¿Mbaʼéichapa ñaipytyvõkuaa umi ojedivorsia vaʼekuépe?

Peteĩ ermána okonsola peteĩ ojedivorsiávape

Oime vaʼerã reikuaa peteĩ térã hetave persónape ojedivorsia vaʼekue. Koʼág̃arupi oĩ heta hetave matrimónio ojopoíva. Por ehémplo, peteĩ estúdio ojejapo vaʼekue Polóniape, ohechauka ojedivorsiaveha umi orekóva 30 áñorupi ha ojapóva tres a seis áño omenda hague. Péro ndahaʼéi umi orekóva upe edánte la ojedivorsiavéva.

Pe Instituto de Política Familiar oĩva Espáñape omombeʼu: “Európape mokõi matrimóniogui katuete peteĩva ojedivorsia”. Ha ambue tetã tuichávape péichante avei.

UMI OJEDIVORSIÁVA OÑEÑANDU VAIETEREI OPYTÁVO

¿Mbaʼéichapa oñeñandu peteĩ persóna ojedivorsiáva? Peteĩ konsehéra matrimoniál Europa del Estegua orekóva heta experiénsia heʼi: “Pe divórsio ohechauka peteĩ mbaʼe: umi omendáva noñontendevéima ha ojopoíma. Ha upe rire, mokõivéva oñeñandu vaieterei opytávo”. Upéi heʼi avei: “Umi divorsiádo opyta ipochy, ipyʼaro, oñedesilusiona, ojedesespera ha otĩ”. Sapyʼánte katu oĩ opensáva ojesuisida. “Ojejapopa rire umi kuatia de divórsio, káda uno oñepyrũ opensa ijehe. Oñandu oñemboyke hague chupe ha ndoikuaái mbaʼépa ojapóta. Ikatu voi opensa: ‘¿Mbaʼe piko oikóta chehegui koʼág̃a apytámarõ cheaño?’”.

Peteĩ kuñakarai hérava Ewa omombeʼu mbaʼéichapa oñeñandu vaʼekue: “Ajedivorsia rire apyta atĩeterei. Che vesinokuéra ha umi che kompañéro de traváho heʼi cherehe ‘pe divorsiáda’. Che ména chereja vaʼekue mokõi mitã michĩva reheve, ha che aiko vaʼerã sy ha túvaramo. Chepochyeterei ningo apytávo”.a Ótro ermáno hérava Adam, oservi vaʼekue 12 áñore ansiánoramo, ha haʼe omombeʼu: “Ni che ndajehayhuvéi apytávo, ha sapyʼánte chepochy ha añemomombyryse entérogui”.

OÑEHAʼÃMBAITE HIKUÁI OÑEÑANDU PORÃ JEY HAG̃UA

Umi ojedivorsiáva ojepyʼapyeterei henonderãre, péro oĩ osegíva oñehaʼã oñeñandu porã jey hag̃ua, ohasárõ jepe heta áñoma haʼeño hague. Oĩ opensáva avave noñeinteresaiha hesekuéra. Peteĩ periodísta orekóva experiénsia ko témape heʼi: “Haʼekuéra okambia vaʼerãha heta mbaʼe ojepokuaa vaʼekue ojapo, ha oaprende vaʼerã ombohovái haʼeño umi provléma”.

Stanisław omombeʼu: “Rojedivorsiárõ guare, che rembirekore ndohejái chéve ahecha umi mokõi che rajyʼípe. Upévare aimoʼã avavéma noñeinteresaiha cherehe. Apensa voi Jehová cherejareiha, ha amanoséntema. Tiémpo rire ae ahechakuaa tuicha ajavy hague”. Wanda ojepyʼapy vaʼekue avei ha heʼi: “Aimoʼã ohasávo pe tiémpo, opavavénte oñemomombyrytaha chehegui ha che membykuéragui. Péro koʼág̃a ahechakuaa mbaʼeichaitépa umi ermáno oñangareko vaʼekue orerehe ha mbaʼéichapa chepytyvõ hikuái amongakuaa hag̃ua che membykuérape Jehová rapére”.

Jahechaháicha, heta ojedivorsiáva opyta ndovyʼavéi. Ikatu opensa ndovaleiha mbaʼeverã ha nomereseiha avave ojepyʼapy hesekuéra. Avei oĩ umi oñepyrũva ojesareko ótro deféktore ha upéicha rupi oimoʼã umi ermáno kongregasiongua ndohayhuiha térã nontendeiha chupekuéra. Péro oiko haguéicha Stanisław ha Wanda rehe, ohasávo pe tiémpo ikatu ohechakuaa umi ermáno añetehápe oñeinteresaha hesekuéra. Hiʼarive heta vése oñeñangareko hesekuéra oñeimoʼãʼỹháicha, ndojehechakuaáiramo jepe ñepyrũrã.

OÑEÑANDU HAʼEÑO HA OPENSA OJEDESPRESIAHA CHUPEKUÉRA

Ñanemanduʼa vaʼerã umi ermáno ojedivorsia vaʼekue, sapyʼánte oñeñandutaha haʼeño, ha koʼýte umi ermána ikatu opensa avave noñeinteresaiha hesekuéra. Alicja omombeʼu: “Ojapóma ocho áño ajedivorsia hague, ha sapyʼánte añembojoja ótrore ha apensa ndavaleiha. Péicha jave añemohaʼeño jepi, añepyrũ cherasẽ ha añembyasy”.

Añetehápe ningo umi ermáno ojedivorsia vaʼekue, heta vése oñeñandu Alícjaicha, péro la Biblia ohechauka naiporãiha ñañemohaʼeño. Umi nopenáiva ko konséhore ohechauka ‘naiñaranduiha’ (Prov. 18:1, NM). Péro peteĩ ermáno oñeñandúva haʼeño ohechaukáta iñaranduha ndoikóiramo oñemongeta manterei peteĩ kuña ndive konsého ha konsuélo rekávo. Avei pe ermána ojedivorsiáva oñatende vaʼerã otrata lája ótro kuimbaʼépe. Jahechaháicha, noñeñangarekóiramo hikuái ikatu hína ou oike iñakãmekuéra peteĩ mbaʼe noĩporãiva.

Umi ermáno ojedivorsiáva ikatu okyhyje henonderãgui, oñeñandu haʼeño ha oimoʼã ojedespresiaha, ha koʼã mbaʼe hasy hína ombohovái hag̃ua. Upévare ñaipytyvõ vaʼerã chupekuéra Jehová ojapoháicha (Sal. 55:22; 1 Ped. 5:6, 7). Katuete ningo oagradesetereíta ñaipytyvõ haguére chupekuéra, ha ohecháta kongregasiónpe oĩha amígo oñeinteresa añetéva hesekuéra (Prov. 17:17; 18:24).

a Oĩ téra oñekambiáva.

Mbaʼéichapa jahecha vaʼerã pe divórsio

La Biblia heʼi pe matrimónio haʼeha peteĩ kompromíso tuichaitereíva, upévare opavave kristiáno jarrespeta Ñandejára Ñeʼẽ heʼíva. Por ehémplo, Malaquías 2:16 heʼi Jehová ndoipotaietereiha umi omendáva ojedivorsia. La Biblia heʼi peteĩ kristiáno ikatuha ojedivorsia iména térã hembireko omoakãratĩramo añoite chupe. Upévare, petẽi ermáno térã ermána omendáva tuicha ojavy nopenáiramo la Biblia heʼívare ha opensa ojedivorsia ikatu hag̃uáicha omenda jey (Gén. 2:22-24; Deut. 5:21; Mat. 19:4-6, 9).

Péro oiméramo peteĩ kristiáno ojedivorsia iména térã hembireko omoakãratĩ haguére chupe, umi ermáno kongregasiongua oipytyvõ vaʼerã chupe. Upéicharõ, ñahaʼangákena Jehovápe ñamokyreʼỹvo umi ‘hekopotĩvape’ ohasa asýva hína ‘oñembyasy’ rupi (Sal. 34:15, 18, ÑÑB; Is. 41:10).

¿MBAʼÉPA IKATU REJAPO REIPYTYVÕ HAG̃UA CHUPEKUÉRA?

¿Mbaʼéichapa nde ikatu reipytyvõ peteĩ ermáno ohasávape umi mbaʼe ojeʼe vaʼekue ko artíkulope? Ehechamína mbaʼépa heʼi la Biblia ha avei mbaʼépa ojapo heta kristiáno oipytyvõ hag̃ua koʼãichagua ermánope.

Ehendu chupe ha eñemoĩ ilugárpe. (Prov. 16:20, 23)

Heta vése umi ojedivorsiáva noñeʼẽséi umi provléma ogueraha vai vaʼekuére imatrimónio. Ha ikatu voi oñeñandu vaive omombeʼu rire umi mbaʼe oiko vaʼekue (Prov. 12:25; Rom. 12:15). Michał heta oipytyvõ kuri Ádampe, pe ermáno ñañeʼẽma hague. Michał oikuaa natekotevẽiha jaikuaa opaite mbaʼe oiko vaʼekue ikatu hag̃uáicha ñahendu ha ñañemoĩ pe ermáno lugárpe. Haʼe heʼi: “Añehaʼãmbaite antendeka hag̃ua Ádampe natekotevẽiha omombeʼu chéve peteĩ mbaʼe upe rire ombyasýtava omombeʼu haguére”. Upéicharõ jepe, Michał ohechauka Ádampe oĩha ohendu hag̃uáicha chupe. Oĩramo kongregasiónpe peteĩ ojedivorsiáva, iporãta jaʼéramo chupe, tahaʼe rreunión mboyve térã opa rire: “¿Mbaʼetekópa reime? Ijetuʼu lénto hína, ¿ajépa? Nde reikuaa voi, reikotevẽramo aimeha roipytyvõ hag̃ua”.

Ehechauka reñeinteresaha hese. (Filip. 2:4)

Mirosław heʼi: “Che ha che rembireko roñemotiémpo roipytyvõ hag̃ua peteĩ ermána ojedivorsia vaʼekuépe. Por ehémplo, romyatyrõ hokẽ serradúra ha rogueraha chupe doktórpe”. Haʼetévaicha koʼã mbaʼe sonseraitereiha, péro tuicha oipytyvõ ko ermánape. Mbeguekatúpe omombarete jey ijerovia ha upe rire ojapo iprekursorádo, ha imemby orekóva 11 áño katu ojevautisa.

Ere chupe Jehová ontendeha isituasión.

Oiméramo pe ojedivorsiáva opensa naiñimportanteiha, ikatu ere chupe Ñandejára ñanderayhuha káda únope. Jehovápe g̃uarã javaleve hína “heta gorrióngui” (Mat. 10:29-31). “Yvypóra pyʼapy katu Ñandejára oikuaa”, upévare haʼe ontende umi ojedivorsia vaʼekuépe. Haʼe ndohejareimoʼãi ni peteĩ isiérvo iñeʼẽrendúvape (Prov. 17:3; Sal. 145:18; Heb. 13:5). Jahechaháicha, jahechauka vaʼerã umi ojedivorsiávape ñañeinteresaha hesekuéra. Péro iñimportánte jaʼe avei Jehová oguerohoryha chupekuéra ohayhu haguére pe añetegua ha oñehaʼã haguére akóinte oservi chupe (Filip. 2:29).

Emokyreʼỹ chupe ani hag̃ua oñemomombyry kongregasióngui.

Heta ermáno ojedivorsia vaʼekue oñeñandu vaieterei ha ndohosevéima rreunionhápe. Péro añetehápe koʼã rreunión omombarete ha omokyreʼỹta chupekuéra (Sal. 122:1; 1 Cor. 14:26). Upévare umi ansiáno ohecha vaʼerã mbaʼéichapa oĩ hína koʼã ermáno. Wanda, pe ermána ñañeʼẽma hague, heʼi: “Oremanduʼa mbaʼeichaitépa umi ansiáno mborayhúpe oñangareko orerehe”.

Emokyreʼỹ chupe oñakãrama hatã hag̃ua Jehováre oñemboʼe, ostudia ha ojepyʼamongetávo Ñandejára Ñeʼẽre. (Sant. 4:8)

Jehová ningo ipoderosoiterei ha oiko yvágape, upéicharõ jepe haʼe oñeinteresa ‘umi oñembyasývare ha omombaʼéva iñeʼẽ’. Emomanduʼákena koʼã mbaʼe pe ojedivorsia vaʼekuépe, ehechauka Jehová oipytyvõtaha chupe haʼe oñemboʼéramo ha ostudiáramo Iñeʼẽ (Is. 66:2, NM).

Einvita chupe pepredika hag̃ua oñondive térã pejeprepara hag̃ua rreunionrã.

Upéva oipytyvõta pe ojedivorsia vaʼekuépe oñeñandu porãve hag̃ua. Marta oipytyvõ vaʼekue peteĩ ermána oñeñandu vaietereívape ojedivorsia rire. Haʼe omombeʼu: “Rosẽ oñondive ropredika ha rovyʼaiterei rohechávo rohupytyha umi méta romoĩ vaʼekue. Sapyʼánte rojeprepara oñondive rreunionrã ha upéi roprepara roʼumi vaʼerã”.