Kyreʼỹme oñekuaveʼẽ oservi hag̃ua Brasílpe

Ndaʼareguasúi, Rúbia (1) peteĩ ermána orekóva koʼág̃a 30 áño, oho ovisita iñamíga Sándrape (2), oikóva súr gotyo Brasílpe ha oservíva prekursóraramo peteĩ kongregasión michĩvape. Upépe oiko peteĩ mbaʼe opokoitereíva hese ha tuicha okambia upe rire. ¿Mbaʼépa upéva? Jahejána haʼete tomombeʼu ñandéve.

“¡NI NDAGUEROVIASÉI!”

“Sandra cheinvita aha hag̃ua ambostudia hendive peteĩ kuñakaraípe. Ha rostudia jave upe kuñakarai heʼi Sándrape: ‘Che travahohápe oĩ mbohapy kuñataĩ ostudiaséva avei la Biblia, péro che aikuaa nde hetaitereípe remboʼeha ha nanetiempoveimaha, upévare haʼe chupekuéra ko áñope ijetuʼutaha ndéve rembostudia hag̃ua chupekuéra’. Ni ndagueroviaséi ahendúvo oĩha heta tapicha oikuaaséva Jehovápe ha ohaʼarõva hína túrno ostudia hag̃ua Sandra ndive. Che aikohápe katu ijetuʼu chéve ajuhu peteĩ jepe ostudiaséva la Biblia. Ahendúvo pe kuñakarai heʼíva, hiʼãitereíma voi chéve aipytyvõ umi héntepe. Upe riremínte aváma pe siuda che aikohágui, ha aha pe puevlíto Sandra oservihápe.”

¿Mbaʼéichapa oho Rúbiape upépe? Haʼe omombeʼu: “Dos mésepe 15 estúdioma areko ha ndajaroviaséiramo jepe, sapyʼaitérõ g̃uarã heta tapicháma ohaʼarõ avei túrno ostudia hag̃ua chendive”.

OHECHA IKATÚTAPA OPREDIKAVE

Diego (3), peteĩ ermáno orekóva 20 áño rasami oho ovisita umi prekursór oservívape peteĩ puévlo héravape Prudentópolis, opytáva súr gotyo Brasílpe. Umi mbaʼe ohasáva upépe opokoiterei hese, upévare ohecha mbaʼépa ikatu ojapo opredikave hag̃ua. Haʼe heʼi: “Che kongregasiónpe ndajapoguasúi voi mbaʼeve ha saʼi apredika káda més. Péro avisitárõ guare umi prekursórpe ha ahendúvo mbaʼéichapa omombeʼu hembiasakue, ahechakuaa ovyʼaveha hikuái ombaʼapo kyreʼỹgui predikasiónpe. Upépe apensa: ‘¡Hiʼãite piko chéve avyʼa avei haʼekuéraicha!’”. Diego oho rire hógape, oñepyrũ avei ojapo iprekursorádo.

Ha nde mitãrusu, ¿reservípa avei Jehovápe, reho rreunionhápe, resẽ repredika, péro rehechakuaa rejapoha rejapovaʼerãgui reínte ha nderevyʼaiha? Oiméramo upéicha, tuicha reñeñandu porã ha revyʼavéta rejapóramo tekotevẽva reho hag̃ua reservi umi lugár oñekotevẽhápe maranduhárare. Katuete ningo ijetuʼúta ndéve reheja hag̃ua umi komodida reguerekóva, péro heta mitãrusu ndeavegua ojapohína upéicha. ¿Mbaʼérepa? Oiporusevégui itiémpo Jehová servísiope. Jahechamína mbaʼépa ojapovaʼekue Bruno.

OSEGÍTAPA OSTUDIA MÚSIKA TÉRÃPA OPREDIKAVÉTA

Bruno (4) koʼág̃a orekóva 28 áño, ostudiavaʼekue músika peteĩ eskuéla ifamósovape oñemboʼehápe voi músika. Haʼe ningo akóinte opensa oikóvo chugui peteĩ direktór de orkésta ha pyaʼe voi ikatupyry, upéicha rupi heta vése oñeinvita chupe odirihi hag̃ua peteĩ orkésta sinfónika. Haʼe heta mbaʼe ikatu ohupyty ko múndope, péro Bruno omombeʼu mbaʼéichapa oñeñandu: “¡Haʼetévaicha oĩva peteĩ mbaʼe ofaltáva chéve! Añemeʼẽmavaʼekue Jehovápe, péro ahechakuaa ndajapoiha ikatúva guive iservísiope ha upéva chemoñeñandu vaieterei. Peteĩ jey, amombeʼu porã Jehovápe mbaʼéichapa añeñandu ha añeʼẽ umi ermáno ijerovia mbaretévandi kongregasiónpe. Heta apensa rire, adesidi amotenonde Ñandejára servísio. Aheja che estúdio upe eskuéla ifamosoitévape ha aha aservi peteĩ lugár oñekotevẽvehápe maranduhárare”. ¿Odesidi porãpa rakaʼe Bruno?

Bruno ova Guapiárape, oikohápe 7.000 tapicha ha opytáva 260 kilómetro São Páulogui. Upépe ndorekovéima heta komodida. Haʼe omombeʼu: “Aiko peteĩ ogaʼípe, ndarekói eladéra, téle ni Internet, péro areko peteĩ kokueʼi ha heta yva, umíva che arakaʼeve ndarekóiva”. Bruno oservi peteĩ kongregasión michĩvape, oĩhápe saʼi maranduhára. Un día káda semána okarga jepi peteĩ volsónpe hembiʼurã, y, puvlikasión ha ohóma imóto ári opredika kampañaháre, umi lugár arakaʼeve noñemombeʼuihápe gueteri pe marandu porã. Bruno omombeʼu: “Areko 18 estúdio vívliko ha avyʼaiterei ahechávo mbaʼéichapa umi hénte okambia ohóvo oiko hag̃ua la Biblia heʼiháicha. Upépe ahechakuaa ndofaltaveimaha chéve mbaʼevete. Añeñandu porãiterei amotenonde haguére Ñandejára servísio. Umi mbaʼe ikatuvaʼekue ahupyty ko múndope, nachembovyʼamoʼãikuri peichaite peve.” ¿Mbaʼéichapa haʼe oñemantene oiko aja Guapiárape? Haʼe opukavy ha heʼi: “Amboʼe che rapichakuérape ombopukuaa hag̃ua mbaraka”. Péicha Bruno ojapo avei hendápe porã pe mbaʼe ogustaitéva chupe.

“APYTAMANTEVAʼERÔ

Mariana (5) orekóva 20 áño rasami oñeñandu avei Bruno oñeñandu haguéicha. Haʼe ningo avogáda ha ogana porã vaʼekue, upéicharõ jepe haʼetévaicha chupe ndovyʼapáiva. Mariana heʼi: “Haʼete chéve aikóva ‘yvytu’ rapykuéri” (Ecl. 1:17). Heta ermáno omokyreʼỹ chupe ojapo hag̃ua iprekursorádo. Upéi heta opensa rire, haʼe ha mbohapy iñamíga hérava Bianca (6), Caroline (7) ha Juliana (8) odesidi oho oservi peteĩ kongregasión opytávape mombyryeterei hógagui, peteĩ puévlo héravape Barra do Bugres, opytáva ag̃uiete Bolíviagui. ¿Mbaʼépa oiko upéi?

Mariana omombeʼu: “Che ningo tres mésente aservisékuri upépe. Péro ohasávo umi tres mése, 15 estúdioma areko ha ahechakuaa umi estudiánte oikotevẽha oñepytyvõve chupekuéra oservi hag̃ua Jehovápe. ¡Mbaʼéicha piko haʼéta chupekuéra ahamavaʼerãha! Ndaikatúi ningo ajapóvo upéva, apytamantevaʼerã”. Amo ipahápe umi tres iñamíga opyta avei hendive. Mariana ovyʼaitereive koʼág̃a ha heʼi: “Añeñandu porãiterei Jehová ojevale haguére cherehe oipytyvõ hag̃ua umi héntepe ikatu hag̃uáicha oservi avei chupe. Ahechakuaa aiporuha che tiémpo ha che mbaretekue ajapo hag̃ua peteĩ mbaʼe iñimportantetereíva”. Caroline omombeʼu mbaʼéichapa oñeñandu hikuái: “Pyʼaguapýpe roñeno roke pyharekue roikuaágui rojapo hague ikatúva guive Jehová servísiope. Roiporu ore tiémpo roipytyvõ hag̃ua ore estudiantekuérape, ha oremopirĩmba rohechávo mbaʼéichapa haʼekuéra oñehaʼã oñakãrapuʼã ohóvo. Rohechakuaa ndareiriha la Biblia heʼi: ‘Peñehaʼã ha pehecháta [Jehová] ipyʼaporãha’” (Sal. 34:8, ÑÑB).

Oiméne Jehová ipyʼarory ohechávo mbaʼéichapa heta mitãkuña ha mitãrusu ko múndo tuichakuére kyreʼỹme oñekuaveʼẽ omombeʼu hag̃ua pe marandu porã umi lugár mombyryvehápe (Sal. 110:3; Prov. 27:11). Umi mitãrusu ojapóva péicha, ohupyty hetaiterei mbaʼe porã (Prov. 10:22).