Ñandejára ohechauka ñanderayhuha

‘Ñandejára ipyʼaporã rupi ñanesãmbyhy, ñanembohekojoja ha omeʼẽta ñandéve jeikove opaʼỹva.’ (ROM. 5:21)

1, 2. Mbaʼépa umi Romaygua ohejavaʼekue yvyporakuérape, ha mbaʼe jopóipa iporãve?

“UMI Romaygua oheja peteĩ mbaʼe iñimportánteva yvyporakuérape g̃uarã. Upéva hína umi léi omoĩvaʼekue, ha omboʼe hikuái tekotevẽha ojeiko opaichagua léi heʼiháicha.” Péicha heʼi peteĩ mboʼehára otradusíva Biblia ha omboʼéva Universidad de Melbourne, Austráliape, hérava David J. Williams. Añetehápe ningo ndaijapúi ko karai, péro oĩ ambue mbaʼe tuichavéva ojehejavaʼekue opavave yvypórape. Mbaʼépa hína upéva? Peteĩ jopói oúva Jehovágui ikatúva ñanepytyvõ ñaime porã hag̃ua hendive, jajesalva ha jaikove opa ára g̃uarã.

² Ikatu jaʼe Jehová omeʼẽha ñandéve ko jopói neporãva pe hustísia ojerureháicha. Pablo oñeʼẽvaʼekue upévare Romanos kapítulo 5-pe, ha omombeʼu ñanemokyreʼỹ hag̃uáicha, ndojoguái umi dokuménto ojeporúvape trivunálpe. Haʼe heʼi: ‘Ñandejára ñanembohekojojáma ñande jerovia rupi ha ñandepyʼaguapy hendive Jesucristo rupive’. Mbaʼéichapa ñañeñandu Jehová omeʼẽ haguére ko jopói? Jahechakuaa haʼe ñanderayhuetereiha ha ñañehaʼãmbaite jahechauka avei jahayhuha chupe. Apóstol Pablo oñeñanduvaʼekue upéicha, ha ohai: ‘Ñandejára ñanemyenyhẽ imborayhúpe pe espíritu sánto omeʼẽvaʼekue ñandéve rupive’ (Rom. 5:1, 5).

3. Mbaʼépa ñañeporanduvaʼerã?

³ Ñapensami, mbaʼérepa tekotevẽraʼe oñemeʼẽ ko jopói porãite? Mbaʼépa ojapo Jehová omeʼẽ hag̃ua opavave yvypórape ha pe hustísia ojerureháicha? Mbaʼépa jajapovaʼerã maymáva jahupyty hag̃ua ko jopói? Ñandejára Ñeʼẽ ombohovái koʼã porandu ha ohechauka mbaʼeichaite pevépa Jehová ñanderayhu. Ñahesaʼỹijomína koʼã mbaʼe.

Ñandejára mborayhu ipuʼaka pekádore

4, 5.a) Mbaʼeichaite pevépa Jehová ohechauka ñanderayhuha? b) Mbaʼéichapa oñemyesakãve ñandéve Romanos 5:12 heʼíva?

⁴ Ñanderayhueterei rupi Jehová ombou Itaʼýra peteĩete ñanepytyvõ hag̃ua. Pablo heʼi voi: ‘Ñandejára ohechauka ñanderayhuha, Jesucristo omanóvo ñanderehehápe, jepe pekadór gueteri ñande’ (Rom. 5:8). Koʼápe jahecha porã Jesús omanórõ guare ñanderehehápe, “pekadór gueteri ñande”. Ajépa tuichaite mbaʼe upéva! Jahechamína mbaʼéicha rupípa oiko ñandehegui pekadór.

⁵ Pablo omyesakã hag̃ua upéva heʼi: ‘Peteĩ kuimbaʼe rupi niko oike pe pekádo ko yvy ári. Ha upe pekádo rupi oike pe ñemano. Ha upéicha ñemano ohasa opavavépe, opavave opeka rupi’ (Rom. 5:12). Ambue téystope Jehová omyesakãve ñandéve mbaʼépa heʼise koʼã mbaʼe. Jaikuaaháicha, Jehová ojapo ypy vaʼekue mokõi yvypórape, Adán ha Eva, ha ojapo chupekuéra ijoguaháramo, upéicha rupi perfékto hikuái. Upéi omanda mokõivévape peteĩ mbaʼe ndahasýiva okumpli hag̃ua, ha heʼi porã chupekuéra naiñeʼẽrendúiramo omanotaha katuete (Gén. 2:17). Péro Adán ha Eva nopenái Ñandejárare ha ojapo peteĩ mbaʼe ivaietereíva naiñeʼẽrendúivo chupe. Péicha ohechauka hikuái nokumpliseiha Jehová léi ha ndoipotaiha oisãmbyhy chupekuéra (Deu. 32:4, 5).

6.a) Mbaʼérepa Adán ha Eva familiare opyta ñemano poguýpe, ha mbaʼépa oiko Jehová omeʼẽ rire Iléi? b) Mbaʼérepa ikatu ñambojoja pe pekádo ñagueronaséva?

⁶ Adán ha Eva ou ifamília opeka riréma, upévare enterove yvypóra ogueronase pekádo ha ohupyty itúva rembiapo vai repykue. Péro Jehová ndohekýiri chupekuéra Adán ojapovaʼekue. Ndahaʼéi ningo haʼekuéra umi nokumplirivaʼekue Jehová rembipota; hiʼarive upe tiémpope ndaipóri gueteri mbaʼeveichagua léi (Gén. 2:17). Upéicharõ jepe, pe pekádo ohupyty enterovévape. Upe guive maymáva opytáma pekádo ha ñemano poguýpe Jehová omeʼẽ peve Iléi umi isrraelítape. Ha upe Léi rupive ohechakuaa hikuái pekadorha (elee Romanos 5:13, 14). Pe pekádo haʼete peteĩ mbaʼasy orekóva tuvakuéra ha ombohasáva ifamíliape. Upévare umi mitã ogueronase voi pe mbaʼasy. Upéicha avei pe pekádo ñanderupyty enterovévape ñande tuvakuéra ombohasa rupi ñandéve ha ñande ñambohasa jey ñane famíliape. Upévare opavave japyta ñemano poguýpe. Péro ikatúne piko ñasẽ ko mbaʼasy vaietégui?

Mbaʼépa Jehová omeʼẽ ñandéve Jesucristo rupive?

7, 8. Mbaʼérepa tuichaite ojoavy Adán ha Jesús ojapovaʼekue ha mbaʼépa ojehupyty?

⁷ Ñanderayhueterei rupi, Ñandejára ojapóma tekotevẽva ñandepeʼa hag̃ua pekádo poguýgui. Pablo omombeʼu Ñandejára ojapoha upéva pe “Adán mokõiha” rupive, peteĩ kuimbaʼe perfékto Adán perfékto haguéicha (1 Cor. 15:45). Péro perféktoramo jepe mokõivéva, ndojojoguaiete umi mbaʼe ojapóvape ha ohupyty mokõi mbaʼe idiferentetereíva ojuehegui. Mbaʼéicha rupípa upéva? (elee Romanos 5:15, 16.)

⁸ Pablo heʼi pe jopói ‘Ñandejára omeʼẽva ñandéve ndaikatuiha ñambojoja Adán rembiapo vaikuére’. Mbaʼépa jaʼekuaa Adán ojapovaʼekuére? Haʼe ojapo ivaíva ha opagamantevaʼerã upévare, Ñandejára heʼi haguéicha omanovaʼerã katuete. Péro Pablo omombeʼuháicha, ndahaʼéi Adán añónte pe omanóva: “Peteĩ kuimbaʼe rembiapo vai rupi niko heta omano”. Haʼe opekávo ombohasapaite iñemoñarekuérape hembiapo vai repykue, ha upéva ñanderupyty avei ñandéve. Péro tuichaiterei ñandepyʼaguapy jaikuaa haguére ikatuha Jesús okambia ñane situasión. Mbaʼépa ojehupytýta Cristo rupive? Pablo ombohovái: ‘Oñembohekojoja [heta] yvypórape oikove hag̃ua’ (Rom. 5:18).

9. Mbaʼépa heʼise Jehová ‘ombohekojojaha’ yvypórape, heʼi haguéicha Romanos 5:16, 18?

⁹ Mbaʼépa heʼise Jehová ‘ombohekojojaha’ yvypórape? Pe mboʼehára David J. Williams, ohai: “Ndahaʼéi pe tapicha okambiáva ipyʼapýpe orekóva, síno okambia isituasión Ñandejára renondépe [...].Oñembojoja Ñandejárape peteĩ hués rehe, ohusgáva peteĩ ndahekojojáivape. Péro haʼe odesidi oipytyvõ pe hembiapo vaívape. Oheja rei chupe hembiapo vaikue ha amo ipahápe ohecha hekojojávaramo pe pekadórpe”.

10. Mbaʼépa ojapo Jesús ikatu hag̃uáicha Jehová ombohekojoja yvypórape?

¹⁰ Péro mbaʼéicha rupi piko ‘ko yvy ohusgáva’ hekópe oheja reíta hembiapo vaikue peteĩ hekojojaʼỹvape? (Gén. 18:25, ÑÑB.) Jehová ikatu ojapo upéva ohayhuetereígui yvypórape ha ombou ko yvy ape ári Itaʼýra peteĩetépe, upéicha omoĩ tekotevẽva ikatu hag̃uáicha oñeperdona umi pekádo. Jesús ningo ojapovaʼekue hekoitépe Itúva rembipota, ohasáramo jepe heta mbaʼe ijetuʼúva. Oĩ oñembohory vaíva hese, oipyʼaraʼã ha otrata vaíva chupe. Péro haʼe iñeʼẽrendu Jehovápe omano meve pe yvyráre (Heb. 2:10). Omeʼẽvo hekove perfékto opaga oñemosãso hag̃ua Adán ñemoñarekuérape pekádo ha ñemano poguýgui (Mat. 20:28; Rom. 5:6-8).

11. Máva añoitépa osalva yvyporakuérape?

¹¹ Pablo heʼivaʼekue Jesús ouha ‘opagapaite’ Adán operdevaʼekuére (1 Tim. 2:6, NM). Mbaʼe rehépa ‘opagapaite’? Adán opekávo ombohasa imperfeksión ha ñemano opavave iñemoñarépe. Péro Jesús perfékto rupi ikatúkuri heta ifamília ha osẽvaʼerãmoʼã perfékto hikuái.a Upéicha rupi yma ojeʼevaʼekue Jesús ha umi família ikatuvaʼekue haʼe oreko ombojojataha Adán ha ifamiliarépe, ha haʼekuéra ikatuneha opaga ojeperdevaʼekuére. Péro, heʼípa la Biblia Jesús ifamíliarire ikatúne hague haʼekuéra opaga Adán ñemoñarekuérare? Nahániri. Romanos 5:15-19 ohechauka “peteĩ kuimbaʼe” omano rupi ñanderehehápe ñanesãso hague pekádo poguýgui. Péicha jahecha Jesús rekove perfékto añoite ikatu hague oñembojoja Adán rekovére. Jesús ojapógui opa mbaʼe ‘hekopete’ ha iñeʼẽrendu rupi Jehovápe ipyʼaite guive omano meve, yvypóra ikatu oñembohekojoja ha ojesalva (2 Cor. 5:14, 15; 1 Ped. 3:18). Upéicharõ, mbaʼéichapa Ñandejára oiporu Jesucristo sakrifísio oheja rei hag̃ua ñane rembiapo vaikue?

Oñemosãso yvypórape Jesucristo omano rupi

12, 13. Mbaʼérepa jaʼe Jehová oporohayhu ha imbaʼeporãgui ombohekojojaha yvyporakuérape?

¹² Jehová oguerohory pe sakrifísio Itaʼýra ojapovaʼekue ñanemosãso hag̃ua (Heb. 9:24; 10:10, 12). Péro, mbaʼéichapa oĩvaʼekue Cristo remimboʼekuéra oikove aja ko yvy ape ári? Enterovetéva ningo imperfékto gueteri. Oñehaʼãmbaitéramo jepe oiko hekópe, katuete ojavy jepi hikuái. Mbaʼérepa? Ogueronase rupi pe pekádo (Rom. 7:18-20). Péro koʼág̃a Ñandejára ikatúma ombohekojoja yvyporakuérape Jesucristo ‘opagapaite’ rupi Adán operdevaʼekuére. Jehová oiporu Itaʼýra sakrifísio repykue hembiguaikuéra rehehápe.

¹³ Ñandejára oporohayhu ha imbaʼeporã rupi ojapo upéva. Haʼe oiporu itaʼýra sakrifísio repykue umi apóstol ha ambue tapicha rehehápe, ndahaʼéi haʼekuéra ohupytýva hembiapo porãgui rei. Jehová oipota rupínte oipeʼa chupekuéra ñemano poguýgui ha omosãso Adán pekádogui. Pablo omyesakã porã upéva heʼívo: ‘Ñandejára imbaʼeporãgui ha peẽ pejeroviágui hese, haʼe pendesalva. Kóva ndahaʼéi peteĩ mbaʼe pendejehegui ikatúva pejapo, Ñandejára omeʼẽ peẽme’ (Efe. 2:8).

14, 15. Mbaʼépa ohupytýta umi yvypóra Ñandejára ombohekojojáva, ha mbaʼépa akóinte ojapovaʼerã?

¹⁴ Ajépa imbaʼeporãite Ñandejára Jehová operdonávo yvyporakuérape pe pekádo ogueronasevaʼekue ha opa mbaʼe vai ojapóva! Ñañemoĩtaramo jaipapa umi mbaʼe vai opavave ojapovaʼekue oikuaa mboyve Jehovápe, jaha reíta hese, enterovénte ningo jajavy heta mbaʼépe. Péro Jesús sakrifísio rupive Jehová ikatu oheja rei ñandéve umíva. Pablo heʼi voi: ‘Pe jopói Ñandejára omeʼẽva ombohekojoja yvypórape heta tembiapo vaikuégui’ (Rom. 5:16). Upéicharõ jepe, umi apóstol ha ambue tapicha Ñandejára ombohekojojavaʼekue pe sakrifísio rupive, tekotevẽ akóinte omombaʼeguasu Jehovápe ha ojerovia hese ipyʼaite guive. Mbaʼépa ohupytýta ojapóramo péicha? ‘Ñandejára imbaʼeporãgui ombohekojoja chupekuéra oisãmbyhy ha oikove hag̃ua opa ára g̃uarã Jesucristo rupi’. Adán ohejavaʼekue ñandéve ndojoguaiete pe jopói Jehová omeʼẽvape. Adán kúlpare opavave ñamano, péro Jesús rupive ikatu jaikove tapia g̃uarã (Rom. 5:17, NM; elee Lucas 22:28-30).

¹⁵ Umi yvypóra Jehová ombohekojojáva oiko itaʼýraramo. Koʼã ojeporavovaʼekue omoirũta Jesucrístope, upéicha rupi oñemoingovéta chupekuéra espírituicha ha oisãmbyhýta hendive yvágape (elee Romanos 8:15-17, 23).

Jehová ohechauka ohayhuha avei ambuépe

16. Mbaʼe jopóipa ikatu avei ohupyty umi kristiáno ndohomoʼãiva yvágape?

¹⁶ Péva ndeʼiséi opavave oservíva Jehovápe ha ojeroviáva hese oisãmbyhytaha Jesús ndive yvágape. Ñandejára rembiguaikuéra yma guare ogueroviavaʼekue ikatutaha oikove opa ára g̃uarã ko yvy ape ári peteĩ lugár neporãmba jepévape. Upéicha avei heta kristiáno koʼag̃agua ohaʼarõ upe jopói porãite. Ikatúpa jaʼe Jehová ombohekojojamaha avei koʼãvape oiko hag̃ua ko yvy ape ári? Pablo omyesakã haguéicha umi Romayguápe, jaʼekuaa upeichaha.

17, 18.a) Mbaʼéichapa Jehová ohechavaʼekue Abrahánpe? b) Mbaʼéicha rupípa Ñandejára ohecha Abrahánpe hekojojávaramo?

¹⁷ Pablo imanduʼa peteĩ ehémplo neporãvare. Oñeʼẽ Abrahán rehe, peteĩ kuimbaʼe ojeroviavaʼekue Ñandejárare ha oiko heta áño oñemeʼẽ mboyve pe léi umi Israelguápe. Upérõ Jesús ndoúi gueteri avei ha avave ndorekói esperánsa ohóvo yvágape (Heb. 10:19, 20). Pablo heʼi: ‘Pe promésa Ñandejára ojapovaʼekue Abrahán ha iñemoñarekuérape heʼi opytavaʼerãha imbaʼerãkuéra ko yvy, ndahaʼéi haʼe ojapógui pe léi heʼíva, síno Ñandejára oguerekógui chupe hekojojávaramo ojerovia rupínte’ (Rom. 4:13, BNP; Sant. 2:23, 24). Péicha jahecha Ñandejárape g̃uarã Abrahán hekojoja hague (elee Romanos 4:20-22).

¹⁸ Upéva ndeʼiséi Abrahán ndopekái hague. Hese ndojeʼéi hekojojaha ndojapói haguére arakaʼeve ivaíva (Rom. 3:10, 23). Jehová iñaranduetereígui ohechakuaa ojeroviaha hese ipyʼaite guive ha oguerohory umi mbaʼe ojapóva. Pór ehémplo, Abrahán ojeroviaiterei pe “ñemoñare” oñeprometevaʼekue osẽtaha ifamiliarégui. Upe Ñemoñare hína pe Mesías, Cristo (Gén. 15:6; 22:15-18). Oikuaágui ‘Jesucristo ñandejoguataha’ isakrifísio rupive, pe Hués Tuichavéva ikatúma operdona Abrahán pekádo ha ambue Ñandejára rembiguái yma guare rembiapo vaikue. Upéicha rupi oñemoingove jeýta avei chupekuéra (elee Romanos 3:24, 25; Sal. 32:1, 2).

Ñandejára ñanembohekojoja avei koʼág̃a

19. Mbaʼérepa ñanemokyreʼỹ jaikuaávo Abrahán ohupytyvaʼekue?

¹⁹ Ajépa javyʼaite jaikuaávo Ñandejára ñanderayhuetéva ohecha hague Abrahánpe hekojojávaramo. Jehová nombohekojojái chupe ojapoháicha umi kristiáno ‘oisãmbyhýtavare Cristo ndive’. Umi kristiáno ojeporavovaʼekue ningo ndahetái ha ‘oñehenói chupekuéra hekomarangatu hag̃ua’ ha oiko chuguikuéra ‘Ñandejára raʼy’ (Rom. 1:7, BNP; 8:14, 17, 33). Upéicharamo jepe, Abrahángui oiko “Ñandejára angirũ”, hiʼarive upérõ Jesús neʼĩra gueteri omeʼẽ hekove omosãso hag̃ua yvypórape (Sant. 2:23; Isa. 41:8). Mbaʼépa jaʼekuaa upéicharõ umi kristiáno ohaʼarõvare oiko ko yvy ape ári Ñandejára múndo pyahúpe?

20. Mbaʼépa ojapovaʼerã opavave oipotáva Ñandejára ombohekojoja chupe Abrahán rehe ojapo haguéicha?

²⁰ Koʼã kristiáno ndohomoʼãi yvágape; umi unhídopente ‘Ñandejára ombohekojoja’ oisãmbyhy hag̃ua ‘Jesucristo opagágui’ isakrifísio rupive. (Rom. 3:24, ÑÑB; 5:15, 17, NM). Upéicharamo jepe, ojeroviaiterei Jehová rehe ha pe omeʼẽvare ñandesalva hag̃ua. Ha upéva ojekuaa hesekuéra ojapógui kyreʼỹme umi tembiapo porã, pór ehémplo ‘omoherakuã Ñandejára Rréino ha oporomboʼe Jesucrístogui’ (Hech. 28:31, BNP). Upéicha rupi, Jehová ombohekojoja chupekuéra Abrahán rehe ojapo haguéicha. Ndohupytymoʼãiramo jepe hikuái pe jopói ‘Ñandejára omeʼẽvaʼekue’ umi unhídope, ovyʼaiterei ikatu haguére oiko Ñandejára amígoramo Abrahángui oiko haguéicha.

21. Mbaʼépa jahupytýta Jehová hekojoja ha ñanderayhu rupi?

²¹ Ñandejára promésa ndopareimoʼãi politikokuéra promésaicha. Haʼe heʼivaʼekue yvypóra oikovetaha opa ára g̃uarã ko yvy ape ári ha katuete okumplíta. Upéva hína pe Mburuvicha Guasu Ijojahaʼỹva rembipota ha iñarandueterei rupi ombohapepaitéma okumpli hag̃ua iñeʼẽ. Avei opa mbaʼe ojapóvape ohechauka hekojojaha ha mbaʼeichaitépa oporohayhu. Ndareíri Pablo heʼi: ‘Ñandejára ohechaukáma imborayhu ñandéve, Jesucristo omanóvo ñanderehehápe, jepe pekadór gueteri ñande’ (Rom. 5:8).

[Nóta]

Hesakã porãpa ndéve

• Mbaʼépa ñagueronase opavave Adán ñemoñare ha mbaʼépa ñanderupyty upévare?

• Emombeʼu mbaʼéichapa ‘ojepagapaite’ pe mbaʼe vai Adán ojapovaʼekuére ha máva añoitépa ojapo upéva.

• Mbaʼépa jahupytýta Ñandejára ñanembohekojoja rupi?

[Nóta oĩva taʼanga ndive páhina 13]

Peteĩ kuimbaʼe perfékto opeka, ambue kuimbaʼe perfékto katu ‘opagapaite’ isakrifísio rupive

[Nóta oĩva taʼanga ndive páhina 15]

Ñandejára ñanembohekojoja Jesús rupive. Iporãite ko ‘marandu’!