¿Mbaʼéichapa ikatu ‘ñambohovái entéro ombaʼeporandúvape ñandéve’?

1, 2. a) ¿Mbaʼe experiénsiapa ohechauka iñimportanteha ñapensa porã ñambaʼeporandu hag̃ua? (Ehecha pe taʼanga oĩva iñepyrũme.) b) ¿Mbaʼérepa ndajakyhyjéi vaʼerã ñañeʼẽ hag̃ua umi téma ijetuʼúvare?

NDAʼAREGUASÚI peteĩ ermána oñemongeta hague la Bíbliare iména ndahaʼéiva Testígondi. Ko karai oĩ vaʼekue peteĩ rrelihión kristiánape, ha oñemongetávo hikuái, osẽ heʼi ogueroviaha pe Trinida. Péro ñane ermána ohechakuaa iména ndoikuaaporãiha mbaʼépa hína pe Trinida, upémarõ oikekuaánte chupe ha oporandu: “¿Ndépa upéicharõ reguerovia pe Túva haʼeha Ñandejára, Jesús haʼeha Ñandejára ha pe espíritu sánto haʼeha avei Ñandejára, péro amo ipahápe peteĩnteha hikuái?”. Iména heʼi: “¡No, che ningo ndaroviái upéva!”. Upéi pe ermána omombeʼu iménape mávapa añetehápe Ñandejára.

² Ko experiénsia ohechauka iñimportanteha ñapensa porã ñambaʼeporandu hag̃ua ñande rapichápe ha jaikekuaa vaʼerãha chupe jajapo jave upéva. Ñanemboʼe avei ndajakyhyjéi vaʼerãha ñañeʼẽ hag̃ua umi téma ijetuʼúvare, por ehémplo Trinida ha infiérnore, térã jahechauka hag̃ua Ñandejára oexistiha. Jajerovia vaʼerã Jehováre ha jaaprovecha pe edukasión haʼe omeʼẽva ñandéve ikatu hag̃uáicha ñakonvense ñande rapichakuérape ha japoko ikorasõre (Col. 4:6). Ko artíkulo ñanepytyvõta ñandekatupyryve hag̃ua jajapóvo mbohapy mbaʼe: 1) jaipuru umi porandu ikatu hag̃uáicha pe persóna heʼi mbaʼépa opensa, 2) ñamorrasona chupekuéra ontende hag̃ua la Biblia omboʼéva ha 3) ñamoĩ ehémplo ñamyesakã porãve hag̃ua umi mbaʼe ñamboʼeséva.

ÑAMBAʼEPORANDU IKATU HAG̃UÁICHA PE PERSÓNA HEʼI MBAʼÉPA OPENSA

3, 4. ¿Mbaʼérepa iñimportánte jaipuru umi porandu? Emoĩ peteĩ ehémplo.

³ Umi porandu rupive ikatu jaikuaa mbaʼépa oguerovia peteĩ persóna. La Biblia heʼi: “Upe ombohováiva ojapysaka porã mboyve, itavy voi ha katuete oñemotĩ vaʼerã” (Prov. 18:13, ÑÑB). Upévare, ñañepyrũ mboyve jahechauka mbaʼépa heʼi la Biblia peteĩ témare, tekotevẽ jaikuaa raẽ mbaʼépa opensa ñande rapicha. Ndajajapóiramo upéicha, ikatu hína jaipuru rei ñane tiémpo jahechauka hag̃ua japuha peteĩ mbaʼe pe persóna ni ndogueroviáiva voi (1 Cor. 9:26).

⁴ Ñamoĩ chupe ñañeʼẽha peteĩ persónandi pe infiérnore. Naentéroi ningo oguerovia pe infiérno haʼeha peteĩ lugár ojekastigahápe umi iñañávape tatarendýpe. Oĩ opensáva peteĩ persóna oĩha infiérnope oĩramo mombyry Ñandejáragui. Upéicharõ ikatu jaʼe: “Heta mbaʼe ningo ojeʼe pe infiérnore, péro ¿mbaʼépa hína ndéve g̃uarã pe infiérno?”. Ñahendu rire mbaʼépa haʼe opensa, ifasilvéta ñandéve jahechauka hag̃ua chupe mbaʼépa añetehápe omboʼe la Biblia upe témare.

5. ¿Mbaʼéichapa umi porandu ikatu ñanepytyvõ jaikuaa hag̃ua mbaʼérepa peteĩ persóna oguerovia peteĩ mbaʼe?

⁵ Jaipuru porãramo umi porandu, ikatúta jaikuaa mbaʼérepa peteĩ persóna orovia peteĩ mbaʼe. Por ehémplo, ¿mbaʼépa ikatu jajapo jatopáramo predikasiónpe peteĩ tapicha ndoroviáiva Ñandejára oexistiha? Péicha jave, ñapensase jepi pe tapicha ogueroviaha pe evolusión (Sal. 10:4). Péro heta persóna ndojeroviavéi Ñandejárare ohechágui mbaʼeichaitépa heta hénte osufri, térã haʼekuéra voi osufri heta haguére. Haʼekuéra opensa oiméramo Ñandejára ñanderayhu nopermitimoʼãiha jahasa asy. Upéicharõ, jatopáramo peteĩ ndoroviáiva Ñandejára oexistiha, ikatu ñaporandu chupe: “¿Ndépa péichante voi repensáva?”. Heʼíramo ñandéve nahaniriha, ikatu ñaporandu chupe mbaʼéicha rupípa opensa upéicha. Umi mbaʼe heʼíva ohechaukáta ñandéve mbaʼéichapa ikatu ñaipytyvõ chupe oñemoag̃ui hag̃ua Ñandejárare (elee Proverbios 20:5).

6. ¿Mbaʼépa jajapo vaʼerã ñambaʼeporandu rire ñande rapichápe?

⁶ Ñambaʼeporandu rire ñande rapichápe, ñahendu porã vaʼerã chupe ha ñañemoĩ ilugárpe. Por ehémplo ikatu omombeʼu ñandéve ohasa hague peteĩ desgrásia ha upévare opensaha Ñandejára ndoexistiriha. ¿Mbaʼépa ikatu jaʼe chupe? Jahechauka mboyve chupe Ñandejára oexistiha, iporãta jaʼéramo ñambyasyetereiha pe oiko vaʼekue hese ha ndaivairiha oñeporandu mbaʼérepa jasufri (Hab. 1:2, 3). Ñanepasiénsiaramo hese ha ñañehaʼã ñantende chupe, ikatu hína oñeinteresave la Biblia omboʼévare.a

ÑAMORRASONA UMI HÉNTEPE ONTENDE HAG̃UA LA BIBLIA OMBOʼÉVA

7. ¿Mbaʼépa jajapo vaʼerã ñaporomboʼe porã hag̃ua?

⁷ Jahechamína koʼág̃a mbaʼéichapa ikatu ñamorrasona umi héntepe ontende hag̃ua la Biblia omboʼéva. Ñandejára Ñeʼẽ haʼe hína pe lívro iñimportantevéva jaiporúva japredika hag̃ua. Ha ikatu ‘ñanembokatupyry opa mbaʼerã, ha jarekopaite hag̃ua ñaikotevẽva guive jajapo hag̃ua iporãva’ (2 Tim. 3:16, 17). Oiko hag̃ua ñandehegui peteĩ mboʼehára ikatupyrýva, natekotevẽi jaipuru heta téxto vívliko. Upéva rangue, ñamyesakã porã vaʼerã umi téxto jaleéva ha jaipuru umíva ñamorrasona hag̃ua umi héntepe (elee Hechos 17:2, 3). Ñahesaʼỹijomína mbohapy situasión.

8, 9. a) ¿Mbaʼéichapa ikatu ñaipytyvõ peteĩ persóna ogueroviávape Jesús ha Ñandejára peteĩchaiteha? b) ¿Mbaʼéichapa nde reipytyvõ avei umi héntepe orrasona hag̃ua ko témare?

⁸ Primera situasión: Jatopa peteĩ oroviáva Jesús ha Ñandejára peteĩchaiteha. ¿Mbaʼe téxtopa ikatu jaipuru ñamorrasona hag̃ua chupe? Ikatu jaʼe toleemi Jesús heʼi vaʼekue Juan 6:38-pe: “Che aguejy yvágagui ndahaʼéi ajapo hag̃ua che rembipota, síno upe chembou vaʼekue rembipota”. Ñamyesakã porã rire ko versíkulo, ikatu ñaporandu: “Oiméramo Jesús ha Ñandejára peteĩchaite, ¿mávapa upéicharõ ombou chupe yvágagui? Ajépa pe omboúva chupe tuichavémante vaʼerã chugui”.

⁹ Ikatu avei jaipuru Filipenses 2:9, apóstol Pablo omyesakã haguépe mbaʼépa Jehová ojapo Jesús omano ha oñemoingove jey rire. Upépe heʼi: “Ñandejára ombotuicha Jesúspe, omeʼẽ chupe peteĩ puésto ijyvatevéva, ha pyʼaporãme omeʼẽ chupe pe téra iporãvéva entéro umi ótro téragui”. Ikatu hag̃uáicha ñamorrasona chupe ko téxto rupive, jaʼekuaa: “Oimérire Jesús tuicha vaʼekue Ñandejaraichaite omano mboyve, ha upe rire Ñandejára omeʼẽ chupe peteĩ puésto ijyvatevéva, ajépa Jesús tuichavéta Ñandejáragui. Péro, ¿mbaʼéicha piko oĩta peteĩ iñimportantevéva chugui?”. Oiméramo pe persóna ipyʼaporã ha orrespeta la Biblia heʼíva, ikatu hína ohesaʼỹijoseve ko téma (Hech. 17:11).

10. a) ¿Mbaʼéichapa ikatu ñamorrasona peteĩ persóna oroviávape pe infiérno? b) ¿Mbaʼéichapa nde reipytyvõ umi héntepe orrasona hag̃ua ko témare?

¹⁰ Segunda situasión: Peteĩ persóna irrelihiosoitereíva heʼi umi iñañáva ojekastigámante vaʼerãha infiérnope opa árare. Ikatu ningo haʼe opensa upéicha oipotágui umi iñañáva opaga hembiapo vaikuére. ¿Mbaʼéichapa ikatu ñaipytyvõ upe tapichápe? Ñepyrũrã, jaʼe vaʼerã chupe umi iñañáva katuete ojekastigataha (2 Tes. 1:9). Upe rire jalee hendive Génesis 2:16, 17, ohechaukahápe Jehová heʼi hague Adánpe okastigataha chupe opekáramo, ha heʼi omanotaha katuete. Upéi ikatu ñamyesakã enterove ñanaseha pekadór Adán kúlpare (Rom. 5:12). Jaʼekuaa avei Ñandejára ndeʼíri hague okastigataha Adánpe peteĩ infiérnope, ha ñaporandu chupe: “Oimérire Adán ha Eva ojekastigáta kuri pe infiérnope opa árare naiñeʼẽrendúi haguére, ¿mbaʼére piko Ñandejára ndoavisái raʼe chupekuéra? Katuete ningo Ñandejára heʼi vaʼerãmoʼã chupekuéra”. Upe rire ikatu jalee Génesis 3:19 heʼimahápe mbaʼéichapa ojekastigáta Adán ha Évape opeka haguére. Upépe mbaʼevete ndojeʼéi pe infiérnore, upéva rangue, Ñandejára heʼi Adánpe oiko jeytaha chugui yvy. Upéi ñaporandukuaa: “Oimérire añetehápe ojekastigáta raʼe chupekuéra pe infiérnope, ¿oĩ porãtapa Ñandejára heʼíramo oikotaha chuguikuéra yvýnte?”. Pe persóna ipyʼaporãramo, koʼãichagua porandu katuete omopensáta chupe.

11. a) ¿Mbaʼéichapa ikatu ñaipytyvõ peteĩ persóna oroviávape umi ivuénova ohotaha yvágape? b) ¿Mbaʼéichapa nde reipytyvõ umi héntepe orrasona hag̃ua ko témare?

¹¹ Tercera situasión: Jatopa peteĩ persóna oroviáva entéro umi hénte ivuénova ohotaha oiko yvágape. Koʼãichagua persóna ontende vai la Biblia omboʼéva. Ñamoĩ chupe jalee hague hendive Apocalipsis 21:4 (elee). Upe tapicha ikatu oimoʼã umi mbaʼe heʼíva ko téxtope oñekumplitaha yvágape. ¿Mbaʼéichapa ñaipytyvõkuaa chupe? Jalee rangue ótro téxto, ikatu jahechauka chupe pe párte heʼihápe “ndaiporimoʼãvéima omanóva”, ha upe rire jaʼe: “Heʼívo koʼápe ndaiporimoʼãveimaha omanóva, heʼise koʼág̃a oñemanoha gueteri, péro koʼẽrõite opatamaha. Ha jaikuaaháicha, yvágape arakaʼeve noñemanóiva, síno ko yvy ape árinte oiko upéva”. Upéicharõ, umi mbaʼe porã oñemombeʼúva Apocalipsis 21:4-pe, oikóta ko yvy ape ári (Sal. 37:29).

ÑAMOĨ EHÉMPLO ÑAMYESAKÃ PORÃVE HAG̃UA UMI MBAʼE ÑAMBOʼESÉVA

12. ¿Mbaʼérepa Jesús oipuru vaʼekue umi ehémplo?

¹² Jesús ningo ombaʼeporandukuaa vaʼekue, péro avei oipuru umi ehémplo opredika jave (elee Mateo 13:34, 35). Umíva oipytyvõ chupe oikuaa hag̃ua mbaʼépa opensa umi hénte (Mat. 13:10-15). Ha umi ehémplo rupive opa mbaʼe omboʼéva igustove ha entéronte imanduʼa upe rire. ¿Mbaʼéichapa ñande avei ikatu jaipuru umi ehémplo?

13. ¿Mbaʼe ehémplopa ikatu jaipuru jahechauka hag̃ua Ñandejára tuichaveha Jesúsgui?

¹³ Iporãve jaipuru umi ehémplo ndahasýiva oñentende hag̃ua. Ñamoĩ chupe ñamyesakãtaha Ñandejára tuichaveha Jesúsgui. Ñepyrũrã ikatu jaʼe Ñandejára heʼi hague haʼeha pe Túva ha Jesús katu heʼi haʼeha pe Taʼýra (Luc. 3:21, 22; Juan 14:28). Upéi ikatu ñaporandu: “Rehechaukaséramo chéve mokõi persóna ojojoguaitereiha, ¿mbaʼérehepa rekomparáta? ¿Peteĩ túva itaʼýrare, térãpa mokõi oñoermáno mellísore?”. Katuete ningo pe persóna okomparáta umi mellísore. Upéicharõ ikatu jaʼe jey chupe: “Ñandéve voi ifasilvéramo ñantende hag̃ua jaipurúvo ko ehémplo, katuete Jesús, pe Mboʼehára Guasu, oiporúta kuri pe komparasión. Haʼe heʼi Ñandejára haʼeha Itúva, peteĩ persóna tuichavéva ha ijautoridavéva chugui”.

14. ¿Mbaʼe ehémplopa ohechauka japuha Ñandejára onkargaha pe Diáblope otortura hag̃ua umi héntepe infiérnope?

¹⁴ Jahechami ótro ehémplo. Oĩ heʼíva Ñandejára onkargaha pe Diáblope otortura hag̃ua umi héntepe infiérnope. Ikatu jaipuru peteĩ ehémplo jahechauka hag̃ua peteĩ túvape japuha upéva. Jaʼekuaa chupe: “Ñamoĩ chupe nde raʼy irreveldetereiha ha ojapoha oikóvo heta mbaʼe vai. ¿Mbaʼépa nde rejapóta?”. Oime vaʼerã pe túva heʼíta oñehaʼãtaha okorrehi chupe (Prov. 22:15). Upéi ikatu ñaporandu jey mbaʼépa ojapóta itaʼýra osegíramo naiñeʼẽrendúi. Katuete ningo heʼíta okastigámante vaʼerãha chupe. Upe rire jaʼekuaa: “¿Ha mbaʼépa rejapóne reikuaáramo ótra persóna iñañaitereíva omboliga hague chupe ojapo hag̃ua pe ivaíva?”. Pe túva ipochyetereíta upe persóna ndive. Ha ñamyesakã porãve hag̃ua ko ehémplo ikatu jaʼe: “Reikuaáramo upe tapicha ogueraha vai hague nde raʼýpe, ¿rejerurétapa chupe haʼe voi okastiga hag̃ua nde raʼýpe?”. Katuete pe túva heʼíta ndojapomoʼãiha upéva. Upéicharõ, jahecha Ñandejára nonkargamoʼãiha Satanáspe okastiga hag̃ua umi hénte haʼe voi ogueraha vai vaʼekue.

ANI ÑAHAʼARÕITEREI ÑANDEJEHEGUI NI ÑANDE RAPICHAKUÉRAGUI

15, 16. a) ¿Mbaʼérepa nañapensái vaʼerã opavave oaseptataha pe marandu porã? b) ¿Tekotevẽ piko ñandekatupyryeterei ñamboʼe hag̃ua ñande rapichakuérape? Emyesakã. (Ehecha avei pe rrekuádro hérava “Peteĩ mbaʼe ñanepytyvõva ñañemongetakuaa hag̃ua”.)

¹⁵ Ikatu ningo ñandevale jaipuru hag̃ua umi porandu, ñamorrasona hag̃ua umi héntepe ha jaipuru umi ehémplo ideprovéchova oñentende hag̃ua pe ñamboʼéva. Upéicharõ jepe, heta tapicha ndoaseptamoʼãi pe marandu porã oñeʼẽva Ñandejára Rréinore (Mat. 10:11-14). Amo ipahápe ndahetái vaʼekue umi ohendúva Jesúspe ha oikóva chugui idisípulo, hiʼarive Jesús hína pe Mboʼehára ikatupyryvéva oiko vaʼekue ko yvy ape ári (Juan 6:66; 7:45-48).

¹⁶ Aníkena ñapensa ndajavaleiha. Entéro ningo ikatu ñandekatupyry ñaporomboʼe hag̃ua (elee Hechos 4:13). Ñandejára Ñeʼẽ heʼi “opavave oñehaʼãva ohupyty jeikove opaveʼỹva” katuete oaseptataha pe marandu porã (Hech. 13:48). Ani ñahaʼarõiterei ñandejehegui ni umi hénte japredikávagui. Jaaprovechákena pe edukasión Jehová omeʼẽva isiervokuérape. Péicha oikóta ñandehegui mboʼehára ikatupyrýva, ha upéva ou porãta ñandéve voi ha umi ñanerendúvape (1 Tim. 4:16). Jehová ñanemboʼe ikatu hag̃uáicha ‘ñambohovái entéro ombaʼeporandúvape ñandéve’. Pe artíkulo oúvape jahecháta mbaʼéichapa ñasẽ porãta predikasiónpe jasegívo pe Rrégla de Óro.