Pe predikasión ñanepytyvõ ani hag̃ua ñanekaneʼõ
1 Ñandejára Ñeʼẽ heʼi ñandéve “ñañani hag̃ua ñanekaneʼõʼỹre pe karréra oñemoĩva ñane renondépe” (Heb. 12:1). Peteĩ oñaníva naikaneʼõivaʼerã osẽ porã hag̃ua. Upéicha avei ñande, nañanekaneʼõivaʼerã jahupyty hag̃ua pe jeikove opaʼỹva (Heb. 10:36). Mbaʼéichapa pe predikasión ikatu ñanepytyvõ ñag̃uahẽ hag̃ua ñanekaneʼõʼỹre pe ára pahápe? (Mat. 24:13.)
2 Ñanemombarete espiritualménte. Ñañeʼẽ aja umi mbaʼe iporãitereíva pe múndo pyahúpe oĩtavagui, oprometeháicha la Biblia, ñandéve voi hesakã porãve ñande jerovia (1Tes. 5:8). Ñasẽ meméramo japredika, ikatu ñamombeʼu ñande rapichápe umi mbaʼe añetegua ñaaprendevaʼekue la Bíbliagui. Ikatu ñadefende pe jagueroviáva, ha upéicha ñande voi ñañemombareteve espiritualménte.
3 Ikatu hag̃uáicha ñamboʼe porã ñande rapichápe, ñande raẽ ñantende porã vaʼerã umi mbaʼe añetegua oĩva la Bíbliape. Jahekavevaʼerã informasión upe ñaporomboʼétavagui ha jajepyʼamongetavaʼerã hese. Jajapóramo umíva kyreʼỹme, jaikuaa porãvéta hetave mbaʼe, imbaretevéta ñande jerovia, ha ñandepiroʼýta espiritualménte (Pro. 2:3-5). Ha upéicha, ñañehaʼã aja ñaipytyvõ ñande rapichápe, ñande voi ñañemombareteve (1Tim. 4:15, 16).
4 Ñasẽ meméramo predikasionhápe, ñamondeñaína avei “pe armadúra oĩmbaitéva oúva Ñandejáragui”. Ñaikotevẽ pe armadúra rehe ñañemoĩ mbarete hag̃ua Satanás ha idemoniokuéra rehe (Efe. 6:10-13, 15). Ñane rembiapo meméramo Ñandejára servísiope jaguerekovéta ñane akãme umi mbaʼe ñanemombaretéva, ha ndajahejamoʼãi ñanembyai ko múndo Satanás omoakãva (Col. 3:2). Ñamboʼe aja ñande rapichápe Jehová Ñeʼẽ, ñañemomanduʼa ñandéve voi tekotevẽha ñane rembiapo potĩ opa mbaʼépe (1Ped. 2:12).
5 Ñandejára ñanemombarete. Avei, pe predikasión jajapóva ñanemboʼe jajeroviave hag̃ua Jehová rehe (2Cor. 4:1, 7). Ajépa upéva iporã ñandéve g̃uarã! Jajerovia mbaretevéramo Jehová rehe ikatúta jajapo porã ñane predikasión ha ikatúta ñambohovái oimehaichagua provléma jatopáva ñande rekovépe (Fili. 4:11-13). Añetehápe, ani hag̃ua ñanekaneʼõ, ñaaprendevaʼerã mbaʼéichapa jajeroviapaitevaʼerã Jehová rehe (Sal. 55:22). Ha upéicha, pe predikasión tuicha ñanepytyvõ ani hag̃ua ñanekaneʼõ.