‘Tapeho pejapo chuguikuéra che disípulo’

1, 2. a) Asegún pe Jesús omanda vaʼekue Mateo 28:18-20-pe, ¿mbaʼépa pe traváho iñimportantevéva ojapo vaʼerã pe kongregasión? b) ¿Mbaʼe porandúpa ñambohováita ko artíkulope?

UMI apóstol oiméne ovyʼaiterei raʼe oñembyatýrõ guare peteĩ montáña oĩvape Galiléape. Jesús orresusita rire, heʼi kuri chupekuéra ojotopa hag̃ua hendive upe lugárpe (Mat. 28:16). Upérõ oiméne Jesús ojechauka vaʼekue mas de 500 disípulope (1 Cor. 15:6). ¿Mbaʼérepa Jesús ojerure rakaʼe idisipulokuérape ojotopa hag̃ua hendive? Omeʼẽ hag̃ua chupekuéra ko mandamiénto iñimportantetéva: “Tapeho pemboʼe umi hénte opa tetãyguápe oiko hag̃ua chuguikuéra che disípulo” (elee Mateo 28:18-20).

² Umi disípulo ohendúva Jesús omanda vaʼekue oĩ kuri pe kongregasión oñeforma vaʼekuépe primer síglope. ¿Mbaʼépa raʼe pe traváho iñimportantevéva ojapo vaʼerã ko kongregasión? Haʼekuéra oipytyvõ vaʼerã kuri umi héntepe oiko hag̃ua chuguikuéra Jesús disípulo.b Koʼág̃arupi oĩ mas de 120 mil kongregasión ko yvy tuichakuére, ha enterovéva osegi ojapo ko traváho iñimportantetéva. Ko artíkulope ñambohováita 4 porandu: ¿Mbaʼérepa iñimportantete jajapo disípulo? ¿Mbaʼépa jajapo vaʼerã upearã? ¿Enterove kristiáno piko oipytyvõ oiko hag̃ua ótrogui Jesús disípulo? ¿Mbaʼérepa tekotevẽ ñanepasiénsia jajapóvo ko tembiapo?

¿MBAʼÉREPA IÑIMPORTANTETE JAJAPO DISÍPULO?

3. Heʼiháicha Juan 14:6 ha 17:3, ¿mbaʼérepa iñimportantete jajapo disípulo?

³ ¿Mbaʼérepa iñimportantete ñaipytyvõ umi héntepe oiko hag̃ua chuguikuéra Jesús disípulo? Pórke Jesús disipulokuéragui añoite ikatu oiko Jehová amígo. Hiʼarive Jesús segidorkuéra oiko porãve koʼág̃ama voi, ha avei oreko esperánsa oikove hag̃ua pára siémpre (elee Juan 14:6; 17:3). Añetehápe Jesús omeʼẽ ñandéve peteĩ rresponsavilida tuichaitereíva, péro ñande ndajajapói ñaneaño ko tembiapo. Apóstol Pablo heʼi vaʼekue haʼe ha iñirũnguéra haʼeha “Ñandejára ajudánte” (1 Cor. 3:9). ¡Ajépa tuichaite priviléhio omeʼẽ Jehová ha Jesucristo ñande yvypóra imperféktope!

4. ¿Mbaʼépa ñaaprende Iván ha Matilde ehémplogui?

⁴ Katuete javyʼaiterei ñaipytyvõ jave umi héntepe oiko hag̃ua chuguikuéra Jesús disípulo. Jahechamína Iván ha hembireko Matilde ehémplo, oikóva Colómbiape. Haʼekuéra opredika vaʼekue peteĩ mitãkariaʼy héravape Davier. Ko mitãkariaʼy heʼími vaʼekue ijehe: “Chéngo akambiase, péro ndaikatúi”. Davier ningo boxeadór vaʼekue, ojedroga, omokõ rasa ha oiko omendaʼỹre peteĩ kuñataĩ héravandi Erika. Iván omombeʼu: “Ore roñepyrũ rostudia hendive la Biblia, ha mombyry opyta vaʼekue pe puevloʼi haʼe oikoha. Upévare rog̃uahẽ hag̃ua upépe rohómante vaʼerã visikléta ári heta óra, hiʼarive umi tape ivai ha tuju memete. Erika ohechakuaa Davier okambia hague ilája ha ikomportamiénto, upévare haʼe oñepyrũ avei ostudia la Biblia”. Tiémpo rire, Davier oheja umi dróga, nomokõrasavéi, ndopraktikavéi boxéo ha avei omenda Érikare. Matilde omombeʼu: “Davier ha Erika ojevautisárõ guare 2016-pe, oremanduʼa Davier heʼími hague: ‘Chéngo akambiase, péro ndaikatúi’. Ha rovyʼaitereígui roñepyrũ orerasẽ”. Añetehápe ningo javyʼaiterei ñaipytyvõ jave umi héntepe oiko hag̃ua chuguikuéra Jesús disípulo.

¿MBAʼÉPA JAJAPO VAʼERÃ JAJAPO HAG̃UA DISÍPULO?

5. ¿Mbaʼépa primeroite jajapo vaʼerã ikatu hag̃uáicha jajapo disípulo?

⁵ ¿Mbaʼépa primeroite jajapo vaʼerã ikatu hag̃uáicha jajapo disípulo? Jaheka vaʼerã umi hénte oaprendesévape Jehovágui (Mat. 10:11). Ñande ningo jahechauka añetehápe haʼeha testígo de Jehová japredika rupi entéro persóna jatopávape. Ñakumpli jave pe mandamiénto Jesús omeʼẽ vaʼekue ñandéve japredika hag̃ua, ñande jahechauka hína haʼeha kristiáno tee.

6. ¿Mbaʼépa ikatu jajapo osẽ porã hag̃ua ñandéve ñane predikasión?

⁶ Oĩ umi hénte oaprendeséva voi la Biblia omboʼéva, péro oĩ avei umi haʼetévaicha nointeresaguasúiva chupe. Upévare sapyʼánte tekotevẽ raẽta ñamokyreʼỹ chupekuéra oikuaaseve hag̃ua la Bíbliagui. Avei jajeprepara porã vaʼerã ikatu hag̃uáicha osẽ porã ñandéve ñane predikasión. Jaiporavo vaʼerã umi téma ikatúva ointeresa umi héntepe, ha upéi jahecha mbaʼéichapa ñamoñepyrũta káda téma.

7. a) ¿Mbaʼéichapa ikatu ñañepyrũ ñañemongeta umi héntendi? b) ¿Mbaʼérepa nde ere iñimportanteha jajapysaka umi héntere ha jahechauka jarrespetaha umi mbaʼe opensáva?

⁷ Por ehémplo, ikatu jaʼe pe ogajárape: “Koʼág̃arupi ningo oĩ heta provléma oafektáva enterovépe. Péro ndépa mbaʼe repensa, ¿oĩne piko peteĩ goviérno ikatúva osolusiona entéro umi provléma oĩva ko múndope?”. Upéi ikatu ñaanalisa hendive Daniel 2:44. Térã ikatu avei jaʼe peteĩ ogajárape: “Aporandusemi ningo ndéve mbaʼépa repensa. ¿Mbaʼéichapa ikatúne ñamboʼe ñane famíliape osẽ porã hag̃ua hikuái?”. Upéi jahecha hendive Deuteronomio 6:6, 7 heʼíva. Tahaʼe haʼéva pe téma jaiporavóva, siémpre ñapensa raẽ vaʼerã umi hénte ñanerendútavare. Ñapensa vaʼerã mbaʼéichapa ideprovéchota chupekuéra oaprendéramo mbaʼépa añetehápe omboʼe la Biblia. Ha ñañemongeta jave hendivekuéra, iñimportánte jajapysaka hesekuéra, ha jahechauka jarrespetaha la opensáva hikuái. Upéicha jajapóramo, ñantende porãvéta chupekuéra ha ñanerendusevéta hikuái.

8. ¿Mbaʼérepa iñimportánte jasegi jajapo rrevisíta?

⁸ Ikatu hag̃uáicha peteĩ persóna ostudiase la Biblia, sapyʼánte tekotevẽta jaipuru heta tiémpo ha ñañehaʼãmbaite jajapo chupe rrevisíta heta vése. ¿Mbaʼérepa? Pórke ikatu hína ndajatopái jepi hesekuéra jaha jey jave ñañemongeta hag̃ua hendivekuéra. Sapyʼánte tekotevẽta avei javisita jey heta vése peteĩ persónape, ojepokuaa peve ñanderehe oasepta hag̃ua peteĩ estúdio bíblico. Ñanemanduʼa vaʼerã peteĩ plánta pyʼỹi jarregáramo, okakuaa porãvetaha. Upéicha avei, ikatu hag̃uáicha peteĩ persóna ohayhu Jehová ha Jesucrístope, tekotevẽ pyʼỹi ñañemongeta hendive Ñandejára Ñeʼẽre.

¿ENTEROVE KRISTIÁNO PIKO OIPYTYVÕ OIKO HAG̃UA ÓTROGUI JESÚS DISÍPULO?

9, 10. ¿Mbaʼérepa ikatu jaʼe entéro kristiáno ikatuha oipytyvõ ojetopa hag̃ua umi persóna ikorasõ porãvape?

⁹ Entéro kristiáno ikatu ñaipytyvõ jatopa hag̃ua umi persóna ikorasõ porãvape. Ko tembiapo ikatu ñakompara ku ojehekarõguáicha peteĩ mitãʼi okañy vaʼekuépe. ¿Mbaʼérepa jaʼe upéva? Ñapensamíntena la oiko vaʼekuére peteĩ mitãʼi de 3 áñore. Ko mitãʼi ningo okañy kuri hógagui ha 500 persónarupi oñepyrũ oheka chupe. Amo 20 órarupi okañy haguépe, peteĩva umi persóna oheka vaʼekue pe mitãʼípe otopa hese peteĩ avatitýpe. Upe otopa vaʼekue hese ndoipotái kuri umi hénte omombaʼe chupe upe haguére. Haʼe heʼi: “Hetaiterei hénte ningo oipytyvõ ojetopa hag̃ua hese, ndahaʼéi che añónte”.

¹⁰ Koʼág̃arupi hetaiterei hénte ojogua pe mitãʼi okañy vaʼekuépe. Haʼekuéra ndorekói esperánsa ha oikotevẽ ajúda (Efes. 2:12). Ñande ningo ñaime mas de 8 millón, ha enterove ñambaʼapo hína oñondivepa jatopa hag̃ua koʼãichagua persónape. Ikatu oime nde nderetopái peteĩ ostudiaséva la Biblia, péro umi ótro ermáno opredikáva avei el mísmo território ikatu hína otopa umichagua persóna. Peteĩ ermáno oipytyvõ jave peteĩ persónape oiko hag̃ua chugui Jesús disípulo, enterove umi oheka vaʼekue upe persónape ikatu ovyʼa.

11. ¿Mbaʼéichapa ikatu reipytyvõ oiko hag̃ua umi héntegui Jesús disípulo, jepe koʼag̃aite ndereguerekói peteĩ estúdio bíblico?

¹¹ Oiméramo nde koʼag̃aite ndereguerekói peteĩ estúdio bíblico, lomímonte ikatu reipytyvõ umi héntepe oiko hag̃ua chuguikuéra Jesús disípulo. ¿Mbaʼéichapa ikatu rejapo upéva? Por ehémplo, ikatu rerresivi porã umi oho ramóvape rreunionhápe ha nderory chupekuéra. Upéicha haʼekuéra ohechakuaáta ñande haʼeha kristiáno tee, pórke jajoayhu (Juan 13:34, 35). Rekomenta jave rreunionhápe, jepe mbykymínte, ikatu reipytyvõ umi ipyahúvape oikuaa hag̃ua mbaʼéichapa ikatu omombeʼu umi mbaʼe ogueroviáva, ha ojapo hag̃ua upéva ipyʼaite guive ha rrespetuósamente. Ikatu avei reinvita peteĩ puvlikadór pyahúpe nemoirũ hag̃ua predikasiónpe, ha reipytyvõ chupe oipurukuaa hag̃ua la Biblia omboʼe hag̃ua la héntepe. Rejapóramo koʼã mbaʼe, remboʼéta hína chupe osegi hag̃ua Jesús ehémplo (Luc. 10:25-28).

12. ¿Tekotevẽ piko ndevaleterei reipytyvõ hag̃ua umi héntepe oiko hag̃ua chuguikuéra Jesús disípulo? Emyesakã.

¹² Nerepensái vaʼerã tekotevẽha ndevaleterei reipytyvõ hag̃ua umi héntepe oiko hag̃ua chuguikuéra Jesús disípulo. ¿Mbaʼérepa? Jahechamína Faustina ehémplo. Haʼe ningo oiko Bolíviape, ha ndoleekuaái vaʼekue oikuaárõ guare testígo de Jehovápe. Upe rire haʼe ja oleekuaáma michĩmi. Koʼág̃a g̃uarã Faustina ojevautisáma ha omboʼeseterei voi ótrope la Biblia. Haʼe káda semána ojapo jepi 5 estúdio bíblico. La majoría umi iñestudiánte oleekuaave chugui, upéicharõ jepe, haʼe oipytyvõma 6 persónape ojevautisa hag̃ua (Luc. 10:21).

13. Ñanerembiapoitereíramo jepe, ¿mbaʼe vendisiónpa jahupyty jajapóramo disípulo?

¹³ Heta ermáno hembiapoiterei pórke oreko heta rresponsavilida. Upéicharõ jepe, haʼekuéra oñemotiémpo ojapo hag̃ua estúdio bíblico ha ovyʼaiterei upe haguére. Jahechamína Melanie ehémplo. Ko ermána ningo oiko Aláskape, ha omongakuaa vaʼerã haʼeño imemby de 8 áñope. Avei oreko peteĩ traváho de tiémpo kompléto ha oñangareko vaʼerã itúa orekóvare kánser. Ko ermána ningo oiko peteĩ puévlo opytávape mombyry, ha upépe haʼe añoite testígo de Jehová. Haʼe heta vése oñemboʼe Jehovápe omombarete hag̃ua chupe, ikatu hag̃uáicha ogueropuʼaka pe roʼy ha osẽ opredika, pórke haʼe otopaseterei peteĩ persóna ostudiasévare la Biblia. Upe rire otopa Sárape ha haʼe ovyʼaiterei oikuaávo mbaʼéichapa héra Ñandejára. Tiémpo rire Sara oasepta ostudia la Biblia. Melanie omombeʼu: “Viernes kaʼaru ningo che chekaneʼõitereíma jepi. Péro ojapo porãiterei cherehe ha che membykuñaʼíre rohóramo rojapo upe estúdio. Igustoiterei oréve roheka umi informasión rokontesta hag̃ua Sárape umi mbaʼe oikuaaséva. Ha rovyʼaiterei rohechávo mbaʼéichapa Sáragui oiko Jehová amíga”. Sara ningo pyʼaguasúpe oaguanta oĩrõ guare oñemoĩva ikóntrape, oheja pe iglésia oho hague ha upéi ojevautisa.

¿MBAʼÉREPA TEKOTEVẼ ÑANEPASIÉNSIA JAJAPO HAG̃UA DISÍPULO?

14. a) ¿Mbaʼérepa ikatu jaʼe jajapo jave disípulo jajoguaha umi peskadórpe? b) ¿Mbaʼépa ñaaprende umi mbaʼe Pablo heʼi vaʼekuégui 2 Timoteo 4:1, 2-pe?

¹⁴ Ndajatopáiramo jepe peteĩ persóna oikoséva Jesús disípuloramo, ñande jasegi vaʼerã jaheka. Ñanemanduʼa vaʼerã Jesús ombojoja hague jajapo disípulo umi peskadór ojapóva rehe. Umi peskadór ningo ohasa jepi heta óra oity peve la pira. Sapyʼánte haʼekuéra opyta opeska pyharepyte peve, térã voi porã oñepyrũ de madrugáda. Ha sapyʼánte oviaha vaʼerã avei mombyry porã (Luc. 5:5). Péicha avei heta ermáno ipasiénsia ha “opeska” heta órare ha diferénte lugárpe otopa hag̃ua umi héntere. ¿Mbaʼérepa ojapo hikuái upéva? Ikatu hag̃uáicha otopa hetave héntere. Péicha ombaʼapo jejopy rupi, oĩ ermáno otopáva umi hénte ohendusévare pe mensáhe jagueraháva. Ikatu oime jahechakuaa ñande territóriope oĩha óra ha lugár ikatuhápe jatopa hetave héntere, ¿ikatúnepa ñañehaʼã japredika umi óra ha umi lugárpe? (elee 2 Timoteo 4:1, 2).

15. ¿Mbaʼérepa tekotevẽ ñanepasiénsia jajapo jave estúdio bíblico?

¹⁵ ¿Mbaʼérepa tekotevẽ ñanepasiénsia jajapo jave estúdio bíblico? Pórke ndahaʼéi ñamboʼénte vaʼerã ñane estudiántepe oikuaa ha ohayhu hag̃ua umi mbaʼe omboʼéva la Biblia. Tekotevẽ avei ñamboʼe chupekuéra oikuaa ha ohayhu hag̃ua Jehovápe, haʼéva la Biblia Apohare. Avei ndahaʼéi ñamboʼénte vaʼerã ñane estudiántepe mbaʼépa Jesús ojerure idisipulokuéragui, síno ñaipytyvõ vaʼerã chupekuéra oikuaa hag̃ua mbaʼéichapa ikatu okumpli Jesús omanda vaʼekue. Ñanepasiénsia vaʼerã hesekuéra oñehaʼã jave omoĩ en práktika umi konsého oĩva la Bíbliape. Oĩ ningo umi estudiánte okambiáva opensa ha oiko lája unos mésepente voi, péro oĩ avei umi oikotevẽva hetave tiémpo.

16. ¿Mbaʼépa ikatu ñaaprende Raúl ehémplogui?

¹⁶ Umi mbaʼe ohasáva peteĩ misionéro oĩ vaʼekue Perúpe ohechauka porã mbaʼérepa iñimportánte ñanepasiénsia. Haʼe omombeʼu: “Che astudiáma kuri mokõi lívro peteĩ che estudiánte héravandi Raúl, péro haʼe okambia vaʼerã gueteri heta mbaʼépe. Por ehémplo, oreko kuri heta provléma hembirekóndi, ijuru tieʼỹ, ha umi ifamiliakuéra ndorrespetaiete voi chupe pórke haʼe ikondúkta vai. Upéicharõ jepe, haʼe oho meme rreunionhápe, ha upévare asegi avisita Raúl ha ifamíliape aipytyvõ hag̃ua chupekuéra. Ohasa haguépe mas de 3 áño pe primera ves roñemongeta rire, haʼe ikatúma kuri ojevautisa”.

17. ¿Mbaʼépa jahecháta pe ótro artíkulope?

¹⁷ Jesús heʼi vaʼekue ‘jaha hag̃ua ñamboʼe umi hénte opa tetãyguápe oiko hag̃ua chuguikuéra idisípulo’. Ñakumpli hag̃ua ko mandamiénto sapyʼánte ñañeʼẽ vaʼerã umi hénte opensávandi diferentete ñandehegui, umíva apytépe oĩ umi ndorekóiva rrelihión térã umi ndogueroviáiva Ñandejára oexistiha. Pe ótro artíkulope jahecháta mbaʼéichapa ikatu ñamombeʼu umi notísia porã koʼãichagua héntepe.