Tuvakuéra omboʼe hag̃ua ifamíliape
Jesús akóinte iñeʼẽrendu
HASÝPA ndéve neñeʼẽrendu hag̃ua?a... Ani rejepyʼapy, enterovévape ojehu upéva. Ndépa reikuaa Jesúspe jepe ijetuʼu hague iñeʼẽrendu hag̃ua?...
Máva mávapepa neñeʼẽrenduvaʼerã?... Upeichaite, nde túva ha nde sýpe. La Biblia heʼi voi: ‘Peẽ taʼýra ha tajyrakuéra, peneñeʼẽrenduvaʼerã pende ru ha pende sýpe Jesucristo oipotaháicha’ (Efesios 6:1, ÑÑB). Jesús katuete iñeʼẽrenduvaʼekue ituvakuérape. Ndépa reikuaa mávapa hikuái?... Itúva tee ningo Ñandejára Jehová, ha Jehová ñande Ru avei (Mateo 6:9, 10). Oimérire repensa haʼe hague José ha María nderejavýi, haʼekuéra haʼe avei. Péro reikuaápa mbaʼéichapa oikorakaʼe chuguikuéra itúva ha isy?...
Peteĩ ánhel hérava Gabriel heʼivaʼekue Maríape imembytaha. Péro mbaʼéicha piko oikóta upéva José ha María neʼĩrava gueteri upérõ oñeno oñondive? Jehová ojapo peteĩ milágro. Pe ánhel heʼi Maríape: ‘Ñandejára puʼaka nemoʼãta. Upévare ne memby imarangatúta ha oñehenóita chupe Ñandejára Raʼy’ (Lucas 1:30-35, NM).
Jehová oguerova Itaʼýra rekove yvágagui María retepýpe ha Jesús okakuaa isy ryépe, ambue mitã okakuaaháicha. Upe rire José omenda María rehe ha haimete nueve mése rire onase Jesús. Heta hénte oimoʼã José itúva teeha, ha jaʼe porãsérõ g̃uarã Jesús mokõi itúva.
Orekórõ guare 12 áño Jesús ojapo peteĩ mbaʼe ohechaukáva ohayhuetereiha Itúva yvagapeguápe. Mbaʼépa ojapóraʼe? Jesús família ningo ojepokuaavaʼekue oviaha puku Jerusalén peve omboarete hag̃ua Pascua. Péro oho jey rire hógape, opytáva Nazarétpe, José ha María tape kuʼáre ohechakuaa Jesús noĩriha hendivekuéra. Reikuaase piko mbaʼéichapa okañy chuguikuéra?...
Upérõ guare María imembyretáma (Mateo 13:55, 56). Ha oviaháneraʼe ihentekuérandi; pór ehémplo iñermána Salomé ha hovaja Zebedeo ndive, avei koʼãva familiakuéra: Santiago ha Juan. Upéicha rupi oiméne hikuái oimoʼã Jesús oĩha hendivekuéra (Mateo 27:56; Marcos 15:40; Juan 19:25).
Péro ohechakuaa rire ndaiporiha, José ha María ipyʼaropumoʼã ha oho jey Jerusalénpe ha tres día haguépe otopa chupe témplope. Upémarõ María oporandu Jesúspe: ‘Che memby, mbaʼéreiko péicha rejapo orerehe? Nde túvandi oretarovaite rohekávo’. Péro Jesús heʼi chupe: ‘Maʼerã piko pecherekáraʼe? Ndapeikuaáingaʼu piko aimevaʼerãha che Ru rógape?’ (Lucas 2:45-50, NM).
Mbaʼépa nde ere, ombohovái vai piko Jesús isýpe?... Oiméne José ha María oikuaa porã Jesús ohosetereiha témplope (Salmo 122:1). Ha Jesús opensáneraʼe upépe raẽvete ohekataha chupe ituvakuéra, ajépa?... Umi mbaʼe Jesús heʼivaʼekue heta tiémpore omopensa Maríape.
Ndépa mbaʼe repensa, ojapópa Jesús upe rire itúva ha isy heʼíva chupe?... La Biblia heʼi: ‘Upéi Jesús oho jey ituvakuérandi Nazarétpe ha iñeʼẽrendu chupekuéra’ (Lucas 2:51, 52, NM). Mbaʼépa nemboʼe iñehémplo?... Upeichaite, neñeʼẽrenduvaʼerãha nde túva ha nde sýpe.
Jesús akóinte iñeʼẽrenduvaʼekue, péro upéva ndeʼiséi ndaijetuʼuiha chupe.
Pór ehémplo Jehová omeʼẽ chupe peteĩ tembiapo ko yvy ape ári; haʼe omanovaʼerã yvyporakuéra rehehápe. Péro pe pyhare omano mboyve, Jesús oiméne oipota Ñandejára ojoko upéva (Lucas 22:42). Upéicharamo jepe iñeʼẽrendu ha ojapo Itúva oipotáva. La Biblia heʼi Jesús ‘jehasa asýpe oikuaa hague mbaʼépa heʼise ñeʼẽrendu’ (Hebreos 5:8). Ikatúpa ñande avei jajapo upéicha? Ikatúpa ñaneñeʼẽrendu ijetuʼúramo jepe?...
[Nóta]
a Oimérõ releereína peteĩ mitãndi, epytaʼimi oĩ jave mbohapy púnto ha ehaʼarõ tombohovái umi porandu.
PORANDUKUÉRA:
▪ Mbaʼéichapa oiko Maríagui Jesús sy, ha mbaʼérepa jaʼekuaa Jesús mokõi itúva hague?
▪ Mbaʼérepa José ha María ndohechakuaáikuri Jesús noĩriha hendivekuéra?
▪ Moõpa Jesús oimoʼãrakaʼe ituvakuéra ohekataha chupe?
▪ Mbaʼépa nemboʼe Jesús ehémplo?
[Nóta oĩva taʼanga ndive páhina 31]
Mbaʼérepa nde ere José ha María ohovaʼerãha kuri témplope raẽ oheka Jesúspe?