Jastudia porãkena ñande lívro Mbaʼépa añetehápe omboʼe la Biblia?
1 Javyʼaitereíkuri ñane asambléa de distríto “Ñaneñeʼerendu Ñandejárape”, osẽrõ guare pe lívro Mbaʼépa añetehápe omboʼe la Biblia? Koʼẽrõitéma jaiporu meméta ko lívro ñane predikasiónpe, koʼýte jajapo hag̃ua estúdio vívliko. Upévare tekotevẽ jaikuaa porã pe oĩva ipype. Upearã jastudiáta pe lívro ñande Estúdio de lívro de kongregasiónpe oñepyrũvo pe semána 17 de abril 2006.
2 Pe estúdio de lívro omoakãva oiporu raẽta umi porandu oĩva pe título guýpe káda kapítulope. Upéi oiporúta umi porandu oñemoĩva umi párrafope g̃uarã. Ikatu ojelee ha oñehesaʼỹijo umi téysto vívliko iñimportantevéva, ha pe rrekuádro “Mbaʼépa omboʼe la Biblia” ojeporúta opakuévo káda kapítulo ojehecha jeývo umi mbaʼe ojestudiavaʼekue. Upépe oĩ umi téysto omyesakãva umi porandu oĩva pe título guýpe. Ndahasymoʼãi ndéve rekomenta hag̃ua. Pe informasión hesakã porã, ndahasýi ha iñinteresánte.
3 Pe ‘Informasión oĩvéva’ oñeʼẽve heta mbaʼégui. Upéva ikatu jaiporu ñane estudiánte oikuaaseve jave peteĩ témagui. Heta mbaʼe upépe osẽva oñehesaʼỹijóta pe Estúdio de lívro de kongregasiónpe. Ojeleepaitevaʼerã umi párrafo, ha umi téma ipukuvéva ikatu oñembojaʼo oñehesaʼỹijo porã hag̃ua. Noñemoĩri porandukuéra ojestudia hag̃ua pe ‘Informasión oĩvéva’. Pe estúdio omoakãva ikatu oporandu oñekotevẽháicha, ojehecha hag̃ua umi mbaʼe iñimportantevéva.
4 Ñande lívro Mbaʼépa omboʼe la Biblia ojestudia pyaʼéta ñande Estúdio de lívro de kongregasiónpe. Upéva ndeʼiséi jastudia pyaʼe vaʼerãha jajapo vove peteĩ estúdio vívliko, koʼýte pe óga jára saʼi oikuaáramo la Bíbliagui (Hech. 26:28, 29). Jajapo vove peteĩ estúdio ñahesaʼỹijovaʼerã umi téysto vívliko, ñamyesakãvaʼerã umi ilustrasión, ha umícha. Upévare, ñañehaʼãkena ñaime káda semána ha ñakomenta heta ojestudia jave ñande lívro Mbaʼépa añetehápe omboʼe la Biblia?