Ñaipytyvõ ñande rapichápe oiko hag̃ua chugui Ñandejára amígo
1 Tapichakuéra opaite tetã rupi oaprendehína koʼág̃a Ñandejára rapégui (Isa. 2:2, 3). Péro ‘hiʼa porã hag̃ua ohasa asy jave’ ohayhumantevaʼerã Jehovápe (Luc. 8:15, BNP; Mar. 12:30). Ndohayhúiramo Jehovápe naimbaretemoʼãi ombohovái hag̃ua umi mbaʼe vai ha ojapo hag̃ua pe iporãva. Oñemoag̃uive hag̃ua Hese ñaipytyvõvaʼerã umi ipyahúvape ñande apytépe oikuaa porã hag̃ua mbaʼeichaguápa Jehová ha upéicha omombaʼeve Chupe. Upévare, emokyreʼỹkena chupekuéra ostudia hag̃ua pe lívro Acerquémonos a Jehová ha ojepyʼamongeta hag̃ua umi mbaʼe oaprendévare.
2 Ñane ehémplo rupive. Umi mbaʼe jajapóva ikatu opoko ñane estudiánte korasõre. Ohecháramo Jehová ñane amigoha, ha mbaʼéichapa upéva iñimportánte ñande rekovépe, haʼe ikatu ojapose upéicha avei (Luc. 6:40). Umi mbaʼe jajapóva ikatu oipytyvõve ñande rapichápe umi mbaʼe jaʼévagui.
3 Tuvakuéra omboʼe porãta ifamíliape iñehémplo rupive (Deu. 6:4-9). Peteĩ ména ha hembireko omboʼe porãségui ifamíliape oservi hag̃ua Ñandejárape, oporandu umi tuvakuéra osẽ porã vaʼekuépe. “Enterove heʼi chéve iñimportanteha tuvakuéra ehémplo”, heʼi pe kuimbaʼe. Upévare, túva ha sy omoĩvaʼerã ehémplo opa mbaʼépe ifamíliape. Upéicha ohecháta hikuái mbaʼeichavaʼerãpa peteĩ “Ñandejára angirũ” (Sant. 2:23, JMP).
4 Ñañemboʼe ñande pyʼaite guive. Oiko hag̃ua ñande rapichágui Ñandejára amígo, jahechaukavaʼerã chupe mbaʼéichapa ikatu oñemboʼe ipyʼaite guive. Ikatu jaiporu pe ñemboʼe Jesucristo ohejavaʼekue, ha umi ótro oĩva Ñandejára Ñeʼẽme, ohecha hag̃ua mbaʼéichapa oñemboʼe hikuái ipyʼaite guive (Mat. 6:9, 10). Ñañemboʼe jave, ñane família ha ñane estudiantekuéra ikatu oaprende ñandehegui. Ohendúvo mbaʼéichapa ñañeʼẽ ñande pyʼaite guive, ohecháta hikuái mbaʼépa ñañandu Jehováre. Ñaipytyvõ chupekuéra ‘oñemboʼe hag̃ua opa árape’ ohasa asy jave (Rom. 12:12, JMP). Ohechávo mbaʼéichapa Jehová oipytyvõ chupekuéra oikotevẽ jave, ojeroviavéta hese ha ohayhuvéta Jehovápe iñamígo teéicha (Sal. 34:9 [34:8, NM] ; Fili. 4:6, 7).