Jaikuaave Hag̃ua

¿Mbaʼéicha rupípa disípulo Esteban ipyʼaguapyete vaʼekue ojepersegírõ guare chupe?

ESTEBAN rehe oñemoĩ vaʼekue unos kuánto kuimbaʼe ndaijaʼéiva hese. Umi kuimbaʼe oforma pe trivunál iñimportantevéva oĩva Israélpe hérava Sanedrín. Pe trivunálpe oĩ 71 hués, ha haʼekuéra oĩ la omanda guasuvéva apytépe upe nasiónpe. Pe saserdóte prinsipál Caifás ombyaty kuri chupekuéra. Ojapo unos mése haʼe voi omoakã hague pe trivunál Jesúspe ojejukárõ guare (Mat. 26:57, 59; Hech. 6:8-12). Pe Sanedrín ohusgárõ guare Estébanpe ogueru ojoapykuéri umi testígo japu oñeʼẽva Esteban kóntrape. Upe jave ohecha hikuái peteĩ mbaʼe osorprendetereíva chupekuéra, omañávo Estébanre “ohecha pe hova haʼete voi peteĩ ánhel” (Hech. 6:13-15).

¿Mbaʼéicha rupípa Esteban ikatu raʼe osegi ipyʼaguapy oĩrõ guare pe situasión ijetuʼuetévape? Ojegueru mboyve pe Sanedrín renondépe, Ñandejára espíritu oipytyvõ Estébanpe oñemeʼẽmbaite hag̃ua Ñandejára servísiope (Hech. 6:3-7). Upévare, pe espíritu sánto oipytyvõ avei chupe pe pruéva ohasávape, pórke ombopyʼaguapy ha omomanduʼa Estébanpe umi mbaʼe omombaretétavare ijerovia (Juan 14:16). Hechos kapítulo 7 omombeʼu mbaʼéichapa katupyrýpe haʼe oñedefende vaʼekue. Upérõ pe espíritu sánto omomanduʼa chupe 20 téxto rehe oĩva Escrituras Hebréaspe (Juan 14:26).Péro ijerovia imbaretevéntema kuri peteĩ visión rupive, ohechárõ guare Jesúspe oĩha Ñandejára deréchape (Hech. 7:54-56, 59, 60).

Ikatu ningo og̃uahẽ la día ñande voi tekotevẽtahápe ñambohovái peteĩ pruéva térã umi persóna ñandepersegívape (Juan 15:20). Oikóramo upéva, jaheja vaʼerã Jehová espíritu ñanepytyvõ. Péro upearã tekotevẽ koʼág̃ama voi jastudia la Biblia ha ñambaʼapo meme Jehová servísiope. Péicha ñanembaretéta ñaaguanta hag̃ua opa mbaʼe ha jasegíta ñandepyʼaguapy (1 Ped. 4:12-14).