Jaiporúkena Ñandejára omeʼẽvaʼekue ñandéve ñaipytyvõ hag̃ua ñande rapichakuérape
‘Pejoayhu oñoermánoicha, peñombojerovia ha peñomombaʼe.’ (ROM. 12:10.)
1. Mbaʼépa heʼi ñandéve Ñandejára Ñeʼẽ?
ÑANDEJÁRA Ñeʼẽ heta hendápe heʼi Jehová katuete ñanepytyvõtaha ñañeñandu vai jave. Pór ehémplo koʼã téysto heʼi: “Ñandejára ojoko umi hoʼávape, ikangývape omopuʼã jey”. ‘Oñeñandu vaívape haʼe omonguera ha umi hasývape ojokuapa.’ (Sal. 145:14; 147:3.) Ñande Ru yvagapegua heʼi: ‘Che Jehová nde Jára, rojagarráma nde po deréchagui ha haʼe ndéve: “Ani rekyhyje Che roipytyvõta”’ (Isa. 41:13, ÑÑB).
2. Mbaʼépa ojapo Jehová ñanepytyvõ hag̃ua?
2 Péro Jehová oĩramo yvágape, mbaʼéichapa ñandejagarra ñande pógui ha ñanemopuʼã ñañeñandu vaieterei jave? Ojapo heta hendáicha. Pór ehémplo, omeʼẽ ñandéve pe espíritu sánto jagueropuʼaka hag̃ua opa mbaʼe (2 Cor. 4:7; Juan 14:16, 17). Ñanepytyvõ avei la Biblia rupive (Heb. 4:12). Koʼág̃a ñahesaʼỹijomíta pe primera kárta ohaivaʼekue apóstol Pedro jaikuaa hag̃ua mbaʼépa Jehová ojapo avei ñanemokyreʼỹ hag̃ua.
‘Ñandejára omeʼẽ ñandéve opaichagua mbaʼe porã’
3. a) Mbaʼépa heʼi apóstol Pedro jehasa asýre? b) Mbaʼépa heʼi porã Pedro opakuetévoma ikárta?
3 Apóstol Pedro heʼi umi ohótavape yvágape ovyʼavaʼerãha ohaʼarõgui chupekuéra heta mbaʼe porã. Péro heʼi avei: ‘Peẽ pevyʼa pehasáramo jepe opaichagua jehasa asýre’ (1 Ped. 1:1-6, BNP). Pedro koʼápe oñeʼẽ opaichagua jehasa asýre ndahaʼéi peteĩrente. Ogueropuʼakánepa umi ermáno koʼã mbaʼe? Apóstol Pedro heʼi porã Jehová oipytyvõtaha chupekuéra ogueropuʼaka hag̃ua oimehaichagua jehasa asy. Upéva ohai opakuetévoma ikárta, oñeʼẽhápe pe ára paháre (1 Ped. 4:7).
4. Mbaʼérepa ñanemokyreʼỹete heʼíva 1 Pedro 4:10?
4 Apóstol Pedro heʼi: ‘Peẽ niko peguereko heta mbaʼe porã oñemeʼẽvaʼekue peẽme, peiporúkena umi mbaʼe porã ambuekuérape g̃uarã; pembohetave opaichagua mbaʼeta Ñandejára omeʼẽvaʼekue peẽme’ (1 Ped. 4:10, JMP). Koʼápe Pedro oiporu jey pe ñeʼẽ ‘opaichagua’. Péicha ohechauka ikatuha jahasa opaichagua mbaʼe vaíre, péro ‘Ñandejára omeʼẽha avei ñandéve opaichagua’ mbaʼe porã. Mbaʼérepa ñanemokyreʼỹ upéva? Ohechaukágui ñandéve jagueropuʼakataha opaichagua jehasa asy Ñandejára ipyʼaporã rupi. Ha jahechakuaa piko mbaʼépa Jehová oiporu ñanepytyvõ hag̃ua? Oiporu ñane ermanokuérape.
‘Ñañopytyvõkena’
5. a) Mbaʼépa ojapovaʼerã kristianokuéra? b) Mbaʼe iporãitereívapa omeʼẽ ñandéve Ñandejára?
5 Apóstol Pedro heʼi koʼã mbaʼe umi kristianokuérape: “Opaite mbaʼe ári, tapejoayhuete”. Heʼi avei: ‘Peẽ niko peguereko heta mbaʼe porã oñemeʼẽvaʼekue peẽme, peiporúkena umi mbaʼe porã ambuekuérape g̃uarã’ (1 Ped. 4:8, 10, JMP). Upéicharõ enterove ñamokyreʼỹvaʼerã ñane ermanokuérape. Jehová ningo omeʼẽ ñandéve peteĩ mbaʼe iporãitereíva, ha upéva jaiporuvaʼerã ñaipytyvõ hag̃ua ermanokuérape. Mbaʼérepa ñañeʼẽñaína? Apóstol Pedro heʼi upéva haʼeha peteĩ rregálo omeʼẽva ñandéve Ñandejára. Mbaʼe piko hína upe rregálo? Ha mbaʼéichapa ikatu jaiporu ñaipytyvõ hag̃ua ñande rapichakuérape?
6. Mbaʼe mbaʼépa Ñandejára omeʼẽ ñandéve?
6 Ñandejára Ñeʼẽ heʼi: “Opa mbaʼe porã ha hekopeguáva oñemeʼẽva ñandéve ou yvatégui” (Sant. 1:17). Upéicha Jehová ohechauka imbaʼeporãha ñanendive. Ha umi mbaʼe porã apytépe, omeʼẽ ñandéve pe espíritu sánto. Upéva ningo iñimportanteterei ñanepytyvõgui japorohayhu, ñanembaʼeporã ha ñandepyʼaporã hag̃ua. Upévare jatrata porã ñane ermanokuérape ha jajepytaso ijykerekuéra. Avei ñanepytyvõ ñanearandu ha jaikuaa hag̃ua heta mbaʼe (1 Cor. 2:10-16; Gál. 5:22, 23). Opa mbaʼe jajapokuaáva ningo ou Ñandejáragui, ha haʼe oipota jaiporu umíva ñamomorã ha ñamombaʼeguasu hag̃ua chupe. Upéicharõ jaiporuvaʼerã koʼã mbaʼe jahechauka hag̃ua ñane ermanokuérape Ñandejára imbaʼeporãha.
Mbaʼéichapa jaiporuvaʼerã umi mbaʼe porã oñemeʼẽvaʼekue ñandéve?
7. a) Mbaʼépa ohechauka ñandéve Pedro heʼivaʼekue? b) Mbaʼépa ñañeporanduvaʼerã, ha mbaʼérepa?
7 Apóstol Pedro oñeʼẽvo umi mbaʼe porã oñemeʼẽvaʼekuére ñandéve, heʼi: ‘Peẽ niko peguereko heta mbaʼe porã oñemeʼẽvaʼekue peẽme, peiporúkena’. Koʼápe ohechauka ndahaʼeiha peteĩchapáva enterove. Upévare, Pedro omokyreʼỹ enterovépe oiporu hag̃ua umi mbaʼe porã oñemeʼẽvaʼekue chupekuéra oñopytyvõ hag̃ua. Ha heʼi: ‘Peiporúkena umi mbaʼe porã ambuekuérape g̃uarã’, upéicharõ oñemandahína ñandéve jajapovaʼerã. Upévare ñañeporanduvaʼerã: “Aiporupaʼaína umi mbaʼe porã Jehová omeʼẽva chéve aipytyvõ hag̃ua ermanokuérape?” (ñambojojami 1 Timoteo 5:9, 10 rehe). “Térãpa aiporuʼaína chepláta heta hag̃ua, aiko porãve ha ahupyty hag̃ua heta mbaʼe chejupe g̃uarã?” (1 Cor. 4:7.) Jehová ningo ovyʼa jaiporúramo umi mbaʼe porã omeʼẽvaʼekue ñandéve ñaipytyvõ hag̃ua ñande rapichakuérape (Pro. 19:17; jaleemína Hebreos 13:16).
8, 9. a) Emombeʼu mbaʼéichapa Jehová siervokuéra oipytyvõ iñermanokuérape. b) Mbaʼéichapa oñopytyvõ ermanokuéra ne kongregasionpegua?
8 La Biblia omombeʼu umi kristiáno ypykue oipytyvõ hague heta hendáicha iñermanokuérape (jaleemína Romanos 15:25, 26 ha 2 Timoteo 1:16-18). Koʼág̃a rupi avei, Jehová siervokuéra oiporu umi mbaʼe porã oñemeʼẽvaʼekue chupekuéra oipytyvõ hag̃ua iñermanokuérape. Jahechami mbaʼéichapa ojapo hikuái.
9 Heta ermáno ningo káda més, heta oikovaʼerã oprepara hag̃ua idiskúrso ha oheka hag̃ua informasión iporãtava kongregasiónpe g̃uarã. Upéicha, umi mbaʼe heʼíva oipytyvõ ermanokuérape ogueropuʼaka hag̃ua heta mbaʼe (1 Tim. 5:17). Oĩ ningo ermáno hory ha otrata porãitereíva hapichakuérape (Rom. 12:15). Oĩ avei umi ohóva ovisita umi ikangy ha ndovyʼavéivape ha oñemboʼe hendivekuéra (1 Tes. 5:14). Heta ermáno omondo avei kárta neporã porãva umi ohasa asývape, térã ogueraha rreunionhápe umi hasykatúvape. Ha hetaiterei oĩ oipytyvõva ermanokuérape omopuʼã jey hag̃ua hogakuéra peteĩ ama guasu térã yvyryrýi rapykuerépe. Koʼã ermáno imbaʼeporãitéva ohayhu ha oipytyvõ ambue ermanokuérape. Upéicha ohechaukahína ‘opaichagua mbaʼe porã Ñandejára omeʼẽva ñandéve’ (jaleemína 1 Pedro 4:11).
Mbaʼépa iñimportanteve jajapo?
10. a) Mbaʼépa Pablo heʼivaʼekue ojejapovaʼerãha Ñandejára servísiope? b) Mbaʼéichapa ikatu jajapo Pablo ojapo haguéicha?
10 Ñandejára oipota ñaipytyvõ ñane ermanokuérape, ha avei ñamombeʼu pe marandu porã ñande rapichakuérape. Apóstol Pablo heʼivaʼekue koʼã mokõi mbaʼe ojejapovaʼerãha Ñandejára servísiope. Umi Efesoyguápe heʼi: ‘Pehendúmaneraʼe Ñandejára imbaʼeporãgui chemoĩ hague ambaʼapo hag̃ua pende apytépe’. Péicha ohechauka ojeporavo hague chupe oservi hag̃ua chupekuéra (Efe. 3:2). Péro heʼi avei: ‘Ñandejára ojeroviavaʼekue orerehe omeʼẽ hag̃uáicha oréve pe marandu porã romoherakuã hag̃ua’ (1 Tes. 2:4, BNP). Ñande ningo Pábloicha jahechakuaa avei ñañeʼẽvaʼerãha ñande rapichakuérape Ñandejára Rréino rehe. Pablo ningo kyreʼỹme opredikámi opárupi, ha ñande jajapose avei upéicha (Hech. 20:20, 21; 1 Cor. 11:1). Jaikuaa ningo japredika rupi heta ñande rapicha ikatuha ojesalva. Péro aníkena ñanderesarái ñamokyreʼỹ meme hag̃ua ñane ermanokuérape Pablo ojapo haguéicha (jaleemína Romanos 1:11, 12; 10:13-15).
11. Mbaʼéicha vaʼerãpa ñandéve g̃uarã japredika ha ñamokyreʼỹ ñane ermanokuérape?
11 Mbaʼépa iñimportanteve jajapo: japredika térã ñaipytyvõ ermanokuérape? Péicha haʼete ñaporanduvañaína peteĩ ipepóntepa oikotevẽ peteĩ guyra oveve hag̃ua. Jaikuaa ningo peteĩ guyra oikotevẽha mokõive ipepo oveve hag̃ua. Upéicha avei ñande ñaikotevẽ japredika ha ñaipytyvõ ermanokuérape ñaime porã hag̃ua Jehová renondépe. Upévare, ñandéve g̃uarã iñimportánte jajapo mokõive mbaʼe, apóstol Pedro ha Páblope g̃uarã iñimportánte haguéicha. Ha mbaʼérepa jaʼe upéicha?
12. Mbaʼe jajapo hag̃uápa Jehová ikatu ñandeporu?
12 Ñande ningo japredika jave ñañehaʼãmbaite ñamboʼe ha ñag̃uahẽ ñande rapichakuéra korasõme. Upéicha ñaipytyvõñaína oiko hag̃ua chuguikuéra Jesús remimboʼe. Péro ñañehaʼãmbaite avei ñamokyreʼỹ ñane ermanokuérape. Umi mbaʼe porã jaʼe ha jajapóva ñaporomokyreʼỹ hag̃ua ningo ohechaukahína mbaʼeichaitépa Ñandejára imbaʼeporã (Pro. 3:27; 12:25). Upéicha ñaipytyvõ ñane ermanokuérape osegi hag̃ua Ñandejára rapére. Tuichaiterei mbaʼe ningo Jehová ñandeporu japredika ha ñamokyreʼỹ hag̃ua ñane ermanokuérape (Gál. 6:10).
‘Peñombojeroviákena’
13. Mbaʼérepa Satanás ndoipotái ñañopytyvõ?
13 Apóstol Pablo omokyreʼỹ ermanokuérape kóicha: ‘Pejoayhu oñoermánoicha, peñombojerovia ha peñomombaʼe’ (Rom. 12:10). Ha jahayhu rupi ñane ermanokuérape, jaiporu porãta umi mbaʼe Ñandejára omeʼẽvaʼekue ñandéve. Péro Satanás ndoipotái ñañopytyvõ ani hag̃ua jajepytaso ojoykére Jehová servísiope (Col. 3:14). Ha upéicharõ ñandekaiguétama avei japredika hag̃ua. Satanás ningo oikuaa péicha ñandereitytaha, ojepeʼarõguáicha peteĩ guyrágui un ládo ipepo.
14. Máva rehépa ojapo porãta ñaipytyvõramo ñane ermanokuérape? Emombeʼu peteĩ ehémplo.
14 Ñaipytyvõramo ñane ermanokuérape ningo ojapo porãta hesekuéra ha ñanderehe avei (Pro. 11:25). Pór ehémplo Ryan ha hembireko Roni oikóva Illinois Estados Unídospe, oikuaárõ guare pe huracán Katrina oity hague hetaiterei ermáno róga, oipytyvõse chupekuéra. Upévare oheja hikuái itraváho, la hóga ha ojogua peteĩ casa rodante usádo. Upéi omyatyrõ ha oho hikuái pype 1.400 kilómetro Luisiana peve. Upépe opyta oiko hikuái un áño rupi, oiporu itiémpo, imbarete ha umi mbaʼe orekóva oipytyvõ hag̃ua iñermanokuérape. Ryan ningo oreko 29 áño ha heʼi: “Aipytyvõ haguére umi oikotevẽvape añemoag̃uive Ñandejárare. Ahecha mbaʼéichapa Jehová oñangareko isiervokuérare”. Ha upéi heʼi: “Ambaʼapo umi ermáno ikatupyryvévandi ha upéva chepytyvõ añangareko porãve hag̃ua ermanokuérare. Chemboʼe avei ore oremitãva ikatuha rojapo heta mbaʼe Jehová organisasiónpe”. Roni orekóva 25 áño, heʼi: “Avyʼaiterei ningo ikatu haguére aipytyvõ che rapichakuérape. Peichaite peve ndavyʼáiva gueteri. Aaprendevaʼekue koʼápe ideprovéchota chéve heta áñore”.
15. Mbaʼérepa jasegivaʼerã jaiporu umi mbaʼe porã Ñandejára omeʼẽvaʼekue ñandéve?
15 Péicha jahecha japredika ha ñaipytyvõramo ñane ermanokuérape ojapo porãha enterove rehe. Umi ñande rapicha oñemoag̃uivéta Jehováre, ha ñande katu javyʼaitereíta ñaipytyvõ haguére chupekuéra (Hech. 20:35). Ha kongregasiónpe igustove enterove jajepyʼapýramo ojuehe. Avei jajotrata rupi mborayhúpe ojekuaa ñande Jesús remimboʼeha. Haʼe heʼivaʼekue voi: “Pejoayhúramo, opavave ohechakuaáta peẽ haʼeha che remimboʼe” (Juan 13:35). Jaagradeseterei ningo Jehová oiporu haguére isiervokuérape omombarete hag̃ua umi oikotevẽvape. Upévare, jaiporuvaʼerã umi mbaʼe porã Ñandejára omeʼẽvaʼekue ñandéve ñañopytyvõ hag̃ua. Jasegítapa jajapo upéicha? (Jaleemína Hebreos 6:10.)
Ñanemanduʼami jey
• Mbaʼépa ojapo Jehová oipytyvõ hag̃ua isiervokuérape?
• Mbaʼépa oñemanda ñandéve jajapo hag̃ua?
• Mbaʼéichapa ikatu ñaipytyvõ ñane ermanokuérape?
• Mbaʼépa jajapovaʼerã jasegi hag̃ua ñaipytyvõ ñane ermanokuérape?
[Nóta oĩva taʼanga ndive páhina 13]
Jaiporúpa umi mbaʼe porã Ñandejára omeʼẽvaʼekue ñandéve ñaipytyvõ hag̃ua ñande rapichakuérape?
[Nóta oĩva taʼanga ndive páhina 15]
Ñamombeʼuvaʼerã pe marandu porã ñande rapichakuérape ha ñaipytyvõ ñane ermanokuérape
[Nóta oĩva taʼanga ndive páhina 16]
Jaguerohoryvaʼerã umi oipytyvõvape ermanokuéra oikotevẽvape