Haʼe ‘oikuaa vaʼekue pe tape’

GUY HOLLIS PIERCE omohuʼã iservísio ko yvy ape ári pe martes 18 de marzo de 2014. Oreko kuri 79 áño ha oĩ vaʼekue Kuérpo Governántepe. Haʼe ningo Cristo ermáno, upévare orresusita oiko hag̃ua yvágape (Heb. 2:10-12; 1 Ped. 3:18).

Ermáno Guy Pierce onase el 6 de noviembre de 1934 Áuburnpe (California, Estados Unidos), ha ojevautisa 1955-pe. Áño 1977-pe omenda Penny rehe ha ifamília hikuái. Haʼe ningo peteĩ túva, ha upéicha rupi ifamíliaicha avei otrata ermanokuérape. Áño 1982 guive, haʼe ha Penny ojapo iprekursorádo. Upéi 1986-pe, oñepyrũ oservi de superintendénte de sirkuíto Estados Unídospe, ha 11 áñore osegi upe asignasiónpe.

Áño 1997-pe oñeinvita ermáno Guy Pierce ha hembirekópe oservi hag̃ua Betélpe, Estados Unídospe. Ermáno Pierce ombaʼapo ñepyrũrã Departaménto de Servísiope, ha 1998-pe oñenombra chupe ombaʼapo hag̃ua kómo ajudánte pe Komite de Personál del Kuérpo Governántepe. El 2 de octubre de 1999, oikórõ guare pe rreunión anuál de la Watch Tower Bible and Tract Society of Pennsylvania, oñeanunsia ermáno Pierce oĩtaha pe Kuérpo Governántepe. Ha koʼã áño ohasa ramovévape ombaʼapo oikóvo pe Komite de Personálpe, de Rredaksiónpe, de Puvlikasiónpe ha Komite de Koordinadórespe.

Ermáno Pierce ningo horyeterei ha ovyʼakuaa entérondi. Upévare umi ermáno oparupigua ohayhu ha oguerohory chupe, ha koʼýte ojeapresia chupe ojehechávo mbaʼéichapa oporohayhukuaa, iñumílde, omombaʼe Ñandejára Léi ha ikonsehokuéra, ha ojerovia hese ipyʼaite guive. Ermáno Guy Pierce heʼi voi pe kuarahy jepe ikatuha nosẽi, péro Jehová promésa ni mbaʼevéicharõ ndopytareimoʼãiha. Haʼe omombeʼuseterei voi opavavépe pe añetegua.

Ermáno Pierce ikyreʼỹeterei Jehová servísiope. Voi opuʼã ha sapyʼánte osegi ombaʼapo tárde peve pyharekue. Oviaha heta hendárupi omokyreʼỹ hag̃ua ermanokuérape. Arakaʼeve ndeʼíriva naitiempoiha okomparti hag̃ua ermanokuéra ndive, térã oñatende hag̃ua peteĩ oikotevẽvare konsého, tahaʼe peteĩ oservíva Betélpe térã ambue ermáno. Heta ermáno siémpre imanduʼa mbaʼeichaitépa haʼe imbaʼeporã, iñamigávle ha oporomokyreʼỹ la Biblia rupive.

Katuete hembireko, umi seis ifamília, iniéto ha ivisnietokuéra, ha avei heta persóna ohecháva chupe itúvaramo, ohechagaʼúta ñane ermáno ha ñane amígo Piércepe. Pe diskúrso de funerál ojapo ermáno Mark Sanderson, Kuérpo Governantepegua, Betel de Broóklynpe pe sábado 22 de marzo de 2014. Imanduʼávo ermáno Pierce rehe, omombeʼu avei haʼe oreko hague esperánsa ohotaha yvágape, ha olee Jesús heʼi vaʼekue: “Che Ru rógape oĩ heta lugár ojepyta hag̃ua. [...] Ág̃a aha vove aprepara peẽme pene rendag̃ua, aju jeýta ha porresivíta che rógape, ikatu hag̃uáicha peẽ peime che aĩháme avei. Peẽ peikuaa pe tape ohóva che ahatahápe” (Juan 14:2-4).

Añetehápe heta jahechagaʼúta ermáno Piércepe. Upéicharõ jepe, javyʼa avei ‘oikuaa haguére pe tape’ ogueraháva chupe ‘pe lugár opyta hag̃uáme’.