Pe Ñandejára ñanemboʼéva ñanepytyvõ jahupyty hag̃ua jeikove opaʼỹva
1 Ajépa ojapo porã ñanderehe jahechávo mbaʼeichaitépa ovyʼa ñande rapicha ontende jave umi mbaʼe porã omboʼéva Ñandejára Ñeʼẽ! Añetehápe javyʼa ñamombeʼúramo ñande rapichakuérape pe jaikuaáva Ñandejáragui, ha umi mbaʼe ojapótava. Pe Ñandejára omboʼéva ikatu oipytyvõ chupekuéra ohupyty hag̃ua jeikove opaʼỹva (Juan 17:3).
2 Mbaʼérepa iporãve. Koʼág̃a ojeporu heta mbaʼe oñehekomboʼe hag̃ua tapichakuérape, ha hetaiterei mbaʼe ikatu ojestudia (Ecl. 12:12). Umi mbaʼe upérupi oñemboʼéva katu ndaikatúi ñambojoja “umi mbaʼe iporãitereíva Ñandejáragui” oúva rehe (Hech. 2:11). Omoag̃uivépa tapichakuérape Ñandejárare umi mbaʼe oñemboʼéva ko múndope, térã omboʼépa chupekuéra pe Ñandejára ojapótava? Oipytyvõpa chupekuéra oikuaa hag̃ua mbaʼépa oiko ñamano rire térã mbaʼérepa oĩ hetaiterei jehasa asy? Omeʼẽpa chupekuéra esperánsa? Oipytyvõpa umi familiakuérape oiko porãve hag̃ua? Nahániri. Umi mbaʼe oaprendéva Ñandejáragui añoite ikatúta omyesakã chupekuéra umi mbaʼe oikuaaséva ko ñande rekovégui.
3 Pe Ñandejára ñanemboʼéva omeʼẽ ñandéve pe ndaikatúiva omeʼẽ umi mbaʼe ko múndope ojestudiáva, oñehaʼãramo jepe hikuái. Jajapóramo Ñandejára Ñeʼẽme oĩháicha, ndaijavéima ñane korasõme pe jaʼeʼỹ ñañanduvaʼekue ñande rapicháre ipire kolór diferénte haguére, ha nañamombaʼeguasuvéima ñane retã ñaimoʼãgui iporãveha ótrogui (Heb. 4:12). Oipytyvõma avei hetápe oheja hag̃ua opaichagua mbaʼe vai ha ‘omonde hag̃ua pe teko pyahu’ (Col. 3:9-11; Miq. 4:1-3). Avei, pe Ñandejára ñanemboʼéva oipytyvõma hetaiterei tapichápe oheja hag̃ua heta tembiapo ha kostúmbre vai Ñandejárape ndogustáiva, imbaretéramo jepe hekovekuérape umi mbaʼe (1 Cor. 6:9-11).
4 Mbaʼérepa koʼág̃a tekotevẽterei. Ñane Mboʼehára Ijojahaʼỹva ñanepytyvõ jaikuaa hag̃ua mbaʼépa heʼise umi mbaʼe oikóva koʼág̃a. Iñeʼẽme oĩ umi mbaʼe oikóva koʼág̃a, oñemombeʼuvaʼerã ko Yvy tuichakue javeve (Rev. 14:6, 7). Jesucristo oisãmbyhýma yvága guive, koʼẽrõitéma oñehundíta pe império guasu rrelihión fálsa rehegua, ha Ñandejára Rréino oĩma ohundi hag̃uáicha opavave goviérno oĩva ko yvy ape ári (Dan. 2:44; Rev. 11:15; 17:16). Upévare tekotevẽtereíma ñande rapichakuéra ohechakuaa oĩmaha peteĩ Rréi oisãmbyhýva Ñandejára Rréinope, ikatu hag̃uáicha osẽ pe Babilonia Guasúgui, oiporu hag̃ua Ñandejára réra ha ojerovia hag̃ua Hese (Sal. 2:11, 12; Rom. 10:13; Rev. 18:4). Ñañehaʼãkena ñambaʼapo ikatuha peve ñamog̃uahẽ hag̃ua ñande rapichakuérape pe Ñandejára omboʼéva, ñanepytyvõva jahupyty hag̃ua jeikove opaʼỹva.