Iñimportánte jaikuaa mbaʼéichapa la Biblia og̃uahẽ ñandéve

Ndaipóri ótro lívro rrelihióso ohupytýva la Bíbliape. Ymaite guivéma ningo hetaiterei hénte ojegia la Biblia heʼívare odesidi hag̃ua mbaʼépa ogueroviáta. Péro ndaipóri avei ótro lívro peichaite peve ojekritikáva ha oñeinvestigáva ojetopa hag̃ua pype errór.

Por ehémplo, oĩ expérto heʼíva hasyha jaguerovia hag̃ua umi Biblia koʼag̃agua ndojoavyiha umi ojeskrivi ypy vaʼekuéndi. Peteĩ profesór ostudiáva umi rrelihiónre heʼi: “Ndaikatúi ñaime segúro jaikuaaha mbaʼe mensáhepa oĩ vaʼekue umi orihinálpe. Jareko heta kópia ojejapo vaipa vaʼekue, ha la majoría ojejapo hetaiterei tiémpo ojeskrivi rire umi orihinál, ha jaʼekuaa hetaiterei mbaʼépe ojoavyha umívandi”.

Oĩ avei ndojeroviáiva la Bíbliare oñemboʼe rupi chupe upéva irrelihiónpe. Por ehémplo, peteĩ karai hérava Faizal okakuaa vaʼekue peteĩ família ndahaʼéivape kristiána. Michĩ guive oñemboʼe chupe la Biblia haʼeha peteĩ lívro sagrádo, péro oñekambia hague umi mbaʼe heʼíva pype. Haʼe heʼi: “Upévare che adeskonfia vaʼekue umi oñeʼẽsévare chéve la Bíbliare. Haʼekuéra ndorekói pe Biblia orihinál, síno oñekambia pyréma”.

Péro, ¿iñimportánte piko reikuaa oñekambiápa raʼe umi mbaʼe oĩva la Bíbliape? Epensamíntena, ndereikuaáiramo oĩpa voínte raʼe la Bíbliape umi promésa oñeʼẽva ñane renonderãre, ¿ikatútapa reguerovia umíva oñekumplitaha? (Romanos 15:4). Ha oiméramo umi hénte ojavypa raʼe okopiárõ guare la Biblia, ¿reipurúnepa umi konsého oĩva pype redesidi porã hag̃ua nde travahohápe ha nde rogapýpe? ¿Rejegiánepa hese redesidi hag̃ua mbaʼéichapa readoráta Ñandejárape?

Añetehápe umi lívro orihinál oĩ haguépe la Biblia ndaiporivéima koʼág̃a, péro oĩ kópia ikatúva jahecha, umíva apytépe heta manuskríto ymaiterei guare.a Pe mensáhe oĩva la Bíbliape og̃uahẽ ñandéve ojeskrivíramo jepe umi materiál oñembyai reívape, ha oĩramo jepe hénte ohundise térã okambiase vaʼekue pe mensáhe, ¿mbaʼéicha rupípa oiko raʼe upéva? Ko rrevísta nepytyvõta reikuaa hag̃ua upéva ha avei rejeroviave hag̃ua umi Biblia jarekóvare koʼág̃a.