Kyreʼỹme oñekuaveʼẽ hikuái oservi hag̃ua África occidentálpe

PASCAL okakuaa vaʼekue Costa de Marfílpe peteĩ várrio imboriahúvape, péro haʼe osẽse upe situasióngui ikatu hag̃uáicha oiko porãve. Haʼe ningo opraktika mimi jepi voxéo ha okalkula moõpa ikatúne oho oiko hag̃ua chugui peteĩ profesionál ha ogana hag̃ua heta pláta. Orekórõ guare 25 áñorupi, ohechakuaa ohóramo Európape ikatuha ohupyty hetave mbaʼe. Péro haʼe ndorekói mbaʼeveichagua dokuménto oviaha hag̃ua ótro tetãme, upévare ñemihámemante oike vaʼerã.

Áño 1998-pe, Pascal orekórõ guare 27 áño osẽ oho Európape. Ñepyrũrã ohasa Ghana, Togo, Benín, ha upéi og̃uahẽ Nígerpe peteĩ siuda héravape Birni Nkonni. Péro ohaʼarõ gueteri chupe heta mbaʼe ipeligrosoitereíva. Oho hag̃ua nórte gotyo, ohasa vaʼerã kamionétape pe desiérto del Sahara, ha og̃uahẽvo mar Mediterráneope ojupi vaʼerã peteĩ várkope oguerahátava chupe Európape. Haʼe opensa kuri ojapo upéva, péro Nígerpe oiko mokõi mbaʼe ojokóva chupe.

Ñepyrũrãite voi ou oso, ha upéi oikuaa peteĩ prekursór héravape Noé, ko ermáno oñepyrũ omboʼe chupe la Biblia. Umi mbaʼe Pascal oaprendéva opoko ikorasõre ha sapyʼaitérõ g̃uarã okambia opensa lája. Haʼe ningo ohupytyse vaʼekue heta mbaʼe, péro ojerovia mbarete rupi Jehováre omboyke umíva, ha diciembre de 1999-pe ojevautisa. Ohechauka hag̃ua oagradeseha Jehovápe, áño 2001-pe oñepyrũ ojapo iprekursorádo pe siuda oaprende haguépe pe añetegua oĩva Nígerpe. ¿Mbaʼéichapa oñeñandu odesidi haguére upéva? Haʼe heʼi: “Ahechakuaa koʼág̃a ae aiporu porãha che rekove”.

OAPROVECHA HIKUÁI ITIÉMPO OSERVÍVO ÁFRICAPE

Ndahaʼéi Pascal añónte ohechakuaáva javyʼaveha ñambaʼapóvo Jehová servísiope. Heta ohechakuaa avei upeichaha, upévare 65 ermánorupi oikóva Európape orekóva éntre 17 ha 70 áño ova África occidentálpe, oservi hag̃ua umi lugár oñekotevẽvehápe maranduhárare. Oho hikuái Benín, Burkina Faso, Níger ha Tógope.a ¿Mbaʼépa omomýi chupekuéra ova hag̃ua, ha mbaʼépa ohupyty hikuái?

Peteĩ ermána Dinamarcagua hérava Anne-Rakel, heʼi: “Che tuvakuéra oservi vaʼekue misionéroramo Senegálpe. Haʼekuéra ningo siémpre oñeʼẽ porã vaʼekue umi mbaʼe ohasávare iñasignasiónpe, ha che atantease avei upéva”. Ojapo 15 áñorupi, haʼe orekórõ guare 20 áño rasami, ova Tógope oservi hag̃ua peteĩ kongregasión oĩva lenguáhe de séñaspe. ¿Mbaʼéichapa upe odesidi vaʼekue oipytyvõ avei ótrope? Haʼe omombeʼu: “Tiémpo riremi, che ermána ha che ermáno imitãvéva ova avei Tógope”.

Aurele, peteĩ ermáno Franciagua, orekóva 70 áño, heʼi: “Ojapóma cinco áño ajehuvila hague, ha ikatu kuri adesidi apyta aiko Fránciape pyʼaguapýpe porã og̃uahẽ meve pe múndo pyahu, térã añehaʼã ambaʼapove Jehovápe g̃uarã”. Amo ipahápe haʼe odesidi oservive Jehovápe, ha ojapóma tres áño ova hague hembireko Albert-Fayette ndive Benínpe. Aurele omombeʼu: “Roʼekuaa rodesidi porãiterei hague rojúvo roservi ko tetãme”. Upéi opukavy ha heʼi: “Hiʼarive heta lugár oĩva ore territóriope iporãiterei, haʼete roĩmava pe múndo pyahúpe”.

Clodomir ha hembireko Lysiane oiko vaʼekue Fránciape ha koʼág̃a ojapóma 16 áño ova hague hikuái Benínpe. Ñepyrũrã heta ohechagaʼu ihénte ha iñamigokuérape, ha opensa ndojepokuaamoʼãiha voi hikuái. Péro ohasávo pe tiémpo ojehasa chuguikuéra ha ovyʼáma. Clodomir heʼi: “Koʼã 16 áñope roipytyvõma haimete 16 persónape oservi hag̃ua Jehovápe, ha upéva peteĩ priviléhio tuichaitereíva oréve g̃uarã”.

Sébastien ha Johanna, peteĩ matrimónio Franciagua ova vaʼekue Benínpe 2010-pe. Sébastien heʼi: “Hetaiterei orerembiapo kongregasiónpe. Koʼápe haʼete voi roiméva peteĩ kúrsope, roaprendehápe heta mbaʼe orepytyvõva roservi porãve hag̃ua Jehovápe”. ¿Ha mbaʼépa jaʼekuaa umi hénte oĩvare upe territóriope? Johanna omombeʼu: “Umi hénte oikuaaseterei pe añetegua. Ha sapyʼánte noroiméiramo jepe predikasiónpe, roikohárupi orejoko oporandu hag̃ua oréve la Biblia omboʼéva ha ojerure hag̃ua puvlikasión”. ¿Mbaʼépa ohupyty ko matrimónio ova haguére? Sébastien heʼi: “Oremoag̃uive ojuehe ha avyʼaiterei apredikávo che rembirekóndi ára ha ára”.

Eric ha hembireko Katy oservi de prekursór Benínpe nórte gotyo, peteĩ puevloʼi héravape Tanguiéta. Oikórõ guare hikuái Fránciape, ojapo 10 áñorupi, olee hikuái umi artíkulo omokyreʼỹva ermanokuérape ova hag̃ua umi lugár oñekotevẽvehápe maranduhára ha oñemongeta hag̃ua umi ermáno oservívandi de tiémpo kompléto. Upéva omomýi chupekuéra oho hag̃ua oservi ótro tetãme, ha upéicha ojapo hikuái áño 2005-pe. Upe tiémpo guive ohecha hikuái mbaʼéichapa heta hetave ohóvo umi oñemoag̃uíva Jehováre. Eric omombeʼu: “Ore roservi peteĩ grúpo oĩva Tanguiétape, ha roime vaʼekue 9 puvlikadór ojapo dos áño; koʼág̃a katu roiméma 30. Ha domingokue katu roime 50 a 80 persóna rreunionhápe. Orembovyʼaiterei rohechávo mbaʼéichapa ko grúpo oñakãrapuʼã ohóvo, ha upéva ndaijojahái”.

OGUEROPUʼAKA HIKUÁI HETA MBAʼE

¿Mbaʼe ijetuʼúvapa ombohovái umi ohóva oservi ótro tetãme? Benjamin ningo Anne-Rakel ermáno, ha oreko 33 áño. Haʼe oikórõ guare Dinamárcape, áño 2000-pe oñeʼẽ peteĩ misionérondi oservíva Tógope. Benjamin heʼi: “Amombeʼúrõ guare ko misionérope ajaposeha che prekursorádo, haʼe oporandu chéve; ‘¿Nerepensáivapa reho Tógope reservi hag̃ua de prekursór?’. Péro upérõ neʼĩra amboty 20 áño, upéicharõ jepe ndahasymoʼãi aha hag̃ua Tógope, oĩmagui upépe mokõi che ermána”. Upéi haʼe opensa porã ha odesidi ova. Péro oreko peteĩ provléma; haʼe noñeʼẽkuaái ni michĩmi francéspe. Benjamin omombeʼu: “Seis mése ijetuʼueterei kuri chéve, ndaikatúi rupi añemongeta porã umi hénte upepeguándi”. Péro upéi mbeguekatúpe ivakeánoma ohóvo. Koʼág̃a katu oservi Betel oĩva Benínpe, upépe ombaʼapo Departaménto de Envíos ha Komputasiónpe.

Umi ermáno ñañeʼẽma vaʼekuére, hérava Eric ha Katy, ova mboyve Benínpe oservi vaʼekue Fránciape, peteĩ kongregasión oñeʼẽvape ótro idióma. Péro, ¿mbaʼépa ombohovái hikuái ova rire Áfricape? Katy omombeʼu: “Ijetuʼu oréve rotopa hag̃ua peteĩ óga omachamíva roiko hag̃ua. Heta mésere roiko peteĩ óga ndorekóivape elektrisida, ha avei rogueroja vaʼerã y roiporu hag̃ua”. Eric heʼi avei: “Ore vesinokuéra katu omusikea hatãiterei pyharepyte peve. Upévare orepasiénsia ha roñehaʼãmante rojepokuaa”. Péro mokõivéva ohechakuaa peteĩ mbaʼe, ha heʼi hikuái: “Hetaiterei mbaʼe porã ningo rohupyty roservi haguére peteĩ lugár saʼi ojepredikahápe, upévare ndahaʼéi mbaʼevete asy umi mbaʼe ijetuʼúva rohasa vaʼekue”.

Michel ha hembireko Marie-Agnès ojapo cinco áñorupi ova hague Benínpe, haʼekuéra Franciagua ha orekóma 60 áñorupi. Ñepyrurã okyhyje lénto hikuái. Michel omombeʼu: “Oĩ heʼíva oréve ropensa porã hag̃ua la rojapótavare ani hag̃ua roho roiko asy rei. Péro rojerovia Jehová orepytyvõtaha ha upéva orembopyʼaguasu. Upéicha rupi rova roservi porãve hag̃ua chupe. Ha rohechakuaa koʼag̃aite peve Haʼe oñangarekoha orerehe”.

MBAʼÉICHAPA JAJEPREPARA VAʼERÃ

Umi ohóva oservi umi lugár oñekotevẽvehápe maranduhárare, heʼi tekotevẽha jajeprepara porã jadesidi mboyve java ótro lugárpe. Upearã jajerovia vaʼerã Jehováre ha voimi jakalkula heta mbaʼe, por ehémplo, jahecha jajepokuaátapa hína pe lugár jahatahápe ha ikatútapa jaiko sensillomie (Luc. 14:28-30).

Pe ermáno ñañeʼẽma vaʼekuére, hérava Sébastien omombeʼu: “Dos áño rova mboyve, Johanna ha che roñepyrũma rombyaty ore platami. Ha rodesidi saʼive rogasta umi vyʼarãre ha ndorojoguamoʼãiha umi mbaʼe noroikotevẽiva”. Koʼã ermáno káda áño oho ombaʼapoʼimi Európape ha upéva oipytyvõ chupekuéra osegi hag̃ua iprekursorádo Benínpe.

Oĩ amo véinterupi ermána soltéra ohóva oservi África occidentálpe, umíva apytépe oĩ Marie-Thérèse. Fránciape haʼe ombaʼapo de chofér kolektívope, ha áño 2006-pe ojerure ipatrónpe permíso un áño ikatu hag̃uáicha oho ojapo iprekursorádo Nígerpe. Sapyʼaitérõ g̃uarã ohechakuaa haʼe péicha oikoseha. Ko ermána heʼi: “Aha jeýrõ guare Fránciape haʼe che patrónpe ambaʼaposeha saʼimie, ha haʼe oasepta upéva; koʼág̃a ambaʼapo de chofér Fránciape mayo guive agosto peve, ha ajapo che prekursorádo Nígerpe septiembre guive abril peve”.

Jehová ningo katuete omeʼẽ oikotevẽva guive umi omotenondévape Irréino (Mat. 6:33). Por ehémplo, jahechamína mbaʼéichapa oipytyvõ Saphírape, peteĩ ermána soltéra Franciagua orekóva treinta áño ha oservíva de prekursóra Benínpe. Áño 2011-pe oho jey Fránciape ombaʼapoʼimi ombyaty hag̃ua pláta, ha péicha osegi iprekursorádo Áfricape seis añoha. Haʼe omombeʼu: “Peteĩ viernes opa la che traváho, ha hemby chéve quince día aha hag̃ua Benínpe, ha ndahupytýiti pe pláta aikotevẽva añemantene hag̃ua un áño upépe. Upévare tekotevẽ kuri ambaʼapove diez día. Upémarõ añemboʼe Jehovápe che situasiónre. Upe riremínte añehenói ha añekontrata akuvri hag̃ua peteĩ empleádape dos semána aja”. Saphira oñepresenta lunes itraváho pyahúpe, ikatu hag̃uáicha omboʼe chupe pe persóna orremplasátava. Haʼe heʼi: “Ni ndagueroviaséi aikuaárõ guare peteĩ ermána la oikotevẽva arremplasa chupe, haʼe ningo oikotevẽ diez día lívre oho hag̃ua eskuéla de prekursórpe. Péro ipatrón heʼi omeʼẽtaha chupe permíso okonsegírõ añoite okuvri vaʼerã ipuésto. Ko ermána oñemboʼe avei Jehovápe oipytyvõ hag̃ua chupe. ¡Ha haʼe mokõivévape ombohovái!”.

PETEĨ SERVÍSIO ÑANEMBOVYʼAITEREÍVA

Heta ermáno ha ermána oho vaʼekue oservi África occidentálpe opyta oiko upépe, péro oĩ avei oho vaʼekue unos kuánto áño ha upéi oho jey hetãme. Upéicharõ jepe koʼã ermáno ojevy vaʼekue hetãme akóinte ovyʼa imanduʼávo umi mbaʼe ojapo vaʼekuére Áfricape. Haʼekuéra ohechakuaa ñamotenondéramo Jehová servísio javyʼa añeteha.