Mbaʼérepa jajapo vaʼerã pe Konmemorasión

1, 2. ¿Mbaʼépa ojapo Jesús pe 14 de nisán del áño 33 pyhare? (Ehecha pe taʼanga oĩva iñepyrũme.)

PYHARÉMA hína Jerusalénpe, pe jasy henyhẽmbaite ha ñasaindy porã. Jesús ha ijapostolkuéra ojapopa ramoite pe Páskua, ogueromanduʼáva umi isrraelíta osẽ hague Egíptogui ojapóma 1.500 áño. Upéi haʼe omoñepyrũ peteĩ séna espesiál umi 11 ijapóstol iñeʼẽrendúva ndive. Ko séna oservíta ojegueromanduʼa hag̃ua pe día Jesús omano hague. Koʼã mbaʼe oiko kuri áño 33-pe, el 14 de nisán, oñemohuʼã mboyve upe día (Mat. 26:1, 2).a

² Jesús oñemboʼepa rire ombohasa ijapostolkuérape pe pan ndailevadúraiva ha heʼi: “Kóina peʼu”. Upéi ojagarra avei peteĩ kópa, oñemboʼe jey ha heʼi: “Kóina peʼu enterovete” (Mat. 26:26, 27). Ko séna espesiálpe Jesús oipuru vaʼekue pe pan ha pe vínonte, ha omboʼe ijapostolkuérape heta mbaʼe iñimportantetereíva.

3. ¿Mbaʼe porandúpa oñembohováita ko artíkulope?

³ Péicha Jesús omoñepyrũ kuri pe Séna del Señór térã Konmemorasión ojegueromanduʼa hag̃ua haʼe omano hague (1 Cor. 11:20). ¿Mbaʼérepa jagueromanduʼa Jesús omano hague? ¿Mbaʼépa orrepresenta pe pan ha pe víno? ¿Mbaʼéichapa jajeprepara vaʼerã Konmemorasionrã? ¿Mávapa ikatu hoʼu pe pan ha pe víno? ¿Mbaʼéichapa oñeñandu umi kristiáno pe esperánsa Jehová omeʼẽvare chupekuéra?

MBAʼÉREPA JAGUEROMANDUʼA JESÚS OMANO HAGUE

4. ¿Mbaʼépa ojehupyty Jesús omano rupi?

⁴ Adán káusare enterove yvypóra ñanase pekadór ha ñamano (Rom. 5:12). Ndaipóri umáno imperfékto ikatúva ojei ijehegui reínte pekádo poguýgui ni ndaikatúi oipeʼa ótrope. Yvypóra ndaikatúi ojapo mbaʼeve opaga hag̃ua Ñandejárape ijehe (Sal. 49:6-9). Péro Jesús omano rire oofrese Ñandejárape peteĩ mbaʼe ikatúva oasepta: hete perfékto ha huguy. Haʼe omeʼẽ hekove ñanderehehápe ha opresenta Jehovápe isakrifísio repykue. Upévare ñande ikatu jajei pekádo ha ñemano poguýgui ha jaikove opa ára g̃uarã (Rom. 6:23; 1 Cor. 15:21, 22).

5. a) ¿Mbaʼéichapa Jehová ha Jesús ohechauka ñanderayhuha? b) ¿Mbaʼérepa ndajafaltái vaʼerã Konmemorasionhápe?

⁵ Ñandejára ohechauka ñanderayhuetereiha omeʼẽvo Itaʼýra ñanderehehápe (Juan 3:16). Ha Jesús avei ohechauka mbaʼeichaitépa ñanderayhu omeʼẽvo hekove entéro yvypóra rehehápe. Haʼe ou mboyve voi ko yvy ape ári, haʼérõ guare Jehová ‘pytyvõhára katupyry’ yvágape, ‘ohayhúma vaʼekue voi yvyporakuérape’ (Prov. 8:30, 31). Jaagradeséramo Jehová ha Jesús ojapo vaʼekue ñanderehehápe, ni mbaʼevéicharõ ndajafaltamoʼãi pe Konmemorasiónpe. Katuete ñakumplíta ko mandáto: “Pesegíkena pejapo kóva penemanduʼávo cherehe” (1 Cor. 11:23-25).

MBAʼÉPA ORREPRESENTA PE PAN HA PE VÍNO

6. ¿Maʼerãpa Jesús oipuru pe pan ha pe víno ojapórõ guare pe última séna?

⁶ Ojapórõ guare pe última séna, Jesús nokonvertíri pe pan ikuérpope ni pe víno huguýpe. Haʼe heʼi pe pán rehe: “Kóva orrepresenta che rete”. Ha pe vínore heʼi: “Kóva orrepresenta hína ‘che ruguy pe kompromíso pyahúpe g̃uarã’, oñeñohẽtava heta rehehápe”. Péicha Jesús ohechauka porã oipurúnte hague pe pan ha pe víno orrepresenta hag̃ua ambue mbaʼe iñimportantetereíva (Mar. 14:22-24).

7. ¿Mbaʼépa orrepresenta pe pan ojepurúva Konmemorasiónpe?

⁷ Upe pyharépe, Jesús oipuru pe pan ndailevadúraiva hemby vaʼekue pe Páskuagui (Éx. 12:8). La Bíbliape, pe levadúra oñekompara sapyʼánte pe pekádore térã peteĩ mbaʼe oñembyaívare (Mat. 16:6, 11, 12; Luc. 12:1). Upévare pe pan ndailevadúraiva orrepresenta porãiterei Jesús rete ndaipekádoiva (Heb. 7:26). Peichagua pan ojepuru avei koʼág̃arupi ojejapo jave pe Konmemorasión.

8. ¿Mbaʼépa orrepresenta pe víno ojepurúva Konmemorasiónpe?

⁸ Pe víno Jesús oipuru vaʼekue pe 14 de nisán áño 33-pe, orrepresenta huguy, térã hekove. Péicha avei pe víno ojepurúva Konmemorasionhápe orrepresenta Jesús ruguy. Namombyrýi Jerusaléngui, peteĩ lugár héravape Gólgota, oñeñohẽ vaʼekue Jesús ruguy “oñeperdona hag̃ua hetápe ipekádo” (Mat. 26:28; 27:33). Ñamombaʼéramo upe sakrifísio, jajepreparáta káda áño jagueromanduʼa hag̃ua ko okasión espesiál.

MBAʼÉICHAPA JAJEPREPARA VAʼERÃ KONMEMORASIONRÃ

9. a) ¿Mbaʼérepa jasegi vaʼerã pe lektúra vívlika ojepreparáva Konmemorasionrã? b) ¿Mbaʼépa nde repensa pe rreskátere?

⁹ Káda áño osẽ téxto diáriope pe prográma de lektúra vívlika Konmemorasionrã. Jaleéramo koʼã párte, ikatúta jajepyʼamongeta umi mbaʼe Jesús ojapo vaʼekuére omano mboyve. Upéva ñanepytyvõta japrepara hag̃ua ñane korasõ.b Peteĩ ermána oskrivi: “Chemanduʼánte voi papa omanórõ guare; amaña hína pe kuérpore, ha upépe ae antende mbaʼeichaitépa ivalióso pe rreskáte. Upévare rohaʼarõiterei pe Konmemorasión. Haʼete oréve káda áño iñimportantevéva. [...] Che ningo aikuaa umi téxto vívliko oñeʼẽva ko témare ha amyesakãkuaa umíva. Péro omano rire papa avalorave pe rreskáte ha ahechakuaa mbaʼeichaitépa ideprovécho enterovévape. ¡Añetehápe, upéva tuichaiterei chekonsola!”. Jajeprepara jave Konmemorasionrã, ñapensa vaʼerã mbaʼéichapa ñanembopyʼaguapy Jesús sakrifísio, ñandepeʼáva pekádo ha ñemano poguýgui.

10. ¿Mbaʼépa ikatu avei jajapo jajeprepara hag̃ua pe Konmemorasionrã?

¹⁰ Ikatu hag̃uáicha jajeprepara avei pe Konmemorasionrã, iporãta ñañehaʼãramo japredikave, por ehémplo jajapo ñande prekursorádo auxiliár upe temporádape. Ñainvitákena opa ikatúvape ou hag̃ua pe Séna del Señórpe. Katuete ningo javyʼaitereíta ñañemongetávo umi hénte ndive Jehováre, Itaʼýrare ha umi mbaʼe porãite jahupytýtavare (Sal. 148:12, 13).

11. ¿Mbaʼérepa la Biblia heʼi heta kristiáno Corintogua ndorrespetái hague pe Konmemorasión?

¹¹ Ñapensamíntena avei apóstol Pablo ohai vaʼekuére pe kongregasión oĩvape Coríntope (elee 1 Corintios 11:27-34). Haʼe heʼi: “Oimeraẽ hoʼúva pe pan térã pe víno omeʼẽva ñande Ruvicha, péro ndorrespetái upéva, opeka hína ñande Ruvicha rete ha huguy kóntrape”. Upéicharõ, umi unhído ojepyʼamongeta porã vaʼerã isituasión rehe hoʼu mboyve pe pan ha pe víno, ojasegura hag̃ua oĩ porãpa hína Ñandejára renondépe. Pórke oiméramo ikondúkta vai, Jehová ndoaseptamoʼãi chupe, ha pe persóna “oñekondena ijupe voi” hoʼúramo pe pan ha víno. Oĩ vaʼekue heta kristiáno Corintogua noñekomportaporãiva, ha upévare ‘ikangy, hasy’ ha haʼete voi “omanóva” espirituálmente. Ikatu oime oĩ raʼe okaru ha hoʼu rasáva víno pe Konmemorasión aja térã upe mboyve voi. Upéicha haʼekuéra ohechauka ndorrespetaiha upe okasión espesiál, ha Jehová ndoaseptái chupekuéra.

12. a) ¿Mbaʼérehepa ombojoja Pablo pe Konmemorasión, ha mbaʼépa heʼi umi unhídope? b) ¿Mbaʼépa ojapo vaʼerã peteĩ unhído opeka vaíramo?

¹² Pablo ombojoja pe Konmemorasión peteĩ vankétere, ha heʼi umi unhídope: “Peẽ ndaikatúi peyʼu Jehová kópagui ha umi demónio kópagui; ndaikatúi pekaru ‘Jehová meságui’ ha demoniokuéra meságui” (1 Cor. 10:16-21). Oiméramo peteĩ unhído opeka vaieterei, ojerure vaʼerã ansianokuérape toipytyvõ chupe oñemoĩ porã jey hag̃ua Jehová ndive (elee Santiago 5:14-16). ‘Oñarrepentíramo’ ipyʼaite guive, ikatúta hoʼu pe pan ha pe víno konsiénsia potĩ reheve. Péro ndojapóiramo upéva ha hoʼu pe pan ha pe víno, ohechaukáta ndorrespetaiha Cristo sakrifísio (Luc. 3:8).

13. ¿Mbaʼérepa iñimportánte ñañemboʼe jajasegura hag̃ua mbaʼe esperánsapa Jehová omeʼẽ ñandéve?

¹³ Japrepara jave ñane korasõ pe Konmemorasionrã, iporãta jajepyʼamongeta ha ñañemboʼe jaikuaa porã hag̃ua mbaʼe esperánsapa Jehová omeʼẽ ñandéve. Peteĩ kristiáno oĩ vaʼerã segúro haʼeha unhído ikatu hag̃uáicha hoʼu pe pan ha víno. Pórke hoʼúramo oikuaa porãʼỹre, ohechauka hína ndorrespetaiha Jesús sakrifísio. ¿Mbaʼéichapa peteĩ persóna oikuaáta ikatúpa hoʼu pe pan ha pe víno ojepurúva Konmemorasionhápe?

MÁVAPA IKATU HOʼU PE PAN HA PE VÍNO

14. ¿Mbaʼépa ohupytýta umi unhído oĩ rupi pe pákto pyahúpe?

¹⁴ Umi hoʼúva pe pan ha pe víno Konmemorasiónpe, oĩ segúro oñeinkluiha chupekuéra pe pákto pyahúpe. Jesús heʼi pe víno rehe: “Ko kópa orrepresenta pe [pákto] pyahu ojejapóva che ruguy rupive” (1 Cor. 11:25). Jeremías rupive Jehová oprofetisa oipeʼataha pe pákto de la Léi ojapo vaʼekue umi isrraelítandi, ha hendaguépe ojapotaha peteĩ pákto pyahu (elee Jeremías 31:31-34). Jehová ojapo upe pákto pyahu umi isrraelíta espirituál ndive (Gál. 6:15, 16). Ha Cristo ruguy oñeñohẽ rire oñepyrũ ko kompromíso iñimportantetéva (Luc. 22:20). Jesús rupive ojejapo kuri pe pákto pyahu, ha umi unhído iñeʼẽrendúva oikóta hendive yvágape (Heb. 8:6; 9:15).

15. a) ¿Mávapepa oñeinklui pe pákto del Rréinope? b) ¿Mbaʼépa ohupytýta umi unhído iñeʼẽrendúva?

¹⁵ Umi kristiáno unhído oikuaa avei oñeinkluiha chupekuéra pe pákto del Rréinope (elee Lucas 12:32). Jesús ojapo ko kompromíso umi oapoja vaʼekuéndi chupe ha “ohasa [asýva] haʼéicha” (Filip. 3:10). Ko akuérdo rupive, umi unhído iñeʼẽrendúva ikatúta ogoverna Jesúsndi yvágape opa ára g̃uarã (Apoc. 22:5). Koʼã kristiáno ikatu hoʼu pe pan ha pe víno pe Séna del Señórpe.

16. Emyesakã mbykymi mbaʼépa heʼise Romanos 8:15-17 heʼíva.

¹⁶ Pe espíritu sánto oikuaauka umi kristiáno unhídope haʼeha Ñandejára Raʼy, upévare haʼekuéra añoite ikatu hoʼu pe pan ha pe víno (elee Romanos 8:15-17). Apóstol Pablo oipuru vaʼekue pe palávra araméa Abba, heʼiséva “Che Ru” térã “Papa”. Péicha umi mitã ikatu vaʼekue ohechauka ohayhuha itúvape ha orrespetaha chupe. Jahechakuaa upéicharõ mbaʼeichaitépa umi unhído oĩ unído Jehovándi orresivi rire pe ‘espíritu ohechaukáva Ñandejára oadoptaha chupekuéra itaʼýraramo’. ‘Pe espíritu sánto [...] oikuaauka chupekuéra haʼeha Ñandejára raʼy.’ Ndahaʼéi ningo ndoikoséinteva hikuái ko yvy ape ári. Haʼekuéra oĩ segúro ikatutaha ogoverna Crístondi yvágape iñeʼẽrendúramo omano meve. Jaikuaaháicha, “Ñandejára Imarangatúva” oiporavo vaʼekue 144.000 unhído, ha umívagui mbovyetereíma hemby ko yvy ape ári (1 Juan 2:20; Apoc. 14:1). Haʼekuéra haʼe rupi Jehová raʼy ikatu heʼi: “¡Abba, che Ru!”.

MOKÕI ESPERÁNSA IDIFERÉNTEVA

17. a) ¿Mbaʼe esperánsapa oreko umi unhído? b) ¿Mbaʼéichapa peteĩ kristiáno oikuaa unhidoha?

¹⁷ Oiméramo nde peteĩ kristiáno unhído, katuete reñeʼẽ ne esperánsare reñemboʼe jave. Ha la Biblia heʼíva katu opoko de ótro nderehe. Por ehémplo, oñeʼẽ jave pe kasamiénto oikótavare yvágape Jesús ha pe “nóvia” omenda vove, katuete reikuaa oñeʼẽha nderehe, ha reipotaitereíma og̃uahẽ upe ára (2 Cor. 11:2; Juan 3:27-29; Apoc. 21:2, 9-14). Relee jave la Bíbliape mbaʼeichaitépa Jehová ohayhu itaʼyrakuéra espirituálpe, reikuaáma oñeʼẽha hína nderehe. Térã retopa jave pype umi instruksión oñemeʼẽva unhidokuérape, pe espíritu sánto nemomýi neñeʼẽrendu hag̃ua. Péicha Ñandejára espíritu oikuaauka ndéve erekoha esperánsa selestiál.

18. a) ¿Mbaʼe esperánsapa oreko “ambue ovechakuéra”? b) ¿Mbaʼéichapa reñeñandu repensávo ne esperánsare?

¹⁸ Oiméramo nde reĩ “ambue ovechakuéra” apytépe, oñehenóiva avei “peteĩ aty guasu”, ereko hína esperánsa reikovévo ko yvy ape ári (Juan 10:16; Apoc. 7:9). Katuete reikose opa árare peteĩ hardín neporãvape. Oiméne ndepyʼarory repensa jave mbaʼéichapa ojeikóta ko yvy ape ári, ha hiʼãitereíma ndéve og̃uahẽ pe ára reiko hag̃ua vyʼa ha pyʼaguapýpe ne família ha ne amigokuérandi. Katuete reipotáma avei og̃uahẽ pe ára ndaiporimoʼãveimahápe iñembyahýiva, hasýva, imboriahúva ni omanóva (Sal. 37:10, 11, 29; 67:6; 72:7, 16; Is. 33:24). Oiméne hiʼãitereíma avei ndéve oikove jey umi rehayhúva omano vaʼekue, ha reñeimahinambáma mbaʼéichapa rerresivíta chupekuéra (Juan 5:28, 29). Katuete ningo reagradese Jehovápe upe esperánsa porãitére. Ha ndereʼúiramo jepe pe pan ha víno, reho pe Konmemorasionhápe rehechauka hag̃ua reagradesetereiha pe sakrifísio Jesús ojapo vaʼekue ndesalva hag̃ua.

ANÍKENA REFALTA

19, 20. a) ¿Mbaʼépa rejapo vaʼerã ikatu hag̃uáicha rehecha Ñandejára promésa oñekumpli vove? b) ¿Mbaʼérepa nde reho vaʼerã Konmemorasionhápe?

¹⁹ Reipotáramo oñekumpli umi mbaʼe rehaʼarõva, tahaʼe yvágape térã ko yvy ape ári, rejerovia vaʼerã Jehováre, Jesúsre ha pe rreskátere. Pe Konmemorasiónpe rejepyʼamongeta vaʼerã pe esperánsa erekóvare ha umi mbaʼe ojehupytývare Jesús omano haguére. Ág̃a viernes 3 de abril de 2015, kuarahy oike rire, ko yvy tuichakuére hetaiterei persóna oñembyatýta umi Salón del Réinope ha ambue lugárpe ogueromanduʼa hag̃ua pe Séna del Señór.

²⁰ Rehóramo pe Konmemorasionhápe katuete reagradesevéta Jesús ojapo vaʼekue ñanderayhupápe. Ejapysaka porãkena pe diskúrso ojejapótavare upépe. Upéva nepytyvõta rehayhuve hag̃ua umi héntepe ha nemomýita remombeʼu hag̃ua chupekuéra mbaʼeichaitépa Jehová ñanderayhu. Avei remombeʼuséta opavavépe mbaʼépa haʼe ojapóta ñanderehehápe koʼẽrõite (Mat. 22:34-40). ¡Aníkena ni mbaʼevéicharõ rejavy ko rreunión iñimportantetéva!