéra ostudia hag̃ua universidápe ikatu hag̃uáicha ohupyty heta mbaʼe porã ko múndope. Upéicha oikóramo ejerure Jehovápe tanepytyvõ, ha oñemeʼẽ jave ndéve peteĩ konsého ehecha mbaʼépa heʼi la Biblia upe mbaʼére. Ikatu avei rehecha umi puvlikasión omeʼẽva pe tembiguái jeroviaha. Restudia rupi la Biblia rehechakuaa Satanás oñehaʼãha opaicharei oity iñuhãme umi imitãvévape. Nemanduʼavaʼerã hardín de Edénpe oikovaʼekuére. Eva ndoikuaaivaʼekue heta mbaʼe gueteri, upévare ohendu Satanáspe, ndoikuaáiramo jepe chupe. Eva iñeʼẽrendúrire Jehovápe ndoikoivaʼerãmoʼã umi mbaʼe vai jahecháva koʼág̃a! Jehová katu ohechaukavaʼekue chupe ohayhu ha ojepyʼapyha hese (Génesis 3:1-6).
14. Mbaʼérepa rehenduvaʼerã Jehovápe, ha avei nde sy ha nde rúpe?
14 Jehová nderayhueterei ha ojepyʼapy nderehe. Haʼe oipota revyʼa opa ára g̃uarã, ndahaʼéi koʼág̃a añónte. Upévare, ñande Ru ñanderayhuetéva heʼi ñandéve: “kóva hína pe tape, tapeho koʼárupi” (Isaías 30:21). Ha oimérõ nde sy ha nde ru oñehaʼãmbaitehína oservi hag̃ua Jehovápe, upéva haʼe avei peteĩ vendisión. Ehendúkena chupekuéra ha ejapo umi mbaʼe heʼíva reiporavóta jave umi mbaʼe rehupytyséva ha iñimportantevéva nde rekovépe (Proverbios 1:8, 9). Haʼekuéra niko oipota nde rehupyty jeikove opaveʼỹva. Upéva tuichave mbaʼe umi mbaʼereta ha ñemombaʼe ko múndope oĩvagui (Mateo 16:26).
15, 16. a) Mbaʼérepa ikatu jajerovia Jehováre? b) Mbaʼépa ñanemboʼe Baruc ohasavaʼekue?
15 Imanduʼáva Ijapoharére ndoikói mbaʼereta rapykuéri, ojerovia rupi Jehová ‘ndohejaichéne ha nomotyreʼỹichéne hag̃ua chupekuéra arakaʼeve’ (jaleemína Hebreos 13:5). Péro ko múndope la hénte nopensái upéicha. Upévare ñañatendevaʼerã ani hag̃ua ñande avei ñapensa haʼekuéraicha (Efesios 2:2). Jahechami mbaʼépa oikovaʼekue Jeremías sekretáriore, hérava Baruc. Haʼe oikovaʼekue Jerusalénpe ijetuʼuve jave, oñehundi mboyvemi pe táva áño 607-pe Jesús ou mboyve.
16 Baruc oiko porãse vaʼekue ojepyʼapyʼỹre. Jehová ohechakuaa upéva ha heʼi chupe ani hag̃ua oheka mbaʼe guasu ijupe g̃uarã. Baruc iñumílde, iñakãguapy ha iñeʼẽrendu rupi Jehovápe, nomanói oñehundírõ guare Jerusalén (Jeremías 45:2-5). Hapichakuéra katu oiko mbaʼereta rapykuéri ha hesarái Jehovágui. Péro upe riremínte umi Babiloniaygua oipeʼapa chuguikuéra opa mbaʼe orekomíva, ha hetaiterei omano (2 Crónicas 36:15-18). Baruc ohasavaʼekue ñanemboʼe iporãveha ñaime porã Jehová ndive, jaipota rangue mbaʼereta ha ñanemombaʼe ñande rapichakuéra ko múndope.
Umi ehémplo porã ikatúva resegi
17. Mbaʼérepa Jesús, apóstol Pablo ha Timoteo ehémplo porã ñandéve g̃uarã?
17 Ñandejára Ñeʼẽme jajuhu heta ehémplo porã, ñanepytyvõtava jahupyty hag̃ua jeikove opaveʼỹva. Jahechamína Jesús ojapovaʼekue. Haʼe ikatupyryve vaʼekue opavavégui, upéicharamo jepe omotenonde pe tembiapo ikatúva ogueru jeikove opaveʼỹva: ‘oikuaauka marandu porã Ñandejára Rréino rehegua’ (Lucas 4:43). Ha mbaʼépa ikatu jaʼe apóstol Pablo rehe? Oservi porãségui Jehovápe, omboyke heta mbaʼe porã ikatuvaʼerãmoʼã ohupyty ha oñehaʼãmbaite opredika pe marandu porã. Timoteo osegivaʼekue apóstol Pablo ehémplo. Upévare Pablo heʼi hese “che raʼy añetete” (1 Timoteo 1:2, JMP). Ombyasýpa rakaʼe Jesús, apóstol Pablo ha Timoteo umi mbaʼe ojapovaʼekue? Mbaʼeveichavérõ. Apóstol Pablo katu ohechavaʼekue “ytýramo” umi mbaʼe ko múndo oikuaveʼẽva ombojojávo Ñandejára servísiore (Filipenses 3:8-11).
18. Mbaʼépa ojapo peteĩ ermáno imitãva, ha mbaʼérepa nombyasýi?
18 Jesús, apóstol Pablo ha Timoteo ojeroviahaguéicha, koʼág̃a avei heta mitãrusu ha mitãkuñanguéra ojerovia Jehováre. Pór ehémplo, peteĩ ermáno imitãva ha ombaʼapo porã vaʼekue ohai péicha: “Ajapo rupi Ñandejára Ñeʼẽ heʼíva, heta vése chemoĩ hikuái agana porãve hag̃uáme. Péro agana porãramo jepe, haʼeteváicha chéve ndahupytýiva mbaʼeve. Haʼérõ guare che patronkuérape aiporuseha che tiémpo aservi porãve hag̃ua Ñandejárape, heʼi hikuái opagavetaha chéve apytáramo ambaʼapo hendivekuéra. Péro che adesidíma mbaʼépa ajapóta. Heta oĩ nontendéi vaʼekue mbaʼérepa aheja che traváho agana porãhápe aservi hag̃ua Ñandejárape. Che ajapo upéva akumpliségui aprometevaʼekue Jehovápe añemeʼẽrõ guare chupe. Koʼág̃a amotenonde Ñandejára rembipota ha upéva chembovyʼaiterei. Aikuaa porã pláta ha ñemombaʼe ko múndope nomeʼẽmoʼãiha chéve upéva”.
19. Mbaʼépa ñamokyreʼỹ mitãrusu ha mitãkuñanguérape odesidi hag̃ua?
19 Hetaiterei mitãrusu ha mitãkuña ko Yvy ape ári iñakãguapy ha odesidi avei ojapo upéicha. Upévare, mitãrusu ha mitãkuñanguéra, pedesidíta vove mbaʼépa pejapóta pende rekovépe, aníkena pende resarái Jehová ára hiʼag̃uimaha (2 Pedro 3:11, 12). Ani reikose ko múndope ojeikoháicha. Upéva rangue ehendúkena umi nde rayhúvape. Embyatýramo “mbaʼeta yvágape”, ndaiporimoʼãi oipeʼavaʼerã ndehegui ha ikatúta rehupyty jeikove opaveʼỹva (Mateo 6:19, 20; jaleemína 1 Juan 2:15-17). Nemanduʼákena nde Apoharére ha rehecháta mbaʼéichapa nderovasa.
[Nóta]
a Reikuaave hag̃ua umi estúdio ijyvatevéva ha traváhogui, iporã rehechami La Atalaya 1 de octubre de 2005, páh. 26 guive 31 peve.
Ñambohovaimi koʼã porandu
• Mbaʼéichapa jahechauka jajeroviaha Ñandejárare?
• Mávapa ikatu ñanemboʼe porãve opavavégui?
• Mbaʼépa ñanemboʼe Baruc ohasavaʼekue?
• Máva mávapa omoĩ ehémplo porã ñandéve, ha mbaʼérepa?
[Nóta oĩva taʼanga ndive páhina 19]
Ndaipóri ñanerekomboʼe porãvéva Jehovágui
[Nóta oĩva taʼanga ndive páhina 21]
Baruc iñeʼẽrendu Jehovápe ha nomanói Jerusalén oñehundírõ guare. Mbaʼépa ikatu nemboʼe upéva?