Ñaneñeʼẽrendúkena ha ñandepyʼaguasu Jesucrístoicha
‘Pendepyʼaguasúkena. Che chepuʼakáma ko múndo rehe.’ (JUAN 16:33.)
1. Mbaʼéichapa Jesús iñeʼẽrenduvaʼekue Ñandejárape’?
JESÚS ningo akóinte ojapóvami Itúva rembipota. Haʼe ni nopensaivaʼekue naiñeʼẽrendúivo Ñandejárape (Juan 4:34; Heb. 7:26). Jesús ningo ohasa heta mbaʼe vai ko Yvy ape ári, upévare ijetuʼuvaʼekue chupe iñeʼẽrendu hag̃ua. Jesús opredika ñepyrũ guive, Satanás ha umi ndaijaʼéiva hese ojapoukase chupe ivaíva, ojopy ha omoñuhãse chupe anive hag̃ua iñeʼẽrendu Ñandejárape (Mat. 4:1-11; Luc. 20:20-25). Umíva ombohasa asyeterei Jesúspe, ha amo ipahápe ojuka chupe hikuái peteĩ yvyráre (Mat. 26:37, 38; Luc. 22:44; Juan 19:1, 17, 18). Upéicharõ jepe, Jesús ‘iñeʼẽrenduvaʼekue omano meve’ (jaleemína Filipenses 2:8).
2, 3. Mbaʼépa ohechauka Jesús iñeʼẽrendúvo ohasa asýramo jepe?
2 Umi mbaʼe ohasavaʼekue rupive Jesús oaprende heta mbaʼe iñeʼẽrenduve hag̃ua Ñandejárape (Heb. 5:8). Péro mbaʼe piko la ikatúva oaprendeve? Jaikuaa ningo Jesús hetaiterei áño oiko hague Itúva ndive yvágape ha oipytyvõ hague chupe ojapo hag̃ua opa mbaʼe (Pro. 8:30). Ha ojopy vaíramo jepe chupe, umi mbaʼe ohasavaʼekue ko yvy ape ári ombohovái porã ha ohechauka iñeʼẽrendu ha ohayhuha Jehovápe. Opa koʼã mbaʼe ningo oipytyvõ Jesúspe oñemoag̃uive hag̃ua Itúvare. Mbaʼépa ñanemboʼe upéva?
3 Jesús perféktoramo jepe, oikuaa ndaikatumoʼãiha ijehegui reínte iñeʼẽrendu Itúvape opaite mbaʼépe. Upévare ojerure Jehovápe oipytyvõmi hag̃ua chupe (jaleemína Hebreos 5:7). Upéicharõ tekotevẽ avei ñande ñaneumílde ha akóinte jajerure Ñandejárape ñanepytyvõmi hag̃ua ani anga nañaneñeʼẽrenduvéi chupe. Apóstol Pablo heʼivaʼekue voi: “Peikókena ojoapytépe Cristo oiko haguéicha. Haʼe niko [...] oñemomirĩ ha iñeʼẽrendu omano meve” (Fili. 2:5-8). Jesús ehémplo ohechauka yvyporakuéra ikatuha iñeʼẽrendu Ñandejárape oikóramo jepe peteĩ múndo añáme. Upévare ñande yvypóra imperfékto jaikuaase mbaʼépa ikatu jajapo.
Ñaneñeʼẽrenduvaʼerã ñaneimperféktoramo jepe
4. Mbaʼépa heʼise jadesidi ñandejehegui?
4 Adán ha Eva haʼevaʼekue yvypóra iñarandu ha odesidíva ijehegui. Ha ñande ifamiliare upéicha avei. Mbaʼépa heʼise upéva? Jarekoha liverta jadesidi hag̃ua jajapótapa iporãva térã ivaíva, ñaneñeʼẽrendútapa Ñandejárape térãpa nahániri. Péro upéva ndahaʼéi vyrorei. Umi mbaʼe jadesidíva ikatu avei ojapo porã térã ojapo vai ñande rapichakuérare, ha ikatu voi ñamano jadesidi vaíramo.
5. Mbaʼéicha rupípa ñande nañaneñeʼẽrenduséi jepi? Ha mbaʼépa ikatu jajapo ani hag̃ua jajapo ivaíva?
5 Ñande ningo ñaneimperfékto rupi nañaneñeʼẽrenduséi. Upévare ijetuʼu ñandéve jajapo hag̃ua Ñandejára heʼíva. Apóstol Pablo heʼivaʼekue voi ijehe: “Che pype katu ahecha ambue léi, oñorairõva pe léi che akãme oĩvandi, pe pekádo rehegua léi oĩva che pype ha chererekóva ipoguýpe” (Rom. 7:23, BNP). Jaikuaa ningo ndahasyiha ñaneñeʼẽrendu oho porã jave ñandéve. Péro mbaʼépa jajapo jahechakuaáramo ñandegustaha umi mbaʼe jaikuaáva ivaiha? Jajapose jepi ivaíva ñaneimperfékto rupi ha ko múndope henyhẽgui iñañáva (1 Juan 2:16; 1 Cor. 2:12). Upévare ani hag̃ua jajapo ivaíva, jajejopy vai mboyve jajedesidimavaʼerã ñaneñeʼẽrendutapa Jehovápe (Sal. 78:8). La Biblia ningo omombeʼu oĩ hague heta Ñandejára siervokuéra ojapóva upéicha ha upévare akóinte iñeʼẽrendu hikuái (Esd. 7:10; Dan. 1:8).
6, 7. Mbaʼe ehémplopa ohechauka iporãha jastudia ñaneañohápe ani hag̃ua jajapose ivaíva?
6 Ani hag̃ua jajapose ivaíva jastudiavaʼerã Ñandejára Ñeʼẽ ha umi puvlikasionkuéra. Ñapensamíntena oikoha ko mbaʼe: Ñande ningo jarekóma voi mbaʼe díapa jastudiáta pyharekue ñaneaño. Ha jajerure jepi Jehovápe ijespíritu sánto ñanepytyvõmi hag̃ua ikatu hag̃uáicha jajapo hembipota. Peteĩ jey ningo upe jastudiavañaína ñanemopensa peteĩ pelíkula jahechasévare. Hetáramo jepe oĩ heʼíva ñandéve upe pelíkula igustoha, ohechauka avei oñorairõva ha itieʼỹva.
7 Upémaramo jajepyʼamongeta apóstol Pablo heʼívare Efesios 5:3-pe: ‘Ani peñeʼẽ mbaʼeveichagua tekotieʼỹre, térã oimehaichagua tekokyʼáre ha ani pendetaryrýi. Koʼã mbaʼe niko ndoʼái penderehe, umíva rangue pemombaʼeguasu Ñandejárape’. Ñanemanduʼa avei Pablo heʼivaʼekuére Filipenses 4:8-pe (jaleemína). Ha upéi ñañeporandu: “Koʼẽrõ ahecháramo pe pelíkula piko asegitaʼaína Jesús ehémplo?”. Mbaʼépa jajapóne ñaiméramo ko situasiónpe? Jahechánepa upe pelíkula?
8. Mbaʼérepa ndajaʼeivaʼerã vyroreiha Jehová heʼíva jajapo hag̃ua?
8 Tuichaiterei ningo jajavýta jaʼéramo vyroreiha Jehová heʼíva jajapo hag̃ua. Avei ñaimoʼãramo ñanembareteha ha ndojapomoʼãiha voi ñanderehe mbaʼeve umi júnta vai. Tahaʼe jepe prográma térã umi pelíkula ohechaukáva oñorairõ ha hekovaíva. Upévare ñañangarekovaʼerã ñane familiakuérare ha ñandejehe ani hag̃ua jajapo umi mbaʼe vai Satanás oipotáva jajapo. Heta ningo oĩ oñangarekóva ikokuére ani hag̃ua ikogaty ojagarrapa yso ha oñehundipa chugui. Péicha oĩramo oñangarekóva ikokuére, ñande koʼýte ñañangarekovaʼerã ani hag̃ua jaʼa Satanás ñuhãme (Efe. 6:11).
9. Mbaʼérepa ñaneñeʼẽrenduvaʼerã Jehovápe?
9 Koʼẽ koʼẽre jadesidivaʼerã heta mbaʼe jajapótapa Jehová oipotaháicha. Ha jajesalvaséramo ñaneñeʼẽrendu ha ñamombaʼevaʼerã Jehová heʼíva. Upéicha avei jahechauka hag̃ua jajerovia añeteha, jasegivaʼerã Jesús ehémplo ha ñaneñeʼẽrendu Jehovápe ñamano meve. Ha Jehová katuete ñanevendesíta upévare. Jesús heʼivaʼekue voi: “Upe ogueropuʼakáva ipahaite peve, péva ojesalváta” (Mat. 24:13, ÑÑB). Jaikuaa ningo ñaneñeʼẽrendu hag̃ua ñandepyʼaguasuvaʼerãha yma Jesús ipyʼaguasu haguéicha (Sal. 31:24).
Jesucrístoicha ipyʼaguasúva ndaipóri
10. Mbaʼe mbaʼépa ñambohovái, ha mbaʼépa jajapovaʼerã upévare?
10 Ko múndope heta rupi iñañáva, ñandepyʼaguasuvaʼerã ani hag̃ua ova ñanderehe ilajakuéra. Ñambohovái ningo heta mbaʼe ikatúva ñanemomombyry Jehovágui. Heta ermánore ningo oñemoĩ ihentekuéra ani hag̃ua oservi Jehovápe. Heta tetã rupi katu oñemboʼe yvypóra ouha kaʼígui, ha opárupi heta hetavéntema oĩ ndojeroviavéimava Ñandejárare. Upévare ñañehaʼãmbaitevaʼerã ñañangareko ñandejehe ha ñambohovái umi mbaʼe ijetuʼúva. Jesús ningo ohechaukavaʼekue voi ñandéve mbaʼéichapa ikatu ñambohovái ko múndo.
11. Mbaʼérepa ñandepyʼaguasúta jajepyʼamongetáramo Jesús ehémplore?
11 Jesús heʼivaʼekue hemimboʼekuérape: ‘Heta pehasa asýta ko yvy ári, péicharõ jepe, pendepyʼaguasúkena. Che chepuʼakáma ko múndo rehe’ (Juan 16:33). Jesús noñemongyʼaivaʼekue umi mbaʼe vai ko múndope ojejapóvare. Opredika kyreʼỹ uvei ha ojapo porã opa mbaʼe Jehová oipotahaichaite. Ñande avei jajapovaʼerã upéicha. Jesús oñemboʼérõ guare Ñandejárape, heʼi hemimboʼekuérare: ‘Haʼekuéra niko ndoikovéima ko múndope ojeikoháicha, oiko uvei tekopotĩ ha hekópe che aikoháicha’ (Juan 17:16, ÑÑB). Jajesareko ha jajepyʼamongetáramo Jesús ehémplore, ñandepyʼaguasúta ani hag̃ua jajeheʼa ko múndore.
Ñañehaʼãkena ñandepyʼaguasu Jesucrístoicha
12-14. Emombeʼumína mbaʼe mbaʼépa Jesús ojapovaʼekue ipyʼaguasu rupi.
12 Jesús oĩrõ guare ko yvy ape ári, ohechauka ipyʼaguasuha. Haʼe niko Ñandejára Raʼy, ha upéicha rupi ‘oike pe témplope ha omosẽmba upégui umi ombaʼevendéva ha ombaʼejoguávape, ha otumba umi pirapire okambiáva mesakuéra ha umi pykasu ovendéva oguapyha’ (Mat. 21:12, ÑÑB). Pe pyhare Jesús omano mboyve, oho ojagarra hag̃ua chupe heta soldádo. Ha upepete haʼe osẽ hemimboʼekuéra apytégui ha oñepresentávo henondepekuéra, heʼi: “Chéve cherekáramo peheja koʼãva toho” (Juan 18:8). Upe riremínte, Pedro oguenohẽvo ijespáda, Jesús heʼi chupe oñongatúnte hag̃ua. Upéicha ohechauka ojeroviaveha Jehová puʼakáre (Juan 18:11).
13 Jesús heʼi umi hudío rrelihión omoakãva iñaña ha ijapuha. Heʼi voi chupekuéra: ‘Pejererekóke peẽ eskríva ha fariséo rovamokõi, peẽ pemboty Ñandejára sãmbyhy yvagapegua rokẽ ani hag̃ua avave oike’. Ha upéi heʼive: ‘Penderesarái Ñandejára léi penemboʼeha penderekojojavaʼerãha, peporoporiahuvereko ha pejeroviavaʼerãha Ñandejárare. Pemopotĩ pene mbaʼyru ijapeguio, hyepy katu henyhẽ umi mbaʼe pemondavaʼekuégui’ (Mat. 23:13, 23, 25). Jesús remimboʼekuéra ningo ipyʼaguasuvaʼerã avei haʼéicha. Umi rrelihión omoakãva opersegi ha ojukaséta rupi chupekuéra (Mat. 23:34; 24:9).
14 Ni umi demónio ningo nomongyhyjéi Jesúspe. Peteĩ árape oumi hendápe peteĩ endemoniádo imbaretetereíva. Avave ningo ndaipuʼakái hese, ni kadénape oñeñapytĩramo. Péro Jesús ndokyhyjéi chugui ha omosẽmbaite umi demónio oĩva pe kuimbaʼe retepýpe (Mar. 5:1-13). Jaikuaa ningo koʼág̃a rupi Ñandejára nomeʼẽiha ñandéve podér jajapo hag̃ua upeichagua milágro. Péro japredika ha ñamboʼévo ñande rapichakuérape, ñañemoĩñaína Satanás rehe. Haʼe ningo oreko pytũnguýpe la héntepe (2 Cor. 4:4). Jesús ojapo haguéicha, ñande ndajaiporúi ‘yvypóra oiporúva oñorairõ hag̃ua, ñande ñañorairõ Ñandejára puʼaka rupi, ikatúva oheja yvýre opa mbaʼe ojeʼéva’, térã umi rrelihión japu omboʼéva (2 Cor. 10:4). Mbaʼéichapa ikatu jajapo upéva? Jahechamína mbaʼéichapa ojapovaʼekue Jesús.
15. Mbaʼéicha rupípa Jesús ipyʼaguasuvaʼekue?
15 Jesús ndahaʼéi ojehechauka hag̃uánte oñembopyʼaguasúva. Haʼe ningo ojerovia rupi Ñandejárare ipyʼaguasuvaʼekue. Ha ñande upéicha vaʼerã avei (Mar. 4:40). Mbaʼépa ikatu jajapo jajerovia añete hag̃ua? Jesús omoĩ avei ñandéve ehémplo upearã. Haʼe ningo oikuaa porã vaʼekue Ñandejára Ñeʼẽ ha ojerovia hese. Ha oñorairõ hag̃ua oiporu Ñandejára Ñeʼẽ peteĩ espádaicha. Upévare pyʼỹinte oiporu oporomboʼe hag̃ua. Jesús ningo pyʼỹinte avei oñeʼẽ ñepyrũvo heʼi: “Ñandejára Ñeʼẽme heʼi”, ha upéi omombeʼúma mbaʼépa heʼi upépe.a
16. Mbaʼépa ikatu jajapo ñamombarete hag̃ua ñande jerovia?
16 Jagueropuʼaka hag̃ua heta mbaʼe vai, koʼẽ koʼẽre jalee ha ñahesaʼỹijovaʼerã Ñandejára Ñeʼẽ ha jaha meme rreunionhápe. Upéicharõmante opyta porãta ñandéve ñane akãme ha jajeroviavéta Jehováre (Rom. 10:17). Iporã avei jajepyʼamongeta Ñandejára Ñeʼẽre ikatu hag̃uáicha umi mbaʼe jaikuaáva oike ñane korasõme. Jajerovia mbaretéramo añoite Jehováre ñandepyʼaguasúta jajapo hag̃ua opa mbaʼe (Sant. 2:17). Jajerurevaʼerã avei Ñandejárape ijespíritu sánto ikatu hag̃uáicha jajeroviave hese (Gál. 5:22).
17, 18. Mbaʼéichapa Kitty ohechauka ipyʼaguasuha?
17 Peteĩ mitãkuña hérava Kitty ningo oikuaa porã ojeroviáramo Ñandejárare añoite ipyʼaguasutaha. Imitã guive haʼe oikuaa notĩrivaʼerãha omombeʼu hag̃ua marandu porã eskuélape. Ha haʼe opredikase voi ikompañerokuérape (Rom. 1:16). Péro káda áño oñehaʼãramo jepe, okyhyje opredika hag̃ua chupekuéra. Upéi imitãkuñápema oho ostudia hag̃ua ótro hendápe ha heʼi: “Koʼág̃a ndahejavéima ohasa rei chehegui che tiémpo”. Kitty ojerure Jehovápe omeʼẽ hag̃ua chupe upe oportunida ha ombopyʼaguasu ha ombokatupyry hag̃ua chupe.
18 Upéi pe primer día de klásepe, umi alúmno omombeʼumavaʼerã mbaʼéichapa héra ha mbaʼe mbaʼépa ojapo jepi. Upépe Kitty ohechakuaa oñemeʼẽha chupe pe oportunida ohaʼarõvahína. Ha otokávo chupe, heʼi porã: “Che ningo testigo de Jehová ha añehaʼã aiko la Biblia heʼiháicha”. Oñeʼẽvévo, oĩ umi ikompañéro oñembohova vaipámava, péro oĩ avei umi ojapysaka porãva hese ha upéi ombaʼeporandu chupe. Upévare iprofesór omoĩ Kíttype ehémploramo odefende haguére ijerovia. Ha Kitty katu ovyʼaiterei oñehaʼã haguére ipyʼaguasu Jesucrístoicha.
Jajerovia ha ñandepyʼaguasúkena Jesucrístoicha
19. a) Mbaʼépa heʼise jajerovia añete? b) Mbaʼépa ikatu jajapo ñambovyʼa hag̃ua Jehovápe?
19 Umi apóstol ningo ohechakuaavaʼekue ipyʼaguasu hag̃ua tekotevẽha ojerovia. Upévare heʼi hikuái Jesúspe: ‘Emombaretevemína oréve ore jerovia’ (jaleemína Lucas 17:5, 6). Jajerovia añete ndeʼiséi jagueroviánte Ñandejára oĩha. Jajeroviavaʼerã ñane ñeʼã mbytete guive Jehováre, ñañemoag̃ui hese ha jahayhu chupe ñande túvaicha. Rréi Salomón ningo ohaivaʼekue voi: “Che raʼy, nde ne arandúramo che avyʼáta. Che pyʼapy henyhẽta vyʼágui ahendúrõ reñeʼẽ hekópe” (Pro. 23:15, 16). Upéicha avei Jehová ovyʼáta ñadefendéramo pyʼaguasúpe Iñeʼẽ. Ha ñande ningo ñandepyʼaguasuvéntema jaikuaágui upéva. Upévare ñañehaʼãkena jasegi Jesús ehémplo ha ñadefende pyʼaguasúpe Ñandejára Ñeʼẽ.
[Nóta]
a Koʼã téysto oñeʼẽve upévare: Mateo 4:4, 7, 10; 11:10; 21:13; 26:31; Marcos 9:13; 14:27; Lucas 24:46, ha Juan 6:45; 8:17.
Emyesakãmína koʼã mbaʼe
• Mbaʼépa ñanepytyvõta ñaneñeʼẽrendu hag̃ua ñaneimperféktoramo jepe?
• Mbaʼépa jajapovaʼerã jajerovia mbarete hag̃ua?
• Mbaʼépa jahupytýta ñañehaʼãramo ñaneñeʼẽrendu ha ñandepyʼaguasu Jesucrístoicha?
[Nóta oĩva taʼanga ndive páhina 13]
Ndépa reñeñangarekoreína ani hag̃ua reʼa Satanás ñuhãme?
[Nóta oĩva taʼanga ndive páhina 15]
Jesús ipyʼaguasu ojeroviágui Ñandejárare. Ha ñande upéicha vaʼerã avei