Prográma ñane famíliape g̃uarã: Rreunionkuéra kongregasionpegua
1 Nde haʼéramo peteĩ túva térã sy, reipota ne família okakuaa ohayhu ha oservi hag̃ua Jehovápe, ha ohupyty hag̃ua jeikove opaʼỹva pe múndo pyahu Ñandejára oprometévape. Mbaʼéichapa ikatu reipytyvõ chupekuéra omotenonde hag̃ua Jehová adorasión hekovépe? Ne ehémplo iñimportantetereíta upévape (Pro. 20:7). Peteĩ ermána, imanduʼávo isy ehémplore (isy peteĩ testígo avei), heʼi: “Natekotevẽiva roporandu rohótapa térãpa ndorohomoʼãi rreunionhápe”. Upévagui haʼe ndahesaraivéi.
2 Ontende porãpa ne família maʼerãpa ojejapo umi rreunión kongregasionpegua? Katuete umi mbaʼe ñaaprendéva ñane rreunionkuérape tuicha ñanemombarete jasegi hag̃ua jajapo Ñandejára oipotáva, ha jajeheʼáramo ñane ermanokuéra ndive ikatu ñanekyreʼỹ meme (Isa. 54:13; Rom. 1:11, 12). Upéicharõ jepe, umi rreunión ojejapo espesialménte ojealava hag̃ua Jehovápe ‘umi tapichaita ijatýva apytépe’ (Sal. 26:12). Ñane rreuniónpe ikatu jahechauka jahayhuha Jehovápe ha upépe ikatu jaadora ichupe.
3 “Peñangareko porãke.” Jahechakuaáramo ñane rreunionkuéra isagradoha, ‘ñañeñangareko porãta’ ani hag̃ua jaha pokã rreunionhápe ñamotenondehaguére umi mbaʼe iñimportanteʼỹva ha mbegue mbeguépe jajepokuaa upéicha (Efe. 5:15, 16; Heb. 10:24, 25). Rejapo vove ne famíliape g̃uarã prográma, ikatu remoĩ umi rreunión kongregasionpegua raẽvete. Ha upéi ehecha ani hag̃ua mbaʼeveichagua tembiapo pendejoko peho hag̃ua rreunionhápe. Emboʼe ne famíliape omotenonde hag̃ua pe rreuniónpe jeho.
4 Ajépa ñanemokyreʼỹ jahechávo mbaʼéichapa ñane ermanokuéra ombohovái umi provléma oho hag̃ua rreunión térã asambleahápe. Katuete oĩne avei umi provléma pembohováiva, ndatuicháiramo jepe. Satanás oñehaʼãve káda día Ñandejára puévlope hasyve hag̃ua oadora Jehovápe. Upéicharõ jepe reikuaa porã vaʼerã nde raʼykuéra ohechaha mbaʼéichapa pene família oñehaʼã oho hag̃ua rreunionhápe. Añetehápe, rejapóramo upéicha, remeʼẽreína chupekuéra peteĩ jopói espirituál ndahesaraimoʼãiva hikuái arakaʼeve.