Ñameʼẽkena sakrifísio Jehovápe ñande pyʼaite guive

‘Oimeraẽ mbaʼe pejapóva, pejapo pende pyʼaite guive [Jehovápe] g̃uarãicha.’ (COL. 3:23, BNP)

1-3. a) Jesús ningo omeʼẽ hekove yvyporakuéra rehehápe, heʼisépa upéva natekotevẽveimaha ñameʼẽ mbaʼeveichagua sakrifísio? Emyesakã. b) Mbaʼépa tekotevẽ jaikuaa porã jajapóta jave peteĩ sakrifísio?

SÍGLO primérope, Jehová omombeʼu hembiguaikuérape ndojeporumoʼãveimaha pe Léi oñemeʼẽvaʼekue Moisés rupive, Jesús omeʼẽ rire hekove yvypóra rehehápe (Col. 2:13, 14). Upévare natekotevẽi ni ndaideprovechovéima umi isrraelítape oikuaveʼẽramo mymba térã ambue mbaʼe, ojapo haguéicha oikóvo heta áñorema. Peteĩ mitãrerekua okumpliháicha hembiapo oñangarekóvo peteĩ mitãre, pe Léi okumplíma hembiapo oipytyvõvo umi hudíope ou peve Cristo (Gál. 3:24).

² Péro upéva ndeʼiséi ñande kristiáno nañamombaʼeiha umi sakrifísio. Apóstol Pedro heʼivaʼekue ‘ñaikuaveʼẽvaʼerãha, Jesucristo rupive, umi sakrifísio Ñandejára oguerohorýva’ (1 Ped. 2:5, NM). Ha apóstol Pablo katu ohechauka porã kristianokuéra ojapóva hekovépe, Jehová ohechaha peteĩ ‘sakrifísioramo’ (Rom. 12:1, NM).

³ Ñande kristianokuéra ñameʼẽramo térã ñamboykéramo peteĩ mbaʼe ñandegustáva Jehová rehehápe, haʼe ohecha upéva peteĩ sakrifísioramo. Upévare tekotevẽ jaikuaa porã Jehová oguerohorýtapa umi sakrifísio jajapóva, ha upearã iporãta jajepyʼamongetáramo umi mbaʼe ojerurevaʼekuére umi isrraelítape ombaʼekuaveʼẽtarõ guare hikuái.

UMI SAKRIFÍSIO JAJAPÓVA ÁRA HA ÁRA

4. Mbaʼe rehépa ñanemanduʼavaʼerã jajapóvo ñane rembiapo ára ha ára?

⁴ Sapyʼánte ijetuʼu jahechakuaa hag̃ua umi mbaʼe jajapóva ára ha ára ikatuha ñanepytyvõ ñameʼẽ hag̃ua sakrifísio Jehovápe. Pór ehémplo, ikatu ñapensa umi tembiapo jajapóva ñande rogapýpe, eskuélape, ñande travahohápe, ñambaʼejogua jave térã ambue mbaʼe, ndajajapoiha Ñandejárape g̃uarãicha. Péro oiméramo ñañemeʼẽma Jehovápe, téra jajaposehína upéva, iporãta ñañangarekóramo umi mbaʼe jajapóvare. Ñanemanduʼavaʼerã ñande kristianoha tódo él día, ndahaʼéi sapyʼamínte, upévare jajapovaʼerã la Biblia heʼíva opa mbaʼépe. Pablo heʼi porã vaʼekue voi: ‘Oimeraẽ mbaʼe pejapóva, pejapo pende pyʼaite guive [Jehovápe] g̃uarãicha’ (elee Colosenses 3:18-24).

5, 6. Mbaʼe rehépa ñapensa raẽ vaʼerã jadesidi mboyve mbaʼéichapa jaiko ha ñañemondéta?

⁵ Umi tembiapo jajapóva ára ha ára ningo ndahaʼéi peteĩ servísio ñameʼẽva Ñandejárape. Upéicharõ jepe, Pablo heʼi jajapovaʼerãha ñande ‘pyʼaite guive Jehovápe g̃uarãicha’. Upévare iporãta jajepyʼamongetáramo opa mbaʼe jajapóvare ha ñañeporandu: “Ahechaukápa cheakãguapyha añemonde ha aiko lájare? Térãpa sapyʼánte atĩta haʼe hag̃ua che testígo de Jehováha añemonde vai ha aiko rupi hekopeʼỹ?”. Ñambyasyetéta ningo oiméramo upéicha! Ñande Jehová rembiguái arakaʼeve ndajahejavaiséi héra porãite (Isa. 43:10; 2 Cor. 6:3, 4, 9).

⁶ Jajepyʼamongetamína umi mbaʼe jajapo ha ñapensávare, ha jahecha jajapopañaína ‘ñande pyʼaite guive Jehovápe g̃uarãicha’. Ha jajapóvo upéva ñanemanduʼavaʼerã haʼe ohaʼarõ hague umi isrraelíta omeʼẽ chupe iporãnguete (Éxo. 23:19).

ÑANDE REKOVE OKAMBIA ÑAÑEMEʼẼVO JEHOVÁPE

7. Mbaʼépepa ñañekompromete ñañemeʼẽvo Jehovápe?

⁷ Ñande ningo ñañemeʼẽ Jehovápe jajapose rupínte, péicha ñapromete ñamotenondetaha chupe opa mbaʼépe (elee Hebreos 10:7). Katuete upéva haʼe pe mbaʼe iporãvéva jajapovaʼekue. Ha oiméne jahechakuaáma ñañehaʼãramo jajapo Ñandejára oipotáva opa mbaʼépe, akóinte ñasẽ porãtaha (Isa. 48:17, 18). Ñande ningo peteĩ tetã imarangatu ha ovyʼáva, ñahaʼanga rupi umi mbaʼe porã oguerekóva Ñandejára, pe Mboʼehára Ijojahaʼỹva (Lev. 11:44; 1 Tim. 1:11).

8. Mbaʼépa ñaaprende jaikuaávo Jehovápe g̃uarã imarangatu hague umi isrraelíta sakrifísio?

⁸ Jehovápe g̃uarã ningo imarangatu umi sakrifísio ojapovaʼekue umi isrraelíta (Lev. 6:25; 7:1). Evréope pe ñeʼẽ “marangatu” heʼise opa mbaʼe ojeporavóva térã oñemboykéva ojeporu hag̃ua Ñandejára servísiope añoite. Upévare, jaipotáramo Ñandejára oguerohory ñande sakrifísio, ndojeheʼaivaʼerã mbaʼeve ojejapóvare ko múndope. Ha ndajahayhuivaʼerã umi mbaʼe ñande Rúpe ombojeguarúva (elee 1 Juan 2:15-17). Pór ehémplo, ndajajeheʼaivaʼerã mbaʼeve ikatúvare ñanemongyʼa térã ñanemoĩ vai henondépe (Isa. 2:4; Rev. 18:4). Avei ndajaikoivaʼerã ñamaña térã ñapensa mbaʼeve ikyʼa ha itieʼỹvare (Col. 3:5, 6).

9. Mbaʼérepa iñimportánte ñaipytyvõ ñande rapichakuérape?

⁹ Pablo heʼivaʼekue kristianokuérape: ‘Ani penderesarái pejapo hag̃ua iporãva pende rapicháre ha pendepojera hag̃ua hendivekuéra. Ñandejára oguerohory umichagua sakrifísio’ (Heb. 13:16, NM). Jaikuaa ningo Jehová ohechaha peteĩ sakrifísioramo umi mbaʼe jajapóva ñaneñeʼẽrendu hag̃ua chupe térã ñaipytyvõramo ñande rapichakuérape. Ha jahayhúramo chupekuéra, jahechaukáta avei ñande Jesús remimboʼeha (Juan 13:34, 35; Col. 1:10).

ÑAMEʼẼ SAKRIFÍSIO ÑAMOMBAʼEGUASÚVO ÑANDEJÁRAPE

10, 11. Mbaʼéichapa Jehová ohecha ñane predikasión ha ñande servísio, ha mbaʼépa jajapovaʼerã jaikuaávo upéva?

¹⁰ Jaikuaa ningo ‘ñamombeʼúvo opavavépe pe esperánsa jaguerekóva’, jajapoha peteĩ mbaʼe iporãva. Jaaprovechapañaína opaichagua oportunida ñañeʼẽ hag̃ua umi mbaʼe jagueroviávare? Pablo heʼi jajapóvo ko tembiapo iñimportantetéva ñameʼẽhahína Ñandejárape peteĩ sakrifísio omombaʼeguasúva chupe ha péicha jaikuaauka héra marangatu (Heb. 10:23; 13:15; Ose. 14:2). Iporãta ñapensáramo mboy tiémpopa jaiporu ñamoherakuã hag̃ua pe marandu porã ha mbaʼépa ikatu jajapo ñandekatupyryve hag̃ua. Ha pyʼỹinte pe Aty Ñanemboʼéva Japredika Hag̃uáme oñeñeʼẽve ñandéve upévare. Péro ñamombeʼupátaramo umi konsého oñemeʼẽva predikasionrã, ipukuetereíta. Upévare ñamombyky hag̃ua, jaʼekuaa ñañehaʼãmbaitevaʼerãha jajapo iporãveháicha ñane predikasión, tahaʼe ñasẽ jave ogahárupi, kállere térã oimehápe, jaikuaágui Jehová ohechaha upéva peteĩ sakrifísioramo. Opavave ningo ñane situasión idiferénte, péro pe tiémpo jaiporúva ñamoherakuã hag̃ua pe marandu porã ohechaukáta ñamombaʼépa ñande servísio.

¹¹ Ñande kristiáno ningo ñañemotiémpo káda semána ñamombaʼeguasu hag̃ua Jehovápe, tahaʼe ñaneaño térã peteĩ atýpe. Haʼe voi ojerure ñandéve jajapo hag̃ua upéva. Jaikuaaháicha, koʼág̃a rupi natekotevẽvéima ñamboyke umi sábado japytuʼu hag̃ua térã káda áño jaha umi fiésta ojejapóvape Jerusalénpe, péro ikatu ñaaprende heta mbaʼe koʼã Léigui. Pór ehémplo, Ñandejára oipota ñamboyke ñane rembiapokuéra jastudia hag̃ua Iñeʼẽ, ñañemboʼe ha jaha hag̃ua rreunionhápe. Avei oipota umi omoakãva ogapy ojapo pe Aty Jastudia Hag̃ua Ñande Rogayguándi (1 Tes. 5:17; Heb. 10:24, 25). Upévare opavave iporã ñañeporandu: “Tekotevẽpa ajapo porãve che rembiapo Ñandejára servísiope?”.

12. a) Mbaʼépa ñande ikatu ñameʼẽ Jehovápe oñembojojáva pe insiénso ojehapyvaʼekuére altár ári? b) Mbaʼéichapa ñañemboʼevaʼerã jaikuaámarõ oñembojojaha upéva pe insiénsore?

¹² Rréi David opuraheivaʼekue Jehovápe: “Insiénsoicha tog̃uahẽ ndéve che ñemboʼe” (Sal. 141:2). Jajepyʼamongetamína ko mbaʼére ha ñañeporandumi: Añemboʼe pyʼỹipa Ñandejárape? Mbaʼe rehépa añemboʼe jepi? Revelaciónpe ningo oñemombeʼu Jehová ohenduha umi “hekomarangatúva ñemboʼe”, haʼeramoguáicha peteĩ isiénso hyakuã asýva (Rev. 5:8). Péro ñanemanduʼavaʼerã Jehová heʼi hague umi isrraelítape ohapýtarõ altár ári pe insiénso, oprepara porã vaʼerãha hikuái haʼe heʼi hagueichaite chupekuéra. Ha ndojapóiramo upeichaite, haʼe omboykéntema (Éxo. 30:34-37; Lev. 10:1, 2). Ñande avei jaipotáramo Jehová oguerohory ñane ñemboʼe, jajapovaʼerã ñande pyʼaite guive ha haʼe ojerureháicha.

ÑAMEʼẼ HA OÑEMEʼẼ ÑANDÉVE

13, 14. a) Mbaʼéichapa oipytyvõ Páblope umi ermáno Filiposgua ha Epafrodito, ha mbaʼéichapa ohecha haʼe upéva? b) Mbaʼéichapa ikatu ñahaʼanga Epafrodito ha umi ermáno Filiposguápe?

¹³ Saʼi térã hetáramo jepe umi kontrivusión ñameʼẽva obra mundiálpe g̃uarã, Jehová ohecha peteĩ sakrifísioramo (Mar. 12:41-44). Síglo primérope umi ermáno Filiposgua omondo Epafrodítope Rómape oipytyvõ hag̃ua Páblope, ha katuete ogueraháne avei chupe platami. Ha ndahaʼéi upérõ guarénte oipytyvõva chupe hikuái. Haʼekuéra pyʼaporãme omeʼẽ koʼã mbaʼe apóstol Páblope, ani hag̃ua ojepyʼapy plátare ha ikatu hag̃uáicha itiempove opredika hag̃ua. Pablo omombaʼeterei upe jopói, upévare heʼi: ‘Haʼete ningo peteĩ insiénso hyakuã asýva, Ñandejára oguerohorýva’ (elee Filipenses 4:15-19). Haʼe, ha avei Jehová, oagradeseterei umi ermáno ojapóva hesehápe.

¹⁴ Koʼág̃a rupi avei Jehová omombaʼeterei umi kontrivusión ñameʼẽva obra mundiálpe g̃uarã. Ha opromete ñandéve akóinte ñamotenondéramo Irréino, haʼe oñangarekotaha ñanderehe ha omeʼẽtaha ñandéve opa mbaʼe ñaikotevẽva (Mat. 6:33; Luc. 6:38).

JAHECHAUKÁKENA JAAGRADESEHA

15. Mbaʼe mbaʼe rehépa nde reagradeseve Jehovápe?

¹⁵ Jehová ningo hetaiterei mbaʼe porã omeʼẽ ñandéve, pór ehémplo, ñande rekove, jaʼumivaʼerã, ao, peteĩ lugár jaiko hag̃ua ha áire jarrespira hag̃ua. Avei ñanepytyvõ ñantende hag̃ua umi mbaʼe oĩva la Bíbliape, omeʼẽva ñandéve esperánsa ha ñanepytyvõva jajeroviave hag̃ua hese. Ñapensáramo mávapa hína Jehová ha hetaite mbaʼéma ojapoha ñande rehehápe, katuete jahechakuaáta omereseha jaagradese ha ñamombaʼeguasu chupe (elee Revelación 4:11).

16. Mbaʼépa jajapóta ñamombaʼéramo Jesús sakrifísio?

¹⁶ Jahecha haguéicha pe ótro artíkulope, Jesucristo sakrifísio peteĩ jopói iporãitereíva Ñandejára omeʼẽva ñandéve. Ajépa ñanderayhuete omeʼẽvo ñandéve ko mbaʼe porãite! (1 Juan 4:10.) Mbaʼépa jajapovaʼerã jaikuaámarõ upéva? Pablo heʼi: ‘Cristo mborayhu ñanemokyreʼỹ, jahechakuaágui peteĩ omano hague opavave rehehápe; [...] ha omano opavavére ikatu hag̃uáicha umi oikovéva ndoikovéima ijupe g̃uarã, oikove hag̃ua guei upe hesehapekuéra omano ha oikove jey vaʼekuépe g̃uarã’ (2 Cor. 5:14, 15). Koʼápe Pablo heʼi ñamombaʼéramo umi mbaʼe Ñandejára omeʼẽva ñandéve, jaiporutaha ñande rekove ñamombaʼeguasu hag̃ua Chupe ha Itaʼýrape. Ha mbaʼéichapa jahechaukáta jaagradeseha chupekuéra? Ñaneñeʼẽrendúvo, ñamoherakuãvo kyreʼỹme pe marandu porã ha ñaipytyvõramo ñande rapichápe oiko hag̃ua chugui Jesús remimboʼe (1 Tim. 2:3, 4; 1 Juan 5:3).

17, 18. Mbaʼéichapa heta ermáno ojapo porãve umi sakrifísio omeʼẽva Jehovápe? Emombeʼu peteĩ ehémplo.

¹⁷ Ikatúpa iporãve umi sakrifísio ñameʼẽva Ñandejárape? Heta ermáno ojepyʼamongeta rire umi mbaʼe porãita Jehová ojapóvare hesehapekuéra, odesidi oiporu porãve itiémpo. Upéicha rupi ikatu osẽve predikasiónpe térã ojapo ambue mbaʼe Ñandejárape g̃uarã. Pór ehémplo, oĩ ojapóva iprekursorádo auxiliar káda áño, uno térã hetave mése. Ambue katu ojapo iprekursorádo rregulár ha avei oĩ ohóva oipytyvõ oñemopuʼãhápe umi lugár oñemombaʼeguasu hag̃ua Jehovápe. Ajépa iporãitevaʼerã jajapórõ koʼã mbaʼe jaagradese hag̃ua Jehovápe! Haʼe ningo omombaʼe ha oguerohoryeterei umi mbaʼe jajapóva ñande pyʼaite guive jaagradese hag̃ua chupe.

¹⁸ Heta kristiáno oñehaʼãmbaite oservi Jehovápe oagradese hag̃ua umi mbaʼe porãita omeʼẽvare chupe. Péicha ojapovaʼekue peteĩ ermána heráva Morena, haʼe ningo michĩete guive Católica. Ha oikuaaségui hetave mbaʼe Ñandejára ha hembipotágui oho meme tupaópe ha avei ohecha mbaʼépa heʼi umi filosofía orientál; péro koʼãva nombohováiri chupe umi mbaʼe haʼe oikuaaséva. Ostudia rire la Biblia umi testígo de Jehovándi añoite ontende umi mbaʼe oikuaasevaʼekue. Haʼe omombaʼe ha oagradeseterei umi mbaʼe oaprendéva, upévare odesidi oiporupaite itiémpo ha imbaretekue Ñandejára servísiope. Ojevautisa riremi oñepyrũma ojapo meme iprekursorádo auxiliar, ha ijamírentema chupe, ojapo iprekursorádo rregulár. Koʼág̃a ojapóma 30 áño oservi hague Jehovápe de tiémpo kompléto.

19. Mbaʼeichagua sakrifísiopa ikatu ñaikuaveʼẽ Jehovápe?

¹⁹ Jaikuaaháicha heta ermáno ndaikatúi ojapo iprekursorádo, ojaposéramo jepe. Péro tahaʼe haʼéva umi mbaʼe ikatúva jajapo Ñandejára servísiope, enterovéva ñameʼẽkuaa umi sakrifísio ombopyʼarorýva chupe. Mbaʼéichapa jajapokuaa upéva? Jaiko lájare: jahechaukávo ñamombaʼe ha jarrespetaha la Biblia heʼíva ha akóinte ñanemanduʼávo ñarrepresentaha chupe. Ñande jeroviáre: jajerovia mbaretévo Haʼe okumplipaha ohóvo hembipota. Ha ñane rembiapóre: kyreʼỹme ñamoherakuãvo pe marandu porã. Koʼã mbaʼe ningo osẽvaʼerã ñane korasõgui, ha péicha jahechaukáta jaagradeseha Jehovápe ñande pyʼaite guive opa mbaʼe omeʼẽvare ñandéve, ha akóinte ñameʼẽta sakrifísio ombopyʼarorýva chupe.

[Komentário oĩva páhina 25-pe]

Jehová ningo imbaʼeporãiterei ñanendive, ñanemokyreʼỹpa upéva ñambaʼapo porãve hag̃ua iservísiope?

[Nóta oĩva taʼanga ndive páhina 23]

Jaaprovechapañaína opaichagua oportunida ñañeʼẽ hag̃ua umi mbaʼe jagueroviávare?