Ñañehaʼãkena ñandekatupyryve ñaipytyvõvo ñande rapichápe opensa porã hag̃ua
1. Mbaʼe oikovaʼekuépa, oĩháicha la Bíbliape, jahecháta koʼág̃a, ha mbaʼérepa?
1 Pe diskúrso omeʼẽvaʼekue pe apóstol Pablo peteĩ sinagógape oĩ aja Antioquía de Pisídiape, oĩháicha Hechos 13:16-41-pe, ohechauka mbaʼéichapa ñaipytyvõvaʼerã umi ñanerendúvape ontende porã hag̃ua mbaʼérepa jaʼe peteĩ mbaʼe. Pablo nomboykéi pe haʼekuéra oikuaáva ha opensáva, ha oñeʼẽvo pe marandu porãgui imanduʼa chupekuéra umi mbaʼére. Koʼág̃a jahecháta pe oikovaʼekue ha upe aja ñapensami mbaʼéichapa ñande avei ikatu jajapo Pablo ojapohaguéicha japredika jave.
2. Mbaʼépa ñaaprende Páblogui jaleévo mbaʼéichapa omoñepyrũ idiskúrso?
2 Jaheka mbaʼépepa ñapensa joja. Ipredikasiónpe, Pablo ohechauka mbaʼéichapa Ñandejára oiporu Jesúspe ojapo hag̃ua pe oipotáva, péro haʼe noñeʼẽraẽi upévagui oñepyrũvo idiskúrso. Upéva rangue, oñeʼẽ raẽ henduharakuéra ndive, haimetéva hudío meme, peteĩ mbaʼe opensa jojávagui: oñeʼẽ umi mbaʼe umi hudío ohasavaʼekuégui (Hech. 13:16-22). Upéicha avei, ñande rapichakuéra ñanerendu porãvéta jaheka raẽramo mbaʼépepa ñapensa joja hendivekuéra. Ñaporandukuaáramo mbaʼépa opensa hikuái, ha ñahendúramo pe heʼíva, ikatúta ñantende mbaʼépa iñimportanteve chupekuéra g̃uarã.
3. Mbaʼérepa ikatu hasy rakaʼe umi hudíope oguerovia hag̃ua Jesús haʼehague pe Mesías ohaʼarõvaʼekue hikuái?
3 Ohesaʼỹijóvo umi mbaʼe ohasavaʼekue umi hudío yma guare, Pablo omomanduʼa henduharakuérape Ñandejára oprometehague omopuʼãtaha David ñemoñarégui peteĩ osalvátava chupekuéra. Heta hudío katu ohaʼarõ peteĩ héroe militar, oipeʼátava chupekuéra Roma poguýgui ha omopuʼãtava Israélpe tuichave hag̃uáicha umi ótro tetãnguéragui. Haʼekuéra oikuaa umi hudío mburuvicha oĩva Jerusalénpe ndogueroviaihague Jesúspe, omeʼẽhague hikuái chupe umi Romaygua mburuvichakuérape, ha ojejukahague. Mbaʼépa ikaturakaʼe heʼi Pablo oguerovia hag̃ua hikuái Jesús haʼeha pe Mesías?
4. Mbaʼéichapa Pablo ikatupyry omopensa hag̃ua umi hudíope?
4 Ñañepyrũ pe oñekotevẽháicha. Oikuaágui mbaʼépa opensa henduharakuéra Pablo oiporu Ñandejára Ñeʼẽgui umi mbaʼe haʼekuéra ogueroviámava, omyesakã hag̃ua pe omboʼéva. Pór ehémplo, ohechauka Jesús ouhague Davídgui ha avei Juan el Bautista, pe proféta opavave nunga ogueroviáva, ohechaukahague Jesús haʼeha pe Mesías (Hech. 13:23-25). Ndogueroviáivo Jesúspe, ha ojukaukávo chupe, heʼi Pablo, umi hudío mburuvicha ‘okumpli umi proféta ñeʼẽngue’ (Hech. 13:26-28). Avei, ohechauka oĩhague umi ohechavaʼekue Jesúspe opuʼã jey rire omanóva apytégui, ha oiporu umi téysto vívliko henduharakuéra oikuaa porãva, oñekumplivaʼekue Jesús rehe opuʼã jeýrõ guare (Hech. 13:29-37).
5. a) Mbaʼéichapa Pablo oñepyrũ oñemongeta umi Greciaygua ndive? b) Mbaʼéichapa ikatu jajapo Pablo ojapohaguéicha japredika vove ñande territóriope?
5 Péro, oñeʼẽvo umi Greciayguápe, Atenas Areópagope, Pablo ndoiporúi upeichagua informasión oñepyrũvo oñeʼẽ chupekuéra (Hech. 17:22-31). Upéicharõ jepe, haʼe nokambiái pe marandu omboʼéva, ha mokõive hendápe osẽ porã (Hech. 13:42, 43; 17:34). Koʼág̃a avei, ñamboʼe porãve hag̃ua ñande rapichakuérape japredika jave, jahekavaʼerã mbaʼépepa ñapensa joja, ha ñañepyrũvo ñañemongeta hendivekuéra, jaiporuvaʼerã pe oikuaáva ha opensáva hikuái.