Moisés ojerovia mbarete
¿MBAʼÉPA HEʼISE JEROVIA?
La Bíbliape jerovia heʼise jagueroviaha katuete oikotaha peteĩ mbaʼe. Pór ehémplo, umi ojeroviáva Ñandejárare oguerovia katuete haʼe okumplitaha ipromésa.
¿MBAʼÉICHAPA MOISÉS OHECHAUKA OJEROVIAHA?
Umi mbaʼe odesidívare Moisés ohechauka ojeroviaha Ñandejára katuete okumplitaha ipromésa (Génesis 22:15-18). Haʼe ikatúkuri oiko porã Egíptope ha oreko oguerekoséva, péro oheja “ojetrata vai chupe Ñandejára puévlondi, oiko rangue ovyʼa sapyʼami opeka aja” (Hebreos 11:25, 27, NM). ¿Odesidípa umi mbaʼe opensaʼỹre? ¿Ombyasýpa upe rire? Nahániri, la Biblia heʼi: “Haʼe osegi ojerovia mbarete ohecharamoguáicha Upe ikatuʼỹvape jahecha” (Hebreos 11:25, 27, NM).
Moisés oñehaʼãvaʼekue avei omombarete hag̃ua hapichakuéra jerovia. Oimevaʼerã nemanduʼa umi isrraelíta oĩrõ guare pe már Rojo rembeʼýpe ha faraón ehérsito og̃uahẽmbaitéma chupekuéra, upérõ haʼekuéra okyhyjeterei ha sokórro ojerure hikuái Jehovápe ha Moiséspe oipytyvõmi hag̃ua chupekuéra. ¿Mbaʼépa ojapo Moisés?
Moisés oiméne ni nopensáiraʼe Jehová odividitaha pe már Rojo ohasa hag̃ua hikuái upérupi. Péro ojerovia Jehová ojapotaha tekotevẽva oñangareko hag̃ua hesekuéra ha oipota umi isrraelíta ojerovia avei Jehováre. Éxodo 14:13 omombeʼu: ‘Moisés heʼi hetãyguakuérape: “Anítei penekangy ha ani pekyhyje, ko ára kóvape pehecháta mbaʼéichapa Ñandejára puʼaka pendesalva”’¿Omombaretéparaʼe umi isrraelíta jerovia? Si, la Biblia heʼi Moisés ha entéro umi Israelgua “ojerovia rupi” ohasa hague “pe már Rojo yvy ikãhárupi” (Hebreos 11:29, NM). Ojerovia mbarete rupi, Moisés ohupyty heta mbaʼe ha iñehémplo oipytyvõ hetaitereípe.
¿MBAʼÉPA ÑANEMBOʼE IÑEHÉMPLO?
Jajeroviavaʼerãha Ñandejára promésare ha jahechauka upéva umi mbaʼe jadesidívare. Pór ehémplo, haʼe opromete ndofaltamoʼãiha ñandéve mbaʼeve ñamotenondéramo Irréino (Mateo 6:33). Ko múndo ningo oikuaveʼẽ heta mbaʼe ha ijetuʼu ñandéve ñamboyke hag̃ua umíva; péro jaikuaa porã Jehová omeʼẽtaha ñandéve ñaikotevẽva ñañemeʼẽmbaitéramo iservísiope ha javyʼa umi mbaʼe jarekomívare. Haʼe opromete ñandéve: “Arakaʼeve ndorohejamoʼãi ha arakaʼeve noromotyreʼỹmoʼãi” (Hebreos 13:5, NM).
Ñañehaʼãmbaitevaʼerã avei ñamombarete ñande rapichakuéra jerovia. Pór ehémplo, tuvakuéra oipytyvõvaʼerã ifamíliape ojerovia mbarete hag̃ua Jehováre. Michĩmi guive umi mitã tekotevẽ oikuaa oĩha Ñandejára ha ohechakuaa mbaʼépa oguerohory ha mbaʼépa nahániri. Ontendevaʼerã hikuái iporãveha iñeʼẽrendu ha oiko Ñandejára oipotaháicha (Isaías 48:17, 18). Iporãiterei ningo peipytyvõ pene famíliape oguerovia hag̃ua Ñandejára “añetehápe oikoveha ha omyengovia porãha umi oñehaʼãvape ipyʼaite guive ojapo hembipota” (Hebreos 11:6, NM).