¿Oñehundínepa ko yvy?

▪ Oĩvaʼekue oimoʼãva ko yvy oñehunditaha 21 de octubre de 2011. Péro ipahápe ndoikói upéicha. Peteĩ lokutór Estados Unidosgua, Harold Camping, heʼivaʼekue Ñandejára ára guasu oñepyrũtaha 21 de mayo de 2011, peteĩ yvyryrýi guasu rupive oikótava ko yvy tuichakuére. Ha cinco mése haguépe, 21 de octubre, oñehundietetaha ko yvy.

Péro, ¿ohejáne piko Ñandejára oiko upéva? Nahániri, la Biblia heʼi voi ko yvy arakaʼeve noñehundimoʼãiha: “Nde [Ñandejára] rejapovaʼekue ko yvy, ha nde rupi opytavaʼerã” (Salmo 119:90, ÑÑB).

Oĩ oikuaa porãva la Biblia omboʼéva ha upéicharamo jepe oguerovia ko yvy okaipataha. Haʼekuéra heʼi 2 Pedro 3:7, 10 omboʼeha upéva. Upépe ningo heʼi: ‘Yvága ha yvy koʼag̃agua ojehejahína oñehundi hag̃ua tatápe. Pe ára pahápe, ha umi hembiapo vaíva oñehundiha árape, yvága ha yvy ikusuguéta. [...] Ñandejára ára guasu og̃uahẽta ku mondaháicha. Upévo, sununu guasúpe yvága oñehundíta ha opa mbaʼe oĩva yvágape okaipáta tatápe. Yvy ha opa mbaʼe oĩva ipype, ikusuguéta’. ¿Heʼiséparaʼe apóstol Pedro hendypataha ko yvy?

Nahániri. Oimérire upéicha, umi mbaʼe heʼivaʼekue Pedro upe rire oñekumplivaʼerã avei upeichaite, ha ndojoavyivaʼerã ambue téystondi oĩva la Bíbliape. Upéva heʼise umi estrélla, ko yvága tuichakue ha opa mbaʼe oĩva ipype, okaipaitevaʼerãha avei, yvyporakuéra iñañáva káusare. Péro epensamíntena, ¿rehapypánepa nde róga rejukase rupi peteĩ tarave? ¡Ajépa naisentidomoʼãi upéva! Upéicha avei, Jehová nohundimoʼãi ko univérso tuichakue oĩ rupi oñemoĩva hese peteĩ hendapemi.

Umi hénte ogueroviáva koʼã mbaʼe ojoavy Jesucristo heʼivaʼekuéndi: “Ovyʼa umi ipyʼaporãva, Ñandejára omeʼẽta chupekuéra ko yvy” (Mateo 5:5, NM; Salmo 37:29). ¿Oĩne piko peteĩ túva omopuʼãva peteĩ óga porã ifamíliape g̃uarã ha ipahápe ohapypa? (Salmo 115:16.) ¡Ndaiporichéne! Ha Jehová ningo ndahaʼéi ñande Apoharénte, síno ñande Ru ñanderayhuetéva avei (Salmo 103:13; 1 Juan 4:8).

Avei, 2 Pedro 3:7, 10-pe apóstol Pedro oiporu pe ñeʼẽ yvy oñeʼẽ hag̃ua umi hénte añáre. Ha ombojoja Ñandejára ára guasu pe Dilúvio rehe (2 Pedro 3:5, 6). Jaikuaaháicha upérõ omanovaʼekue umi hénte hembiapo vaíva añoite. Ko yvy, Noé ha ifamília noñehundirivaʼekue. Avei, ko téysto heʼívo yvága, oñeʼẽ umi yvypóra goviérnore. Upéicharõ, Ñandejára Rréino oĩva yvágape opytáta umi yvypóra goviérno rendaguépe, ha umi hénte aña ha nokambiaséiva oñehundietéta (Daniel 2:44).

¿Jaʼekuaápa upéicharõ oñehunditaha ko yvy? Nahániri. Umi hénte aña ningo la oñehundítava. Ko yvy ha umi tapicha iñeʼẽrendúva Ñandejárape opytáta opa ára g̃uarã (Proverbios 2:21, 22).