KO RREVÍSTAPE OÑEHESAʼỸIJO: MBAʼÉPA IKATU ÑAAPRENDE MOISÉSGUI
¿Mávapa rakaʼe Moisés?
¿Mbaʼépa ou ndéve ne akãme rehendúvo Moisés réra?
Peteĩ mitãraʼy isy omoĩvaʼekue ajakápe ha oheja rrío Nílope.
Peteĩ mitãrusu okakuaavaʼekue Faraón rajy membýramo Egíptope ha orekopaite opa mbaʼe, péro ndahesaráiri haʼe isrraelíta hague.
Peteĩ kuimbaʼe 40 áñore oñangarekovaʼekue ovecháre Madiánpe.
Peteĩ kuimbaʼe oñemongetavaʼekue Jehováa ndive peteĩ jukeri máta hendýva ypýpe.
Pe kuimbaʼe ohovaʼekue rréi Egiptoygua rendápe ha heʼi chupe opoi hag̃ua umi isrraelítagui.
Pe kuimbaʼe heʼivaʼekue Faraónpe Ñandejára omboutaha umi 10 plága.
Pe kuimbaʼe omoakãvaʼekue umi isrraelítape osẽrõ guare Egíptogui.
Pe kuimbaʼe Ñandejára ojokuái vaʼekue ombojaʼo hag̃ua pe már Rojo.
Pe kuimbaʼe Ñandejára ojokuái vaʼekue omeʼẽ hag̃ua umi Diez Mandamiénto umi isrraelítape.
MOISÉS ohasavaʼekue koʼãva ha hetave mbaʼe. Ndareíri ningo umi kristiáno, hudío ha musulmán omombaʼe ko kuimbaʼe iñeʼẽrenduetévape.
Añetehápe, Moisés haʼevaʼekue Ñandejára proféta ha ojapo heta mbaʼe ijojahaʼỹva (Deuteronomio 34:10-12). Haʼe ohejavaʼekue Ñandejára ojokuái chupe ojapo hag̃ua umi mbaʼe, péro upéva ndeʼiséi idiferenteha ñandehegui. Haʼe ningo “peteĩ yvypóra ñandeichaguánte” avei haʼe haguéicha proféta Elías, pe ojekuaavaʼekue hendive Jesús ykére peteĩ visiónpe (Santiago 5:17; Mateo 17:1-9). Moisés ohasavaʼekue heta mbaʼe ñande jahasáva ñaína ha ombohovái porã vaʼekue umíva.
¿Reikuaasépa mbaʼéichapa ojapo upéva? Ñahesaʼỹijomína mbaʼéichapa haʼe ojerovia, hekomirĩ ha oporohayhu, avei mbaʼéichapa ikatu jasegi iñehémplo.
a La Biblia heʼi Ñandejára heraha Jehová.