¿Máva káusarepa jasufri?

Pe sufrimiénto ndoúiramo Ñandejáragui, ¿máva káusare upéicharõ oĩ hetaite ñembyahýi, mboriahu, gérra, mbaʼasy ha torménta vai? La Biblia omombeʼu mbaʼérepa oĩ hetaite mbaʼe ñanembosufríva. Jahechamína mbohapy mbaʼe:

1. Oĩ heta opensáva ijehénte, iplatarayhúva ha ndochaʼéiva hapicháre. “Yvypóra omanda hapicháre operhudika hag̃uánte chupe” (Eclesiastés 8:9). La hénte ningo ohasa asy pórke ótra persóna opensáva ijehénte, iñañáva ha iñimperféktova ombosufri chupekuéra.

2. Entérope ikatu “ohupyty umi desgrásia ohaʼarõʼỹve jave” (Eclesiastés 9:11). Upéva heʼise peteĩ persóna ikatuha oĩ hústo pe lugár ha óra oikohápe peteĩ mbaʼe vai. Ikatu oiko peteĩ aksidénte, térã oiko hese álgo noñatendéi, ojavy térã ojapo vai haguére peteĩ mbaʼe.

3. Oĩ peteĩ iñañaitereíva odomináva ko múndo. La Biblia ohechauka porã máva káusarepa prinsipálmente oĩ hetaite sufrimiénto. Upépe heʼi: “Ko múndo kompletoite oĩ pe aña poguýpe” (1 Juan 5:19). Pe “aña” haʼe Satanás pe Diávlo, haʼe ningo peteĩ espíritu imbaretetereíva ha iñepyrũme haʼe vaʼekue peteĩ ánhel oĩva Ñandejárandi péro upéi “omboyke pe añetegua” (Juan 8:44). Upéi oĩma avei hetave ánhel omoirũva Satanáspe, oñemoĩ hikuái Ñandejárare ojapo hag̃ua haʼekuéra ojaposéva ha péicha oiko chuguikuéra demónio (Génesis 6:1-5). Satanás ha idemoniokuéra opuʼã guive Ñandejárare, odomina ko múndo, ha umi mbaʼe ojapóva tuicha oafekta ko ñane múndope. Upéva jahecha porã oikoha ko ñane tiémpope. Koʼág̃a Satanás ipochyháre oiko ha ombotavy hína ko múndo kompletoitépe, upéicha rupi oĩ heta ohasa asýva (Apocalipsis 12:9, 12). Upévare ikatu jaʼe Satanás haʼeha peteĩ diktadór iñañaiterei ha ipyʼahatãva, haʼe ovyʼaiterei voi umi hénte osufri jave. Umi persóna oĩva ko múndope osufri Satanás káusare, ha ndahaʼéi Ñandejára káusare.

EPENSAMÍNA KO MBAʼÉRE: Peteĩ persóna iñañaitereívanteko ombosufríta umi hénte inoséntepe. Péro la Biblia heʼi Ñandejára haʼeha mborayhu (1 Juan 4:8). Haʼe ningo oporohayhueterei, upévare “ni mbaʼevéicharõ [...] ndojapomoʼãi ivaíva, Ñandejára Todopoderóso ndaikatúi hembiapo vai” (Job 34:10).

Péro ikatu ñañeporandu: ¿Mboy tiémpore piko Ñandejára Todopoderóso ohejáta Satanás osegi ko goviérno ñanembosufrietévare? Jahecháma haguéicha, Ñandejárape ndogustaiete umi mbaʼe vai oikóva ha ohechávo jasufriha oñeñandu vaieterei voi. La Bíbliape heʼi avei: “Pemoĩ ipópe opaite mbaʼe pendepyʼapýva, haʼe ojepyʼapýgui penderehe” (1 Pedro 5:7). Ñandejára ningo ñanderayhueterei ha ipoderóso, upévare koʼẽrõitéma oipeʼapáta umi sufrimiénto ha inhustísia. Pe artíkulo oúvape ñañeʼẽvéta upe témare.a