Ñamombaʼeguasu Ñandejára añetegua ha peteĩetévape
1 Ajépa iporãitevaʼerã opavave yvyporakuéra oiko porãmbáramo oñondive peteĩ famíliaicha. Jahechaháicha koʼág̃a oĩ heta ndaijaʼéiva ojuehe ndahaʼeihaguére ojopire kolór térã iñeʼẽ ha irrelihión idiferentehaguére. Oĩ avei umi ndohayhúiva iplátavape térã imboriahúvape. Upéicharamo jepe, la Biblia heʼi opaichagua tapicha omombaʼeguasutaha Ñandejárape oñondivepa (Miq. 4:1, 2). Jaservi rupi Jehovápe ñamombaʼeguasu chupe oñondivepa peteĩ ñeʼẽme. Mbaʼéicha rupípa upéva? Mbaʼépa ikatu jajapo ñamombaʼeguasu hag̃ua Ñandejárape oñondivepa peteĩ ñeʼẽme? Jahecha hag̃ua koʼã mbaʼe opavave ñaiméva kongregasión térã grúpo guaraníme jastudiáta pe lívro Ñamombaʼeguasu Ñandejára añetegua ha peteĩetévape. Upéva oñepyrũta semána 8 de enero 2007 guive.
2 Ikatu oime restudiámaraʼe kastellánope ko lívro Ñamombaʼeguasu Ñandejárape. Upéicharõ jepe, iñimportanteterei rupi ko lívro pe Cuerpo Gobernante heʼi koʼág̃a ostudiavaʼerãha opavave kongregasión ha grúpo oĩva umi sirkuíto guaraníme. Ko lívro katuete ñanepytyvõta jaguerohoryve hag̃ua Jehová ha iñorganisasiónpe.
3 Mbaʼépa jajapovaʼerã ñaguenohẽ hag̃ua heta mbaʼe porã ko lívro guaraníme oĩvagui? Ñañehaʼãvaʼerã ñaime káda semána ñande estúdio de lívrope. Tekotevẽ avei jajeprepara porã. Ko lívro rupive Ñandejára omeʼẽ ñandéve ‘tembiʼu hypyʼũvéva’ (Heb. 5:14). Iñimportánte avei jaleepaite umi téysto vívliko, ha ñañehaʼã ñantende mbaʼérepa oñemoĩ. Jajepyʼamongetavaʼerã avei upe jastudiávare. Jajapóramo upéicha pe ñaaprendéva og̃uahẽta ñane korasõme ha jahayhuvéta Jehová ha iñorganisasiónpe. (Neh. 8:8).
4 Jastudia vove pe lívro ñañeporanduvaʼerã: “Mbaʼépa chemboʼe kóva Jehová ha hembipotágui? Mbaʼéichapa ikatu aipytyvõ oikopa hag̃ua Jehová heʼivaʼekue? Mbaʼéichapa ikatu aipytyvõ che rapichakuérape ohayhuve hag̃ua Jehovápe?” Umícha ñañeporandúramo heta mbaʼe porã ñaguenohẽta pe jastudiávagui. Ha mbaʼépa ikatu jajapove? Jajerurevaʼerã Jehovápe tañanepytyvõ, ikatu hag̃uáicha pe jastudiáva ñanemombarete, jajepytaso hag̃ua ijykére ‘koʼã ára pahápe’ (2 Tim. 3: 1-5).
5 Jaagradese Jehová ha iñorganisasiónpe omeʼẽhaguére ñandéve ko lívro guaraníme. Ko lívro katuete ñanepytyvõta jaservi porãve hag̃ua Jehovápe, og̃uahẽ meve upe ára opavave yvypóra omombaʼeguasutahápe Chupe oñondivepa peteĩ ñeʼẽme.