‘Ovyʼaitevaʼerã niko pe ogueropuʼakáva ijejopy vai’
1 Ñande kristianokuéra jahasa heta mbaʼe ijetuʼúva. Umíva apytépe ikatu ñanderasykatu, ñandesogue, jajapose ivaíva, ha oĩ avei umi oñemoĩva ñanderehe (2 Tim. 3:12). Koʼã mbaʼe rupive, Satanás ñanemokangyse anive hag̃ua ñasẽ japredika térã jaheja hag̃ua Ñandejára rape (Job 1:9-11). Ha upéicharõ jepe, mbaʼérepa jaʼe jagueropuʼakáramo umi jejopy vai javyʼaha? (2 Ped. 2:9.)
2 Ñañembosakoʼíkena jagueropuʼaka hag̃ua umi jejopy vai. Iñeʼẽ rupive Jehová oikuaauka ñandéve hape. Upépe jajuhu umi mbaʼe Jesús omboʼe ha ohasavaʼekue oikórõ guare ko Yvy ape ári. Ñamombaʼe ha jajapóramo Jesús heʼivaʼekue, ñañemopyenda porãta ñambohovái hag̃uáicha umi jejopy vai (Luc. 6:47-49). Oĩve avei umi mbaʼe ñanepytyvõtava ñamombarete hag̃ua ñande jerovia. Umíva apytépe oĩ ñane ermanokuéra, umi rreunión ha umi puvlikasión oguenohẽva tembiguái jeroviaha ha iñarandúva. Ha oimeha órante avei ikatu ñañemboʼe Ñandejárape (Mat. 6:13).
3 Jehová oikuaauka avei ñandéve umi mbaʼe porã ñaneraʼarõva. Jajerovia mbaretéramo ojapotaha heʼivaʼekue, umi mbaʼe ñahaʼarõva haʼetéta “peteĩ ánklaicha ñane ángape g̃uarã, avave omomyiʼỹvaʼerã” (Heb. 6:19, BNP). Yma, tiémpo porãramo jepe umi várko nosẽivaʼekue anklaʼỹ rehe. Oúramo peteĩ yvytu atã katu, ojeity ýpe pe ánkla ani hag̃ua pe várko ojetopeta umi ita rehe. Upéicha avei, jajeroviáramo Ñandejára heʼívare, ñanepytyvõta ñambohovái hag̃ua umi provlemaita oĩva ko múndope, ha ikatúva ñanderupyty ñaimoʼãʼỹve jave. Upéicha oikovaʼekue Lístrape. Apóstol Pablo ha Bernabé oñepyrũrõ guare opredika upe távape, oñehendu porãnte chupekuéra. Péro, upe riremínte ivaíma hendivekuéra, oúrõ guare umi hudío oñemoĩva hesekuéra (Hech. 14:8-19).
4 Javyʼa jagueropuʼakáramo umi jejopy vai. Ñandepyʼaguapy jasegi rupi japredika, oĩramo jepe oñemoĩva ñanderehe. Javyʼa ikatu haguére jahasa asy Jesucristo rehehápe (Hech. 5:40, 41). Jagueropuʼakáramo umi jejopy vai ñaneumildevéta, ñaneñeʼẽrenduve ha ñambohovaikuaáta hetave mbaʼe (Deu. 8:16; Heb. 5:8; Sant. 1:2, 3). Jahechakuaa avei jajeroviavaʼerãha Jehováre ha ojapotaha katuete umi mbaʼe heʼivaʼekue, ha ñañemoĩ ipoguýpe (Pro. 18:10).
5 Jaikuaáningo ndajajejopyvaimoʼãiha opa ára g̃uarã (2 Cor. 4:17, 18). Upéicharõ jepe jahasa aja koʼã mbaʼe rupi, ikatu jahechauka mbaʼeichaitépa jahayhu Jehovápe. Ha jagueropuʼakáramo jahechaukañaína japuha umi mbaʼe vai Satanás heʼivaʼekue. Upévare, aníkena ñanekangy. ‘Ovyʼaitevaʼerã niko pe ogueropuʼakáva ijejopy vai. Ohasa vove, oñemeʼẽta chupe pe jeikove opa ára g̃uarãva.’ (Sant. 1:12.)