Mbaʼe mbaʼépa ojapo María oñekumpli hag̃ua Ñandejára rembipota

JESÚS opredika jave hína peteĩ aty guasúpe osapukái sapyʼa peteĩ kuñakarai: “Ovyʼaiténepa pe kuña ndereruvaʼekue ko yvy ári ha nemongakuaavaʼekue!”. Jesucristo oipotárire ojeadora isýpe, oaprovechavaʼerãmoʼã upérõ heʼi hag̃ua chupekuéra upéva. Péro haʼe ombohovái: ‘Ovyʼaite uvei umi ohendúva Ñandejára Ñeʼẽ ha ojapóva pe Haʼe heʼíva!’ (Lucas 11:​27, 28).

Jesús arakaʼeve ndoadoraivaʼekue isýpe, ha ndojeruréi avei idisipulokuérape ojapo hag̃ua upéva. Mbaʼére piko upéicharõ hetaite oĩ oadoráva Maríape? Jahechamína mbaʼépa heʼi la Biblia heta mbaʼe ojegueroviávare koʼág̃a rupi.

Mbaʼe porãgui nerenyhẽva

Ánhel Gabriel heʼírõ guare Maríape mbaʼépa ojapovaʼerã oñekumpli hag̃ua Ñandejára rembipota, oñeʼẽ chupe péicha: “Roguerohory, mbaʼe porãgui nerenyhẽva. [Jehová] oĩ nendive” (Lucas 1:28). Oĩ Biblia otradusíva péicha ko salúdo: ‘Dios te salve María, llena eres de gracia, el Señor es contigo’. Peteĩ jey María oho ovisita Elisabétpe, ha ohechávo chupe Elisabet heʼi: “¡Bendita eres tú entre las mujeres, y bendito es el fruto de tu matriz!” (Lucas 1:​42, NM). Heʼisépa koʼã mbaʼe ojeadoravaʼerãha Maríape?

Nahániri. Umi católico oiporúramo jepe iñemboʼépe Gabriel ha Elisabet heʼivaʼekue Maríape, la Biblia ndeʼíri ñañemboʼevaʼerãha chupe. Upéicha umi mbaʼe ohechauka tuichaiterei mbaʼeha pe oñemeʼẽvaʼekue Maríape. Chugui ningo onase Cristo. Péro upéva ndeʼiséi ñañemboʼevaʼerãha chupe. Upéva nomboʼeiete la Biblia. Jesús omboʼérõ guare idisipulokuérape oñemboʼe hag̃ua, ohechauka porã mávapepa ñañemboʼevaʼerã heʼívo: “Ore Ru yvágape reiméva” (Mateo 6:9).

Oisãmbyhy yvágape

Opárupi oĩ avei ogueroviáva María haʼeha pe “yvagapegua Rréina”. Péro la Biblia ndeʼíri ni peteĩ hendápe upeichaha. Omombeʼúnte Maríape oñemeʼẽ hague peteĩ tembiapo ojapo hag̃ua yvágape. Mbaʼépa hína upéva?

Jesús heʼivaʼekue umi ojeroviáva hese apytégui oĩtaha ogovernáva hendive Irréinope (Lucas 22:​28-30). Koʼãva ojeporavovaʼekuépe Jesús ombokatupyry oservi hag̃ua ‘saserdóteramo Ñandejárape g̃uarã, ha oisãmbyhýta hikuái ko yvy tuichakue’ (Revelación [Apocalipsis] 5:10). Upéicha la Biblia ohechauka Maríape ojeporavo hague avei ojapo hag̃ua pe tembiapo. Mbaʼérepa jaʼe upéva?

Pe artíkulo ohasavaʼekuépe jahechákuri Jesús omano rire, isy, iñermanokuéra ha idisipulokuéra ‘oñembyatyha jepi oñemboʼe hag̃ua’. Peteĩ jeýpe oñembyaty hikuái ciento veinte tapicha oñemboʼe hag̃ua, umíva apytépe oĩ “mbovymi kuña” (Hechos 1:​12-15). La Biblia heʼi pe Pentecostés árape ‘ijatyha hikuái peteĩ hendápente’ ha Ñandejára oñohẽ hiʼarikuéra ijespíritu sánto ha oñepyrũ oñeʼẽ hikuái heta idiómape (Hechos 2:​1-4).

María oĩvaʼekue umíva apytépe, upéva ohechauka ojeporavo hague avei chupe ogoverna hag̃ua Jesucristo ndive yvágape. Upévare ikatu jaʼe María oĩhahína koʼag̃aite Jesús ndive yvágape (Romanos 8:​14-17). Upépe oĩ avei umi ótro ojeporavovaʼekue. Mbaʼe tembiapópa ojapóta María yvágape oñekumpli hag̃ua Ñandejára rembipota?

Oipytyvõta oñemeʼẽ hag̃ua heta mbaʼe porã yvyporakuérape

La Biblia omombeʼu ciento cuarenta y cuatro mil tapicha ohotaha yvágape ombaʼapo hag̃ua Jesucrístondi, ha oikotaha chuguikuéra saserdóte, hués ha rréi (Revelación 14:​1, 4; 20:​4, 6). Ombaʼapóta hikuái ikatu hag̃uáicha umi ojapóva Ñandejára rembipota ohupyty heta mbaʼe porã. Ha Jesucristo ojesakrifika haguére ñanderehe, enterovéva ikatúta ñande perfékto opa mbaʼépe (Revelación 21:​1-4). Jehová siervokuérape g̃uarã ningo hiʼãitéma og̃uahẽ ko ára!a

María ojapo heta mbaʼe iñimportantetereíva oñekumpli hag̃ua Jehová rembipota. Ha upéva ñanemboʼe heta mbaʼe. Haʼe ningo peteĩ kuñakarai imbaʼeporãva, ojeroviáva Ñandejárare ha iñeʼẽrendúva chupe, okumplíva irresponsavilida ifamília ndive ha ombohovaivaʼekue hekopete heta mbaʼe vai. Haʼe ningo peteĩ ehémplo porã ñandéve g̃uarã, upévare jarrespetavaʼerã avei chupe.

María ojapovaʼekue heta mbaʼe porã, péro haʼe ojapovaʼekue avei peteĩ mbaʼe iñimportantetereíva enterove Ñandejára siervokuéra ojapovahína avei. Haʼe oadora Jehovápe añoite. Haʼe oĩ umi opurahéiva ndive Jehovápe ha heʼíva: ‘Trónope oguapývape, Ñandejára Jehová, ha pe Ovecharaʼýpe, Jesucristo, toñemombaʼeguasu, toñemoherakuã, toñembotuicha ha taipuʼaka opa ára g̃uarã’ (Revelación 5:13; 19:​10, BNP).

[Nóta]

[Komentário oĩva páhina 10-pe]

Ñaneñeʼẽrendu ha jajeroviákena María ojapo haguéicha