Jajapovaʼerã opa mbaʼe Jesús ojapohaguéicha

1. Mbaʼépa ojehechakuaavaʼekue Jesús rehe?

¹ Japredika jave, ñanemanduʼavaʼerã ojehechahahína umi mbaʼe jajapóva. Jesús oporomboʼevaʼekue heʼíva ha ojapóva rupive. Ojehechakuaa hese oporohayhuha, ojaposeha Itúva rembipota ha omombaʼeguasuha chupe (1 Ped. 2:21).

2. Mbaʼéichapa ikatu ñamboʼe ñande rapichakuérape jajapóva rupive?

² Japredika jave ñande rapicha ndive. Jesús ojapohaguéicha, ñande avei ñamboʼéta ñane ermanokuérape umi mbaʼe jajapóva rupive. Ñanekyreʼỹramo predikasiónpe, umi ipyahúva ohecháta mbaʼéichapa ikatu opredika porãve. Jajepyʼapýramo ñande rapichakuérare ha javyʼáramo predikasiónpe ohechakuaáta hikuái upéicha vaʼerãha avei. Haʼekuéra ojaposéta avei ñandéicha ohecháramo ñañehaʼãha jaiporu meme la Biblia, javisita jey ha ñamboʼe ñande rapichápe.

3. Mbaʼéichapa ikatu ñamboʼe ñane estudiántepe, ha mbaʼépa ojapóta upévare?

³ Ñamboʼévo ñande rapichápe. Umi estudiánte ohechapaitehína umi mbaʼe jajapóva. Ikatu jaʼe chupekuéra tojeprepara estudiorã, oleéma hag̃ua umi téysto ha omarkáma hag̃ua umi rrespuésta. Haʼekuéra ohecháta avei katuete ñandépa jajapóraʼe upéicha (Rom. 2:21). Ha jaháramo jaʼehague oraitépe, nomboykesemoʼãi hikuái ijestúdio oimeraẽ mbaʼére. Ha katuete ohechakuaáta hikuái mbaʼeichaitépa jajeroviañaína Ñandejárare ha ñañehaʼãmbaiteha predikasiónpe. Upévare, ñamboʼéramo ñane estudiántepe Jesús oporomboʼehaguéicha, katuete ombaʼapo kyreʼỹta avei predikasiónpe.

4. Mbaʼéichapa ñaporomboʼeñaína jajapóva rupive rreunionhápe?

⁴ Rreunionhápe. Enterove ñaporomboʼe jajapóva rupive rreunionhápe. Umi ohoramóva rreunionhápe oguerohory ohechávo mbaʼéichapa ermanokuéra ojoayhu, ojogueraha porã ha oñemonde hekópe porã (Sal. 133:1). Ohechakuaáta avei hikuái jaha memépa rreunionhápe ha ñakomentápa. Peteĩ ohoramóva rreunionhápe omombaʼeterei ohechávo mbaʼéichapa peteĩ mitãkuñaʼi otopa pyaʼete umi téysto ha oñatende avei ojelee jave. Upéva ohecha rire ojerure oñemboʼe hag̃ua chupe la Biblia.

5. Mbaʼérepa ñañatendevaʼerã jajapóvare ñande rapichakuéra renondépe?

⁵ Ñandejára Ñeʼẽ ñanemokyreʼỹ jajapo hag̃ua umi mbaʼe porã jahecháva ojapo ñande rapichakuéra (Fili. 3:17; Heb. 13:7). Upévare ñanemanduʼavaʼerã ñañehaʼãramo jajapo Jesús ojapohagueichaite, ikatuha ñaipytyvõ umi ñanderechávape. Upéicharõ jajapovaʼerã 1 Timoteo 4:16-pe heʼíva ñandéve: ‘Peñangareko pendejehe voi, ha umi mbaʼe pemboʼévare’.