La Biblia okambia chupekuéra
¿MBAʼÉICHAPA peteĩ kuña Filipinasgua opoi vevídagui ha oiko porãve hogapýpe? ¿Mbaʼépa omomýi peteĩ karatéka Australiayguápe oiko hag̃ua chugui testígo de Jehová? Ehechamína mbaʼépa heʼi hikuái.
“Ndaipóri ningo peteĩ koʼẽmente okambiámava” (CARMEN ALEGRE)
ONASE: 1949-PE
HETÃ: FILIPINAS
MBAʼÉPA OJAPOVAʼEKUE: HOʼU RASA VEVÍDA
CHE REMBIASAKUE: Anase San Fernándope, peteĩ puévlo opytáva Camarines Súrpe. Péro akakuaapa rire hetave tiémpo ahasa siuda Antipolope (opytáva Rizalpe), peteĩ lugár hetahápe sérro, oĩháme heta yvyramáta ha kapiʼipe hovyũ asýva. Avárõ guare Antipolope, haʼevaʼekue peteĩ puevloʼi itrankílova, ha pytũmbývo haimetéma avave ndaiporivéi kállere. Péro koʼág̃a hetaiteve hénte oĩ upe puévlope.
Ava riremi Antipolope, aikuaa Benjamínpe ha romenda. Péro upéva ijetuʼueterei vaʼekue chéve, ndahaʼeiete che apensa haguéicha. Ha añembyesarái hag̃ua che provlémagui, añepyrũ haʼu vevída. Upéi aju ni che nañaguantavéi ha che família heta ohasa asy upévare. Ndarrespetái che ménape, ha oimeraẽ mbaʼe ojapóva haʼe térã che membykuéra chemorrenegaiterei. Jaʼe porãsérõ g̃uarã sarambi oiko ore rogapýpe.
LA BIBLIA CHEPYTYVÕ AKAMBIA HAG̃UA: Che ména ermána Editha ningo testígo de Jehová, ha haʼe oremokyreʼỹ rostudia hag̃ua la Biblia, ha rojapo upéva roiko porãse jeýgui ore rogapýpe.
Rostudiávo la Biblia, hetaiterei mbaʼe porã roaprende. Pór ehémplo, opokoiterei cherehe heʼíva Revelación térã Apocalipsis 21:4. Oñeʼẽvo umi tapicha oikótavare peteĩ Hardín neporãvape ko yvy ape ári pe Rréino yvagapegua poguýpe, heʼi Ñandejára ‘omokãtaha hesaykuéra, ndaiporimoʼãvéima ñemano, tasẽ jaheʼo ha mbaʼembyasy’. Che aimesetereíma voi umi tapicha ohupytýtava koʼã mbaʼe porãite apytépe.
Ahechakuaa upearã akambiavaʼerãha che lája ha ahejavaʼerãha umi mbaʼe vai ajapóva. Péro ndaipóri ningo peteĩ koʼẽmente okambiámava, heta tiémpo chereraha ahejaite hag̃ua vevída, aaprende hag̃ua cherory ha chepasiénsia che membykuérare. Avei arrespeta ha aipytyvõ hag̃ua che ménape, haʼe ningo pe omoakãva ore rogapy.
Roho ñepyrũrõ guare testígo de Jehová rreunionhápe Benjamin ndive, roguerohoryeterei umi mbaʼe rohecháva. Haʼekuéra ndaikaʼúi ha ndoikói ohuga plátare. Ndoapoʼíri avavépe, upéva rangue omombaʼe ha orrespeta enterove tapichápe. Rohechakuaa rojuhu hague pe rrelihión añetegua (Juan 13:34, 35).
UMI MBAʼE PORÃ AHUPYTÝVA: Tuichaiterei okambia ore rogapy, Benjamín ndive roiko vyʼápe ha igústo oréve romboʼe ore rapichápe la Biblia. Umi mokõi ore família ha hembirekokuéra oñepyrũma avei ostudia la Biblia, ha hiʼãiterei oréve oservi hikuái Jehovápe orendive. Añetehápe ndaipóri mbaʼeve iporãvéva ko mbaʼégui.
“Apensa avave ndaipuʼakamoʼãiha cherehe” (MICHAEL BLUNSDEN)
ONASE: 1967-PE
HETÃ: AUSTRALIA
MBAʼÉPA OJAPOVAʼEKUE: KARATÉKA
CHE REMBIASAKUE: Akakuaavaʼekue peteĩ táva neporãvape, hérava Albury (Nueva Gales del Sur). Oĩramo jepe ojapóva mbaʼe vai, oikoháicha jepi voi ambue puévlope, Albury haʼe peteĩ puévlo itrankiloitereíva.
Mokõi che ermána, che ermáno ha che roñehekomboʼe porãiterei vaʼekue. Che sy ha che ru ojedivorsiáramo jepe arekópe siete áño, arakaʼeve nombofaltáiva oréve hikuái mbaʼeve. Aha umi eskuéla omboʼe porãvévape oĩva upe puévlope ha che ru oipota amohuʼã rire che estúdio ambaʼapo porã. Péro chegustave vaʼekue umi depórte, cheakuãiterei voi karréra de visiklétape ha chevale karátepe. Amo ipahápe ambaʼapo peteĩ tallér oñemyatyrõhápe áuto ikatu hag̃uáicha chetiempove umi depórtepe g̃uarã.
Che rete vevýi asy ha upévare añemombaʼeguasu voi. Chembareteterei rupi aime voi ambyepoti hag̃uáicha oimeraẽvape ha sapyʼánte apensa avave ndaipuʼakamoʼãiha cherehe. Pe chemboʼéva karáte ohechakuaa chembaretetereiha ha ndaikatuiha ajejoko, upévare chemboʼe aikokuaa hag̃ua che rapichakuéra apytépe, ajejoko ha che akãguapy hag̃ua. Akóinte chemomanduʼa iñimportanteha cheñeʼẽrendu ha avavépe natraisionaivaʼerãha.
LA BIBLIA CHEPYTYVÕ AKAMBIA HAG̃UA: Añepyrũrõ guare astudia la Biblia, aaprende Jehovápe ombojeguaruha umi violénsia (Salmo 11:5). Che aimoʼãvaʼekue pe karáte haʼeha peteĩ depórte ndaipeligrósoiva ha naivioléntoiva. Umi mbaʼe oñemboʼéva upépe ojoguaiterei voi chéve la Biblia omboʼévape. Umi testígo de Jehová chembostudiáva la Biblia ipasiénsia vaʼekue cherehe, ha arakaʼeve ndeʼíriva chéve aheja hag̃ua pe karáte. Haʼekuéra ningo chemboʼénte pe añetegua oĩva la Bíbliape.
Aaprendevévo la Biblia omboʼéva ha añemoag̃uivévo Jehováre, ahecháma heta mbaʼe ambue hendáicha. Tuicha chepytyvõ Jesús ehémplo, haʼe ningo Ñandejára Raʼy ha ipoderósoramo jepe arakaʼeve ndoiporúi upéva ojahéi hag̃ua avavére. Mateo 26:52-pe Jesús heʼi: “Umi oiporúva guive pe espáda, ojejukáta espádape”. Ko téysto heʼíva opokoiterei cherehe.
Aikuaavévo Jehovápe arrespeta ha ahayhuvéma chupe. Opokoiterei cherehe ñande Apohare iñarandu ha ipoderosoitéva ojepyʼapy haguére cherehe. Opa mbaʼe ijetuʼuvaʼekue chéve, upévare sapyʼánte nañehaʼãsevéima térã afalla Jehovándi. Péro avyʼaiterei aikuaávo Jehová arakaʼeve ndacherejamoʼãiha, añehaʼãma guive ajapo umi mbaʼe haʼe oguerohorýva. Tuichaiterei chembopyʼaguapy ko promésa Jehová ojapóva: ‘Che, Jehová nde Jára, rojagarráma nde po deréchagui ha haʼe ndéve: “Ani rekyhyje, Che roipytyvõta”’ (Isaías 41:13). Ahechakuaávo Jehová cherayhuha, ni napensái voi amboykévo chupe.
Che aikuaa opaite mbaʼégui ijetuʼuvetaha chéve aheja pe karáte. Péro aikuaa avei ahejáramo, ambovyʼataha Jehovápe ha arakaʼeve nambyasymoʼãiha aservi haguére chupe. Chéve g̃uarã pe chemomyivaʼekue adesidi hag̃ua haʼehína Jesús heʼivaʼekue Mateo 6:24-pe: “Avave ndaikatúi ombaʼapo tembiguáiramo mokõi patrónpe g̃uarã”. Ahechakuaa ndaikatuiha aservi Jehovápe ha asegi apraktika karáte, mbeguekatúpe ikatúgui amotenondeve pe depórte. Upévare tekotevẽvaʼekue adesidi aservítapa Jehovápe, térãpa asegíta pe karáte.
Ijetuʼuvaʼekue chéve aheja hag̃ua pe karáte. Aju che pyʼamokõi, avyʼa aservíta haguére Jehovápe, péro apensa avei atraisionaha pe chemboʼévape karáte. Umi omboʼéva karáte opensa voi peteĩ oporotraisionáva ojapoha peteĩ mbaʼe ivaietereíva ha ikatuʼỹva oñeperdona. Oĩ voi umi ojesuisidaséva oñemotĩ rangue upéicha.
Che upéicha rupi akyhyje amombeʼu hag̃ua pe chemboʼévape karáte adesidiha aheja upe depórte. Upévare akañy, ndahavéi añeʼẽ hag̃ua hendive ni umi che kompañerokuéra ndive. Aikuaa adesidi porã hague. Upéicharõ jepe, añeñandu vai ndaaprovechái haguére upe oportunida amyesakã hag̃ua chupekuéra umi mbaʼe aaprendéva la Bíbliagui. Añandu afallaha Jehová ndive añepyrũ mboyve voi aservi chupe. Upéva nachembovyʼaieterei ha añemboʼe jave Jehovápe katuete cherasẽ.
Oiméne Jehová ohecháraʼe cherehe iporãva, upévare ojevale umi ermáno kongregasionpeguáre chepytyvõ hag̃ua. ¡Aagradeseterei ningo chupekuéra cherayhu, chepytyvõ ha chemoirũ haguére! Avei tuicha chembopyʼaguapy David ha Bat-seba rembiasakue oĩva la Bíbliape. Ivaietereíramo jepe David ojapovaʼekue, Jehová operdona chupe oñearrepentígui ipyʼaite guive. Ajepyʼamongetávo ko ehémplore chepytyvõ ani hag̃ua apensa Jehová nacheperdonamoʼãiha ajavy jave.
UMI MBAʼE PORÃ AHUPYTÝVA: Astudia mboyve la Biblia, ndajepyʼapyivaʼekue avavére, chejehénte apensa. Péro Jehová ha che rembireko chepytyvõ rupi ikatúma añemoĩ che rapicha lugárpe. Ojapóma siete áño romenda hague ha orembovyʼaiterei ikatu haguére romboʼe la Biblia heta ore rapichápe, umíva apytépe oĩ ombohováiva heta mbaʼe ijetuʼúva. Umi mbaʼe ikatuvaʼekue ahupyty asegírire pe karáte, ndaikatúi ñambojoja pe vyʼa omeʼẽvare chéve ahechávo mbaʼéichapa Jehová mborayhu oipytyvõ heta héntepe okambia hag̃ua.
[Komentário oĩva páhina 14-pe]
“Opokoiterei cherehe ñande Apohare iñarandu ha ipoderosoitéva ojepyʼapy haguére cherehe”
[Taʼanga ha rrekuádro oĩva páhina 15-pe]
“¡Aguyjémante koʼã artíkulo porãitére!”
¿Reguerohorýpa umi tembiasakue releepa ramoitéva? Koʼã mokõi tembiasakue oĩ umi cincuenta rasa apytépe osẽvaʼekue agosto 2008 guive Ñemañaháme. Umi oleéva ko rrevísta oguerohoryeterei pe artíkulo “La Biblia okambia chupekuéra”. ¿Mbaʼérepa?
Umi tapicha omombeʼúva hembiasakue ningo diferénte mbaʼe ojapovaʼekue. Oikuaa mboyve Jehovápe, oĩ umi ohupytyvaʼekue heta mbaʼe ko múndope, péro ndoguerekói esperánsa. Ambue katu ijarhél ha iviolentoiterei, ikaʼu, ojedroga térã ombohovái hetave mbaʼe ijetuʼúva. Oĩ avei umi okakuaavaʼekue Jehová organisasiónpe ha upéi ou oheja. Koʼã tembiasakue ohechauka porã ikatuha ñakambia ñambovyʼa hag̃ua Ñandejárape ha jajapóramo upéicha katuete jahupyty heta mbaʼe ijojahaʼỹva. ¿Mbaʼéichapa koʼã tembiasakue oipytyvõ umi oleévape?
Peteĩ kuña omombeʼu mbaʼéichapa pe artíkulo osẽvaʼekue La Atalaya 1 de febrero 2009-pe, oipytyvõ umi oĩvape kárselpe.
◼ “Heta kuña oĩvare kárselpe opokoiterei umi tembiasakue ojoguaitereígui umi mbaʼe haʼekuéra ohasavaʼekuépe. Ojehecharamoiterei umi fóto yma guare ha koʼag̃agua oñemoĩva upe artíkulope, ha mbaʼépa ojapovaʼekue. Mokõi kuña oĩva kárselpe, oleepa rire umi tembiasakue oñepyrũ avei ostudia la Biblia.” (C. W.)
Koʼã istória osẽvaʼekue opokoiterei umi oleévare. Pór ehémplo, La Atalaya 1 de abril 2011-pe osẽ Guadalupe Villarreal rembiasakue. Chupe ningo ogustavaʼekue hapicha kuimbaʼe, péro upéi okambia oiko hag̃ua Jehová oipotaháicha. Ehechamína koʼã mokõi kárta oguerukáva oréve umi oleevaʼekue hembiasakue.
◼ “Amombaʼeterei Guadalupe rembiasakue. Iporãite jahecha mbaʼéichapa peteĩ tapicha ikatu okambia ohayhúgui Ñandejárape ha Iñeʼẽ la Biblia.” (L. F.)
◼ “Ymave añehaʼãvaʼekue añeʼẽ enterove tapichápe umi mbaʼe agueroviávare, umíva apytépe umi kuimbaʼe oikóvape kuimbaʼéndi jepe. Upéi ndajapovéima, ajere voi katu chuguikuéra. Ko artíkulo tuicha chepytyvõ ahecha hag̃ua koʼãichagua tapichápe Jehová ohechaháicha: ikatu okambia ha oservi Ñandejárape.” (M. K.)
Victoria Tong rembiasakue osẽva La Atalaya 1 de agosto 2011-pe opokoiterei avei umi tapicha oleévare. Victoria imitãme ohasa asyeterei vaʼekue ha upévare ndogueroviaséi Jehová ohayhuha chupe, ojapómaramo jepe heta áño oservi hague Jehovápe. Upéi omombeʼu mbaʼépa mbeguekatúpe oipytyvõ chupe oguerovia hag̃ua Jehová ohayhuha chupe. Ehechamína mbaʼépa heʼi umi oleéva hembiasakue.
◼ “Victoria rembiasakue opokoiterei cherehe. Heta mbaʼe vai ningo ahasa ha arémaramo jepe aservi hague Jehovápe, ára ha ára añehaʼã ani hag̃ua apensa umi mbaʼe chemoñeñandu vaítavare. Hembiasakue chemokyreʼỹ asegi hag̃ua ahecha umi mbaʼe porã Jehová ohecháva cherehe.” (M. M.)
◼ “Chemitãme ahecha meme vaʼekue pornografía, péro añehaʼã rupi ikatuvaʼekue aheja. Ambyasýramo jepe, ramoite añepyrũ jey ahecha. Upévare añemboja umi ansiáno rendápe chepytyvõ hag̃ua, ha ajapo tekotevẽva ambohovái hag̃ua upe provléma. Haʼekuéra heʼi chéve Jehová cherayhu ha ikatuha cheporiahuvereko. Upéicharõ jepe, sapyʼánte apensa ndavaleiha mbaʼeverã ha Ñandejára ndacherayhumoʼãiha voi. Péro Victoria heʼivaʼekue tuichaiterei chepytyvõ. Koʼág̃a ahechakuaa apensáramo Jehová arakaʼeve nacheperdonamoʼãiha, namombaʼeihaʼaína pe sakrifísio Jesús ojapovaʼekue oñeperdona hag̃ua che pekádo. Aikytĩ ko artíkulo ikatu hag̃uáicha alee ha ajepyʼamongeta hese añepyrũ jave apensa umi mbaʼe ikatúvare chemokangy. ¡Aguyjémante koʼã artíkulo porãitére!” (L. K.)