La Biblia okambia chupekuéra

“Koʼág̃a che rembireko ovyʼaitereive chendive” (RIGOBERT HOUETO)

• ONASE: 1941-PE

• PAÍS: BENÍN

• ÓTRA INFORMASIÓN: OMENDA HETA KUÑÁRE, NDOCHAʼÉI VAʼEKUE UMI TESTÍGO DE JEHOVÁRE

CHE REMBIASAKUE:

Anase vaʼekue peteĩ siuda tuicháva héravape Cotonou, opytáva Benínpe. Che túa ha che sy katóliko vaʼekue, péro ndorohoguasúi vaʼekue la tupaópe. Upe tiémpope, upe lugárpe pe léi opermiti vaʼekue umi kuimbaʼépe omenda heta kuñáre, ha pe che aiko haguépe oĩ vaʼekue heta katóliko hembireko hetáva. Kon el tiémpo che voi amenda jepe 4 kuñáre.

Áño 1970 rupi oñepyrũ vaʼekue peteĩ rrevolusión, ha che apensa vaʼekue upéva omehoráta hague la situasión che paíspe. Upéicha rupi che pyʼaite guive aapoja pe rrevolusión, ha aike pe polítikape. Umi rrevolusionário ndochaʼéi vaʼekue umi testígo de Jehová rehe, pórke haʼekuéra noñentremetéi polítikare. Upévare, che avei ndachaʼéi vaʼekue hesekuéra ha apersegi voi chupekuéra. Áño 1976-pe oñemosẽmba vaʼekue pe paísgui umi misionéro testígo de Jehovápe, ha che aime vaʼekue segúro ndoumoʼãvéima hague hikuái núnka mas.

LA BIBLIA CHEPYTYVÕ AKAMBIA HAG̃UA:

Pe rrevolusión opa kuri áño 1990-pe. Tuichaiterei añesorprende kuri pórke sapyʼaitérõ g̃uarã, oupaite jeýma umi misionéro. Upépe añepyrũ apensa a lo mehór Ñandejára oĩha mbaʼe koʼã héntendi. Mas o ménos upe tiémpope avei añepyrũ ambaʼapo ótro ládo, ha peteĩva umi ombaʼapóva chendive haʼe vaʼekue Testígo. Haʼe ensegída voi opredikáma chéve ha ohechauka chéve la Bíbliape Ñandejára Jehová ñanderayhuha ha ndogustaietereiha chupe umi inhustísia (Deuteronomio 32:4; 1 Juan 4:8). Koʼã mbaʼe chegustaiterei kuri, ha aikuaasevéma voi Jehovápe. Upévare aasepta peteĩ kúrso bíblico.

Pyaʼe voi añepyrũma aha umi rreunión ojapóvape umi testígo de Jehová. Ahecha mbaʼeichaitépa haʼekuéra ojoayhu añete ha ojorrespeta tahaʼe haʼéva paisgua, ha lomímonte oiméramo ipláta térã imboriahu. Ha upéva chesorprendeterei. Amáske ajeheʼa umi Testígore, ahechakuaa haʼekuéra de verdaite haʼeha Jesús segidór (Juan 13:35).

Apilla la aservi hag̃ua Jehovápe, ahejámante vaʼerãha pe iglésia katólika. Upéva hendyeterei kuri, pórke ndaipotaieterei oñepensa vaipa cherehe. Ohasa rire un vuén tiémpo, ha Jehová chepytyvõ rupi, hasýpe añanima ha ahejaite pe iglésia.

Péro oĩ kuri ótra kósa ajapove vaʼerã, ha ndahaʼeiete kuri vyrorei. Astudiávo la Biblia, aaprende Ñandejárape ndogustaiha peteĩ kuimbaʼe omendáramo heta kuñáre (Génesis 2:18-24; Mateo 19:4-6). Chupe g̃uarã pe che matrimónio ypykue añoite la ovale vaʼekue. Upémarõ upe che rembirekóndi roho roñanota hag̃ua pe léi heʼiháicha, ha umi ótrape ajerure ohopa hag̃ua ógagui. Péro apreparapaite avei umi mbaʼe oikotevẽtava hikuái ani hag̃ua ofalta chupekuéra mbaʼeve oho rire. Kon en el tiémpo, mokõi che rembirekokue oñepyrũ avei oservi Jehovápe.

UMI MBAʼE PORÃ AHUPYTÝVA:

Che rembireko ningo haʼe gueteri katólika, péro orrespeta la che desisión ha oheja aservi Jehovápe. Koʼág̃a che rembireko ovyʼaitereive chendive, ha che voi ahechakuaa tuicha amehora hague.

Che apensámi vaʼekue aike vaʼerãha pe polítikape aipytyvõ porã hag̃ua che vesinokuérape, péro ahechakuaa en rrealida mbaʼeve ndahupytýi hague upéicha. Koʼág̃a katu aime segúro Ñandejára Rréino añoite osolusionataha entéro umi provléma jarekóva (Mateo 6:9, 10). Aagradeseterei Jehovápe chepytyvõ haguére de verda añeñandu porã ha avyʼa hag̃ua.

“Akambiase vaʼekue, péro cheforsaiterei kuri” (ALEX LEMOS SILVA)

• ONASE: 1977-PE

• PAÍS: BRASIL

• ÓTRA INFORMASIÓN: HAʼE VAʼEKUE PASTÓR PENTEKOSTÁL

CHE REMBIASAKUE:

Akakuaa vaʼekue umi vílla oĩvare peteĩ siuda héravape Itu, opytáva São Páulope. Pe sóna che aiko hague ikonosído voi oĩ haguére hetaiterei la delinkuénte.

Che cheviolénto ha cherekovaieterei vaʼekue. Hiʼarive avende jepe vaʼekue dróga entéro. Kon el tiémpo, ahechakuaa la péichante asegírõ, aháta hague kárselpe osino katu ajejukáta hague, ha upémarõ ajedeha chugui. Upéi añepyrũ aha peteĩ iglésia pentekostálpe, ha kon el tiémpo oiko chehegui pastór.

Apensa vaʼekue upépe de verda ikatúta hague aipytyvõ la héntepe. Un tiémpore ajapo vaʼekue umi sermón peteĩ prográma de rrádiope, ha chefamóso jepe vaʼekue pe sónape. Péro upe rire ahechakuaa pe rrelihiónpe unos kuántonte oĩ hague la isinséro ha ipyʼaporãva, ha la majoríape legálmente nointeresaiha hapichakuéra ni Ñandejára. Haʼetévaicha voi chéve sólamente oĩha hikuái pe rrelihiónpe ogana hag̃uánte pláta, ha upémarõ ajedehaite chugui.

LA BIBLIA CHEPYTYVÕ AKAMBIA HAG̃UA:

Añepyrũ rire astudia la Biblia umi testígo de Jehovándi, ensegídama voi apilla haʼekuéra idiferenteha umi ótra rrelihióngui. Oĩ vaʼekue mokõi mbaʼe chekonvensetéva voi. Primero, umi Testígo ndahaʼéi ku heʼínteva jahayhu vaʼerãha Ñandejárape ha ñande rapichakuérape, síno ke ojapo voi upéva. Segundo, haʼekuéra noñentremetéi polítikare ni umi gérrare (Isaías 2:4). Koʼã mokõi mbaʼe chekonvense vaʼekue péva haʼeha la rrelihión verdadéra, pe tape ipoʼíva ñandegueraháva vída etérnape (Mateo 7:13, 14).

Ahechakuaa tekotevẽta hague akambia tuichaháicha voi Ñandejára cheguerohory hag̃ua. Tekotevẽ kuri akuida porãve che familiakuérare, ha avei tekotevẽta cheumildeve. Akambiase vaʼekue, péro cheforsaiterei kuri. Upéicharõ jepe, Jehová chepytyvõ rupi, chepuʼaka hese. Che rembirekópe osorprendeterei kuri mbaʼeichaitépa akambia. Haʼe raẽ ningo oñepyrũ vaʼekue ostudia la Biblia, péro ohecha rire mbaʼéichapa akambia, oñepyrũ avei pyaʼeterei oprogresa. Upéi ja rojedesidíma voi oikotaha orehegui testígo de Jehová, ha rojevautisa oñondive el mísmo día.

UMI MBAʼE PORÃ AHUPYTÝVA:

Che rembireko ha che rovyʼaiterei ikatu haguére roipytyvõ umi mbohapy ore famíliape haʼe hag̃ua avei Jehová amigoite. Che família kompletoite rovyʼaiterei voi. Aagradeseterei Jehovápe chepytyvõ haguére aikuaa hag̃ua la verda. Iñeʼẽ rreálmente ikatu okambiaite la ñande rekove, che ikatu haʼe upéva che juru renyhẽngue.

“Koʼág̃a añandu chepotĩha Ñandejára renondépe” (VICTORIA TONG)

• ONASE: 1957-PE

• PAÍS: AUSTRALIA

• ÓTRA INFORMASIÓN: HETAITEREI OSUFRI IMITÃKUÑAʼÍME

CHE REMBIASAKUE:

Che akakuaa vaʼekue peteĩ lugár héravape Nueva Gales del Sur. Ore roĩ vaʼekue éntre 7 ermáno, ha che haʼe la majór. Che túa iviolénto ha ikaʼueterei vaʼekue, ha che sy avei iviolentaiterei vaʼekue. Haʼe pyʼỹi heʼi vaʼekue chéve cheñañaha ha ahataha asufri pe infiérnope, ha che akyhyjeterei vaʼekue upévagui.

Mama heta oñemboharáimi vaʼerã cherehe, ha upévare pyʼỹi ndaikatúi vaʼekue ni eskuélape aha. Arekópe 11 áño pe goviérno chepeʼa mama umíagui ha chegueraha peteĩ lugár orekóvape hikuái umi mitãme g̃uarã. Tiémpo riremi cheraha hikuái peteĩ konvéntope. Arekópe 14 áño akañýma pe konvéntogui. Che ja ndahasevéima kuri ógape, upévare añepyrũ aiko pe kállere peteĩ várrio héravape Kings Cross.

Pe kállere añepyrũ vaʼekue ajedroga, akaʼu, ahecha pornografía, ha aike pe prostitusiónpe. Péro chemanduʼa una vuéltape tuichaiterei añemondýi hague. Oĩ vaʼekue peteĩ karai orekóva peteĩ diskotéka, ha che aiko hína kuri por un tiémpo pe karai departaméntope. Peteĩ pyhare, ou hendápe mokõi kuimbaʼe. Haʼe heʼi chéve aha hag̃ua pe ótro kotýpe, péro upe guive lomímonte ahendu kuri la heʼíva hikuái. ¡Pe karai heʼimi chevendetaha chupekuéra! Haʼekuéra chemokañýta kuri peteĩ várko de kárgape, ha chegueraháta kuri Japónpe ambaʼapo hag̃ua upépe peteĩ várpe. Tuichaiterei vaipa ningo añemondýi, ha upémarõ apo pe ventánarupi ha akañy upégui.

Ajotopa peteĩ karai oĩ vaʼekuéndi de paséo pe siudáre, ha amombeʼu chupe la ojehu vaʼekue chéve. Che aipota kuri haʼe omeʼẽ chéve pláta, péro upéva rangue haʼe heʼi chéve ikatuha aha hendive hógape ajahumi ha haʼu hag̃ua álgo. Amo ipahápe núnka ndahái la hógagui, ha un áño haguépe romenda.

LA BIBLIA CHEPYTYVÕ AKAMBIA HAG̃UA:

Añepyrũ rire astudia la Biblia umi testígo de Jehovándi, aaprende Satanás káusare la peichaite jasufriha, ha chemorrenegaiterei upéva, pórke siémpre ojeʼe vaʼekue chéve Ñandejára haʼeha la ñanembosufríva. Péro tuicha avei añetrankilisa aaprendérõ guare haʼe ndokastigaiha la héntepe peteĩ infiérnope, pórke ymaite guive che akyhyjéva upévagui.

Chesorprendeterei vaʼekue ahechárõ guare umi Testígo siémpre orekoha enkuénta la Biblia heʼíva ojapóta jave oimeraẽ mbaʼe. Haʼekuéra legálmente oiko la Biblia heʼihaichaite. Che ningo ndahaʼéi vaʼekue la chereʼẽmbáva, péro umi Testígo siémpre cherrespeta ha cherayhu vaʼekue, haʼe térã ajapóramo jepe álgo noĩporãiva.

Che ningo apensa vaʼekue ndavaleiha mbaʼeverã, ha upéva heta chembosufri vaʼekue. Che jepe chejeguaru chejehegui voi, ha añeñandu vaʼekue upéicha heta tiémpore ajevautisa rire jepe. Che ahayhueterei Jehovápe, péro aime vaʼekue segúra haʼe núnka ndacherayhumoʼãiha chéve.

Amo 15 áñorupi ajevautisa rire, oiko álgo okambiaitéva la apensa lája. Peteĩ diskúrso ojejapóvape peteĩ rreuniónpe, pe diskursánte olee Santiago 1:23, 24. Upépe heʼi Ñandejára Ñeʼẽ ojoguaha peteĩ espéhope, ha ikatuha ñanepytyvõ ñantende hag̃ua mbaʼépa opensa ñanderehe Jehová. Upépe añepyrũ akalkula noiméipa Jehová opensa ótra kosaite hína cherehe. Primerorã añemohatãʼi la che idéape, pórke asegínte apensa Jehová ndacherayhumoʼãiha voínte.

Unos kuánto día haguépe, alee peteĩ téxto okambiaitéva la che rekove. Upe téxto haʼe hína Isaías 1:18. Upépe Jehová voi heʼi: “Peju che rendápe ñañemongeta hag̃ua, ha che poipytyvõta peiko porã jey hag̃ua chendive. Pende pekadokuéra pytãramo jepe tuguýicha, opytáta morotĩ asy pe niéveicha”. Haʼetévaicha ku Jehová heʼíva chéve voi: “Ejúna Vicky, ndaipóri provléma ñañemongeta hag̃ua. Che roikuaa porã, ha aikuaa porã avei nde pekadokuéra. Péro aikuaa avei la oĩva ne korasõme, ha upévare che rohayhu”.

Chemanduʼa upe pyhare ndaikatúi hague ni ake. Asegi gueteri apensa Jehová ndacherayhuiha, péro añepyrũ avei apensa pe sakrifísio ojapo vaʼekuére Jesús. Upépe apilla sapyʼa avía sído Jehová ipasiénsia hague oikóvo cherehe hetaiterei tiémporema, ha hetaiterei hendáichama ohechauka hague chéve cherayhuetereiha. Péro che katu haʼete voi haʼéva chupe: “Nambréna, ndéngo ndacherayhumoʼãi núnka. Ha pe sakrifísio ojapo vaʼekue nde Raʼy ndaikatúi opagapa la che ajapo vaʼekue”. Haʼetévaicha voi ku arrechasáva mbaʼe pe sakrifísio ojapo vaʼekue cherehehápe Jehová. Heta apensa Jesús sakrifísiore, ha hasypeve añandu legálmente Jehová cherayhuetereiha.

UMI MBAʼE PORÃ AHUPYTÝVA:

Koʼág̃a añandu chepotĩha Ñandejára renondépe, ha por fin aiko trankilomi. Avei, koʼág̃a rovyʼaitereive che ménandi ha avyʼaiterei ikatu haguére aipuru umi mbaʼe ahasa vaʼekue aipytyvõ hag̃ua ótrope. Koʼág̃a mas ke núnka Jehová haʼe che amigoite.

“Ñandejára okontesta chéve che ñemboʼe” (SERGEY BOTANKIN)

• ONASE: 1974-PE

• PAÍS: RUSIA

• ÓTRA INFORMASIÓN: ITAVYETE VAʼEKUE PE HEAVY METAL REHE

CHE REMBIASAKUE:

Anase vaʼekue peteĩ lugár héravape Vótkinsk, upépe onase vaʼekue avei peteĩ kompositór ifamósova hérava Piotr Ilič Chaikovski. Che família ningo imboriahueterei vaʼekue. Che túa katu ikalida vaʼekue, péro ikaʼueterei rupi, heta vése ojeiko vaipa ógape ha ndaigústoi mbaʼeve.

Che ndahaʼéi vaʼekue la chevaletereíva eskuélape, ha upéicha rupi kon el tiémpo añepyrũ apensa ndavaleiha mbaʼeverã. Upéi añepyrũma añemohaʼeño, nakonfiái voi avavére, ha ni eskuélape ndahasevéi. Chemanduʼa otokámi jave chéve ajapo exposisión pe eskuélape, ndaikatúimi hague añeʼẽ ni aexplika umi mbaʼe aikuaa porãva jepe. Atermina rire pe octavo grádo, che livréta rehe heʼi vaʼekue: “Saʼieterei palávra oikuaa, ha ndorekói kapasida heʼi hag̃ua la opensáva”. Upéva hasyeterei vaʼekue chéve, ha koʼytevéntema apensa cheinutilha. Upéi añepyrũma voi apensa ikuentaveha amano mbaʼe.

Chemitãrusúpe añepyrũma vaʼekue amokõ, ha primerorã upéva chemoñeñandu porã guaʼu. Péro upéi tuichaiterei akaʼu jave, chestorváma la che konsiénsia. Mbaʼevete naisentídoi chéve. Añedeprimi ha avése díare voi nasẽvéi ógagui. Upépe katu ja añepyrũma voi akalkula ajesuisidávo.

Arekópe 20 áño, ahendu primera ves pe músika heavy metal. Chegustaiterei vaʼekue la ipu lája pe músika, ha chembolokoite voi la ahendu jave. Upéi añepyrũma ajeheʼa umi ohendúvare avei peichagua músika, añemoakãrangue puku, añemonamichãi, ha añemonde ojapoháicha umi rrokéro chegustavéva. Mbeguekatúpe añepyrũ vaʼekue chekachafa ha cheviolénto, ha upévare pyʼỹi roiko vaipa ógape.

Apensa vaʼekue avyʼavetaha ahendúramo pe heavy metal, péro amo ipahápe ótra kosaite la oikóva. Pe músika chegueraha vaíma hína kuri, ha aikuaa rire umi músiko che ahayhúva ojapoha mbaʼe vai, añedesepsionaite chuguikuéra.

Upévare añepyrũ jeýma apensa ajesuisidávo, ha ko vuéltape ja enserioitéma. Péro apensa avei ojapo vaietereitaha mamáre la ajesuisidáramo, ha upevaiténte la chejoko vaʼekue. Haʼe ningo cherayhueterei vaʼekue, ha siémpre okuida porã cherehe. Hetaiterei ningo asufri upe tiémpope. Che ja chekueráima la che rekovégui, péro apensa avei ndovaleiha ajesuisida.

Ajedistraemi hag̃ua añepyrũ vaʼekue alee umi lívro ruso. Peteĩva umívape alee peteĩ oservívare peteĩ tupaópe. Ha upépe derrepentete apensa che avei ajapómante vaʼerãha álgo Ñandejárape g̃uarã ha la hénte rehehápe. Upémarõ, primera ves en la vída añemboʼe Ñandejárape che pyʼaite guive. Ajerure chupe tachepytyvõ atopa hag̃ua álgo ikatúva ajapo porã ha avyʼamínte hag̃ua. Chemanduʼa pe añemboʼe aja, añandu hague tuichaiterei añetrankilisaha. Péro la oikóva upe rire katu tuichaitereivéntema chesorprende. Dos óra haguépente, peteĩ testígo de Jehová og̃uahẽ ógape, ha oporandu chéve ndastudiaséipa la Biblia. ¡Ñandejára okontesta chéve che ñemboʼe! Upe día guive, tuichaiterei okambia la che rekove.

LA BIBLIA CHEPYTYVÕ AKAMBIA HAG̃UA:

Ijetuʼuetereíramo jepe chéve, ahejaite pe heavy metal, ha amombopaite entéro mbaʼe hesegua areko vaʼekue. Upéicharõ jepe, hetaiterei tiémpore opyta vaʼekue che akãme umi músika. Káda ke ahasámi peteĩ lugár ipuhápe hína upe músika, oupaite jey chéve la ahasa vaʼekue. Umi mbaʼe aaprende vaʼekue hína la Bíbliagui ningo chegustaiterei, ha nachemanduʼasevéima kuri umi mbaʼe yma guare rehe. Upévare apropósito voi ndahasavéi umi lugár oñehenduhárupi peichagua músika. Ha peichahágui chemanduʼa jeýramo la yma guarére, ensegída añemboʼe Ñandejárape ajerure hag̃ua chupe sokórro. Upéva chepytyvõ areko hag̃ua “Ñandejára pyʼaguapy tuichavéva entéro mbaʼe yvyporakuéra ikatúvagui ontende” (Filipenses 4:7).

Astudiávo la Biblia aaprende avei umi kristianokuéra omombeʼu vaʼerãha ótrope mbaʼépa heʼi Ñandejára Ñeʼẽ (Mateo 28:19, 20). Sinséramente apensa vaʼekue che núnka ndaikatumoʼãiha ajapo upéva. Péro astudia rire la Biblia avyʼaitereive ha aiko trankilomi. Upévare apensa la hénte oikotevẽtereiha avei oaprende la che aaprende vaʼekue, ha upémarõ añepyrũ amombeʼu ótrope umíva. Akyhyjéramo jepe, añepyrũ añemongeta ótrondi umi mbaʼe aaprendévare. Ha tuichaiterei añesorprende, pórke añeʼẽ rire ótrope la Bíbliare, mbeguekatúpe ajeroviavéma chejehe. Ha avei upéva chepytyvõ ikatu hag̃uáicha amombareteve che jerovia Ñandejárare.

UMI MBAʼE PORÃ AHUPYTÝVA:

Koʼág̃a amendáma, ha rovyʼaiterei che rembirekóndi. Avei ikatúma aipytyvõ heta héntepe oikuaa hag̃ua la Biblia heʼíva, umíva apytépe che ermána ha che sýpe. Aservi rupi Ñandejárape ha aipytyvõ rupi la héntepe, koʼág̃a ikatu haʼe de verdaite avyʼaha.