Jaikuaave hag̃ua
Mbaʼépa ojapo pe kapitán templopegua?
La Biblia omombeʼu pe kapitán templopegua oho hague avei ojagarra hag̃ua apóstol Pedro ha Juánpe opredika jave (Hechos 4:1-3). Ha noñemombeʼúiramo jepe opa mbaʼe ojapóva hikuái, oĩve informasión oñeʼẽva hesekuéra.
Amalisia ningo Jesús tiémpope pe saserdóte oservíva de kapitán oĩ segundo lugárpe pe saserdóte guasu rire. Haʼe ningo ohechavaʼerã opa mbaʼe ojejapóva oñemombaʼeguasu hag̃ua Jehovápe pe témplo de Jerusalénpe. Ohechavaʼerã avei pe témplo ryepýpe ha ijerérepa oĩ porãmba entéro mbaʼe. Upearã oipytyvõ chupe umi polisía templopegua ojeʼeha. Ha oĩ avei umi kapitán saʼive omandáva chugui. Umíva oavrika pe témplo rokẽ pyhareve ha ombotyka pyharekue umi guárdiape. Oñatende avei hikuái ani hag̃ua avave oike umi lugár ojeproivihápe ha oñeñangareko hag̃ua pe tesorería templopeguáre.
Umi saserdóte ha levíta ombaʼapóva pe témplope ningo ojedividi 24 grúpope. Ha káda grúpo oho oservi una semána pe témplope dos vése al áño. Oiméne káda grúpo orekorakaʼe la ikapitán (1 Crónicas 24:1-18).
Umi kapitán templopegua ningo tuicha omandavaʼekue. La Bíbliape heʼi voi umi kapitán ha ambue saserdóte oñemoĩ hague peteĩ ñeʼẽme ojuka hag̃ua Jesúspe. Omombeʼu avei omondo hague hembiguaikuérape ojagarra hag̃ua Jesúspe (Lucas 22:4, 52).
Mateo 3:4-pe heʼi Juan el Bautista hoʼu hague ‘tuku ha eirete’. Ha upe tiémpope piko la hénte ojepokuaarakaʼe hoʼu tuku?
Oĩ ningo heʼíva ndahaʼeiha tuku pe Juan el Bautista hoʼuvaʼekue. Ojeʼe hoʼu hague algarrobo rope, pira térã yva. Péro pe ñeʼẽ griégo Mateo oiporúva ningo ohechauka oñeʼẽha umi tuku guasúre (acrídidos). Peichagua tuku ningo hetaiterei Israélpe, ha ohohápe ohundipaite opa kogaty ojuhúva haperãme (Joel 1:4, 7; Nahúm 3:15).
Yma ningo umi Asiria ha Etiopiayguápe heterei umi tembiʼu ojejapóva tukúgui. Péro umi hudío oikóva Yemen-pe ha umi beduino koʼág̃a peve hoʼu. Israélpe katu mboriahu rembiʼúnte upéva. Haʼekuéra ningo pe tuku oñakãʼo, ohyekueʼo ha ohetymaʼo hoʼu hag̃ua. Sapyʼánte hoʼu hikuái ipýra, ohesy térã ombopiru kuarahýpe. Oĩ avei ombojuky ha omoĩva vinágre térã eírape.
Juan el Bautista ningo opredikavaʼekue desiertoháre ha upévare oiméne ndahasyive chupe ojuhu hag̃ua peichagua hembiʼurã (Marcos 1:4). Ojeʼe voi ningo pe tuku guasu orekoha 75% proteína ha oñembojeheʼárõ eírare iñalimentoitereive.
[Nóta oĩva taʼanga ndive páhina 28]
UMI ASIRIAYGUA OGUERAHAHÍNA TUKU GUASU HA GRANÁDA
[Roagradese]
Oĩva lívro Discoveries Among the Ruins of Nineveh and Babylon-pe (1853)