Cristo ohayhu yvyporakuérape

1, 2. ¿Mbaʼéichapa Jesús ohechauka ohayhuha yvyporakuérape?

PROVERBIOS kapítulo 8-pe oñeñeʼẽ pe arandúre haʼerõguáicha peteĩ persóna. Ko kapítulope heʼi pe arandu orrepresentaha hína Jesúspe ou mboyve ko yvy ape ári. Ha heʼi Ñandejára okreárõ guare entéro mbaʼe, Jesús oipytyvõ hague chupe opa mbaʼépe. Avei omombeʼu haʼeha peteĩ persóna ombaʼapokuaáva ha ikatupyrýva. Katuete Jesús ovyʼáne raʼe oipytyvõrõ guare Ñandejárape ojapo hag̃ua pe yvága ha ko yvy. La Biblia heʼi Jesús oguerohoryeterei hague opa mbaʼe Ñandejára ojapo vaʼekue, péro ohayhuveha yvyporakuérape (Prov. 8:22-31).

² ¿Mbaʼéichapa Jesús ohechauka ohayhuetereiha Ñandejárape ha yvyporakuérape? Oúvo ko yvy ape ári “opaga ha oguenohẽ hag̃ua hetápe pekádo poguýgui” (Filip. 2:5-8; Mat. 20:28). Avei, Ñandejára omeʼẽ vaʼekue chupe podér ikatu hag̃uáicha ojapo milágro. Ha koʼã milágro rupive Jesús ohechauka mbaʼeichaitépa ñanderayhu, ha avei ohechauka umi mbaʼe porãita koʼẽrõitéma ojapótava ñanderehehápe.

3. ¿Mbaʼépa ñahesaʼỹijóta ko artíkulope?

³ Jesús oúrõ guare ko yvy ape ári, oñeʼẽ umi héntepe Ñandejára Réinore (Luc. 4:43). Haʼe oikuaa ko goviérno omopotĩtaha Ñandejára réra ha osolusionataha pára siémpre opaichagua provléma. Ha opredika tiémpope ojapo vaʼekue heta milágro. Péicha ohechauka ohayhuha umi héntepe. ¿Mbaʼérepa iñimportánte ñandéve g̃uarã umi milágro haʼe ojapo vaʼekue? Pórke omeʼẽ ñandéve esperánsa. Ko artíkulope ñañeʼẽta cuatro milágro Jesús ojapo vaʼekuére.

“SI, ROMONGUERASE”

4. Emombeʼu mbaʼépa oiko vaʼekue Jesús ohechárõ guare peteĩ kuimbaʼe ilépravape.

⁴ Jesús opredika aja Galiléape, ohecha peteĩ kuimbaʼe iléprava (Mar. 1:39, 40). Ko karai hasy vaieterei anga, upévare Lucas, haʼéva doktór, heʼi hese ‘henyhẽha lépragui’ (Luc. 5:12). Ko kuimbaʼe ohechávo Jesúspe, oñesũ henondépe ha heʼi chupe: “Karai, nde reipotáramo ningo ikatu chemonguera”. Haʼe oikuaa porã Jesús ikatuha omonguera chupe, péro ndoikuaái oimépa omonguerase chupe. ¿Mbaʼérepa? Pórke umi líder rrelihióso hudío odespresia vaʼekue umi leprósope. Hiʼarive oime vaʼerã pe mbaʼasy odeformambáma ko kuimbaʼépe. ¿Mbaʼépa ojapo Jesús? ¿Ojahéipa avei hese umi líder rrelihióso ojapoháicha? ¿Mbaʼéichapa nde retrata vaʼerãmoʼã pe kuimbaʼépe?

5. ¿Mbaʼérepa Jesús omonguerase pe kuimbaʼe ilépravape?

⁵ Ñandejára Léi heʼi vaʼekue peteĩ iléprava oñemoag̃uívo ohóvo peteĩ persónare oavisa vaʼerãha hasyha. Péro amalisia ko kuimbaʼe ndojapói upéva (Lev. 13:43-46). ¿Ipochýpa raʼe Jesús upe haguére? Nahániri. Upéva rangue ojepyʼapy hese ha oipytyvõse chupe. Oiporiahuvereko rupi ko kuimbaʼépe ojapo peteĩ mbaʼe oñehaʼarõʼỹva: “Opoko hese ha heʼi: ‘Si, romonguerase’. Ha upepete pe lépra opa chugui” (Luc. 5:13). Jehová ningo omeʼẽ podér Jesúspe ikatu hag̃uáicha ojapo ko milágro, ha ohechauka hag̃ua haʼe avei ohayhuetereiha umi héntepe (Luc. 5:17).

6. a) ¿Mbaʼéichapa Jesús oporomonguera vaʼekue? b) ¿Mbaʼépa ñanemboʼe umi milágro Jesús ojapo vaʼekue?

⁶ Jesús ningo ndahaʼéi omongueráva umi ilépravapente. Ñandejára podér rupive haʼe ojapo vaʼekue hetave milágro ha omonguera heta kláse mbaʼasy. Por ehémplo, la Biblia heʼi: “Umi hénte ohecharamoiterei mbaʼéichapa umi iñeʼẽngúva oñeʼẽ jey, umi oguataʼỹva oguata, umi siégo ohecha” (Mat. 15:31). Ñane tiémpope umi doktór tekotevẽ jepi oporoopera térã ojapo trasplánte de órgano omonguera hag̃ua peteĩ hasývape. Péro Jesús natekotevẽi vaʼekue ojapo upéva. Haʼe ikatu omonguera oimeraẽvape upepete voi, ha hiʼarive ikatu oporomonguera mombyry guive (Juan 4:46-54). ¿Mbaʼépa ñanemboʼe koʼã mbaʼe? Ñande rréi Jesucristo ikatuha omongueraite oimehaichagua mbaʼasy, ha ndahaʼéi ikatúnteva, síno ojapose voi upéva. Jesús otrata porãiterei vaʼekue umi hénte hasývape. Upévare ñande ñaime segúro Ñandejára múndo pyahúpe ojapo jeytaha upéicha. La Biblia opromete: “Oiporiahuverekóne imboriahúvape ha chupe oguenohẽne jejopy vaígui” (Sal. 72:13). Ñande ningo jaikuaa porã Jesús omongueraseha entéro umi persóna osufrívape.

“EPUʼÃ, EJAGARRA NDE RUPA HA TEREHO”

7, 8. ¿Mbaʼéichapa Jesús oipytyvõ umi hénte ohendúvape ipredikasión?

⁷ Unos kuánto mése upe rire, Jesús oho Galiléagui Judéape ikatu hag̃uáicha osegi omombeʼu pe marandu porã. Hetaiterei persóna ohendu chupe, ha ohechakuaa hikuái haʼe ohayhuha chupekuéra. Jesús okonsola umi ohasa asývape ha omeʼẽ chupekuéra esperánsa (Is. 61:1, 2; Luc. 4:18-21).

⁸ Mes de nisánpe, Jesús oviaha Jerusalénpe ikatu hag̃uáicha ofesteha pe Páskua hudía. Hetaiterei persóna ningo oho upépe upearã. Pe siudápe oĩ peteĩ piléta ikonosidoitereíva hérava Betzata, opytáva nórte gotyo pe témplogui. Jesús oho upépe ha ohecha peteĩ kuimbaʼe oñenóva ha ndaikatúiva oguata.

9, 10. a) ¿Mbaʼérepa umi hénte oho vaʼekue pe pilétape Jerusalénpe? b) ¿Mbaʼépa Jesús ojapo vaʼekue pe piléta de Betzátape? c) ¿Mbaʼépa ñaaprende ko milágrogui? (Ehecha pe taʼanga oĩva iñepyrũme.)

⁹ ¿Mbaʼérepa hetaite hénte ohómi vaʼekue pe piléta oĩvape Jerusalénpe? Haʼekuéra oimoʼã okuerataha milagrósamente ojahúramo upépe pe y okuʼe jave. Ñapensamína: oime vaʼerãngo umi hénte itarovapa oikeségui upe ýpe. Péro, ¿mbaʼépa Jesús ojapo upépe, ko haʼe ndahasýiva? Haʼe oho upépe ohayhu rupi umi héntepe. Ha upe lugárpe ohecha kuri pe kuimbaʼe hasývape, ndaikatúiva oguata ojapóma 38 áño (elee Juan 5:5-9).

¹⁰ Jesús oporandu pe kuimbaʼépe okuerasépa. Pe karai anga heʼi okueraseha, péro ndaiporiha avave oipytyvõ vaʼerã chupe oike hag̃ua pe pilétape. Upémarõ Jesús heʼi ko kuimbaʼépe ojapo hag̃ua peteĩ mbaʼe haʼetévaicha ndaikatumoʼãiva ojapo. Heʼi chupe: “Epuʼã, ejagarra nde rupa ha tereho”. ¿Mbaʼépa ojapo pe karai? Opuʼã, ojagarra ikamílla ha oguata. Ko milágro ñanemopensa umi milágro Jesús ojapótavare Ñandejára múndo pyahúpe. Avei ñanemboʼe haʼe ohayhuetereiha umi persónape. Jesús oho kuri pe pilétape oheka hag̃ua mávapa oikotevẽve ajúda. Ñande avei jasegi vaʼerã iñehémplo ha jaha japredika umi hénte ojepyʼapýva ha ohasa asývape.

“CHE RAJY, REJEROVIA RUPI NINGO REKUERA”

11. ¿Mbaʼépa ñanemboʼe Marcos 5:25-34?

¹¹ (Elee Marcos 5:25-34.) Oĩ vaʼekue peteĩ kuña hasýva 12 áñorema. Haʼe ogastapáma orekomíva doktórpe, péro a mas día hasykatuve. Pe enfermeda orekóva oheja vaieterei chupe ha ndaikatuvéi oservi porã Ñandejárape (Lev. 15:19, 25). Péro peteĩ día, ojedesesperágui haʼe oike peteĩ hénte atýpe Jesús oĩháme, ha opoko ijaóre. Upepete pe kuña okuera. Péro Jesús oñandu osẽ hague chugui podér, upévare ojere ha oporandu mávapa opoko hese. Pe kuña oryrýi osusũ, oñesũ Jesús renondépe ha omombeʼu la ojapo vaʼekue. Jesús ohechakuaa Jehová omonguera hague chupe. Upévare heʼi pe kuñáme: “Che rajy, rejerovia rupi ningo rekuera”. Upéi heʼi chupe anínte hag̃ua ojepyʼapy, tohónte pyʼaguapýpe. Jahechaháicha, Jesús ohayhueterei umi hasykatúvape.

12. a) ¿Mbaʼeichagua persónapa raʼe Jesús? b) ¿Mbaʼe ehémplopa oheja ñandéve Jesús?

¹² ¡Ajépa ivuenoite Jesús! Haʼe ningo ohayhueterei yvyporakuérape, koʼýte umi hasykatúvape. Satanás katu idiferentete voi. Haʼe oipota ñapensa ndajavaleiha mbaʼeverã ha ndaiporiha ñanderayhúva. Péro umi milágro Jesús ojapo vaʼekue ohechauka ojepyʼapyha ñanderehe ha ointeresaha chupe umi mbaʼe jahasáva. ¡Ajépa javyʼaite jareko haguére peteĩ rréi ha saserdóte peichaite peve ñanderayhúva! (Heb. 4:15.) Oiméramo ñaneresãi, sapyʼánte ikatu ijetuʼu ñandéve ñantende hag̃ua peteĩ persóna hasýmavape heta tiémpore. Péro ñañehaʼã vaʼerã jasegi Jesús ehémplo. Haʼe núnka ndahasýiramo jepe, ontende umi persóna hasykatúvape ha oiporiahuvereko chupekuéra (1 Ped. 3:8).

“¡LÁZARO, ESẼ!”

13. ¿Mbaʼépa ñanemboʼe Jesúsgui pe milágro ojapo vaʼekue?

¹³ Jesús ningo ombyasyeterei vaʼekue umi héntepe ohechávo chupekuéra osufri. Por ehémplo, oñeñandu vaieterei iñamígo Lázaro omanórõ guare, pórke ohecha ihentekuéra ha iñamigokuéra osufriha (elee Juan 11:33-36). Jesús oikuaa porã omoingove jeytaha Lázarope, péro upéicharõ jepe hasẽ kuri upe moméntope. Haʼe nopensái iporãveha ojejokónte, pórke oĩta ohecháva chupe hasẽ jave. Jesús ohayhueterei Lázaro ha ihentekuérape, upéicha rupi oipuru Ñandejára podér orresusita hag̃ua chupe (Juan 11:43, 44).

14, 15. a) ¿Mbaʼérepa jaʼekuaa Jehová oipeʼaseha opa mbaʼe ñanembosufríva? b) ¿Mbaʼérehepa ojerreferi Jesús heʼírõ guare “opavave umi oĩva pe sepultúrape”?

¹⁴ La Biblia heʼi Jesús ojoguaitereiha Itúvape (Heb. 1:3). Upévare ikatu jaʼe umi milágro haʼe ojapo vaʼekue ohechaukaha Ñandejára oñeinteresaha avei ñanderehe. Jehová oipeʼase avei opa mbaʼe ñanembosufríva, por ehémplo umi mbaʼasy ha ñemano. Koʼẽrõitéma Jehová ha Jesús omoingove jeýta hetaiterei umi omano vaʼekuépe. Jesús heʼi kuri oñemoingove jeytaha “opavave umi oĩva pe sepultúrape” (Juan 5:28, 29).

¹⁵ ¿Mbaʼérehepa ojerreferi Jesús heʼírõ guare “opavave umi oĩva pe sepultúrape”? Upérõ haʼe heʼise kuri opavave oĩva Itúva memóriape oikove jeytaha. Jehová ikatu imanduʼa mbaʼeichagua persónapa raʼe upe omano vaʼekue, por ehémplo iñapariénsia, ikarákter ha umi rrekuérdo oreko vaʼekue (Is. 40:26). Péro ndahaʼéi ikatúnteva imanduʼa koʼã mbaʼére, síno haʼe omoingovese jey umi omano vaʼekuépe. La Biblia omombeʼu oiko hague heta rresurreksión, ha upéva ogarantisa Ñandejára múndo pyahúpe oĩtaha avei opuʼã jeýva.

MBAʼÉPA ÑANEMBOʼE UMI MILÁGRO JESÚS OJAPO VAʼEKUE

16. ¿Mbaʼeichagua milágropa ohecháta heta Ñandejára siérvo?

¹⁶ Jasegíramo ñaneñeʼẽrendu Ñandejárape, jahecháta pe milágro tuichavéva oikótava ko yvy ape ari: jarekóta oportunida jahasávo pe grán trivulasión. Ha opa rire Armagedón oikóta hetave milágro, por ehémplo yvyporakuéra mbeguekatúpe hesãita ohóvo ohupyty peve perfeksión (Is. 33:24; 35:5, 6; Apoc. 21:4). Ndaiporimoʼãvéima oikotevẽtava lénte, vastón, muléta ni sílla de rruéda. Jehová oipytyvõta enterovévape ikatu hag̃uáicha imbarete ha hesãi. Péicha ikatúta enterovéva ombaʼapo vyʼápe ojapo hag̃ua ko yvýgui peteĩ paraíso (Sal. 115:16).

17, 18. a) ¿Mbaʼérepa Jesús ojapo vaʼekue heta milágro oĩrõ guare ko yvy ape ári? b) ¿Mbaʼérepa ñañehaʼãmbaite vaʼerã ñaime hag̃ua pe múndo pyahúpe?

¹⁷ Jaleévo umi milágro Jesús ojapo vaʼekue, ñanekyreʼỹ japytávo, pórke jaikuaa porã koʼẽrõite ndaiporimoʼãveimaha mbaʼeveichagua mbaʼasy (Apoc. 7:9). Koʼã milágro ohechauka porãiterei mbaʼeichaitépa Jesús ñanderayhu (Juan 10:11; 15:12, 13). Avei ohechauka ñandéve Jehová ohayhuetereiha isiervokuérape.

¹⁸ Ko múndope enterovéva jasufri ha ñamano (Rom. 8:22). Upévare jaipotaitereíma Ñandejára ogueru imúndo pyahu. Malaquías 4:2 oasegura ñandéve javyʼaitereitaha upéva oiko vove, pórke ñaneresãita ha jahupytýta perfeksión. Ajépa jaagradesete Jehovápe koʼã mbaʼére, ha jajerovia haʼe katuete okumplitaha ipromésa. Upéicharõ, ñañehaʼãmbaitékena ikatu hag̃uáicha ñaime pe paraísope. Ha ani ñanderesarái, umi milágro Jesús ojapo vaʼekue ohechauka koʼẽrõitéma jahupytytaha heta mbaʼe porã igoviérno poguýpe.