LA BIBLIA OMBOHOVÁI KOʼÃ PORANDU

¿Ohendúpa Ñandejára opaichagua ñemboʼe?

Ñandejára ohendu opa tetãyguápe (Salmo 145:18, 19). La Biblia rupive haʼe ojerure ñandéve ñamombeʼupaite hag̃ua chupe umi mbaʼe ñandepyʼapýva (Filipenses 4:6, 7). Péro oĩ avei ñemboʼe ndogustáiva Ñandejárape. ¿Mbaʼeichaguápa umíva? Umi ojerrepetínteva de memória. (Elee Mateo 6:7.)

Haʼe nohendúi avei umi ndojaposéivape haʼe heʼíva, oikuaa porãramo jepe mbaʼépa ojapo vaʼerã (Proverbios 28:9). Por ehémplo, nohenduséi vaʼekue umi isrraelíta naiñeʼẽrendúi ha oporojukávape. Upéicharõ, Ñandejára ohendu hag̃ua ñane ñemboʼe jajapo vaʼerã hembipota. (Elee Isaías 1:15.)

¿Mbaʼépa Ñandejára oipota jajapo?

Haʼe oipota jajerovia hese, ndajajeroviáirõ, ni mbaʼevéicharõ nañanerendumoʼãi (Santiago 1:5, 6). Jajerovia vaʼerã haʼe oexistiha ha ojepyʼapyha ñanderehe. Ha upearã tekotevẽ jastudia la Biblia. Umi mbaʼe jatopáva upépe ñanepytyvõta jajerovia mbarete hag̃ua Ñandejárare. (Elee Hebreos 11:1, 6.)

Tekotevẽ avei ñaneumílde ha ñañemboʼe ñande pyʼaite guive, Jesús ojapo haguéicha (Lucas 22:41, 42). Upévare, jaʼe rangue Ñandejárape mbaʼépa ojapo vaʼerã, ñañehaʼã vaʼerã jaikuaa mbaʼépa haʼe oipota ñande jajapo. ¿Mbaʼépa ñanepytyvõta jaikuaa hag̃ua upéva? Jalee vaʼerã la Biblia, upéicharõmante ñañemboʼéta haʼe oipotaháicha (Elee 1 Juan 5:14.)