“Ñañehaʼãkena jajapo Jesús ojapohaguéicha”
1. Mbaʼépa jajapovaʼerã ñandekatupyryve hag̃ua jaservívo Ñandejárape?
1 Jesús ningo ndoikeivaʼekue umi eskuéla oñemboʼehápe Escrituras Hebreas. Upéicharõ jepe ndaipóri haʼéicha ikatupyrýva omboʼe hag̃ua Ñandejára Ñeʼẽ. Ajépa javyʼaite oĩhaguére la Bíbliape mbaʼéichapa haʼe oporomboʼevaʼekue. Ñandekatupyryséramo Jesús ikatupyryhaguéicha oservívo Ñandejárape, ñañehaʼãvaʼerã jaguata ipyporépe (1 Ped. 2:21).
2. Mbaʼépa ñanepytyvõta jahayhu hag̃ua ñande rapichakuérape Jesucristo ohayhuhaguéicha chupekuéra?
2 Oporohayhu. Jesús ohayhu añetevaʼekue opavavépe (Mar. 6:30-34). Japredika jave jajuhu jepi umi ‘ohasa asývape’ ha oikotevẽtereíva oikuaa Ñandejárape (Rom. 8:22). Jajepyʼamongetárõ mbaʼéichapa ohasa asy hikuái ha Jehová ojepyʼapyha hesekuéra, ñanemomýita japredika meme hag̃ua (2 Ped. 3:9). Avei, ñande rapichakuéra ñanerendu porãvéta ohechakuaáramo jajepyʼapy añeteha hesekuéra.
3. Mbaʼéicha javépa Jesús opredikavaʼekue?
3 Ohohápe oñeʼẽ Ñandejárare. Jesús ningo ohohápe omombeʼuvaʼekue umi marandu porã (Mat. 4:23; 9:9; Juan 4:7-10). Ñande avei jajeprepara porã vaʼerã ikatu hag̃uáicha ñañeʼẽ Ñandejárare jaikoha rupi. Oĩ ermáno ohohápe voi ogueraháva la Biblia ha puvlikasionkuéra. Ha péicha ikatu opredika hikuái itravahohápe, eskuéla térã koléhiope, oviaha aja, térã oho jave ombaʼejogua ha mbaʼe.
4. Mbaʼe rehépa ñañeʼẽseve ñasẽ jave japredika?
4 Jesús oñeʼẽ meme Ñandejára Rréinore. Jesús oñeʼẽvevaʼekue Ñandejára Rréinore (Luc. 4:43). Sapyʼánte ñañemongeta ñepyrũvo nañañeʼẽi Ñandejára Rréinore, péro jaikuaa porã ñande rapicha ohechavaʼerãha oikotevẽha upe goviérnore. Jaʼéramo jepe heta mbaʼe vai oikoha jaiko rupi ára pahápe, ñamombeʼuseve umi ‘ñeʼẽ oporombopyʼaguapýva’ ha ‘ñamoherakuãse umi mbaʼe iporãva’ (Rom. 10:15).
5. Mbaʼéichapa jaiporuvaʼerã la Biblia oho porã hag̃ua ñandéve japredika jave?
5 Oiporu Ñandejára Ñeʼẽ heʼíva. Jesús opredikárõ guare oñeʼẽ meme Ñandejára Ñeʼẽ heʼívare. Haʼe nomboʼeivaʼekue ijehegui reínte (Juan 7:16, 18). Heta mbaʼe oikuaa Ñandejára Ñeʼẽgui ha ojapo upépe heʼíva Satanás oñemoĩrõ guare hese (Mat. 4:1-4). Oho porã hag̃ua ñandéve japredika jave, jaleevaʼerã la Biblia ára ha ára ha jajapovaʼerã upépe heʼíva (Rom. 2:21). Ñamyesakã jave oñeporandúva ñandéve predikasiónpe, ñamombeʼuvaʼerã moõpa heʼi upéva la Bíbliape. Ha ikatúramo katu jaleevaʼerã voi chupekuéra upéva. Umi ñanerendúva ohechakuaavaʼerã pe jaʼevañaína chupekuéra ndahaʼeiha ñandehegui osẽva. Ohechakuaavaʼerã hikuái jaʼeha chupekuéra Ñandejára heʼíva.
6. Mbaʼéichapa Jesús opokovaʼekue umi ohendúvape chupe korasõ rehe?
6 Jesús heʼíva opoko umi ohendúva chupe korasõ rehe. Umi saserdóte ha fariséo oporandúrõ guare umi ofisiálpe mbaʼérepa ndojagarrái hikuái Jesúspe, umi ofisiál heʼi: “Ndaipóri niko avave oñeʼẽva ko kuimbaʼe oñeʼẽháicha” (Juan 7:46). Jesús ningo omombeʼúnte rangue heta mbaʼe, omboʼe opoko hag̃uáicha umi ohendúva chupe korasõ rehe (Luc. 24:32). Oñentende hag̃ua haʼe heʼíva, ombojoja heta mbaʼe ojekuaa porãvare (Mat. 13:34). Upéicha avei, nomombeʼúi chupekuéra hetaiterei mbaʼe ojehesareapa hag̃uáicha hikuái (Juan 16:12). Ha oñeʼẽvo avei, noñeʼẽi ijehe, oñeʼẽ guei Jehová rehe. Ñande avei ñamboʼéta Jesús omboʼehaguéicha ñañatendéramo mbaʼéichapa ikatu ñamboʼe porãve (1 Tim. 4:16).
7. Mbaʼérepa Jesús ndaipytaryryirivaʼekue osegi hag̃ua opredika?
7 Opredika meme oĩramo jepe nohenduséiva chupe ha oñemoĩva hese. Heta milágro ningo Jesús ojapovaʼekue, upéicharõ jepe oĩ heta nopenaivaʼekue hese (Luc. 10:13). Hogayguakuéra apytépe katu oĩvaʼekue heʼíva ‘hese itavyha’ (Mar. 3:21). Upéicharõ jepe Jesús ndaipytaryrýiri. Ovyʼa guei oikuaa porã rupi umi mbaʼe omboʼevahína ikatuha osalva umi ohendúvape chupe (Juan 8:32). Jehová ñanepytyvõ rupi, ñande avei nañandepytaryryimoʼãi (2 Cor. 4:1).
8, 9. Japredika hag̃ua Jesús ojapohaguéicha, mbaʼe mbaʼépa ñamboykevaʼerã?
8 Heta mbaʼe omboyke opredika meme hag̃ua. Jesús omboykevaʼekue heta mbaʼe opredika meme hag̃ua (Mat. 8:20). Haʼe ndopytuʼúi voi, tárde peve opredikantehikóni (Mar. 6:35, 36). Haʼe oikuaa porã saʼimaha hemby chupe opredika hag̃ua. Koʼág̃a avei “saʼíma hemby ñandéve” japredika hag̃ua ha upévare jajaposéramo Jesús ojapohaguéicha, ñamboykevaʼerã avei heta mbaʼe (1 Cor. 7:29-31).
9 Umi kristiáno síglo primérope guare ikatupyryvaʼekue oaprende rupi Jesúsgui (Hech. 4:13). Ñande avei jajapo porãta ko tembiapo jajapóramo pe Mboʼehára Ikatupyryvéva ojapohaguéicha (2 Tim. 4:5).